Ondrofenitori

Nanga Tangi na Ati Mi E Prakseri den Sani Di Pasa na ini Mi Libi!

SOLEKI FA DRUSILLA CAINE FRUTERI

A ben de a yari 1933, èn mi no ben trow langa ete nanga Zanoa Caine, di neleki mi, ben de wan kolporteur, noso wan sma na ini a furuten preikiwroko. Fu di mi ben prisiri srefisrefi, meki mi ben teki a bosroiti fu go wroko makandra nanga mi masra na ini a toewijzing fu en. Ma mi ben abi wan baisigri fanowdu fu ben man du dati, èn dati ben de wan diri sani srefisrefi. Mi no ben o man bai wan noiti, fu di a libi ben muilek baka a depressie (wan muilek pisi ten na ekonomia sei) di ben de na ini den yari na mindri 1920 nanga 1930. San mi ben kan du?

DI DEN swagri fu mi yere sortu problema mi ben abi, dan den go luku na presi pe sma ben e fringi broko sani na ini a birti, fu man feni owru pisi fu baisigri, so taki den ben kan meki wan gi mi. Den ben meki wan gi mi, èn a ben e rei bun! A momenti di mi ben man rei a baisigri, mi nanga Zanoa ben e rei nanga prisiri na ini den distrikt Worcester nanga Hereford di de na ini Ingrisikondre, ala di wi ben e gi kotoigi na ala sma di wi ben miti.

Mi no ben sabi srefisrefi taki a pikin bosroiti di mi ben teki fu sori taki mi ben e frutrow tapu Yehovah, ben o meki mi ondrofeni so furu moi sani di mi no ben sa frigiti moro. Ma a fasi fa mi libi waka na yeye fasi, na fu di mi lobi-ati papa nanga mama ben de wan bun eksempre gi mi.

Den Muilek Yari na a Pisi Ten fu a Fosi Grontapufeti

Mi gebore na ini december 1909. A no ben de langa baka dati di mi mama kisi a buku Het Goddelijk Plan der Eeuwen (A Plan fu Gado na ini den Yarihondro). Leki bakapisi fu dati, na ini 1914, mi papa nanga mama tyari mi go luku a felem „Photo-Drama der Schepping” na ini a foto Oldham di de na ini a distrikt Lancashire. (Yehovah Kotoigi ben tyari a buku èn so srefi a felem kon na doro). Ala di mi ben yongu ete, toku mi e memre  krinkrin taki mi ben e dyompo fu prisiri ede di mi ben de na pasi fu go na oso, fu di mi ben e prakseri den sani di mi ben si! Na a ten dati Frank Heeley ben bigin wan bijbelstudie grupu na ini a foto Rochdale pe wi ben e libi. Fu di wi ben e go na a bukustudie grupu disi, dan dati yepi wi leki osofamiri fu frustan den Buku fu Bijbel moro bun.

A srefi yari dati, a switi libi fu wi ben kenki wantronso fu di a Bigi Feti ben broko — wi e kari dati a Fosi Grontapufeti now. Lanti kari mi papa fu go feti na ini a legre, ma a weigri fu go, fu di leki wan Kresten a no ben e teki partèi. Di a ben de na krutubangi, dan sma taki fu mi papa leki „wan tumusi bun man”, èn den leisi wan tu brifi so srefi fu „mansma di ben taki dati den ben e bribi taki a ben abi bun reide fu no wani go feti”, na so a koranti fu a foto ben taki.

Na presi taki krutubangi gi mi papa primisi fu no abi no wan enkri sani fu du nanga a legre, den gi en primisi soso fu no feti na ini a legre. A sani dati meki taki wantronso sma bigin spotu en, èn den du dati so srefi nanga mi èn nanga mi mama. Te fu kaba, krutubangi luku na afersi fu mi papa ete wan leisi, èn den taki dati a ben musu go du gronwroko. Ma wan tu gronman ben mesbroiki mi papa fu di a ben de na ini a situwâsi disi, èn den no ben e pai en wan bun moni srefi noso no ben e pai en noti srefi. Fu ben man horibaka gi na osofamiri, dan mi mama ben e wasi krosi gi sma. A ben e kisi pikinso moni gi a hebi wroko dati. Toku, mi e si now fa mi kisi tranga na ini den fosi yari dati fu mi libi, fu di mi ben abi fu kakafutu gi den sortu muilek situwâsi disi. A sani disi yepi mi fu warderi yeye afersi di de den moro prenspari sani na ini a libi.

