Unu No Musu Tapu fu Du San Bun
Unu No Musu Tapu fu Du San Bun
„No meki wi tapu fu du san bun, bika na a reti ten wi sa koti efu wi no e kon weri.”—GALASIASMA 6:9.
1, 2. (a) Fu san ede wi abi horidoro fanowdu fu man dini Gado? (b) Fa Abraham ben sori taki a ben horidoro, èn san ben yepi en fu man du dati?
LEKI Yehovah Kotoigi, wi e prisiri fu du a wani fu Gado. Wi e feni kowru-ati tu fu di wi teki a „tyatyari” na wi tapu fu de wan disipel (Mateus 11:29). Ma toku a no wan makriki sani ala ten fu dini Yehovah nanga Krestes. Na apostel Paulus ben tyari disi kon na krin di a ben gi tra Kresten deki-ati: „Unu abi horidoro fanowdu, so taki, baka te unu du a wani fu Gado, unu kan kisi a kontru fu a pramisi” (Hebrewsma 10:36). Wi abi horidoro fanowdu bika a dini di wi e dini Gado kan de wan tyalensi.
2 A libi fu Abraham e sori krin taki dati de so. Furu leisi a ben musu teki muilek bosroiti èn a ben kisi fu du nanga situwâsi di ben hebi srefisrefi. A komando di a ben kisi fu gowe libi a switi libi na Ur, ben de a bigin nomo. Syatu baka dati, a ben kisi fu du nanga angriten, feantifasi fu den birtikondre, pikinmoro a ben lasi en wefi, wan tu famiriman fu en ben hori en na ati, ma a ben ondrofeni na ogri-atifasi tu di orloku e tyari kon. Moro bigi tesi ben de fu kon ete. Ma Abraham noiti no ben tapu fu du san bun. Disi na wan tumusi aparti sani te yu e prakseri taki a no ben abi a heri Wortu fu Gado, soleki fa wi abi dati na ini a ten disi. Ma toku, a ben musu fu sabi fu a fosi profeititori pe Gado ben fruklari: „Mi sa poti feantifasi na mindri yu nanga na uma èn na mindri yu siri nanga en siri” (Genesis 3:15). A no de fu taki dati Satan ben o hori Abraham na feanti, fu di a ben de a sma fu pe a Siri ben sa komoto. A frustan di Abraham ben frustan disi, ben musu de wan yepi gi en fu horidoro nanga prisiri na ini den tesi di a ben kisi.
3. (a) Fu san ede a pipel fu Yehovah kan fruwakti taki den sa kisi problema? (b) San Galasiasma 6:9 e taki di e gi wi deki-ati?
3 A pipel fu Yehovah na ini a ten disi musu fruwakti taki den sa kisi problema tu (1 Petrus 1:6, 7). Te yu luku en bun, dan Openbaring 12:17 e warskow wi taki Satan ’e feti’ nanga a salfu fikapisi. Fu di den „tra skapu” e wroko skinskin nanga den salfuwan, meki Satan e puru en atibron na den tapu tu (Yohanes 10:16). Boiti den gens di Kresten ben sa kan ondrofeni na ini a publiki diniwroko fu den, dan den kan kisi tesi na ini den eigi libi tu di hebi srefisrefi. Paulus e gi wi a frumane: „No meki wi tapu fu du san bun, bika na a reti ten wi sa koti efu wi no e kon weri” (Galasiasma 6:9). Iya, Satan abi a fasti bosroiti fu pori a bribi fu wi, ma wi musu teki a bosroiti fu kakafutu gi en, fu di wi e horidoro na ini a bribi (1 Petrus 5:8, 9). San kan de a bakapisi efu wi e tan getrow? Yakobus 1:2, 3 e fruteri dati: „Si en leki wan trutru prisiri nomo, mi brada, te unu e miti difrenti tesi, fu di unu sabi taki na eigifasi disi fu un bribi di kisi tesi, abi horidoro leki bakapisi.”
