Tan Go Doro Nanga a Kotiwroko!
Tan Go Doro Nanga a Kotiwroko!
„Den wan di e sai nanga watra-ai, den sa koti srefi nanga bigi prisiri.”—PSALM 126:5.
1. Fu san ede wi musu „begi a Masra fu a kotiwroko fu seni wrokoman go” na ini a ten disi?
BAKA a di fu dri leisi di Yesus Krestes ben waka preiki na Galilea, a ben taigi den disipel fu en: „Iya, a kotiwroko bigi, ma furu wrokoman no de” (Mateus 9:37). Na so a situwâsi ben de tu na Yudea (Lukas 10:2). Sensi dati ben de tru so wan 2000 yari pasa, dan fa a de na ini a ten disi? We, na ini a dienstyari di pasa, moro leki 6.000.000 Kotoigi fu Yehovah ben tan go doro fu du wan kotiwroko na mindri den 6.000.000.000 sma na grontapu, èn furu fu den sma disi e ’kisi kwinsi èn den panya leki skapu sondro skapuman’. So bun, a frumane di Yesus ben gi fu „begi a Masra fu a kotiwroko fu seni wrokoman go na ini a kotiwroko fu en”, abi krakti teleki now ete neleki fa a ben abi krakti hondrohondro yari pasa.—Mateus 9:36, 38.
2. San e meki taki sma e poti prakseri na wi?
2 Yehovah Gado, a Masra fu a kotiwroko, piki a tranga begi fu seni moro wrokoman go. Èn a de trutru wan prisiri sani fu du a kotiwroko disi tu di Gado e tiri! Ala di wi no de nanga furu sma efu yu teki wi gersi nanga den nâsi, toku a fayafaya preiki di wi e preiki a Kownukondre èn a meki di wi e meki disipel, e hari a prakseri fu grontapu. Na ini furu kondre den e kari wi nen furutron tapu radio, telefisi, koranti, èn so moro fara. Na ini wan telefisi programa te wan sma naki na tapu wan doro, dan dati kan meki den trawan piki taki a musu fu de Yehovah Kotoigi di de na a doro. Iya, wi Kresten wroko di gersi wan kotiwroko, na wan wroko di furu sma sabi heri bun na ini a di fu 21 yarihondro.
3. (a) Fa wi du sabi taki sma ben si fa a Kownukondre ben preiki na ini a fosi yarihondro? (b) Fu san ede wi kan taki dati engel e horibaka gi wi na ini wi diniwroko?
3 Grontapu ben si a Kownukondre preikiwroko tu di ben du na ini a fosi yarihondro, èn den ben frufolgu den sma di ben meki a bun nyunsu bekènti. Dati meki na apostel Paulus ben skrifi: „Gi mi a gersi taki Gado poti wi, den apostel, leki lasti sma di musu dede, bika wi [den apostel] de leki wan prei na ini wan theater gi grontapu èn gi engel èn gi libisma” (1 Korentesma 4:9). Na so a de tu te wi e horidoro leki sma di e meki a Kownukondre bekènti ala di frufolgu e miti wi, dan dati e meki taki grontapu e poti prakseri na wi èn a de prenspari gi den engel. Openbaring 14:6 e taki: „Mi [na apostel Yohanes] ben si wan tra engel e frei na mindrisei fu hemel, èn a ben abi têgo bun nyunsu fu meki bekènti leki prisiri nyunsu gi den sma di e libi na grontapu, èn gi ibri nâsi nanga lo nanga tongo nanga pipel.” Iya, a de so taki engel e horibaka gi wi na ini wi diniwroko — a kotiwroko fu wi!—Hebrewsma 1:13, 14.
„Sani Di Sma No Wani Si na Ai”
4, 5. (a) Sortu warskow Yesus ben gi den disipel fu en? (b) Fu san ede den futuboi fu Gado na ini a ten disi, na „sani di sma no wani si na ai”?
