Wini den Problema Di E Tapu Yu fu Go na Fesi!

PRAKSERI na eksempre disi. Yu e start a wagi fu yu. A motor e drai, ma a wagi no man waka. Wan sani broko? Nôno, wan bigi ston e didon leti na fesi wan fu den wiel. Ala san yu musu du fu meki a wagi waka, na fu puru a ston.

Na a srefi fasi, wan tu sma di e studeri Bijbel nanga Yehovah Kotoigi abi problema di kan tapu den fu go na fesi na yeye fasi. Fu eksempre, Yesus ben warskow taki sani soleki „den broko-ede fu a seti fu sani disi èn a korifasi fu a makti fu gudu”, ben sa kan „tyokro a wortu” fu waarheid. Dati e meki taki wan sma no man go na fesi.—Mateus 13:22.

Trawan abi gwenti noso swakifasi di rutu dipi na ini den. Den sani dati e meki taki den no man go na fesi. Wan man fu Yapan di nen Yutaka, ben lobi a Bijbel boskopu, ma toku a ben abi wan seryusu problema. A ben lobi fu dòbel. A ben pruberi furu leisi kaba fu tapu nanga a takru gwenti disi, ma a no ben man du dati. A takru gwenti disi ben meki taki a lasi kefalek furu moni. A lasi dri oso tu, so srefi a lespeki fu en famiri, nanga a wartifasi fu en. A ben o man puru a sani disi di ben tapu en fu tron wan Kresten?

Prakseri tu fu wan uma di nen Keiko. Nanga a yepi fu Bijbel, a ben tapu nanga takru gwenti soleki afkodrei, hurudu, nanga a lukuman-wroko fu en. Ma Keiko e erken: „A moro bigi problema  fu mi ben de a smoko di mi ben smoko tabaka. Someni leisi mi ben pruberi fu tapu nanga a gwenti dati, ma mi no ben man du en.”

Na a srefi fasi, a kan de so taki yu abi wan problema di de neleki wan bigi ston di e tanapu na tapu yu pasi èn di e tapu yu fu go na fesi. Awinsi san na yu problema, yu kan de seiker taki nanga a yepi fu Gado, yu kan wini en.

Prakseri a rai baka di Yesus ben gi den disipel fu en, baka di den no ben man puru wan ogri yeye san ben de na tapu wan man di ben abi fadon-siki. Baka di Yesus ben klari san den disipel fu en no ben man du, dan a ben fruteri den: „Efu unu ben abi bribi di bigi neleki wan pikin mosterdsiri, dan unu sa taigi a bergi disi: ’Opo yusrefi puru fu dya èn go drape’, èn a sa opo ensrefi puru, èn no wan sani no sa de di unu no man du” (Mateus 17:14-20; Markus 9:17-29). Iya, wan problema di kande gersi wan tumusi bigi bergi gi wi, na wan pikin sani srefisrefi gi wi almakti Mekiman.—Genesis 18:14; Markus 10:27.

Leri fu Si Krin San Na den Sani Di E Tapu Wi fu Go na Fesi

Bifo yu kan wini den problema fu yu, yu musu kon sabi san na den problema dati. Fa yu kan du dati? Son leisi, wan sma fu a gemeente, soleki wan owruman noso a sma di e studeri Bijbel nanga yu, sa taki nanga yu fu wan problema di yu abi. Na presi taki yu e weigri fu teki a lobi-ati rai dati, yu musu „gi yesi na trangaleri [nanga sakafasi] èn kon koni” (Odo 8:33). Na tra okasi, yusrefi e kon sabi den swakifasi fu yu te yu e studeri Bijbel. Iya, Gado wortu de „libilibi èn a abi krakti” (Hebrewsma 4:12). Te yu e leisi a Bijbel nanga den Bijbel publikâsi, dan dati kan tyari kon na krin san na den moro dipi prakseri fu yu, den firi fu yu èn san e meki yu handri na wan noso tra fasi. A e yepi yu fu luku efu yu e libi akruderi den hei markitiki fu Yehovah. A e sori yu krin san na den sani di ben kan tapu yu fu go na fesi na yeye fasi.—Yakobus 1:23-25.