Frufolgu
4. Fa Satan frufolgu a pipel fu Gado, fu pori a soifri retifasi fu den?
4 A libi fu Abraham e sori den „difrenti tesi” di wan Kresten kan kisi na ini a ten disi. Fu eksempre, a ben musu feti nanga den sma fu Sinear di broko kon na ini a kondre nanga tranga (Genesis 14:11-16). A no de fu fruwondru taki Satan e tan du a pipel fu Gado ogri, fu di a e frufolgu den na wan ogri-ati fasi. Sensi a kaba fu a Di fu Tu Grontapufeti, furu tirimakti ben tapu a Kresten leriwroko fu Yehovah Kotoigi. A Jaarboek van Jehovah’s Getuigen 2001 e fruteri fu den Kresten na ini Angola di ben musu horidoro te den feanti ben handri na wan ogri-ati fasi nanga den. Fu di den brada fu wi ben frutrow tapu Yehovah, meki den horidoro èn no tapu fu du san bun! Na presi taki den du den feanti wan ogri baka, noso suku fu feti nanga den, dan den handri nanga koni fu di den horidoro na ini a preikiwroko.—Mateus 24:14.
5. Fa Kresten yonguwan ben sa kan kisi frufolgu na skoro?
5 Ma te wan sma e kisi frufolgu, dan a no ala ten a wani taki dati sma e du en ogri nanga tranga. Abraham ben kisi tu manpikin te fu kaba — Ismaèl nanga Isak. Genesis 21:8-12 e fruteri taki na wan okasi, Ismaèl ben „tanteri” Isak. Na ini a brifi fu en gi den Galasiasma, Paulus e sori taki disi ben de moro leki a prei nomo di pikin-nengre e prei. A ben taki fu Ismaèl dati a ben frufolgu Isak! (Galasiasma 4:29). So bun, te skoropikin e taki na wan spotu fasi nanga wi noso te gensman e kosi wi, dan nanga reti wi ben kan kari dati frufolgu. Wan yongu Kresten di nen Ryan e memre ete fa skoropikin ben trobi en: „Mi ben musu sidon na ini bus 15 miniti nomo, fu rei go-kon fu skoro. Ma fu di den skoropikin ben kosi mi te wi ben de na ini a bus, meki a pisi ten dati ben gersi someni yuru. Den ben bron mi nanga paperclip (wan sortu metaal fu hori papira na wan) di den ben e faya nanga wan aansteker.” Fu san ede den ben du den ogri sani disi nanga en? „A leri di mi ben kisi fu Gado en organisâsi meki taki mi ben e difrenti fu den tra yongu sma na skoro.” Ma toku, nanga a yepi fu a papa nanga mama fu en, Ryan ben man horidoro na wan getrow fasi. Yonguwan, unu lasi-ati fu di den speri fu unu e tanteri unu? We, no gi abra! Te unu e horidoro na wan getrow fasi, dan unu sa ondrofeni a kontru fu den wortu fu Yesus: „Koloku fu unu te sma e skempi unu èn e frufolgu unu èn na wan lei fasi e taki ala sortu ogri sani fu unu, fu mi ede.”—Mateus 5:11.
Aladei Broko-ede ini a Libi
6. Sortu sani kan pori den matifasi na mindri Kresten na ini a ten disi?
6 Moro furu fu den tesi di wi e miti na ini a ten disi, abi fu du nanga den aladei broko-ede ini a libi. Abraham srefi ben kisi fu du nanga wan trobi na mindri den skapuman fu en nanga di fu en brada pikin Lot (Genesis 13:5-7). Na so a de tu na ini a ten disi. Fu di sma e difrenti fu makandra ini a fasi fa den de, meki den no man feni en nanga makandra. So srefi a dyarusu di sma e dyarusu tapu makandra fu pikinpikin sani ede, kan pori a matifasi di den abi nanga tra sma èn a kan meki srefi taki a vrede na ini a gemeente e kon ini kefar. „Pe dyarusu nanga strei de, na drape bruya nanga ala sortu tegu sani de” (Yakobus 3:16). A prenspari srefisrefi taki wi no e tapu fu du san bun! Neleki Abraham wi no musu gi pasi taki bigifasi e pori a vrede, ma wi musu hori tra sma na prakseri.—1 Korentesma 13:5; Yakobus 3:17.
7. (a) San wan sma musu du te wan tra Kresten hati den firi fu en? (b) Fa Abraham ben gi wan tumusi bun eksempre fu tan abi bun matifasi nanga tra sma?