4 Di Yesus ben seni den apostel fu en go leki wrokoman na ini a kotiwroko, dan den ben gi yesi na a rai fu en, namku fu de „koni leki sneki èn toku sondro fowtu leki doifi”. Yesus ben taki moro fara: „Luku bun nanga den sma; bika den o gi unu abra na den krutubangi drape, èn den sa krawasi unu na ini den snoga fu den. Srefi fu mi ede den sa srepi unu go na fesi tiriman nanga kownu, fu unu de leki wan kotoigi gi den èn gi den nâsi. . . . Èn unu sa de sani di sma no wani si na ai fu mi nen ede; ma a sma di e horidoro te na a kaba, en sa kisi frulusu.”—Mateus 10:16-22.
5 Na ini a ten disi wi na „sani di sma no wani si na ai”, bika „a heri grontapu e didon na ini a makti fu a godelowsuwan”, Satan Didibri, èn en na a moro prenspari feanti fu Gado nanga En pipel (1 Yohanes 5:19). Den feanti fu wi e si taki a e go bun nanga wi na yeye fasi, ma den e weigri fu taki dati na Yehovah e meki taki sani e waka bun nanga wi. Gensman e si na wi fesi taki wi de koloku èn fa wi e lafu te wi e prisiri fu du a kotiwroko. Den e fruwondru te den e si a wánfasi fu wi! Fu taki en leti, kande den no wani, ma toku den musu erken sontron taki te den e go na wan tra kondre, dan den e si taki Yehovah Kotoigi e du a srefi wroko drape neleki fa den ben si den Kotoigi e du dati na ini den eigi kondre. A no de fu taki dati na a reti ten srefi den feanti fu wi sa kon sabi Yehovah, a sma di e yepi wi èn di gi wi a wánfasi.—Esekièl 38:10-12, 23.
6. Sortu dyaranti wi abi te wi e du a kotiwroko, ma sortu aksi e opo kon?
6 A Masra fu a kotiwroko gi en Manpikin, Yesus Krestes, „ala makti na ini hemel èn na grontapu” (Mateus 28:18). Na so fasi Yehovah e gebroiki Yesus fu tiri a kotiwroko nanga yepi fu den engel na hemel èn nanga yepi fu a salfu „getrow èn koni srafu” dya na grontapu (Mateus 24:45-47; Openbaring 14:6, 7). Ma san wi kan du te feanti e gens wi èn fa toku wi kan tan abi prisiri ala di wi e tan go doro na ini a kotiwroko?
7. San na a fasi fa wi wani de nomonomo te wi e kisi fu du nanga gens noso frufolgu?
7 Te sma e gens wi noso srefi e frufolgu wi langalanga, dan meki wi suku yepi na Gado so taki wi kan abi a srefi fasi di Paulus ben abi. A ben skrifi: „Te sma e skempi nanga wi, wi e blesi [den]; te den e frufolgu wi, wi e tan tanapu steifi; te den e lei ogri-ati lei, wi e begi” (1 Korentesma 4:12, 13). A fasi disi, makandra nanga wi publiki diniwroko di wi e du nanga takt, sontron e kenki a fasi fa den gensman fu wi de.
8. Sortu dyaranti yu e kisi fu den wortu fu Yesus soleki fa dati skrifi na Mateus 10:28?
8 Srefi a kefar fu dede no e frede wi fu kiri a faya di wi abi leki wrokoman na ini a kotiwroko. Sondro fu frede wi e meki a Kownukondre boskopu bekènti so taki ala sma kan si dati. Èn wi e kisi deki-ati fu a dyaranti di Yesus e gi nanga den wortu: „No frede den wan di e kiri a skin, ma di no kan kiri a sili; ma na presi fu dati, frede a sma di kan kiri a sili nanga a skin na ini Gehèna” (Mateus 10:28). Wi sabi taki wi hemel Tata na a Sma di e gi libi. A e pai den wan di e tan hori den soifri retifasi èn di na wan getrow fasi e tan go doro na ini a kotiwroko.
