Fa fu Meki den Yongu Yari fu Yu Waka Bun

DEN ben aksi sma di e libi na ini wan kondre na Europa fu luku sortuwan fu den dri sani disi den ben sa wani: fu abi moifasi, fu abi gudu, noso fu tan yongu. Moro furu sma ben wani fu tan yongu. Iya, gi yonguwan nanga owruwan den tini yari èn a ten te den abi 20 te go miti 25 yari, de wan spesrutu ten na ini a libi. Ibri sma wani taki yonguwan musu gro kon tron bigisma na wan bun fasi. Ma fa den kan du dati?

Bijbel kan yepi den yonguwan disi? Sondro tweifri a piki na iya. Meki wi go luku tu fasi fa Gado Wortu kan gi yongu sma spesrutu yepi. Kande Bijbel kan gi moro yepi srefi na yonguwan leki a e gi dati na tra sma.

Feni En Nanga Tra Sma

Jugend 2000 na wan raportu di e fruteri fu wan ondrosuku di ben du na ini wan bigi pisi fu Doisrikondre. Den ben ondrosuku a fasi fa moro leki 5000 yongu sma na ini Doisrikondre e denki, san na den sani di den e si leki warti sani, èn fa den e tyari densrefi. Na ondrosuku e sori taki, te yongu sma e du sani na ini den fri ten — soleki fu arki poku, du wan sport, noso gebroiki den fri ten fu soso — dan pikinmoro ala ten den de nanga tra sma. Yonguwan wani de nanga den speri, kande moro srefi leki tra sma. A tru taki efu yongu sma wani taki den yongu yari fu den e waka bun, dan den musu man feni en nanga tra sma.

Ma a no ala ten a makriki fu feni en nanga tra sma. Fu tru, furu yonkuman nanga yongu uma e taki dati den abi problema furutron fu libi bun nanga tra sma. Ma Bijbel kan gi trutru yepi ini a tori disi. A Wortu fu Gado abi tirilin fu yepi yongu sma, so taki den kan libi bun nanga tra sma. San Bijbel e taki?

Wan fu den moro prenspari markitiki fu man libi bun nanga tra sma na a Gowtu Lin: „Alasani disi oen wani trawan foe doe gi oen, so oen moesoe doe gi den toe.” Te yu e handri nanga tra sma na wan switi fasi èn te yu e sori tra sma lespeki nanga wartifasi, dan dati e gi den deki-ati fu handri nanga yu na a srefi fasi. Te yu e sori switifasi, dan dati e yepi fu no abi trobi nanga problema. Efu tra sma kon sabi yu leki wan sma di e hori trawan na prakseri, dan a no de fu taki dati den sa warderi yu èn den sa wani de nanga yu. Yu no e firi koloku te trawan wani de nanga yu?—Mateus 7:12; Da Bijbel na ini Sranantongo.

Bijbel e gi yu a rai fu „lobi tra sma soleki fa yu lobi yusrefi”. A lobi di yu musu lobi yusrefi wani taki dati yu musu sorgu gi yusrefi èn taki yu musu lespeki yusrefi na wan yoisti fasi. Yu no musu denki tumusi furu fu yusrefi. Na a tra sei a no musu de so, taki yu no e prakseri yusrefi kwetikweti. Fu san ede disi sa yepi yu? We, efu yu no e lespeki yusrefi, dan kande yu sa si ala pikin sani di trawan du, leki  wan bigi sani. Disi sa meki taki yu no sa man feni en nanga tra sma noso yu no sa man tron mati fu tra sma. Ma efu yu abi a yoisti lespeki gi yusrefi, dan dati sa meki taki yu man de bun mati nanga tra sma.—Mateus 22:39.

Te tu sma e tron mati fu makandra, dan den ala tu musu du muiti fu meki a matifasi kon tranga. Yu sa firi koloku te yu e teki ten fu meki wan matifasi kon moro tranga, fu di „a moro koloku fu gi sani, leki fu kisi sani”. Wan fasi fa yu kan gi sma sani na te yu e gi trawan pardon. Disi wani taki dati yu no e luku den pikinpikin fowtu fu tra sma; yu no e fruwakti volmaaktifasi fu den. Bijbel e fruteri wi: ’Meki ala sma kon sabi a reidelekfasi fu yu.’ Fu tru, ’so langa a e anga fu yu, abi vrede nanga ala sma’. Ma san yu musu du te wan mati e sori yu taki yu abi wan swakifasi? Fa yu e handri? Luku a bun rai di Bijbel e gi: „No hasti yusrefi fu atibron na ini yu yeye”, bika „den hati sani di wan mati e taigi yu, bun.” A no de so taki den mati fu yu abi krakti tapu a denki fu yu, a fasi fa yu e taki, èn a fasi fa yu e tyari yusrefi? Fu dati ede Bijbel e warskow: „Takru kompe e pori bun gwenti.” Na a tra sei, „a sma di e waka nanga koni sma, sa kon koni”.—Tori fu den Apostel 20:35; Filipisma 4:5; Romesma 12:17, 18; Preikiman 7:9; Odo 13:20; 27:6, 1 Korentesma 15:33.

