Yu E Frudrage Trutru?

OITI yu ben atibron srefisrefi bika wan sma no ben tyari ensrefi na wan bun fasi? Yu abi a gwenti fu handri esi-esi te ogri sani abi takru bakapisi na tapu den krosibei mati fu yu?

Son leisi a de fanowdu fu handri wantewante na wan seryusu fasi fu no meki wan seryusu sondu panya go moro fara. Fu eksempre, di kefalek takru ogri ben o pori den Israèlsma na ini a di fu 15 yarihondro b.G.T., dan Pinehas granpikin fu Aron, ben handri wantewante fu puru na ogri. Yehovah Gado ben feni bun san a ben du, di Yehovah ben taki: „Pinehas . . . ben puru na atibron fu mi di ben de tapu den manpikin fu Israèl fu di a no ben frudrage srefisrefi taki den ben strei nanga mi.”—Numeri 25:1-11.

Pinehas ben handri na a yoisti fasi fu no meki a doti fasi disi panya go moro fara. Ma fa a de te wan sma e atibron tumusi nanga den fowtu fu tra sma? Efu wi e handri tumusi esi noso handri sondro wan bun reide, dan wi no ben o tron wan sma di e horibaka gi regtfardikifasi. Ma na presi fu dati, wi ben sa tron wan sma di no e frudrage sani kwetikweti — wan sma di no e gi pasi srefisrefi taki trawan e meki fowtu leki onvolmaakti sma. San kan yepi wi fu no tron so wan sma?

’Yehovah E Gi Pardon fu Ala den Fowtu fu Yu’

Yehovah na „wan Gado di dyarusu (di fayafaya); wan Gado di no e frudrage taki sma e strei nanga en” (Exodus 20:5, futuwortu). Fu di en na a Mekiman, a abi a reti fu aksi wi taki wi musu dini en wawan (Openbaring 4:11). Toku Yehovah e frudrage den swakifasi di wi abi leki libisma. Fu dati ede a psalm skrifiman ben singi fu en: „Yehovah abi sari-ati èn bunfasi, a no e atibron esi èn a abi lobi bun-ati pasa marki. A no ala ten a sa tan feni fowtu . . . A no handri nanga wi akruderi den sondu fu wi srefi; èn a no gi wi san wi e frudini akruderi den sondu fu wi.” Iya, efu wi abi berow, dan Gado ’e gi wi pardon fu ala den fowtu fu wi’.—Psalm 103:3, 8-10.

Bika a sabi den sondu fasi fu libisma, meki Yehovah no „e tan feni fowtu” na sma di ben du ogri èn di ben abi berow (Psalm 51:5; Romesma 5:12). Fu taki en leti, Yehovah abi na prakseri fu puru sondu nanga onvolmaaktifasi. So langa a no puru ala sondu nanga onvolmaaktifasi, dan na presi taki Gado e gi „san wi frudini”, a e gi wi kefalek furu pardon tapu gron fu Yesus Krestes en frulusu-ofrandi. No wan fu wi ben sa kisi a krutu fu tan libi efu Yehovah no ben sori sari-ati te a fiti (Psalm 130:3). Wi kan de wi hemel Tata grantangi srefisrefi taki en na wan Gado di abi sari-ati, èn a abi a reti fu aksi fu wi taki wi musu dini en wawan!

Sabi O Fara Yu Musu Go

Fu di a Soeverein Masra fu na universum e sori taki a e frudrage te a e handri nanga onvolmaakti libisma, dan a no musu de so dan taki wi musu du dati tu? Sma e taki dati frudrage na a pasensi di wi musu abi nanga a fasi fa tra sma e denki èn e handri. Wi srefi abi a pasensi disi? Wi abi pasensi nanga tra sma te den e taki noso e du sani di no de wan kefalek sondu, ma kande na sani di den taki noso du èn di no e fiti?

A no de fu taki dati wi musu luku bun taki wi no e frudrage sani tumusi. Fu eksempre, kefalek ogri e du te kerki tiriman e frudrage den priester di e tan mesbroiki boi nanga meisje gi seks. Wan nyunsuman na ini Ierland e taki dati „fu di den kerki tiriman e si a sani di ben pasa nanga den pikin leki wan sondu di pasa wan leisi nomo, dan a wan-enkri sani di den du na fu froisi a priester di du na ogri [go na wan tra presi]”.

