Abraham—Wan Eksempre fu Bribi
Abraham—Wan Eksempre fu Bribi
„[Abraham ben de] a tata fu ala den wan di abi bribi.”—ROMESMA 4:11.
1, 2. (a) Fa tru Kresten sabi Abraham na ini a ten disi? (b) Fu san ede Bijbel e kari Abraham „a tata fu ala den wan di abi bribi”?
A BEN de a fositen tata fu wan makti nâsi, a ben de wan profeiti, wan bisnisman, so srefi wan fesiman. Ma toku, Kresten na ini a ten disi sabi en moro furu leki wan man di ben abi wan prenspari eigifasi di meki taki Yehovah Gado ben si en leki wan mati. Na eigifasi dati ben de a tranga bribi fu en (Yesaya 41:8; Yakobus 2:23). A man disi ben nen Abraham. Bijbel e kari en „a tata fu ala den wan di abi bribi”.—Romesma 4:11.
2 A no de so taki mansma soleki Abel, Heinok nanga Noa di ben libi fosi Abraham, ben sori bribi? Iya, ma a ben de nanga Abraham taki Gado ben meki a frubontu fu blesi sma fu ala nâsi fu grontapu (Genesis 22:18). Na so fasi a ben tron na agersi tata fu ala den wan di ben sa poti bribi na ini a Siri san Gado ben pramisi (Galasiasma 3:8, 9). Wi ben sa kan taki dati Abraham na wi tata, fu di a bribi fu en na wan eksempre gi wi di wi kan waka na baka. Na ini a heri libi fu en a ben musu sori taki a abi bribi, bika a ben kisi fu du nanga so furu tesi nanga problema ini en libi. Di Abraham ben kisi a komando fu òfer en manpikin Isak, dan wi ben sa kan kari dati a moro hebi tesi di a ben kisi tapu a bribi fu en. Ma langa ten bifo Abraham ben kisi a tesi dati, dan a ben kisi tra tesi pe a ben sori kaba taki a abi bribi (Genesis 22:1, 2). Meki wi ondrosuku wan tu fu den tesi disi now, di a ben kisi biginbigin tapu a bribi fu en. Meki wi si san wisrefi kan leri fu dati na ini a ten disi.
A Komando fu Komoto na Ur
3. San Bijbel e fruteri wi fu a situwâsi pe Abraham gro kon bigi?
3 Bijbel e bigin taki fu Abram (baka ten a kisi a nen Abraham), na ini Genesis 11:26, di e taki: „Tera ben libi seibitenti yari, èn baka dati a ben tron papa fu Abram, Nahor nanga Haran.” Abram ben de wan bakapikin fu Sem di ben abi frede gi Gado (Genesis 11:10-24). Akruderi Genesis 11:31, Abram nanga en famiri ben tan na ini a gudu foto „Ur fu den Kaldeasma”. Dati ben de wan foto di wan ten ben de na owstusei fu na Eufraatliba. * So bun, Abram no ben gro kon bigi leki wan sma di ben e libi na ini tenti, e froisi fu a wan tanpresi go na wan tra tanpresi. Ma a ben tan na ini wan gudu foto pe sma ben abi furu bun sani fu man libi wan switi libi. Na ini Ur, furu pikin wenkri ben de pe sma ben kan bai sani di komoto na tra kondre. Na ini den strati fu Ur, kefalek bigi weti oso ben e tanapu sei na sei. Na ini den oso dati, den ben abi wan peipi sistema tu fu puru watra.
4. (a) Sortu sani na ini Ur ben de wan tyalensi gi den anbegiman fu a tru Gado? (b) Fa a du kon taki Abram poti bribi na ini Yehovah?