Wan Boskopu Di E Kibri Sma Libi
9. San wan tu sma ben du di den ben yere den wortu fu Esekièl, èn fa wan srefi sortu sani e pasa na ini a ten disi?
9 Di a profeiti Esekièl ben meki Yehovah en boskopu bekènti sondro fu frede gi den „opruru nâsi” — namku den kownukondre fu Israèl nanga Yuda — dan wan tu sma ben lobi yere san Esekièl ben abi fu taki (Esekièl 2:3). „Luku!” Yehovah ben taki, „gi den yu de leki wan singi nanga moi lobi wortu, leki wan sma nanga wan moi sten èn di e pingi wan instrument bun” (Esekièl 33:32). Ala di den ben lobi den wortu fu Esekièl, toku den no ben du san den wortu dati ben aksi den fu du. San e pasa na ini a ten disi? Te a salfu fikapisi nanga den mati fu den e meki Yehovah boskopu bekènti nanga deki-ati, dan wan tu sma lobi yere den Kownukondre blesi. Ma den no e sori warderi gi dati, den no e tron disipel èn den no e span anu makandra nanga wi na ini a kotiwroko.
10, 11. San ben du na ini a fosi pisi fu a di fu 20 yarihondro, fu meki sma kon sabi wi boskopu di e kibri sma libi, èn san ben de a bakapisi fu dati?
10 Na a tra sei, furu sma piki bun tapu a kotiwroko èn ben meki Gado en boskopu bekènti tu. Fu eksempre, na tapu wan tu kongres na ini den yari 1922 te go miti 1928, krutu boskopu teige na ogri seti fu Satan ben de fu yere krinkrin. Den krutu boskopu disi di ben meki bekènti na den kongres dati, ben de fu yere tapu wan tu radio tu. Baka dati, Gado en pipel ben prati milyunmilyun eksemplaar fu den krutu boskopu disi.
11 Na ini den yari fosi 1940, wan tra fasi fu gi kotoigi ben opo — namku fu waka èn fruteri sma. Na ini a bigin, Yehovah en pipel ben waka nanga karta pe ben skrifi taki publikitaki ben o hori. Baka ten, den ben waka nanga karta pe sani skrifi soleki „Kerki na wan trapu èn wan kruka bisnis” èn „Dini Gado èn Krestes a Kownu”. Te den ben waka na tapu strati, dan den ben hari a prakseri fu furu sma di ben waka pasa. ’A sani disi ben yepi furu fu meki sma kon sabi Yehovah Kotoigi èn fu gi den Kotoigi deki-ati,’ na so wan brada ben taki di doronomo ben abi wan prati na a wroko disi na tapu den strati di ben lai nanga sma na ini Londen, Ingrisikondre.
12. Boiti taki wi e meki sma kon sabi Gado en krutu boskopu, san moro wi ben meki den kon sabi na ini wi diniwroko? Suma bondru densrefi tu fu preiki a bun nyunsu?
12 Te wi e meki den krutu boskopu fu Gado bekènti, dan wi e poti prakseri so srefi na den blesi di a Kownukondre boskopu e pramisi sma. A gi di wi e gi kotoigi na grontapu sondro fu frede, e yepi wi fu suku den wan di warti gi dati (Mateus 10:11). Na ini a pisi ten fu den yari baka 1920 èn baka 1930, furu fu den lastiwan fu a salfu grupu ben piki bun tapu a krin boskopu di den ben kisi na ini a kotiwroko. Baka dati, tapu wan kongres na ini 1935, wan kefalek moi nyunsu ben de fu yere taki „wan bigi ipi” fu „tra skapu”sa kisi a blesi fu wan moi tamara na ini wan paradijs grontapu (Openbaring 7:9; Yohanes 10:16). Den ben gi yesi na Gado en krutu boskopu èn den ben kon bondru densrefi nanga den salfuwan fu preiki a bun nyunsu di e kibri sma libi.
