A E Tan Moro Langa Leki Soifri Gowtu

NA ALA sei sma e suku fu feni gowtu fu di a moi èn a e tan langa. Furu sma wani gowtu fu di a gersi leki a e tan brenki èn a e tan krin fu têgo. Disi de so bika gowtu no e lasi gowe efu a e tuka nanga watra, zuurstof, swarfu èn pikinmoro ibriwan tra sani. Sma kon feni furu gowtu sani na ini boto di sungu noso na tra presi. Den gowtu sani disi ben brenki ete baka hondrohondro yari.

Ma a moi fu si taki Bijbel e sori dati wan tra sani de, di e tan moro langa èn „di abi moro bigi waarde leki gowtu di e lasi gowe ala di faya srefi soifri en” (1 Petrus 1:7). Te den e gebroiki faya èn so srefi tra sani fu luku o soifri a gowtu de, noso fu puru a doti na en, dan a kan taki den e kisi gowtu di soifri 99,9 procent. Ma srefi soifri gowtu e pori gowe noso e lasi gowe, efu a e tuka nanga koningswater, wan sortu watra di meki moro furu fu zoutzuur nanga pikin salpeterzuur. So bun, te Bijbel e taki dati ’gowtu e lasi gowe’, dan a e sori soifri san sabidensiman e buweisi tu.

Na a tra sei, a tru Kresten bribi „e meki a sili tan na libi” (Hebrewsma 10:39). Libisma kan kiri wan tra sma di abi wan tranga bribi, neleki fa den ben du nanga Yesus Krestes. Ma den wan di abi trutru bribi, e kisi a pramisi disi: „Buweisi taki unu de getrow, srefi te na dede èn mi sa gi yu a kownu-ati fu libi” (Openbaring 2:10). Den wan di dede ala di den de getrow ete, e tan ini a prakseri fu Gado èn a o gi den wan opobaka (Yohanes 5:28, 29). No wan enkri pisi gowtu kan du dati. Ini a kefal disi, dan bribi warti trutru moro leki gowtu. Ma taki bribi kan abi so wan bigi waarde, dan wi musu ondrosuku finifini tu o bun èn o warti a de. Fu taki en leti, Petrus ben taki dati ’na eigifasi fu bribi di kisi tesi’ warti moro gowtu. Yehovah Kotoigi sa prisiri fu yepi yu fu studeri Bijbel so taki yu kan kweki èn tan abi wan tranga bribi ini a tru Gado, Yehovah, nanga en Manpikin, Yesus Krestes. Soleki fa Yesus ben taki, dan disi „wani taki têgo libi”.—Yohanes 17:3.