Aksi fu Leisiman

O langa Yob nyan pina?

Son sma e denki taki Yob ben kisi tesi furu yari langa, ma a buku Yob no e taki dati a ben nyan pina so wan langa pisi ten.

A buku e sori taki den fosi tesi di ben miti Yob, pasa na ini wan syatu pisi ten nomo. Den tesi disi ben meki taki Yob lasi memre fu en osofamiri na ini dede, èn a lasi den gudu fu en so srefi. Wi e leisi: „Now a dei ben doro taki [Yob] en manpikin nanga en umapikin ben e nyan èn den ben e dringi win na ini na oso fu a brada fu den di ben de a fosi geborewan.” Yob kisi a wan nyunsu baka a trawan taki a ben lasi furu sani. A kisi nyunsu taki a ben lasi den meti fu en, en buriki, en skapu, en kameili, èn so srefi den dinari fu en di ben e sorgu gi den meti dati. Soleki fa a sori, dan wantron baka den sani disi, dan Yob kon sabi taki den manpikin nanga den umapikin fu en ben lasi den libi na a ten di den „ben e nyan èn ben e dringi win na ini na oso fu a brada fu den di ben de a fosi geborewan”. A sori taki ala den sani disi pasa tapu wán dei.—Yob 1:13-19.

Den tesi di Yob kisi baka dati ben musu fu teki wan moro langa pisi ten. Satan go na Yehovah èn a taigi en taki Yob ben o brokokindi te a ben o kisi tesi tapu en soifri retifasi, dati wani taki tesi na en eigi skin. Dan Satan naki Yob nanga „wan takru sweri fu en ondrofutu te na en edekrabasi”. A kan taki wan pisi ten pasa bifo a siki disi ben panya na tapu en heri skin. Èn seiker a ben teki ten bifo a nyunsu fu „ala den rampu di ben miti en” ben doro den sokari trowstuman fu en di ben kon fu trowstu en baka dati.—Yob 2:3-11.

Elifas ben de fu Teman, wan presi na ini a kondre fu Edom, èn Sofar ben de fu wan kontren na a noordwest-sei fu Arabia. A sani disi e sori taki den no ben e tan fara fu Yob di ben e tan na ini Us, wan kondre di kande ben de na a noordsei fu Arabia. Ma Bildad ben de wan Suhietsma, èn wi sabi taki den sma disi ben e libi na a lanki fu na Eufraatliba. Efu na a ten dati Bildad ben de na ini a kontren pe a ben e tan, dan kande a ben teki wiki noso mun bifo a ben yere fu a situwâsi fu Yob, so taki a ben kan reis go na Us. A no de fu taki, dati a kan taki den dri man disi ben de krosibei fu pe Yob ben e tan di a bigin nyan pina. Awansi fa a no fa, di den dri mati fu Yob doro, den „tan sidon na gron nanga en seibi dei nanga seibi neti”, sondro fu taki.—Yob 2:12, 13.

Ne Yob kisi den lasti tesi fu en, èn a tori fu den tesi disi skrifi finifini na ini furu kapitel fu a buku. Den sokari trowstuman ben haritaki nanga Yob, èn furutron Yob ben piki den. Di den kaba du dati, dan a yonkuman Elihu gi Yob piri-ai, èn Yehovah gi Yob trangaleri komoto fu hemel.—Yob 32:1-6; 38:1; 40:1-6; 42:1.

Den sani disi e sori taki a heri pisi ten di Yob nyan pina, kande doro wan tu mun, kande a no doro wán yari. Kande yu srefi ondrofeni taki a gersi leki hebi tesi e tan tumusi langa. Ma wi no musu frigiti taki den e kon na wan kaba, neleki fa den di fu Yob ben kon na wan kaba. Awansi o langa wi e kisi den tesi fu wi kaba, meki wi hori na prakseri taki Gado e horibaka gi wi. Wi e kisi a dyaranti dati fu den wortu disi di skrifi na ondro a krakti fu en santa yeye: „Bika ala di a banawtu de gi wan syatu pisi ten nomo en lekti, toku a e tyari gi wi wan glori di moro bigi srefisrefi en e tan fu têgo” (2 Korentesma 4:17). Na apostel Petrus ben skrifi: „Ma baka di unu pina wan syatu pisi ten, dan a Gado fu ala no-frudini bun-ati, di ben kari unu kon na ini en têgo glori na ini wánfasi nanga Krestes, ensrefi sa tyari a leri di unu kisi kon na wan kaba, a sa meki unu kisi wan fasti bosroiti, a sa meki yu kon tranga.”—1 Petrus 5:10.