Wi Bigin Nanga Pikinso Sani

A no ben teki langa bifo wi leri sabi Danièl Hughes, wan fayafaya bijbelstudenti. A ben e wroko na ini wan ston-krofaya mijn na ini Ruabon, wan dorpu di ben de so wan 20 kilometer pasa a foto Oswestry, pe wi ben froisi go tan. Omu Dan, soleki fa mi ben e kari en, ben abi kontakti nanga wi osofamiri, èn ibri leisi te a ben kon luku wi, a ben gwenti fu taki fu sani di skrifi na ini Bijbel. Noiti a ben e taki swititori. Wan Bijbelstudie grupu ben bigin na ini Oswestry na ini 1920, èn na ini 1921 Omu Dan gi mi a buku De Harp Gods (A Harpu fu Gado). Mi ben lobi a buku disi, bika a ben yepi mi fu frustan den leri fu Bijbel moro bun.

Wan tra brada ben de Pryce Hughes, * di baka ten tron fesiman opziener fu a bijkantoro fu Yehovah Kotoigi na ini London. En nanga en famiri ben e libi krosibei fu a presi Bronygarth di ben de na a lanki fu Wales (wan pisi fu Ingrisikondre). En sisa Cissie ben tron wan bun mati fu mi mama.

Mi e memre fa wi ben prisiri na ini 1922, di wi kisi a kari fu ’meki a Kownu nanga en kownukondre bekènti. Na ini den yari baka dati, ala di mi ben de na skoro ete, mi yepi fayafaya fu prati den traktaat di ben tyari kon na doro spesrutu gi a wroko dati. Wan fu den traktaat di mi ben prati furu, ben de a wan di nen De geestelijkheid aangeklaagd (Wan Kragi Teige den Kerki Tiriman) èn di kon na doro na ini 1924. Te mi e prakseri a pisi ten dati baka, dan mi e si sortu grani a ben de fu abi demakandra nanga so furu getrow brada nanga sisa. Wan tu fu den ben de Maud Clark * nanga en patna Mary Grant, * Edgar Clay, * Robert Hadlington, Katy Roberts, Edwin Skinner, * makandra nanga Percy Chapman nanga Jack Nathan. * Den tu brada disi, Percy Chapman nanga Jack Nathan, ben go na Kanada fu go yepi nanga a wroko drape.

A Bijbel lezing „Milyunmilyun Sma Di E Libi Now Noiti Sa Dede” ben sori fu de wan kotoigi di ben gi na a yoisti ten na ini a bigi gebied pe wi ben musu preiki. Tapu 14 mei 1922, Stanley Rogers, wan famiriman fu Pryce Hughes, komoto fu Liverpool fu hori a lezing disi na ini a dorpu Chirk di no ben de fara na a noordsei fu a foto pe wi ben e tan. Na wan tra ten a srefi neti dati, a hori a lezing disi na a kino-oso na ini Oswestry. Mi abi wán fu den traktaat ete di ben tyari kon na doro spesrutu gi na okasi dati. Na ini a heri pisi ten disi, a pikin grupu fu wi tan kisi tranga fu den dri kringopziener noso pelgrim, soleki fa wi ben e kari den. Den brada disi ben de Herbert Senior, Albert Lloyd, nanga John Blaney.

Wan Ten fu Teki wan Bosroiti

Na ini 1929, mi bosroiti fu teki dopu. Mi ben abi  19 yari, èn na a srefi ten, mi kisi mi fosi tesi. Mi ben miti wan yonkuman èn a papa fu a yonkuman disi ben de na ini politiek. Wi ben lobi makandra èn a ben aksi mi fu trow nanga en. Wan yari na fesi, a buku Regering (Tirimakti) ben kon na doro, so bun mi gi en a buku disi. Ma heri esi mi kon si taki a no ben wani sabi noti fu a hemel tirimakti, san ben de a thema fu a buku disi. Fu di mi ben studeri Bijbel, dan mi ben kon sabi taki den Israèlsma fu owruten ben kisi a komando fu no trow nanga sma di no ben de bribiman. Mi ben kon sabi so srefi taki Kresten musu hori densrefi na a srefi gronprakseri disi. Fu dati ede, ala di a ben muilek fu du dati, mi taigi a yonkuman taki mi no ben o man tron en wefi.—Deuteronomium 7:3; 2 Korentesma 6:14.