13, 14. (a) Sortu trowstu wi kan kisi fu Psalm 126:5, 6? (b) Efu wi e go doro fu sai èn fu gi watra, dan san sa pasa?
13 Wan bigi trowstu gi den wrokoman na ini a kotiwroko fu Gado, èn spesrutu gi den wan di e kisi frufolgu, na den wortu fu Psalm 126:5, 6: „Den wan di e sai nanga watra-ai, den sa koti srefi nanga bigi prisiri. A sma di trutru e go doro, srefi ala di a e krei, ala di a e tyari wan saka di lai nanga siri, seiker sa drai kon baka nanga wan prisiri babari, èn a sa tyari den bosu fu en.” A taki di a psalm skrifiman e taki fu sai èn fu koti, e sori fa Yehovah ben sorgu èn ben blesi a fikapisi di ben drai kon baka fu katibo na Babilon fu owruten. Den ben breiti srefisrefi taki den ben kon fri, ma a kan taki den ben krei di den ben sai siri na gron di no wan sma ben wroko na ini den 70 yari di den ben de na ini katibo. Ma den wan di ben go doro fu sai èn fu bow, ben nyan bun fu den bakapisi fu a wroko fu den.
14 Kande wi ai e lon watra te wi de na ondro tesi noso te wan tra bribiman fu wi e pina fu regtfardikifasi ede (1 Petrus 3:14). Na ini wi kotiwroko, a kan taki a ten tranga na ini a bigin fu di a gersi leki wi no abi no wan bun bakapisi fu sori taki wi e du muiti ini a diniwroko. Ma efu wi e go doro fu sai èn fu gi watra, dan Gado sa meki sani gro, èn furutron a e pasa srefi san wi ben fruwakti (1 Korentesma 3:6). Disi de krin fu si te wi e luku den bakapisi fu a prati di wi prati Bijbel nanga tra Bijbel buku.
15. Gi wan eksempre di e sori o bun den Kresten publikâsi kan wroko na ini a kotiwroko.
15 Luku na eksempre fu wan man di nen Jim. Di en mama dede, dan na mindri den sani di en mama ben abi, Jim ben feni wan eksemplaar fu a buku Leven — Hoe is het ontstaan? Door evolutie of door schepping? * Di a ben leisi a buku, dan a buku ben hari en prakseri. Di a ben taki nanga wan Kotoigi di ben waka miti en na tapu strati, dan Jim ben feni en bun taki a Kotoigi ben o kon baka, èn disi ben meki taki wan bijbelstudie ben bigin. Jim ben go na fesi esi-esi na yeye fasi, a ben gi ensrefi abra na Yehovah, èn a ben teki dopu. A ben fruteri tra sma fu en famiri den sani di a ben leri. Dati meki, en sisa nanga en brada ben tron Yehovah Kotoigi, èn baka ten Jim ben abi a grani fu dini leki wan furuten friwani wrokoman na Bethel na Londen.
Den E Kisi Frufolgu, ma Toku Den E Prisiri
16. (a) Fu san ede sani waka bun na ini a kotiwroko? (b) San a bun nyunsu ben sa du soleki fa Yesus ben warskow, ma nanga sortu denki wi e go na den sma?