7 A kan de wan tyalensi fu tan na ini vrede nanga wan tra bribiman te wi e feni taki a sma du wan sani noso taki wan sani di e hati wi. Odo 12:18 e taki: „Wan sma de di e taki sondro fu denki, a de neleki a e dyuku sma nanga wan feti-owru.” Te wan sma e taki wan sani fu wi sondro fu denki, dan awinsi a sma no ben abi takru sani na prakseri, toku a kan hati wi srefisrefi. A e hati wi moro srefi te wi e feni taki sma fruteri ogri-ati lei fu wi, noso konkru na wan fasi fu pori wi nen (Psalm 6:6, 7). Ma wan Kresten no kan tapu fu du san bun fu di wan sma hati den firi fu en! Efu yu de na ini so wan situwâsi, dan yusrefi musu du wan sani fu poti a tori kon reti baka, fu di yu e go taki na wan switi fasi nanga a sma di ben hati yu (Mateus 5:23, 24; Efeisesma 4:26). Yu musu de klariklari fu gi a sma dati pardon (Kolosesma 3:13). Te wi no e hori a sma na ati, dan dati e yepi wi fu kisi wan korostu firi baka èn a e yepi wi so srefi fu kon bun baka nanga a brada noso sisa fu wi. Abraham no ben hori Lot na ati kwetikweti. Iya, Abraham ben de klariklari fu feti gi Lot nanga en osofamiri!—Genesis 14:12-16.
Tesi Di Wisrefi E Tyari Kon na Wi Tapu
8. (a) Fa Kresten ben sa kan ’sutu densrefi na den heri skin nanga furu pen’? (b) Fu san ede Abraham ben man denki fu materia sani na wan yoisti fasi?
8 Wi musu erken taki son tesi di e miti wi, na tesi di wisrefi e tyari kon na wi tapu. Fu eksempre, Yesus ben komanderi den bakaman fu en: „Unu no musu tyari gudu kon na wan gi unsrefi na grontapu moro, pe motu nanga frustu e pori sani, pe fufuruman e broko kon na inisei fu fufuru sani” (Mateus 6:19). Toku wan tu brada ’e sutu densrefi na den heri skin nanga furu pen’, fu di den e poti moro furu prakseri na materia sani leki na Kownukondre afersi (1 Timoteus 6:9, 10). Abraham ben de klariklari fu lasi den materia sani fu en so taki a ben man plisi Gado. „Nanga bribi a ben tan leki wan freimdesma na ini a kondre fu a pramisi leki na ini wan freimde kondre èn a ben libi na ini tenti nanga Isak nanga Yakob, di ben de erfgenaam nanga en fu a srefi pramisi. Bika a ben e wakti a foto di abi trutru fondamenti, a foto di Gado na a bowman nanga a mekiman fu en” (Hebrewsma 11:9, 10). A bribi di Abraham ben abi na ini wan „foto”, noso tiri fu Gado di ben musu kon ete, ben yepi en fu no frutrow tapu gudu. A no ben sa de wan koni sani fu du dati tu?
9, 10. (a) Fa a kan de wan tesi gi wi te wi angri fu kisi bigi nen? (b) Fa wan brada ben sa kan tyari ensrefi leki wan „moro lagiwan”?
9 Prakseri wan tra sani. Bijbel e gi wi a tumusi prenspari rai disi: „Efu iniwan sma e denki taki a de wan sani ala di a de noti, dan a e kori en eigi prakseri” (Galasiasma 6:3). Boiti dati, wi e kisi a frumane so srefi fu ’no du noti fu di wi lobi fu meki trobi noso prakseri wisrefi nomo, ma wi musu du sani na wan saka fasi’ (Filipisma 2:3). Son sma e tyari tesi kon tapu densrefi fu di den no e gi yesi na a rai disi. Na presi taki den e angri fu du „wan tumusi bun wroko”, dan den e angri fu kisi bigi nen. Fu dati ede den e lasi-ati noso mandi te den no e kisi grani na ini a gemeente.—1 Timoteus 3:1.
10 Abraham ben poti wan tumusi moi eksempre fu wan sma di ’no e denki fu ensrefi moro leki a de fanowdu’ (Romesma 12:3). Di Abraham ben miti Mèlkiseidèk, dan a no ben handri leki a grani di a ben kisi fu Gado ben meki en tron wan moro prenspari sma leki Mèlkiseidèk. Kontrari fu dati, fu di Abraham ben pai en wan di fu tin pisi, meki a ben erken a hei posisi di Mèlkiseidèk ben abi leki priester (Hebrewsma 7:4-7). Na a srefi fasi, Kresten na ini a ten disi musu de klariklari fu tyari densrefi leki den „moro lagiwan”, no leki sma di e feni taki den de tumusi prenspari (Lukas 9:48). Efu a gersi taki den wan di e teki fesi na ini a gemeente no wani gi yu wan spresrutu grani, dan yu musu ondrosuku yusrefi moro bun fu si fa yu kan go na fesi ini a fasi fa yu e tyari yusrefi, noso ini a fasi fa yu e du sani. Na presi taki yu e mandi fu den grani ede di yu no abi, gi yusrefi dorodoro na a grani di yu abi — a grani fu yepi tra sma kon sabi Yehovah. Iya, „saka [yu]srefi . . . na ondro a makti anu fu Gado, so taki a kan hei [yu] te a ten doro”.—1 Petrus 5:6.