4 Boiti ala den materia sani di Ur ben abi, tra sani ben de tu di ben de wan seryusu tyalensi gi ibri sma di ben wani dini a tru Gado. Ur ben de wan foto di lai nanga afkodrei nanga kruktubribi. Iya, a moro prenspari sani na ini a foto dati ben de wan tumusi hei tempel di gersi wan piramide. Drape den ben anbegi a munkenki gado Nanna. A ben musu de so, taki sma ben dwengi Abram fu teki prati na a kruktu anbegi disi. Kande wan tu famiriman srefi ben dwengi en fu teki prati na dati. Soleki fa a sori akruderi Dyu gwenti, dan Tera srefi, a papa fu Abram, ben meki kruktu gado (Yosua 24:2, 14, 15). Awinsi fa a no fa, Abram no ben teki prati na a kruktu èn falsi anbegi disi. Sem, a fositen tata fu en di ben grani kaba, ben de na libi ete èn sondro tweifri a ben fruteri en san a ben sabi fu a tru Gado. A bakapisi fu dati ben de, taki Abram no ben poti bribi na ini Nanna, ma na ini Yehovah!—Galasiasma 3:6.
Wan Tesi Tapu a Bribi
5. San Gado komanderi Abram di a ben de na Ur ete? San Gado ben pramisi en?
5 Abram ben o kisi wan tesi tapu a bribi fu en. Di Gado ben sori ensrefi na Abram, dan a ben gi en a komando: „Komoto na yu kondre èn na yu famiri èn na a oso fu yu papa, go na a kondre di mi sa sori yu; èn mi sa meki yu tron wan bigi nâsi èn mi sa blesi yu èn mi wani meki yu nen kon bigi; èn sori fu de wan blesi. Èn mi sa blesi den wan di e blesi yu, èn a sma di e kari ogri na yu tapu, mi sa fluku, èn nanga yepi fu yu ala famiri fu grontapu fu tru sa blesi densrefi.”—Genesis 12:1-3; Tori fu den Apostel 7:2, 3.
6. Fu san ede Abram ben musu abi tru bribi fu man komoto na Ur?
6 Abram ben owru èn a no ben abi pikin. Fa a ben kan tron „wan bigi nâsi”? Pe a kondre disi pe Gado ben komanderi en fu go, ben de trutru? Gado no ben fruteri en disi na a ten dati. Fu dati ede, Abram ben musu abi tru bribi fu man gowe libi a gudu foto Ur, so srefi ala den bun sani di ben de drape. A buku di nen Family, Love and the Bible (Osofamiri, Lobi nanga Bijbel) e taki fu na owruten: „A moro bigi strafu di sma ben kan gi wan famiriman te a du wan seryusu ogri, ben de fu seni en gowe, fu puru a reti di a ben abi leki ’memre’ fu a famiri. . . . Fu dati ede, a de wan tumusi aparti sani taki Abraham gowe libi a kondre fu en, èn so srefi den famiri fu en. A du di a ben du san Gado ben aksi fu en, e sori taki a ben gi yesi na Gado sondro draidrai èn taki a ben frutrow trutru na En tapu.”
7. Fa Kresten na ini a ten disi ben sa kan kisi tesi leki di fu Abram?
7 A kan de so taki Kresten na ini a ten disi e kisi den srefi sortu tesi disi. Neleki Abram, kande sma e dwengi wi fu feti na baka materia sani na presi fu poti prakseri na theokrasia afersi (1 Yohanes 2:16). Kande wi e kisi gens fu sma na ini na osofamiri di no de na bribi. So srefi famiriman di den ben puru fu a gemeente, ben sa kan kori wi fu suku demakandra nanga ogri sma (Mateus 10:34-36; 1 Korentesma 5:11-13; 15:33). So bun, Abram ben poti wan tumusi moi eksempre gi wi. A ben poti en matifasi nanga Yehovah na fesi ala tra sani — srefi na fesi a banti di a ben abi nanga en famiri. A no ben sabi seiker fa, o ten, noso pe den pramisi fu Gado ben o kon tru. Ma toku a ben de klariklari fu tyari en libi na wan fasi di e sori taki a ben poti ala en frutrow tapu den pramisi dati. Disi e gi wi deki-ati trutru fu poti a Kownukondre na a fosi presi ini wi eigi libi na ini a ten disi!—Mateus 6:33.