Marco e taki gi furu yonkuman nanga yongu uma, te a taki: „Den markitiki fu Bijbel e yepi trutru fu feni en nanga tra sma. Son sma di mi sabi, e prakseri densrefi nomo na ini a libi; den e luku nomo fa den kan kisi wini gi densrefi wawan. Bijbel e leri wi fu no prakseri wisrefi nomo, ma fu prakseri tra sma tu. Soleki fa mi e si en, dan dati na a moro bun fasi fa sma kan kisi bun matifasi nanga trawan.”

Den sani di yongu sma soleki Marco e leri fu Bijbel, e yepi den na ini den yongu yari. Ma a e yepi den tu te na ini a ten di e kon. Ini a tori fu a tamara, wi e feni wan tra fasi fa Bijbel kan yepi den yonguwan na wan spesrutu fasi.

Frede gi a Tamara

Furu yongu sma wani ondrosuku sani. Kande moro leki tra sma srefi, yonguwan wani sabi san e pasa èn fu san ede den sani dati e pasa. Moro leki iniwan tra buku, Bijbel e fruklari fu san ede den situwâsi na grontapu de leki fa den de, èn a e fruteri wi so srefi san wi kan fruwakti na ini a tamara. Disi na den sani di yongu sma wani sabi. Fu san ede wi kan de seiker taki den wani sabi den sani disi?

We, furu sma e bribi taki yonguwan e libi soso gi a dei fu tide. Ma ala di sma e bribi dati, toku wan tu ondrosuku di du, e sori wan sani di e difrenti pikinso fu a denki disi. Den ondrosuku e sori taki furutron, yonguwan e luku bun san e pasa lontu den. Dan den e prakseri fa a libi ben sa kan de na ini a tamara. Wan buweisi fu disi na taki 3 fu den 4 yonkuman nanga yongu uma di den ben aksi fa den e denki fu a tori, ben taki dati den e prakseri „furutron” noso „bun furu leisi” fu a tamara. Ala di furu yonguwan abi howpu gi a tamara, toku moro furu fu den yongu sma e broko den ede nanga a tamara fu den.

Fu san ede den frede san o pasa? Furu yonguwan na ini a ten disi abi problema kaba nanga takrudu, ogri di e du nanga tranga, nanga a gebroiki di den e gebroiki drugs na wan fowtu fasi. Yonguwan abi broko-ede efu den sa feni wan bun wroko na ini wan libimakandra pe sma e feti nomonomo fu kisi bun posisi. Den e firi leki sma e dwengi den fu kisi bun cijfer na skoro noso fu de wan fu den moro bun wrokoman na a wrokope fu den. Wan  yongu uma di abi 17 yari e kragi: „Wi e libi na ini wan libimakandra pe sma no abi sari-ati èn pe den e prakseri den eigi wini nomo. Ibriwan sma e pruberi fu du san ensrefi wani du. Ala ten yu musu buweisi san yu man du; a sani dati e meki mi lasi-ati srefisrefi.” Wan tra yongu sma di abi 22 yari ben taki: „Den sma di man du sani bun e go na fesi na ini a libimakandra èn den e libi wan bun libi; den de tevrede èn den abi seikerfasi. Gi tra sma, sani no e waka so bun. Efu fu difrenti reide ede wan sma no man du sani so bun leki den speri fu en, dan a no sa abi bun bakapisi na ini en libi.” Fu san ede sma e strei so furu na ini a libi? Ala ten a libi sa de leki disi?

Wan Fruklari Di Wi Kan Frustan

Te yongu sma e luku a libimakandra èn den e kisi broko-ede fu a situwâsi, dan, awansi den sabi dati noso no sabi dati, den e agri nanga Bijbel. A Wortu fu Gado e sori taki a „libimakandra na ini a ten disi pe sma no e sori sari-ati èn pe den e prakseri den eigi wini nomo”, na wan marki fu a ten disi. Na apostel Paulus ben skrifi fu a ten fu wi na ini wan brifi di a ben seni go na wan yonkuman di ben nen Timoteus: „Muilek ten sa kon, di tranga fu pasa.” Fu san ede den ten ben o muilek, èn fu san ede den ben o tranga fu pasa? Fu di, soleki fa Paulus  e skrifi moro fara, sma ben sa „lobi densrefi nomo, den sa lobi moni, den sa de asranti, den sa abi heimemre, . . . den sa de sondro tangi, den no sa de loyaal, . . . den sa abi wan krasi fasi fu du sani”. Den wortu disi no e sori soifri fa furu sma na ini a ten disi e tyari densrefi?—2 Timoteus 3:1-3.