Mi kisi krakti fu den wortu fu na apostel Paulus: „No meki wi tapu fu du san bun, bika na a reti ten wi sa koti efu wi no e kon weri” (Galasiasma 6:9). Mi kisi yepi so srefi fu mi lobi-ati Omu Dan nanga yepi fu den wortu disi di a ben skrifi kon gi mi: „Na a ten fu pikin tesi nanga bigi tesi, teki a rai fu Romesma 8 vers 28”, pe skrifi: „Now wi sabi taki Gado e meki ala den wroko fu en e wroko makandra gi a bun fu den wan di lobi Gado, den wan di de den sma di kisi wan kari akruderi a prakseri fu en.” A no ben de wan makriki sani gi mi, ma mi ben sabi taki mi ben teki a yoisti bosroiti. A yari dati mi go na ini a furuten diniwroko.

Mi E Teki a Tyalensi

Na ini 1931, wi ben kisi a nyun nen fu wi, Yehovah Kotoigi, èn a yari dati wi wroko fayafaya fu prati a pikin buku Het Koninkrijk, de Hoop der Wereld (A Kownukondre, a Howpu gi Grontapu). Ibri politiekman, kerki tiriman, nanga bisnisman ben kisi a buku disi. A gebied fu mi ben bigin na a foto Oswestry te go miti a foto Wrexham, sowan 25 kilometer go na a noordsei. A ben de wan tyalensi fu wroko a heri gebied.

Na wan kongres na ini a foto Birmingham a yari baka dati, wan kari ben de gi 24 friwani wrokoman. Wi ben de na mindri den 24 sma di ben de fayafaya fu poti den nen fu du wan nyun sortu fasi fu preikiwroko, ala di wi no ben sabi sortu wroko dati ben o de. Yu kan frustan fa a fruwondru wi di wi kisi a wroko fu prati a srefi buku, Het Koninkrijk, de Hoop der Wereld na sma. Wi ben musu du dati na ini grupu fu tu sma, ala di wi ben e anga wan planga na fesisei èn wán na bakasei fu wi fu meki a Kownukondre bekènti.

Di wi ben e wroko na ini den birti fu a katedraal, mi ben firi syen taki tra sma ben e luku mi, ma mi trowstu misrefi taki nowan sma na ini a foto dati ben sabi mi. Ma a fosi sma di waka kon miti mi ben de wan owru skoromati fu mi. A tanapu luku mi èn a taki: „Fu san ede yu e weri den sani disi na yu skin?” Na ondrofeni dati meki taki noiti moro mi frede libisma!

Mi Go Preiki na Tra Presi

Na ini 1933, mi trow nanga Zanoa, wan man di ben lasi en fosi wefi na ini dede. Zanoa ben owru 25 yari moro mi. A fosi wefi fu en ben de wan fayafaya Bijbel Ondrosukuman, èn baka di na uma disi dede, Zanoa tan getrow na ini a toewijzing di a ben kisi. Syatu baka di wi trow, wi gowe libi Ingrisikondre fu go na wi nyun gebied na a noordsei fu Wales, di ben de sowan 150 kilometer moro fara. Wi poti dosu, kofru, nanga tra warti sani di wi ben abi, na tapu a stuur fu wi baisigri èn na ini tas di ben anga na ala den tu sei fu den baisigri. Ma toku wi doro a presi pe wi ben musu go! Wi ben abi den baisigri fu wi tranga fanowdu na ini a toewijzing dati. Den ben tyari wi go na ala presi, èn pikinmoro wi doro srefi na tapusei fu Cader Idris, wan bergi na ini Wales di hei sowan 900 meter. Wi ben breiti so srefi taki wi ben feni sma di  ben e angri fu yere „a bun nyunsu disi fu a kownukondre”.—Mateus 24:14.

Wi no ben de langa drape ete di sma taigi wi taki wan man di nen Tom Pryce ben preiki den srefi sani gi den di wi ben preiki. Te fu kaba, wi kon feni Tom na a presi Long Mountain di de krosibei fu a foto Welshpool. Na drape a ben e tan. A ben de trutru wan sani di wi no ben fruwakti! Di mi ben bigin du preikiwroko, dan mi ben gi a man disi a bijbelstudie buku Verzoening (Kon Bun Baka Nanga Gado). A studeri a buku ensrefi, dan a skrifi go na a bijkantoro na ini London fu kisi moro publikâsi. Sensi a ten dati a ben prati a nyun bribi fu en fayafaya nanga trawan. Wi nyan bun fu den furu yuru di wi ben abi prisiri demakandra nanga en, èn wi ala dri ben gwenti fu studeri nanga makandra fu kisi deki-ati.