8. Sortu krakti a bribi fu Abram ben abi tapu den krosibei famiriman fu en? San Kresten ben kan leri fu disi?
8 Fa a ben de nanga den krosibei famiriman fu Abram? Soleki fa a sori, dan a tranga bribi fu Abram ben abi furu krakti na den tapu. Dati de so, bika en wefi Sarai, so srefi en neef Lot di no ben abi papa, ben kisi deki-ati fu gi yesi na a komando fu Gado fu gowe libi Ur. Abram en brada Nahor makandra nanga wan tu fu den bakapikin fu en ben gowe libi Ur baka ten, èn ben go tan na Haran pe den ben anbegi Yehovah (Genesis 24:1-4, 10, 31; 27:43; 29:4, 5). We, srefi Tera, a papa fu Abram, ben agri fu gowe makandra nanga en manpikin! Fu dati ede Bijbel e gi Tera a grani, taki en leki famiri edeman teki a bosroiti fu go na Kanan (Genesis 11:31). Kande wisrefi sa abi bun bakapisi te wi e gi den famiriman fu wi kotoigi na wan koni fasi.
9. San Abram ben musu sreka bifo a ben teki waka, èn san a ben lasi kande fu di a ben musu du dati?
9 Bifo Abram ben bigin nanga a waka fu en, dan a ben abi furu fu du. A ben abi fu seri den gron nanga gudu fu en. A ben abi fu bai tenti, kameili, nyanyan nanga wrokosani di a ben o abi fanowdu. A kan de so taki Abram ben lasi moni fu di a ben musu sreka den sani fu en so esi, ma a ben prisiri srefisrefi fu gi yesi na Yehovah. Di a ben kaba sreka ala sani, dan den kameili nanga a grupu sma di ben e go makandra nanga Abram ben tanapu na dorosei fu den skotu fu Ur. Den ben de klariklari fu teki waka. Dati ben musu fu de wan tumusi prenspari dei! A grupu sma disi ben waka nanga den kameili go na a noord-westsei, ala di den ben waka sei fu na Eufraatliba. Baka someni wiki, den ben waka so wan 1000 kilometer te leki den doro wan foto na noordsei fu Mesopotamia di nen Haran. Den grupu sma di ben teki waka nanga den kameili fu den na ini a kontren dati, ben go na a foto dati fu teki bro bifo den ben teki waka go moro fara.
10, 11. (a) Fu san ede Abram ben tan na ini Haran fu wan pisi ten? (b) San na a deki-ati di wi kan gi den Kresten di e sorgu den papa nanga mama di kon grani?
10 Abram ben seti ensrefi na Haran, kande fu di a ben prakseri en papa Tera di kon grani (Lefitikus 19:32). Na a srefi fasi, furu Kresten na ini a ten disi abi a frantwortu fu sorgu gi papa nanga mama di kon grani noso siki. Son wan fu den ben musu tyari kenki kon srefi, fu man du dati. Te a de fanowdu fu du dati, dan den sma disi kan de seiker taki den òfer di den e tyari na wan lobi-ati fasi, de „bun na Gado ai”.—1 Timoteus 5:4.
11 Wan heri pisi ten ben pasa. Dan „den dei fu Tera ben kon de tu hondro nanga feifi yari, dan Tera dede na ini Haran”. Sondro tweifri, Abram ben sari srefisrefi taki a papa fu en dede. Ma di a pisi ten di den ben row ben pasa, dan wantewante a opo gowe. „Abram ben abi seibitenti na feifi yari di a komoto na Haran. Na so Abram ben teki en wefi Sarai, nanga Lot a manpikin fu en brada, èn ala den gudu di den ben tyari kon makandra èn ala den sili di den ben kisi na ini Haran, èn den ben teki pasi go na a kondre Kanan.”—Genesis 11:32; 12:4, 5.
