Yu Abi wan Yeye na ini Yu Di No Man Dede?

„NA GADO ben meki sma skrifi ala den Buku fu Bijbel nanga yepi fu en santa yeye èn den bun fu gi leri, fu piri-ai gi sma, fu poti sani kon reti, fu gi trangaleri ini regtfardikifasi” (2 Timoteus 3:16). Iya, a Bijbel na wan buku fu waarheid di e komoto na a tru Gado, Yehovah.—Psalm 83:18.

Fu di Yehovah na a Mekiman fu ala sani, so srefi fu libisma, meki a sabi heri bun san e pasa nanga wi te wi dede (Hebrewsma 3:4; Openbaring 4:11). Na ini a Bijbel, a Wortu fu en di a meki sma skrifi, a e gi wi piki tapu den aksi di abi fu du nanga wan libi baka te wan sma dede. Den piki disi tru èn soifri.

San Na a Yeye?

Na ini Bijbel, den wortu di vertaal nanga a wortu „yeye”, furutron wani taki „bro”. Ma disi wani taki moro leki fu bro nomo. Fu eksempre, a Bijbel skrifiman Yakobus e taki: „A skin sondro yeye, dede” (Yakobus 2:26). So bun, yeye na a sani di e meki a skin kon na libi.

A krakti disi di e meki a skin kon na libi no kan de a bro nomo, noso a loktu, di e kon na ini den fokofoko fu wan sma. Fu san ede? Bika, te wan sma no e bro moro, dan libi de ete na ini den cel fu a skin fu wan syatu pisi ten — „fu wan tu miniti”, soleki fa The World Book Encyclopedia e taki. Fu dati ede, den muiti di trawan e meki fu yepi wan sma fu bro baka, kan meki a sma dati kisi ensrefi baka. Ma te a krakti di e gi libi na den cel fu a skin e komoto gowe, dan sma kan pruberi ala san den wani fu meki wan sma kon na libi baka, ma ala muiti sa de fu soso. Den kan bro omeni den wani, ma den no sa man tyari wán enkri cel srefi kon na libi baka. So bun, a yeye na a libikrakti di wi no man si. A de a krakti di e gi libi èn di e hori den cel fu a skin na libi èn a sma tu. A hari di wan sma e hari bro e meki taki a libikrakti disi e tan na ini a skin.—Yob 34:14, 15.

A yeye dati de na ini libisma wawan? Bijbel e yepi wi fu kisi a yoisti piki tapu na aksi dati. A koni Kownu Salomo ben erken taki libisma nanga meti, „den alamala abi wán yeye nomo”, èn a ben aksi: „Suma sabi efu a yeye fu den manpikin fu libisma e opo go na loktu; èn efu a yeye fu den meti e saka go na ondro na grontapu?” (Preikiman 3:19-21). So bun, Bijbel e taki dati meti èn so srefi libisma abi wan yeye. Fa dati kan?

 Wi kan teki a yeye, noso a libikrakti, gersi a stroom na ini wan masyin noso na ini wan wrokosani. Wi kan gebroiki a stroom di wi no kan si, fu du difrenti sortu sani. Dati e anga fu a sortu masyin pe a stroom de na ini. Fu eksempre, stroom kan meki wan onfu di e wroko nanga stroom, kon faya. A kan meki wan computer gi informâsi, èn a kan meki wan telefisi sori prenki noso gi geluid. Toku, a stroom noiti no e kon gersi den masyin di a e gi krakti. A tan de wan krakti nomo. Na a srefi fasi, a libikrakti no e kon gersi den libisani di a e hori na libi. A no de wan libisani di abi eigifasi èn a no abi frustan. Libisma èn so srefi meti „abi wán yeye nomo” (Preikiman 3:19). Fu dati ede, te wan sma dede, dan a yeye fu en no e libi go doro na wan tra presi leki wan yeye mekisani.

Dan san na a situwâsi fu den dedewan? San e pasa nanga a yeye te wan sma dede?