 A froisi di den e froisi so wan man go na wan tra presi, na wan eksempre di e sori fa wi musu frudrage na a yoisti fasi? Kwetikweti! Kon meki wi taki dati den fesiman fu wan datra ben tan meki a tan du oparâsi na wan fasi di no bun, fu di den e froisi en go na difrenti ati-oso, ala di a ben e kiri noso e malengri den sikisma di ben kon na en. A fowtu denki fu de loyaal na den kompe datra, kan meki taki den e „frudrage” srefi den sani disi. Ma fa a de nanga den sma di ben lasi den libi noso di ben kisi problema, fu di datra no ben du den wroko bun, noso fu di den datra ben du srefi ogridu?

A kan so srefi taki sma no e frudrage kwetikweti. Di Yesus ben de na grontapu, dan wan tu Dyu di nen Zelootsma ben wani gebroiki na eksempre fu Pinehas fu buweisi taki den sani di densrefi e du, de bun. Wan fu den sani di wan tu Zelootsma ben du na taki den „ben waka na mindri den bigi grupu sma na ini Yerusalem te fesa èn den sortu sani disi ben de, èn dan den ben sutu den feanti fu den nanga nefi sondro taki den feanti ben fruwakti dati.”

Leki Kresten, noiti wi ben sa du leki den Zelootsma fu go feti trutru nanga den sma di wi no lobi. Ma a de so taki na frudrage di wi no e frudrage e meki taki wi e du den sma di wi no lobi, ogri na tra fasi — kande fu di wi e taki ogri fu den? Efu wi na sma di e frudrage sani trutru, dan wi no sa taki na so wan ogri fasi fu sma.

Wan tra grupu sma di no ben frudrage ben de den fosi yarihondro Fariseiman. Doronomo den ben e krutu trawan èn den no ben frudrage no wan onvolmaaktifasi fu libisma. Den Fariseiman di ben abi bigifasi ben wisiwasi den gewoon sma, èn den ben kosi den leki „frufruktu sma” (Yohanes 7:49). Nanga reti Yesus ben krutu den man disi di ben prakseri taki den ben regtfardiki, taki: „Helu fu unu, leriman fu Wet nanga Fariseiman, un hoigriman! Fu di unu e gi a di fu tin pisi fu a munt èn fu a dille èn fu a komijn, ma unu no poti prakseri na den moro prenspari afersi fu a Wet, dati wani taki, retidu nanga sari-ati nanga getrowfasi. Den sani disi unu ben musu du, èn toku unu no ben musu libi den tra sani tu.”—Mateus 23:23.

Di Yesus ben taki den sani disi, dan a no ben taki dati a no ben de prenspari fu du san a Wet fu Moses e taki. A ben sori nomo taki den „moro prenspari” sani fu a Wet ben aksi fu den taki den ben musu hori densrefi na a Wet na wan reidelek fasi èn nanga sari-ati. Yesus nanga den disipel fu en ben de heri tra fasi leki den Fariseiman nanga den Zelootsma di no ben frudrage srefisrefi!

Yehovah Gado nanga Yesus Krestes no e si takrudu leki wan pikin sani. Heri esi a sa „teki refensi tapu den wan di no sabi Gado èn tapu den wan di no e gi yesi na a bun nyunsu” (2 Tesalonikasma 1:6-10). Ma ala di Yesus ben horibaka fayafaya gi regtfardikifasi, toku ala ten a ben sori a pasensi fu en hemel Tata, a sari-ati fu en, èn lobi gi ala sma di wani du san bun (Yesaya 42:1-3; Mateus 11:28-30; 12:18-21). Yesus gi wi wan kefalek moi eksempre!

Frudrage Makandra Nanga Pasensi

Ala di kande wi abi faya gi sani di bun, meki wi du san na apostel Paulus ben gi leki rai: „Tan frudrage makandra èn gi makandra pardon na wan fri fasi efu a wan abi wan sani fu kragi fu a trawan. Soleki fa Yehovah gi unu pardon na wan fri fasi, na so unu musu du tu” (Kolosesma 3:13; Mateus 6:14, 15). Te wi wani frudrage tra sma dan wi musu man frudrage den sani di den e mankeri èn den fowtu fu den na ini na onvolmaakti grontapu disi. Wi musu de reidelek nanga den sani di wi e fruwakti fu trawan.—Filipisma 4:5.