12. San Abram ben du ala di a ben e libi na ini Haran?
12 A de wan aparti sani taki Abram ben ’tyari gudu kon makandra’ di a ben de na Haran. Ala di Abram ben lasi furu sani na materia sei fu di a ben musu komoto na Ur, toku a komoto na Haran leki wan guduman. A de krin taki na blesi Gado ben blesi en, meki a kon gudu (Preikiman 5:19). Gado no e pramisi ala pipel fu en na ini a ten disi taki den sa tron guduman, ma a e hori ensrefi na a pramisi fu en taki a sa sorgu gi den wan di ’libi oso, brada, noso sisa’ gi a Kownukondre (Markus 10:29, 30). Abram ’ben kisi sili’ tu. Dati wani taki dati a ben kisi furu futuboi. A Yerusalem Targum nanga a Kaldew Parafrase e taki dati Abram ’ben taki nanga tra sma fu a bribi fu en’ (Genesis 18:19). A bribi fu yu e meki taki yu wani taki nanga den birtisma fu yu, nanga sma na yu wrokope, noso nanga yu skoromati? Abram no ben seti en libi na Haran na so wan fasi taki a ben frigiti a komando fu Gado. Na presi fu dati a ben gebroiki a pisi ten di a ben de na Haran, na wan bun fasi. Ma now a pisi ten dati ben kon na wan kaba. „Dan, Abram ben go na pasi soleki fa Yehovah ben taigi en.”—Genesis 12:4.
Den Koti na Eufraatliba Abra
13. Tapu sortu dei Abram ben koti na Eufraatliba abra, èn san disi wani taki?
13 Abram ben musu teki waka ete wan leisi. Di a komoto na Haran, dan a grupu sma di ben de nanga en nanga den kameili, ben teki waka go na westsei go so wan 90 kilometer moro fara. A kan de so taki Abram ben teki bro na wan presi na a Eufraatliba, abrasei fu na owruten bisnispresi Karkemis. Sma di ben teki waka na ini a gran sabana ben kon na a prenspari presi disi fu koti a liba abra. * Tapu sortu dei Abram, a grupu sma di ben de nanga en, nanga den kameili ben koti a liba abra? Bijbel e sori taki a ben du dati 430 yari bifo den Dyu ben gowe komoto na Egipti, tapu 14 Nisan 1513 b.G.T. Exodus 12:41 e taki: „A ben pasa so, taki na a kaba fu den fo hondro dritenti yari, iya, a ben pasa tapu a srefi dei disi, taki ala den legre fu Yehovah komoto na a kondre Egipti.” Ne soleki fa a sori, dan a frubontu nanga Abraham ben bigin wroko tapu 14 Nisan 1943 b.B.T. di Abram ben gi yesi na Gado fu koti na Eufraatliba abra.
14. (a) San Abram ben man si nanga en ai fu bribi? (b) Na sortu fasi a pipel fu Gado na ini a ten disi, kisi moro furu blesi leki Abram?
14 Abram ben gowe libi wan gudu foto. Ma a ben man si „a foto” now kaba „di abi trutru fondamenti”, wan regtfardiki tirimakti di sa tiri libisma (Hebrewsma 11:10). Iya, ala di Abram no ben sabi ala sani finifini, toku a ben man si na fesi kaba taki Gado ben abi na prakseri fu frulusu a libisma famiri di e dede. Na ini a ten disi, a de wan blesi trutru taki wi kon frustan den prakseri fu Gado moro krin leki Abram (Odo 4:18). A „foto” noso a Kownukondre tiri di Abram ben howpu na tapu, de wan trutru tiri now. A ben seti na ini hemel sensi 1914. Disi no musu buweigi wi fu handri na wan fasi di e sori taki wi e bribi na ini Yehovah èn e frutrow na en tapu?
A Syatu Pisi Ten na ini a Pramisi Kondre E Bigin
15, 16. (a) Fu san ede Abram ben musu abi deki-ati fu bow wan altari gi Yehovah? (b) Fa Kresten na ini a ten disi kan abi deki-ati neleki Abram?