Wan Rampu Tyari Blesi Kon

Na ini 1934, ala den kolporteur di ben e libi krosibei fu a noordsei fu Wales ben kisi kari fu go na a foto Wrexham fu go yepi prati a pikin buku De Rechtvaardige Heerser (A Regtfardiki Tiriman). A dei bifo wi bigin nanga a spesrutu wroko disi, wan bigi rampu pasa na ini a kondre. A Gresford mijn pe sma ben diki ston-krofaya, ben sutu èn 266 sma di ben e wroko na ini a mijn, lasi den libi. A mijn ben de dri kilometer na a noordsei fu a foto Wrexham. Moro leki 200 pikin-nengre lasi den papa, èn 160 uma tron weduwe.

Wi ben musu skrifi den nen fu den sma di ben lasi wan sma na ini dede, èn wi ben musu go luku den fu gi den a buku. Wán fu den sma di mi ben musu go luku ben de Misi Chadwick di ben lasi wan manpikin fu 19 yari. Di mi doro en oso dan Jack, wan tra manpikin fu en di ben de moro owru, ben de drape fu trowstu en mama. A yonkuman disi ben sabi suma na mi, ma a no taigi mi dati. Leki bakapisi fu dati, a leisi a pikin buku èn baka dati a suku fu kisi a buku De laatste oorlog (A lasti feti), wan tra buku di mi ben gi en wan tu yari bifo.

Jack nanga en wefi, May, ben kon sabi pe mi ben e tan, èn den kon teki moro publikâsi. Na ini 1936 den teki a bosroiti fu hori konmakandra na ini na oso fu den na Wrexham. Siksi mun baka di Albert Lloyd go luku a grupu dati, wan gemeente ben opo di ben abi Jack Chadwick leki fesiman opziener. Now dri gemeente de na ini Wrexham.

A Libi na ini wan Zigeuner Karavan

Te nanga a pisi ten dati, wi ben e tan na iniwan presi di wi ben man feni, ala di wi ben e froisi go fu a wan presi go na a trawan. Ma Zanoa ben bosroiti taki a ten ben doro taki wi ben musu abi wi eigi tanpresi. A ben musu de wan di wi ben o man hari go fu a wan presi go na a trawan. Mi masra ben de wan bun temreman di ben komopo fu wan lin fu Zigeuner sma, èn a bow wan Zigeuner karavan gi wi. Wi ben kari a karavan Elisabet, wan Bijbel nen di wani taki „Gado Di Abi Furu Sani”.

Mi e memre wán spesrutu presi pe wi ben e tan. A ben de wan froktu dyari nanga froktubon di ben de na sei wan liba. Gi mi a ben de neleki Paradijs! Wi ben koloku srefisrefi na ini den yari di wi ben tan na ini a karavan dati, èn dati ben de so ala di a wagi no ben bun nofo fu tan na ini. Na ini a kowru weer, den laken fu a bedi ben kowru sote taki den ben plak na a skin fu a karavan. Wi ben abi problema doronomo nanga den dropu watra di ben de na a plafon te a weer no ben kowru so. Wi ben  musu go teki watra so srefi fu tyari dati kon na a karavan, èn son leisi wi ben musu go bun fara. Ma mi nanga Zanoa ben wini den problema disi.

Wan winter ten mi ben e siki. Wi ben abi pikinso nyanyan nomo èn wi no ben abi moni. Zanoa ben sidon na tapu a bedi, a hori mi anu, èn a leisi Psalm 37:25 gi mi: „Wan ten ben de taki mi ben de wan yonkuman, mi kon owru tu, èn toku mi no si nowan regtfardikisma di libi na baka en wawan, noso den pikin fu en e suku brede.” A ben e luku mi nomo di a ben taki: „Efu wan sani no e pasa heri esi, dan wi sa musu begi sma, èn mi no denki taki Gado o gi pasi taki dati pasa!” Ne a go preiki gi den birtisma fu wi.

Di Zanoa kon baka na oso a bakadina dati fu gi mi wan sani fu dringi, dan wan envelop ben e wakti en. Na ini na envelop 75 Amerkan dala ben de di en papa ben seni kon gi en. Wan tu yari na fesi sma ben taki dati Zanoa ben fufuru moni, ma a sani disi ben buweisi taki dati no ben de so. A presenti disi ben de leki paiman. A moni ben kon trutru na a yoisti ten!