Fu eksempre, kon meki wi taki dati wan bijbelstudenti abi a gwenti fu prakseri fisti sani di e wiki seks lostu. Kande a e feni taki a sani disi di a e du, no de wan ogri sani, fu di a e denki taki a no du a e du wan fowtu sani trutru. Ala di a e tan studeri, dan a e leisi den wortu fu Yakobus 1:14, 15: „Ibriwan sma e kisi tesi fu di en eigi lostu e hari en èn e kori en. Baka dati a lostu, te a meki froktu, e tyari sondu kon; sondu fu en sei, te a du, e tyari dede kon.” Now a kon si taki a no ben sa man go na fesi kwetikweti efu a e go doro nanga a sani di a e du! Fa a kan wini a problema disi di e tapu en fu go na fesi?—Markus 7:21-23.

Wini den Problema

Kande nanga a yepi fu wan lepi Kresten, dan a studenti ben sa kan ondrosuku sani moro fini na ini Gado Wortu fu di a e gebroiki na Index van Wachttoren-publikaties. * Fu eksempre, wan sma kan luku na edeprakseri di abi leki nen „Denken, Denkwijze” (Prakseri, Denki). Drape a man si sortu artikel ben tyari kon na doro di e fruteri fa wan sma kan wini den fisti prakseri di e wiki seks lostu. Den artikel disi e poti prakseri na Bijbel tekst di kan yepi a sma, soleki Filipisma 4:8 di e taki: „Ala sani san tru, ala sani san de wan seryusu afersi, ala sani san regtfardiki, ala sani san krin, ala sani san de fu lobi, ala sani san sma e taki bun fu en, sortu bunfasi de tu èn sortu sani san musu kisi prèise, tan prakseri den sani disi.” Iya, na presi taki wan sma e prakseri fisti sani di e wiki seks lostu, dan a musu prakseri sani di krin èn di e bow en na yeye fasi!

Te a studenti e ondrosuku sani moro fini, dan sondro tweifri a sa si tra Bijbel gronprakseri di o yepi en fu no meki a problema fu en kon moro bigi. Fu eksempre, Odo 6:27 nanga Mateus 5:28 e warskow taki wi no musu furu wi prakseri nanga fisti sani di e wiki seks lostu. „Tapu mi ai, so taki den no e si sani di no abi waarde” na so a psalm skrifiman ben begi (Psalm 119:37). A no de fu taki, a no de nofo fu leisi den Bijbel tekst disi nomo. „Na ati fu a regtfardikiwan e prakseri dipi fu sani”, na so a koniman e taki (Odo 15:28). Te a studenti e prakseri dipi fu san Gado e komanderi, ma so srefi tu fu san ede Gado e gi a komando dati, dan a sa kon frustan moro krin taki a de wan koni sani srefisrefi fu waka den pasi fu Yehovah èn taki den reidelek.

 Te fu kaba, a sma di e meki muiti fu wini a problema disi di e tapu en fu go na fesi, musu de klariklari fu suku yepi na Yehovah. A de wan koni sani fu du, bika Gado sabi heri bun fa wi meki. A sabi taki wi no de volmaakti, èn taki wi meki fu doti (Psalm 103:14). Te wi e begi Gado doronomo fu yepi wi, èn te wi e meki muiti srefisrefi fu no prakseri fisti sani di e wiki seks lostu, dan te fu kaba dati sa abi bun bakapisi. A bakapisi de taki wi no sa abi konsensi fonfon, ma taki wi sa abi wan krin konsensi.—Hebrewsma 9:14.