15 Genesis 12:5, 6 e fruteri wi: „Te fu kaba den doro a kondre Kanan. Abram ben waka na ini a kondre te a doro na a presi Sikem, krosibei fu den bigi bon fu More.” Sikem ben de 50 kilometer noordsei fu Yerusalem. A ben didon na ini wan lagipresi pe sani ben e gro bogobogo. Sma ben kari a lagipresi dati a „paradijs fu a santa kondre”. Ma „na a ten dati, a Kanansma ben de na ini a kondre”. Den Kanansma ben libi wan doti libi. Dati meki Abram ben musu fu du furu muiti fu kibri en osofamiri, meki a doti libi fu den sma disi no pori den.—Exodus 34:11-16.
16 Ete wan leisi „Yehovah ben kon na Abram now èn ben taki: ’Na yu siri mi sa gi a kondre disi.’” Dati na wan tumusi prisiri nyunsu! A no de fu taki dati Abram ben musu abi bribi fu man prisiri nanga wan pramisi di soso den bakapikin fu en ben o kisi. Ma toku Abram „ben bow wan altari drape gi Yehovah, di ben kon na en” (Genesis 12:7). Wan Bijbel sabiman e taki: „Te wan sma ben bow wan altari na ini wan kondre, dan dati ben sori taki a sma ben teki a kondre abra. Fu di a ben du dati, meki a ben abi a reti fu anbegi drape.” Wan sma ben musu abi deki-ati tu fu bow so wan altari. Sondro tweifri, na altari disi ben de neleki na altari di den ben musu meki baka ten akruderi a Wet frubontu. Dati wani taki dati na altari no ben musu meki nanga ston di den koti puru fu wan presi (Exodus 20:24, 25). Na altari ben sa de heri tra fasi leki den altari san den Kanansma ben gebroiki. Na so fasi, Abram ben sori ala sma nanga deki-ati taki a ben de wan anbegiman fu a tru Gado, Yehovah. Fu di a ben du dati, meki a ben tyari a bita-ati fu tra sma kon na en tapu èn en libi ben de ini kefar. Fa a de nanga wi na ini a ten disi? A de so taki son wan fu wi, spesrutu den yonguwan, e syen fu meki birtisma noso skoromati sabi taki wi e anbegi Yehovah? Meki a deki-ati di Abram ben sori, gi wi alamala tranga fu prisiri srefisrefi taki wi de futuboi fu Yehovah!
17. Fa Abram ben sori taki a ben de wan preikiman fu a nen fu Gado? Na san disi e memre Kresten na ini a ten disi?
17 Awinsi pe Abram ben go, a ben poti na anbegi fu Yehovah na a fosi presi ala ten. „Baka dati a ben froisi gowe fu drape fu go na a bergi kontren owstusei fu Bethel èn a ben opo en tenti, nanga Bethel na westsei èn Ai na owstusei. Baka dati a ben bow wan altari drape gi Yehovah èn a ben bigin kari a nen fu Yehovah” (Genesis 12:8). Den Hebrew wortu „kari a nen”, so srefi wan taki „meki a nen bekènti (preiki fu a nen)”. A ben musu de so, taki Abram ben meki a nen fu Yehovah bekènti na den birtisma fu en na Kanan (Genesis 14:22-24). Disi e memre wi na a plekti di wi abi fu „meki en nen bekènti na publiki” someni leki wi kan.—Hebrewsma 13:15; Romesma 10:10.
