Aksi fu Leisiman

Pe Danièl ben de di den dri Hebrewsma ben kisi tesi na fesi a kefalek bigi popki di Nebukadnesar ben meki na a lagipresi fu Dura?

Bijbel no e fruteri dati. So bun, no wan sma na ini a ten disi kan taki seiker pe Danièl ben de na a pisi ten fu a tesi dati.

Son sma kon nanga na idea taki Danièl ben kisi spesrutu grani fu Nebukadnesar. Den grani disi ben bigi moro di fu Sadrak, Mesak, nanga Abednego. Fu dati ede Danièl no ben de fruplekti fu go na a lagipresi fu Dura. A tru taki Danièl 2:49 e sori taki wan pisi ten, Danièl ben abi wan posisi di hei moro di fu den dri mati fu en. Ma wi no kan buweisi taki fu a sani disi ede meki a no ben abi fu kon makandra nanga den trawan na fesi a popki.

Trawan pruberi fu fruklari fu san ede Danièl no ben de drape. Den taki dati kande a ben gowe go du wan lanti wroko noso kande a ben siki so taki a no ben man kon. Ma Bijbel no e taki dati. Awinsi fa a no fa, sma no ben man krutu san Danièl du. Efu dati ben o man, dan sondro tweifri den dyarusu ofsiri fu Babilon ben o gebroiki disi fu sori taki Danièl ben abi fowtu (Danièl 3:8). Bifo èn so srefi baka a sani disi pasa, Danièl ben sori taki a ben tan hori en soifri retifasi na Gado, awinsi sortu tesi a ben kisi (Danièl 1:8; 5:17; 6:4, 10, 11). So bun, awinsi Bijbel no e taki fu san ede Danièl no ben de na a lagipresi fu Dura, toku wi kan de seiker taki a ben de getrow na Yehovah Gado èn taki a ben hori ensrefi tranga na den gronprakseri fu En.—Esekièl 14:14; Hebrewsma 11:33.