Te wi e frudrage, dan dati no wani taki srefisrefi taki wi e feni ogridu bun noso taki wi e tapu wi ai gi fowtu. Kande a denki noso maniri fu wan sma di de na ini a bribi tu, no e kruderi nanga den markitiki fu Yehovah. Ala di a sani di a sma e mankeri no de so wan seryusu sani taki Gado no sa wani en moro, toku a kan gi wan warskow di e sori taki a de fanowdu taki a sma musu kenki (Genesis 4:6, 7). Den wan di  abi yeye eigifasi e sori lobi trutru te den e pruberi na wan safrifasi fu kenki a sma di meki fowtu! (Galasiasma 6:1) Ma efu wi wani abi bun bakapisi nanga a sani disi, dan a de fanowdu fu handri na wan fasi di e sori taki wi e broko wi ede nanga a sma, na presi taki wi e du dati soso fu feni fowtu na a sma.

„Nanga wan Safrifasi èn Nanga Dipi Lespeki”

San wi kan taki fu a pasensi di wi musu abi nanga sma di abi tra kerki denki di no de leki di fu wi? Wan „Algemeen Les” di ben anga na ala den Nationaal Skoro di ben opo na ini Ierland na ini 1831, e taki: „Yesus Krestes no ben wani taki dati nanga tranga unu ben musu dwengi sma fu teki a bribi fu en. . . . Te wi e haritaki èn e kosi den kompe fu wi, dan dati no sa overtoigi den taki wi abi leti èn taki den fowtu. Na presi taki wi e du dati, wi sa overtoigi den taki wi no e handri leki Kresten.”

Yesus ben leri sma èn ben handri na wan fasi di ben meki sma teki Gado Wortu, èn disi wi musu du tu (Markus 6:34; Lukas 4:22, 32; 1 Petrus 2:21). Yesus ben man sabi san de na ini den sma ati fu di a ben de wan volmaakti man di kisi spesrutu koni fu Gado. Fu dati ede, te a ben de fanowdu, Yesus ben man krutu den feanti fu Yehovah na wan krasi fasi (Mateus 23:13-33). Fu di a ben du disi, dan disi no wani taki dati Yesus no ben frudrage sani.

Wi no de leki Yesus fu man sabi san de na ini na ati fu sma. Fu dati ede wi musu du san na apostel Petrus e gi leki rai: „Santa Krestes leki Masra na ini un ati, èn de klariklari ala ten fu opo taki gi unsrefi na fesi ibriwan sma di e aksi unu wan reide fu a howpu di de na ini unu, ma du dati makandra nanga wan safrifasi èn nanga dipi lespeki” (1 Petrus 3:15). Leki futuboi fu Yehovah wi musu opo taki fu den sani di wi e bribi, bika den abi wan tranga fondamenti na ini a Wortu fu Gado. Ma wi musu du disi na wan fasi di e sori taki wi e lespeki tra sma èn den sani di den e bribi fayafaya. Paulus ben skrifi: „Meki a taki fu unu de switi ala ten, a musu abi sowtu leki spesrei, so taki unu sabi fa unu musu gi ibriwan sma wan piki.”—Kolosesma 4:6.

Na ini a pôpi Bergitaki fu Yesus, a ben taki: „Ala sani . . . di unu wani fu sma du gi unu, unu musu du gi den so srefi” (Mateus 7:12). Fu dati ede, meki wi frudrage makandra nanga pasensi èn sori lespeki gi den sma di wi e preiki a bun nyunsu gi. Te wi e hori a balansi na mindri a faya di wi abi gi regtfardikifasi nanga a frudrage di wi e frudrage sma soleki fa Bijbel e taki, dan wi sa plisi Yehovah èn wi sa de sma di e frudrage trutru.

[Prenki na tapu bladzijde 23]

No du leki den Fariseiman di no ben frudrage sma

[Prenki na tapu bladzijde 23]

Yesus ben frudrage leki en Tata. Yu e frudrage tu?