16 Fu san ede sani waka so bun na ini a kotiwroko? Na fu di den salfu Kresten nanga den mati fu den ben gi yesi na a rai fu Yesus: „San mi e taigi unu na ini dungru, taki fu dati na ini leti, èn a syusyu di unu e yere, preiki dati komoto fu den daki” (Mateus 10:27). Ma toku wi kan fruwakti problema, bika Yesus ben warskow: „Moro fara, brada sa gi brada abra fu go dede, èn wan papa si gi en pikin, èn pikin sa opo feti nanga papa nanga mama èn den sa kiri den.” Yesus ben taki moro fara: „No denki taki mi kon fu tyari vrede kon tapu grontapu; mi no kon fu tyari vrede kon, ma wan feti-owru” (Mateus 10:21, 34). Yesus no ben wani prati osofamiri fu espresi. Ma dati na san a bun nyunsu ben du sontron. A srefi sani de tru fu den futuboi fu Gado na ini a ten disi. Te wi e fisiti den osofamiri, wi no abi na prakseri fu prati na osofamiri. Wi wani trutru taki ala sma musu teki a bun nyunsu. Fu dati ede, wi e pruberi fu go na ala den sma fu wan osofamiri na wan switifasi di e meki taki a boskopu e hari den wan „di abi a yoisti denki fu a têgo libi”.—Tori fu den Apostel 13:48.
17. Fa den wan di e horibaka gi a tiri fu Gado de tra fasi? San na wan eksempre fu dati?
17 A Kownukondre boskopu ben poti den sma aparti di e horibaka gi a reti di Gado abi fu tiri. Fu eksempre, prakseri fa wi tra bribiman ben de heri tra fasi leki tra sma, fu di den ben ’pai ceasar baka den sani di de fu ceasar ma [den ben pai] Gado den sani di de fu Gado’, na ini den dei fu a Nationaal Socialisme na ini Doisrikondre (Lukas 20:25). Heri tra fasi leki den kerki fesiman nanga den sma di e taki dati den na Kresten fu den kerki fu Krestenhèit, dan den futuboi fu Yehovah ben tanapu kánkan èn den ben no ben wani broko den Bijbel gronprakseri (Yesaya 2:4; Mateus 4:10; Yohanes 17:16). Professor Christine King, skrifiman fu a buku The Nazi State and the New Religions, ben taki: „Soso nanga den Kotoigi a Nazi tiri no ben man du san den wani, bika ala di den Nazi ben kiri dusundusun Kotoigi, toku a wroko fu den Kotoigi ben go doro, èn na ini mei 1945 den Yehovah Kotoigi ben de ete, ala di a Nationale Socialisme no ben de moro.
18. Na sortu fasi a pipel fu Yehovah e tyari densrefi awansi den e kisi frufolgu?
18 Wan sani di trutru wani taki furu, na a fasi fa Yehovah en pipel tyari densrefi te den e kisi fu du nanga frufolgu. Ala di a bribi fu wi kan naki na ati fu den tiriman fu lanti, toku den e fruwondru taki wi no e hori sma na ati noso si den leki feanti. Fu eksempre, den Kotoigi di pasa a Holocaust libilibi, ibritron e taki nanga prisiri èn den de tevrede te den e prakseri san den ben ondrofeni. Den sabi taki Yehovah ben gi den „a krakti di bigi pasa marki” (2 Korentesma 4:7). Den salfuwan na wi mindri abi a dyaranti taki den „nen skrifi na ini hemel” (Lukas 10:20). A hori di den e horidoro e meki taki den abi wan howpu di no e meki den e lasi-ati, èn den getrow wrokoman di e wroko na ini a kotiwroko èn di abi a howpu fu libi na grontapu, abi a srefi dyaranti.—Romesma 5:4, 5.