No Tapu fu Du Bun

Awinsi sortu problema yu e feti nanga en, yu musu frustan taki son leisi a kan pasa taki yu e go du a fowtu sani baka. Te dati e pasa, dan kande yu ben sa mandi nanga yusrefi, noso yu ben kan lasi-ati. Ma hori den wortu fu Galasiasma 6:9 na prakseri: „No meki wi tapu fu du san bun, bika na a reti ten wi sa koti efu wi no e kon weri.” Den getrow futuboi fu Gado soleki David nanga Petrus, ben meki wan tu seryusu fowtu di ben meki den kisi syen. Ma den no ben tapu fu du bun. Den ben teki rai nanga sakafasi, den ben tyari kenki kon èn den ben tan tyari densrefi leki tumusi bun futuboi fu Gado (Odo 24:16). Awinsi David ben meki fowtu, toku Yehovah ben kari en „wan man di mi ati feni bun, di sa du ala den sani di mi wani” (Tori fu den Apostel 13:22). Na a srefi fasi, Petrus no ben meki den srefi fowtu baka di a ben meki fosi èn a ben tron wan pilari na ini a Kresten gemeente.

Furu sma na ini a ten disi ben abi bun bakapisi tu fu wini den problema fu den. Yutaka di wi ben taki fu en kaba, ben agri fu studeri Bijbel. A e fruteri: „Yehovah ben horibaka gi mi èn a ben blesi mi ibri leisi te mi ben tyari wan kenki kon. Dati ben yepi mi fu wini a problema di mi ben abi fu dòbel. Mi e prisiri trutru fu si taki den wortu fu Yesus tru srefisrefi — taki te yu abi bribi, srefi ’bergi’ kan skoifi go poti na wan tra presi.” Baka wan pisi ten, Yutaka ben tron wan dinari ini a diniwroko na ini a gemeente.

San pasa nanga Keiko di ben abi a takru gwenti fu smoko tabaka? A Kotoigi di ben studeri nanga en ben gi en a rai fu leisi wan tu artikel na ini Ontwaakt! di ben taki fu a takru gwenti fu smoko tabaka. Keiko ben poti den wortu fu 2 Korentesma 7:1 na ini en oto srefi, fu man leisi en ibri dei so taki dati ben kan yepi en fu tan krin na Yehovah ai. Toku a no ben man tapu fu smoko. „Mi ben mandi nanga misrefi”, na so Keiki e memre ete. „So bun, mi ben bigin aksi misrefi san mi ben wani trutru. Mi wani dini Yehovah noso Satan? Di Keiko ben bosroiti taki a ben wani dini Yehovah, dan a ben begi Yehovah seryusu fu yepi en. „Mi ben fruwondru srefisrefi,” na so a memre, „taki mi ben man tapu fu smoko sondro taki mi kon siki. Mi e sari nomo taki mi no ben du dati langa ten kaba.”

Yu srefi man wini den problema di e tapu yu fu go na fesi. Te yu e handri moro akruderi Bijbel gronprakseri na ini a denki fu yu, den winsi fu yu, den sani du yu e taki èn den sani di yu e du, dan yu sa kisi moro lespeki nanga frutrow gi yusrefi. Den brada nanga sisa na yeye fasi, so srefi den sma na ini yu osofamiri, sa kisi kowru-ati nanga deki-ati te den abi demakandra nanga yu. A moro prenspari sani, na taki yu sa meki a matifasi di yu abi nanga Yehovah Gado kon moro tranga. Gado ben pramisi taki a ben o ’puru iniwan sani tapu a pasi fu a pipel fu en di kan hendri den’, efu den e weigri fu meki Satan basi den (Yesaya 57:14). Yu kan de seiker tu taki efu yu e meki muiti trutru fu puru den problema di e tapu yu fu go na fesi èn e du muiti fu wini den, dan Yehovah sa blesi yu srefisrefi.

[Futuwortu]

[Prenki na tapu bladzijde 28]

Yesus ben pramisi taki te wan sma abi bribi, dan a kan wini problema awinsi den gersi bigi bergi

[Prenki na tapu bladzijde 30]

Te wi e leisi Bijbel, dan dati e gi wi deki-ati fu wini den swakifasi di wi abi na yeye fasi