18. Fa Abram ben handri nanga den sma fu Kanan?
18 Abram no ben tan langa na no wan fu den presi dati. „Baka dati, Abram opo gowe fu wan kampu go na wan tra kampu te a doro na a Negeb” — wan drei kontren na zuidsei fu den bergi fu Yuda (Genesis 12:9). Abram ben go fu a wan tanpresi go na wan tra tanpresi doronomo. Na ibri nyun presi pe a ben go, a ben meki sma sabi taki a ben de wan anbegiman fu Yehovah. Na so fasi en nanga en osofamiri „ben meki bekènti na publiki taki den ben de freimdesma nanga sma di ben tan wan pisi ten nomo na ini a kondre” (Hebrewsma 11:13). Ala ten den ben luku bun fu no tron bun mati fu den heiden birtisma fu den. Na a srefi fasi, Kresten na ini a ten disi musu de sma di „no de wan pisi fu grontapu” (Yohanes 17:16). Wi musu abi switifasi nanga lespeki gi den birtisma fu wi nanga den sma na wi wrokope, ma wi musu luku bun taki wi no e tyari wisrefi na wan fasi di e sori a yeye fu a grontapu disi di no sabi Gado.—Efeisesma 2:2, 3.
19. (a) Fu san ede a fasi fa Abram nanga Sarai ben libi, ben musu de wan tyalensi gi den? (b) Sortu tyalensi Abram ben o kisi moro fara?
19 Wi no musu frigiti taki a no ben kan de wan makriki sani gi Abram noso Sarai fu kon gwenti a libi pe den musu froisi doronomo fu wan tanpresi go na wan trawan ala ten. Den ben nyan meti nanga tra sani di den kisi fu den ipi meti fu den, na presi fu bai nyanyan na wan fu den pikin wenkri na Ur di ben seri ala sortu sani. Den ben e libi na ini tenti na presi fu wan bun oso (Hebrewsma 11:9). Abram ben abi furu fu du na ini en libi. A ben musu sorgu den ipi meti nanga den futuboi fu en. A ben musu de so, taki Sarai ben du den wroko di uma fu a kulturu dati ben gwenti fu du: masi deki, baka brede, drai keke, nai krosi (Genesis 18:6, 7; 2 Kownu 23:7; Odo 31:19; Esekièl 13:18). Ma toku, nyun tesi ben de fu kon. Dyonsro Abram nanga en osofamiri ben o miti wan situwâsi di ben o meki a libi fu den kon ini kefar! A bribi fu Abram ben sa tranga nofo fu miti a tyalensi dati?
[Futuwortu]
^ paragraaf 3 Nownow, na Eufraatliba e lon so wan 16 kilometer na owstusei fu a presi pe Ur ben de fosi. Ma sma abi buweisi now taki na ini owruten, a liba ben lon leti na westsei fu a foto. Fu dati ede, Bijbel ben kan taki baka ten dati Abram ben kon fu „a tra sei fu na [Eufraat] Liba”.—Yosua 24:3.
^ paragraaf 13 Hondrohondro yari baka dati, Asurnasirpal II di ben de Kownu fu Asiria, ben gebroiki pisipisi udu di tai makandra fu koti na Eufraatliba abra, krosibei fu Karkemis. Bijbel no e taki efu Abram ben musu du dati tu, noso efu en nanga a grupu sma di ben teki waka makandra nanga en, ben waka nanga den kameili go na ini a watra fu man koti a liba abra.
Yu Ben Si Disi?
• Fu san ede Bijbel e kari Abram „a tata fu ala den wan di abi bribi”?
• Fu san ede Abram ben musu abi bribi fu man gowe libi Ur fu den Kaldeasma?
• Fa Abram ben sori taki na anbegi fu Yehovah ben de a moro prenspari sani gi en?
[Aksi fu a tori disi]
[Karta na tapu bladzijde 16]
(Efu yu wani si pe den sani disi skrifi, luku a tijdschrift)
A WAKA FU ABRAM
Ur
Haran
Karkemis
KANAN
Bigi Se
[Sma di abi a reti fu a karta]
Disi teki puru fu wan karta di Pictorial Archive (Near Eastern History) Est. nanga Survey of Israel abi ala reti fu dati
[Prenki na tapu bladzijde 15]
Abram ben musu abi bribi fu man gowe libi a switi libi di a ben kan abi na Ur
[Prenki na tapu bladzijde 18]
Fu di Abram nanga en osofamiri ben e libi na ini tenti, meki den „ben meki bekènti na publiki taki den ben de freimdesma nanga sma di ben tan wan pisi ten nomo na ini a kondre”