Wan Ondrofeni Di Tyari Winimarki Kon Baka Ten

Son leisi wi e leri ondrofeni baka di furu yari pasa kaba. A sani disi ben pasa nanga mi: Bifo mi ben tapu fu go na skoro na ini 1927, mi gi kotoigi na ala den sma na ini mi klas èn so srefi na ala den sma di ben gi mi leri na skoro. Ma mi no ben gi kotoigi na wán fu den, èn dati ben de a skoromisi Lavinia Fairclough. Fu di nowan sma ben wani sabi san mi ben o du nanga mi libi, èn fu di mi nanga Misi Fairclough no ben e koti, fu taki en leti, dan mi no taigi en tu. Yu kan frustan fa a fruwondru mi èn fa mi ben breiti so srefi taki sowan 20 yari baka dati, mi mama fruteri mi taki a skoromisi disi ben kon baka na ini a foto fu fruteri ala den owru mati nanga studenti fu en taki a ben de wan Kotoigi fu Yehovah now!

Di wi miti makandra dan mi fruteri en fu san ede mi no ben taigi en na fesi fu a bribi fu mi èn fu a wroko di mi ben o go du. A tan arki èn baka dati a taki: „Mi ben e suku waarheid ala ten kaba. Na dati mi ben e suku mi heri libi langa!” Na ondrofeni disi leri mi wan bun sani. Mi ben musu gi kotoigi ala ten na ala sma di mi ben miti èn noiti mi ben musu abi mi eigi denki fu a fasi fa den sma disi trutru ben o denki.

Wan Tra Orloku —Èn Fa Mi Libi Waka Baka Dati

Na ini den yari di de na mindri 1930-1940 a ben sori taki orloku ben o broko baka. Dennis, mi brada di ben yongu tin yari moro mi, ben kisi primisi fu no go feti na ini a legre, ma a ben musu tan du en grontapu wroko. Noiti a ben sori taki a ben wani sabi waarheid, fu dati ede mi nanga mi masra aksi den pionier Rupert Bradbury nanga en brada David fu go na en. Den brada disi ben de fu a presi pe mi brada ben e tan. Den ben go na en èn den studeri Bijbel nanga en. Na ini 1942, Dennis teki dopu, a go na ini a pionierwroko baka ten, èn a tron kringopziener na ini 1957.

Wi umapikin, Elisabet, gebore na ini 1938, èn fu man sorgu na osofamiri, dan Zanoa bow a karavan fu wi kon moro bigi. Di Eunice, a di fu tu umapikin fu wi gebore na ini 1942, dan wi ben feni en moro bun fu suku wan oso pe wi ben o man tan moro langa. A sani disi meki taki Zanoa tapu nanga a pionierwroko wan tu yari, èn wi froisi go tan na ini wan pikin oso, krosibei fu a foto Wrexham. Baka ten wi go tan na ini a foto Middlewich di ben de na ini a distrikt Cheshire di ben de krosibei. Drape mi lobi masra dede na ini 1956.

Den tu umapikin fu wi go na ini a furuten diniwroko, èn den ala tu abi wan koloku trowlibi. Eunice nanga en masra, wan owruman, e dini ete leki spesrutu pionier na ini London. A masra fu Elisabet na wan gemeente owruman so srefi, èn mi breiti taki den, den pikin fu den, èn so srefi den fo bakapikin fu mi e libi krosibei fu mi na ini a foto Preston di de na ini a distrikt Lancashire.

Mi breiti taki mi kan waka fu a fesisei fu mi oso go na a Kownukondre zaal di de na abrasei fu a strati. Na ini den yari di pasa mi abi demakandra nanga a grupu di e taki Guyarati. Den e kon makandra tu na ini a Kownukondre zaal disi. A no makriki fu leri a tongo bika mi dofu pikinso now. Son leisi a muilek fu arki èn fu frustan a tongu bun, soleki fa yongu sma kan du dati. Ma a de wan moi tyalensi.

Mi man preiki oso fu oso ete èn mi e hori bijbelstudie ete na ini mi oso. Te den brada nanga sisa e kon luku mi, dan a de wan prisiri ala ten fu fruteri den wan tu fu den fositen ondrofeni fu mi. Mi de nanga tangi na ati srefisrefi te mi e prakseri den blesi di mi kisi, fu di mi ben abi demakandra nanga a pipel fu Yehovah pikinmoro 90 yari langa kaba.

[Futuwortu]

[Prenki na tapu bladzijde 25]

Wan strooibiljet di e meki bekenti a Bijbel lezing „Milyunmilyun Sma Di E Libi Now Noiti Sa Dede”. Mi arki a lezing disi tapu 14 mei 1922

[Prenki na tapu bladzijde 26]

Mi nanga Zanoa wan syatu pisi ten baka di wi trow na ini 1933

[Prenki na tapu bladzijde 26]

Mi e tanapu sei „Elisabeth”, a karavan fu wi di mi masra ben bow