„Na Doti Yu Sa Drai Go Baka”

Di a fosi man, Adam, ben trangayesi a komando fu Gado fu espresi, dan Yehovah ben taigi en: „Ini a sweti fu yu fesi yu sa nyan brede, te leki yu drai go baka na a gron, bika na drape Gado ben teki yu puru. Bika doti yu de èn na doti yu sa drai go baka” (Genesis 3:19). Pe Adam ben de bifo Yehovah ben meki en fu a doti fu a gron? We, a no ben de na no wan pe! A no ben de kwetikweti. So bun, di Yehovah Gado ben taigi Adam taki a ben o „drai go baka na a gron”, dan Gado ben taki nanga tra wortu dati Adam ben o dede èn ben o tron leki doti fu a gron. Adam no ben o go na a yeye kondre. Te a ben o dede, dan agen a ben o de sondro libi, a no ben o de kwetikweti. A strafu fu en ben de taki a ben o dede — a no ben sa abi libi moro — a no de so taki a ben sa go na wan tra presi.—Romesma 6:23.

Fa a de nanga tra sma di dede? Preikiman 9:5, 10 e tyari kon na krin san na a situwâsi fu den dedewan. Drape wi e leisi: „Den dede soema no sabi noti . . . No wan wroko efoe wrokosani efoe koni efoe sabi de na ini a grebi” (Da Bijbel na ini Sranantongo). Fu dati ede, dede na a de di wan sma no de. A psalm skrifiman ben skrifi taki te wan sma dede, dan „en yeye e komoto gowe, a e go baka na en gron; na a dei dati den prakseri fu en e lasi gowe”.—Psalm 146:4.

A de krin taki dedesma no de kwetikweti. Den no man sabi notinoti. Den no man si yu, yere yu, noso taki nanga yu. Den no man yepi yu, den no man du yu ogri tu. Yu no abi fu frede dedesma. Ma na sortu fasi a yeye „e komoto gowe” fu wan libisma te a dede?

A Yeye „E Drai Go Baka na a Tru Gado”

Bijbel e taki dati te wan sma dede, dan „a yeye srefi e drai go baka na a tru Gado di ben gi en” (Preikiman 12:7). Disi wan taki dati wan yeye sani trutru e komoto fu a skin èn e frei go na loktu fu de nanga Gado? Kwetikweti! A fasi fa Bijbel e gebroiki a wortu „drai go baka”, no wani taki dati wan sma trutru musu abra fu  wan presi go na wan tra presi. Fu eksempre, Gado ben taigi den Israèlsma: „’Drai kon baka na mi, èn mi sa drai kon baka na unu’, na so Yehovah fu den legre taki” (Maleaki 3:7). A ’drai di Israèl drai kon baka’ na Yehovah, ben wani taki dati den ben drai den baka gi wan fowtu fasi fu libi èn ben waka agen na tapu a regtfardiki pasi fu Gado. A ’drai di Yehovah drai kon baka’ na Israèl, ben wani taki dati a ben sori en pipel bun-ati fu di a ben poti prakseri na den ete wan leisi. Na ini ala tu kefal, a ’drai di den drai kon baka’, ben abi fu du nanga a poti di den ben poti spesrutu prakseri na wan sani. Den no ben abra trutru fu wan presi go na wan tra presi.

Na so a de tu te wan sma dede. Te a yeye e „drai go baka” na Gado, dan no wan sani e gowe libi grontapu trutru fu go na hemel. Te a libikrakti dati komoto na ini wan sma, dan Gado wawan man gi dati baka. So bun, a yeye „e drai go baka na a tru Gado” na a fasi disi, taki iniwan howpu di a sma dati abi fu kisi libi na ini a ten di e kon, de krinkrin ini na anu fu Gado now.

Fu eksempre, luku san den Buku fu Bijbel e taki fu a dede fu Yesus Krestes. Na evangelie skrifiman Lukas e fruteri: „Yesus ben kari nanga wan tranga sten èn ben taki: ’Tata, na ini yu anu mi e poti mi yeye.’ Baka di a ben taki dati, a tapu bro” (Lukas 23:46). Di a yeye fu Yesus ben gowe komoto fu en, dan Yesus no ben de na pasi trutru fu go na hemel. Yesus no ben kisi wan opobaka te leki a di fu dri dei baka a dede èn a ben opo go na hemel, baka 40 dei (Tori fu den Apostel 1:3, 9). Ma na a ten di a dede, dan nanga ala frutrow Yesus ben poti en yeye na ini Yehovah anu fu di a ben frutrow dorodoro taki Yehovah ben man meki en kon na libi baka.