Horidoro na ini a Kotiwroko
19. Sortu bun fasi fu gi leri gebroiki na ini a Kresten diniwroko?
19 Wi sa musu si ete o langa Yehovah sa meki wi du a simbôlis kotiwroko. Teleki a ten dati doro, dan wi sa musu hori na prakseri taki wrokoman na ini wan kotiwroko abi spesrutu fasi fa den e du den wroko. Na so tu, wi kan de seiker taki te wi tan getrow fu gebroiki den difrenti fasi fa wi e du a preikiwroko, dan wi sa abi bun bakapisi. Paulus ben taigi tra Kresten: „Mi e begi unu . . . tron sma di e waka baka mi.” (1 Korentesma 4:16). Di Paulus ben miti den owruman fu Efeise na Miletus, dan a ben memre den taki a no ben draidrai fu leri den „na publiki èn oso fu oso” (Tori fu den Apostel 20:20, 21). A mati fu Paulus, Timoteus, ben leri a fasi fa na apostel ben wroko, èn fu dati ede a ben kan leri den Korentesma den fasi disi (1 Korentesma 4:17). Gado ben blesi a fasi fa Paulus ben gi leri, èn so a sa blesi wi te wi e horidoro fu preiki a bun nyunsu na publiki èn oso fu oso, na gobaka, na oso-bijbelstudie, èn na ala presi pe wi kan feni sma.—Tori fu den Apostel 17:17.
20. Fa Yesus ben sori taki koti ben o koti bogobogo na ini a kotiwroko na yeye fasi? Fa disi ben kon tru na ini den yari di pasa?
20 Baka di Yesus ben gi kotoigi na wan Samaria uma krosibei fu Sikar na ini 30 G.T., dan a ben taki fu a kotiwroko na yeye fasi. A ben taigi den disipel fu en: „Opo un ai èn luku den gron, taki den weti kaba fu go koti den. Nownow kaba a sma di e koti, e kisi pasi èn a e piki den froktu gi a têgo libi, so taki a sma di sai èn a sma di koti kan prisiri makandra” (Yohanes 4:34-36). Kande Yesus ben si kaba o bun sani ben waka di a ben taki nanga a Samaria uma, bika furu sma ben bribi na ini Yesus fu di na uma ben gi kotoigi na den (Yohanes 4:39). Na ini den yari di pasa, difrenti kondre ben puru den sani di den poti fu tapu a wroko fu Yehovah Kotoigi, noso den ben erken den na wet, èn na so fasi nyun gron ben opo fu go koti. A bakapisi de taki wan bigi kotiwroko na yeye fasi e du nownowde. Fu taki en leti, na heri grontapu, furu blesi e kon te wi e go doro nanga prisiri fu du a kotiwroko na yeye fasi.
21. Fu san ede wi kan tan go doro leki prisiri wrokoman na ini a kotiwroko?
21 Te sani lepi kaba èn den musu koti, dan wrokoman musu du gawgaw. Den musu wroko sondro draidrai. Na ini a ten disi wi musu wroko fayafaya èn nanga a firi taki a wroko disi musu du gawgaw bika wi e libi na ini „a ten fu a kaba” (Danièl 12:4). Iya, wi e miti tesi, ma wi e koti moro anbegiman fu Yehovah na ini a kotiwroko, moro leki oiti bifo. Fu dati ede disi na wan dei fu prisiri (Yesaya 9:3). Leki prisiri wrokoman, dan, meki wi tan go doro nanga a kotiwroko!
[Futuwortu]
^ paragraaf 15 Wan buku di Yehovah Kotoigi tyari kon na doro èn prati.
San Yu Ben Sa Piki?
• Fa a Masra fu a kotiwroko ben piki a begi gi moro wrokoman?
• Ala di wi na „sani di sma no wani si na ai”, toku fa wi e tan tyari wisrefi?
• Fu san ede wi de nanga prisiri srefi te wi e kisi frufolgu?
• Fu san ede wi musu horidoro na ini a kotiwroko nanga a firi taki a wroko musu du gawgaw?
[Aksi fu a tori disi]
[Prenki na tapu bladzijde 16, 17]
Den engel e horibaka gi den wan di e wroko na ini a kotiwroko na yeye fasi
[Prenki na tapu bladzijde 18]
Furu sma ben poti prakseri na a Kownukondre boskopu, fu di trawan ben waka èn fruteri sani
[Prenki na tapu bladzijde 18]
Wi e prani èn wi e gi watra, ma na Gado e meki en gro