A Reti Di Yu Abi fu Bribi

Kande yu breiti taki yu abi a reti fu man bribi iniwan sani du yu wani bribi. Pikinmoro ibriwan sma e firi a srefi fasi. Fu di den siksi milyard sma na grontapu e gebroiki a reti disi, dan dati abi leki bakapisi taki furu difrenti sortu bribi de. Na ini den sani di meki na grontapu, wi e feni furu difrenti kloru, difrenti vorm, difrenti fasi fa wan skin de, difrenti tesi nanga smeri, èn so srefi difrenti babari. Den sani disi e meki a libi kon moro moi èn den e gi moro prisiri. Den difrenti bribi di sma abi e du dati tu. Den difrenti sani disi di de, trutru kan meki a libi moro switi.—Psalm 104:24.

MA WI musu luku bun. Son bribi no e difrenti fu trawan nomo, ma den kan tyari ogri kon so srefi. Fu gi wan eksempre, na a bigin fu a di fu 20 yarihondro, wan tu sma ben bribi taki den Dyu nanga den vrijmetselaar (wan grupu fu sma di ben de memre fu sikrit organisâsi) ben wani „tyari bruya kon na ini a Kresten libimakandra èn taki den ben wani seti wan nâsi di ben o abi makti na heri grontapu, èn den tu grupu disi makandra ben o tiri a nâsi disi”. Wan sani di meki taki sma ben bribi disi ben de a traktaat di ben skrifi sani teige den Dyu. A nen fu a traktaat na Protocols of the Learned Elders of Zion (Den Sani Di den Koni Dyu Kerki Tiriman Bosroiti fu Du). Soleki fa a traktaat ben taki, dan den Dyu ben wani taki sma ben musu pai hebi belasting. Den ben gi sma deki-ati fu meki moro fetisani, èn den ben wani taki ala den bisnis ben musu kon na ondro a tiri fu wán kompani nomo, so taki ’den sma di no ben de Dyu ben o lasi den gudu fu den wantronso’. A traktaat ben taki so srefi taki den Dyu ben wani abi krakti so srefi tapu a skoro sistema, so taki ’den sma di no ben de Dyu, ben o tron neleki meti sondro frustan’. Soleki fa a traktaat e taki moro fara, dan den Dyu ben wani bow so srefi ondrogron pasi gi loko, so taki den difrenti mamafoto ben man miti makandra. Na so fasi den Dyu kerki tiriman ben o man ’puru iniwan gensman na pasi fu di den ben o kiri den’.

A no de fu taki, dati den sani disi ben de lei — den ben de fu meki a pipel kisi feantifasi gi den Dyu. ’A bigi lei disi’, na so Mark Jones fu a British Museum e taki, ’bigin na Rosiakondre èn a prati go na dorosei kondre’. A fosi leisi di sma ben leisi a lei disi ben de na ini 1903 na ini wan koranti artikel fu Rosiakondre. Tapu 8 mei 1920 sma ben kan leisi a tori na ini The Times, wan koranti fu London. Moro leki wán yari baka dati, The Times tyari kon na krin taki a dokumenti disi ben de wan falsi wan. Ma ini a pisi ten dati a dokumenti ben abi takru bakapisi kaba. ’A muilek fu tapu den sortu lei disi’, Jones e taki. Te sma e bribi den kaba, dan a bakapisi sa de taki sma e bigin bribi wan lo kruktu nanga takru sani.  Furutron den bribi disi abi bun takru bakapisi, soleki fa wi si dati kaba na ini a historia fu a di fu 20 yarihondro.—Odo 6:16-19.

Bribi Kontrari Waarheid

A no de fu taki, dati fowtu bribi kan gro safrisafri sondro taki wan sma lei fu espresi. Son leisi a de so nomo taki wi no e frustan sani bun. Omeni sma lasi den libi fu di den ben du wan sani di den ben bribi taki a ben bun? Boiti dati, furutron wi e bribi wan sani soso fu di wi wani bribi en. Wan professor e taki dati srefi sabidensiman „furutron e kisi wan hei denki fu den sani di densrefi e leri èn e bribi”. Fu di den abi den eigi denki kaba fu wan sani, meki den no wani du muiti fu kon sabi fa a sani de trutru. Dan kande den heri libi langa, den sa pruberi fu horibaka gi den fowtu sani di den e bribi, ma sondro taki den abi bun bakapisi.—Yeremia 17:9.

Den srefi sortu sani disi pasa nanga kerki bribi. Den lai nanga leri di no e kruderi nanga makandra (1 Timoteus 4:1; 2 Timoteus 4:3, 4). A kan de so taki wan sma abi wan tranga bribi na ini Gado. Wan trawan e taki dati a sma dati no abi no wan buweisi di e horibaka gi a bribi di a e bribi na ini Gado. Wan tra sma e taki dati yu abi wan sili di no man dede. Wan trawan e bribi taki te yu dede yu no de moro srefisrefi. A krin fu si taki bribi soleki den disi, de kontrari fu makandra. A no kan de so taki ala den bribi disi de tru. A no ben o bun dan fu du muiti fu kon sabi seiker taki a sani di yu e bribi na trutru wan tru tori, èn no soso wan sani di yu wani bribi? (Odo 1:5) Fa yu kan du dati? Na artikel di e kon now sa ondrosuku a tori disi.

[Prenki na tapu bladzijde 3]

Wan artikel fu 1921 di e tyari „Protocols of the Learned Elders of Zion” kon na krin