Iya, Gado kan meki wan sma kon na libi baka (Psalm 104:30). Disi e gi wi wan kefalek moi howpu fu tru!

Wan Howpu Di No Abi Misi

Bijbel e taki: „A yuru e kon pe ala sma di de na ini den memregrebi, sa yere [Yesus] sten èn sa kon na doro.” (Yohanes 5:28, 29). Iya, Yesus Krestes ben pramisi taki ala den sma di de na ini a prakseri fu Yehovah, sa kisi wan opobaka, noso sa kon na libi baka. A no de fu taki dati den wan di du muiti fu waka èn libi na wan regtfardiki fasi leki futuboi fu Yehovah, sa de na mindri den sma disi. Ma milyunmilyun tra sma dede sondro fu sori efu den ben o gi yesi na den regtfardiki markitiki fu Gado. A kan de so taki den no ben sabi den markitiki fu Yehovah, noso taki den no ben abi nofo ten fu tyari den kenki kon di ben de fanowdu. Den sortu sma disi de na ini a prakseri fu Gado tu èn den sa kisi wan opobaka, fu di Bijbel e taki: „Wan opobaka o de fu den regtfardikiwan nanga den onregtfardikiwan.”—Tori fu den Apostel 24:15.

Grontapu na ini a ten disi furu nanga bita-ati nanga strei, ogri di sma e du nanga tranga èn a kiri di sma e kiri makandra. Grontapu furu tu nanga sma di e doti en, èn furu siki de tu. Efu den dedesma ben musu kon na libi baka na tapu so wan grontapu, dan seiker den no ben sa prisiri wan langa pisi ten. Ma a Mekiman pramisi taki heri esi a sa tyari wan kaba kon na a disiten grontapu libimakandra di abi Satan leki tiriman (Odo 2:21, 22; Danièl 2:44; 1 Yohanes 5:19). Na a ten dati, wan regtfardiki nyun libisma libimakandra — „wan nyun grontapu” — sa de wan kefalek moi sani di o pasa trutru.—2 Petrus 3:13.

Na a ten dati, „no wan sma di e libi drape sa taki: ’Mi siki’ “ (Yesaya 33:24). Srefi a hebi pen di dede e tyari kon no sa de moro, bika Gado „sa figi puru ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba” (Openbaring 21:4). Fu tru, dati na wan kefalek moi howpu gi den wan di de „na ini den memregrebi”!

Te Yehovah sa figi godelowsufasi puru fu grontapu, dan a no sa pori den regtfardikiwan makandra nanga den godelowsuwan (Psalm 37:10, 11; 145:20). Fu taki en leti, te „a bigi banawtu” sa tyari pori kon gi a disiten godelowsu grontapu, dan „wan bigi ipi” fu sma „di komoto  na ala nâsi nanga lo nanga pipel nanga tongo”, sa pasa libilibi (Openbaring 7:9-14). So bun, wan bigi ipi sma sa de na libi fu gi wan switikon na den dedewan di e kon na libi baka.

Yu e angri fu si den lobiwan fu yu baka? Yu wani libi fu têgo na ini Paradijs na grontapu? Efu yu wani dati, dan yu musu teki soifri sabi na ini yu fu a wani fu Gado èn fu den prakseri fu en (Yohanes 17:3). Yehovah wani taki „ala sortu sma musu kisi frulusu èn kon kisi wan soifri sabi fu waarheid”.—1 Timoteus 2:3, 4.

[Prenki na tapu bladzijde 4]

„Doti yu de èn na doti yu sa drai go baka”

[Prenki na tapu bladzijde 5]

Wi kan teki a yeye gersi nanga stroom

[Prenki na tapu bladzijde 7]

Na opobaka sa tyari têgo prisiri kon