Bijbel e taki dati den muilek ten disi ben o pasa „na ini den lasti dei”, bifo bigi kenki ben o kon na ini a heri libisma libimakandra. Den kenki disi sa abi krakti tapu ibri sma, yonguwan èn so srefi owruwan. Sortu kenki sa kon? Heri esi, wan tiri na ini hemel sa teki a tirimakti fu libisma abra. Na ala sei, den sma di o saka densrefi na ondro a hemel tirimakti disi sa abi „vrede pasa marki”. „Na den regtfardiki sma srefi sa abi grontapu leki a gudu fu den, èn den sa libi na tapu fu têgo.” Sma no sa abi den broko-ede moro di den abi now.—Psalm 37:11, 29.

Bijbel na a wan-enkri buku di e meki wi kon sabi soifri san o pasa na ini a tamara, èn wi trutru kan frutrow san a e taki. Te wan yongu sma sabi san a kan fruwakti na baka wan tu yari, dan a kan sreka ensrefi gi den sani di o pasa. A o gi en wan firi fu seikerfasi èn a o sabi fa fu tyari en libi na wan bun fasi. A firi disi sa meki taki a no sa kon bruya èn a no sa abi so furu broko-ede. Yonguwan musu frustan san e pasa na ini a libimakandra èn den musu kon sabi san sa pasa na ini a tamara. We, Bijbel e taki fu a spesrutu sani disi di de so prenspari gi den.

Meki Sani Waka Bun na ini Yu Yongu Yari

San den yonguwan musu du dan so taki sani kan waka bun gi den na ini den yongu yari? A de so taki sani sa waka bun nomo te den abi hei skoroleri, materia gudu, noso wan bigi grupu fu mati? Furu sma e denki dati. Den tini yari èn den yari baka dati musu yepi wan sma fu abi wan bun bigin na ini a libi. Nanga tra wortu, efu sani e waka bun na ini yu yongu yari, dan dati kan sori fa yu libi sa de baka ten.

Soleki fa wi si kaba, dan Bijbel kan yepi wan yongu sma fu meki sani waka bun na ini den yongu yari fu en. Furu yonguwan si kaba dati disi pasa na ini den eigi libi. Den e leisi a Wortu fu Gado ibri dei èn den e du san den e leri. (Luku „Bun Rai Di E Kon fu wan Yongu Dinari fu Yehovah”, tapu bladzijde 6.) Iya, Bijbel na trutru wan buku gi yongu sma na ini a ten disi fu di a kan yepi den fu „de koni dorodoro, de srekasreka dorodoro gi ibri bun wroko”.—2 Timoteus 3:16, 17.

[Prenspari pisi na tapu bladzijde 5]

Wan fu den prenspari sani fu meki den yongu yari fu yu waka bun, na taki yu musu man feni en nanga trawan

[Prenspari pisi na tapu bladzijde 6]

Kande moro leki tra sma, yonguwan wani sabi san e asa èn fu san ede den sani dati e pasa

[Faki na tapu bladzijde 6]

Bun Rai Di E Kon fu wan Yongu Dinari fu Yehovah

Aleksander abi 19 yari. A gro kon bigi na ini wan osofamiri fu Yehovah Kotoigi. A e handri akruderi den sani di a e bribi, èn a e du dati nanga prisiri èn nanga en heri ati. Ma disi no ben de so ala ten. Aleksander e fruteri:

„Kande a sa fruwondru yu, ma seibi yari langa mi ben abi demakandra nanga Kotoigi fu Yehovah leki wan yonguwan di no ben dopu ete. Na a ten dati, mi no ben anbegi Yehovah nanga mi heri ati. Mi ben du en soso fu di mi ben gwenti fu du dati kaba. Mi denki taki mi no ben abi nofo deki-ati fu ondrosuku misrefi bun.”

Dan a fasi fa Aleksander ben denki, kon kenki. A e taki moro fara:

„Mi papa nanga mama, so srefi den mati fu mi na ini a gemeente, ben tan gi mi a rai fu leisi Bijbel ibri dei, so taki misrefi ben kan kon sabi Yehovah. Te fu kaba, mi teki a bosroiti fu pruberi dati. So bun, mi no ben luku telefisi so furu moro èn mi ben bigin leisi Bijbel ibri dei, fruku mamanten. Te fu kaba, mi bigin kon frustan san de na ini Bijbel. Mi kon si fa a kan yepi mi. Ma a moro prenspari sani di mi kon frustan, na taki Yehovah wani taki mi musu kon sabi en. Di mi bigin poti prakseri na dati, dan mi eigi matifasi nanga en ben kon moro bun, èn den matifasi di mi ben abi nanga sma na ini a gemeente ben kon moro bun tu. Bijbel kenki mi libi fu tru! Mi e gi ala yongu dinari fu Yehovah a rai fu leisi Bijbel ibri dei.”

Milyunmilyun yongu sma de na heri grontapu di abi demakandra nanga Yehovah Kotoigi. Yu na wan fu den yongu sma disi? Yu ben sa wani kisi winimarki fu a leisi di yu e leisi Bijbel ibri dei? Dan fu san ede yu no e du san Aleksander ben du? No teki furu ten fu du sani di no de so prenspari; meki a leisi di yu e leisi Bijbel tron wan sani di yu e du ibri dei. Yu sa kisi winimarki trutru.