Bribi na ini den Sani Di Wi No Man Si
11, 12. (a) Fu san ede a kan de so taki son sma na ini a gemeente no e libi moro nanga a fruwakti taki a kaba o kon ibri momenti? (b) Fa Abraham ben poti wan tumusi moi eksempre fu di a ben bribi na ini den pramisi fu Gado en heri libi langa?
11 Wan tra sani di kan de wan tesi tu, na a gersi di a gersi leki wi musu wakti tumusi langa bifo a kaba fu a godelowsu seti fu sani disi e kon. Soleki fa 2 Petrus 3:12 e taki, dan Kresten musu ’fruwakti èn musu hori a denoya fu a dei fu Yehovah bun na prakseri’. Ma furu sma wakti a „dei” disi furu yari langa kaba. Son wan wakti someni tenti yari langa. Dati meki son sma ben sa kan lasi-ati, noso no e libi moro nanga a fruwakti taki a kaba o kon ibri momenti.
12 Prakseri na eksempre fu Abraham ete wan leisi. En heri libi langa a ben bribi na ini den pramisi fu Gado, awinsi a ben sabi heri bun taki a no alamala ben o kon tru na ini a libiten fu en. A tru taki a ben libi langa nofo fu si en manpikin Isak gro kon bigi. Ma hondrohondro yari ben o pasa, bifo den bakapikin fu Abraham ben o de leki „den stari na hemel” noso „den ai-santi di de na sekanti” (Genesis 22:17). Ma Abraham no ben mandi noso lasi-ati. Fu dati ede na apostel Paulus ben taki fu Abraham nanga tra famiri-edeman: „Ala den sma disi dede na ini bribi, ala di den no ben kisi a kontru fu den pramisi, ma den ben si den fu farawe èn ben bari den wan switi kon èn den ben meki bekènti na publiki taki den ben de freimdesma nanga sma di ben tan wan pisi ten nomo na ini a kondre.”—Hebrewsma 11:13.
13. (a) Fa Kresten na ini a ten disi de leki ’sma di e tan wan pisi ten nomo’ na ini a sistema disi? (b) Fu san ede Yehovah sa tyari wan kaba kon na a seti fu sani disi?
13 Ala san Abraham ben du, ben sori taki a ben frutrow dorodoro tapu a kontru fu den pramisi di ben „farawe” ete. So bun, efu Abraham ben man du dati, dan a prenspari srefisrefi taki wi e du dati na ini a ten disi pe a kontru fu den sani disi de so krosibei! Neleki Abraham, wi musu si wisrefi leki ’sma di e tan wan pisi ten nomo’ na ini a sistema fu Satan. Wi musu weigri fu seti wisrefi na ini wan fasi fu libi pe wi e satisferi wi eigi lostu nomo. A „kaba fu ala sani” de krosibei. Ma a no de fu taki, wi ben sa wani taki a kaba disi ben doro kaba (1 Petrus 4:7). Kande wi e pina fu di wi abi seryusu problema nanga a gosontu fu wi. Noso a kan de so taki problema na ekonomia sei e meki taki wi no man bai den sani di wi abi fanowdu. Ma wi musu hori na prakseri taki Yehovah no sa tyari a kaba kon soso fu frulusu wi fu den tumusi takru situwâsi disi, ma fu santa en eigi nen (Esekièl 36:23; Mateus 6:9, 10). A kaba sa kon fu tru. Kande a no sa kon tapu wan ten di bun gi wi, ma a sa kon tapu wan ten di bun gi Yehovah fu du san en abi na prakseri.
14. Fa Kresten na ini a ten disi e kisi winimarki fu a pasensi di Gado abi nanga den?
14 Hori na prakseri tu taki „Yehovah no e draidrai nanga a pramisi fu en, soleki fa son sma e denki taki a e draidrai, ma a abi pasensi nanga unu fu di a no wani taki wan sma e kisi pori, ma a wani taki ala sma musu abi berow” (2 Petrus 3:9). Luku taki Gado „abi pasensi nanga unu” — den sma fu a Kresten gemeente. A kan de so taki son wan fu wi abi moro ten fanowdu fu tyari kenki kon na ini wi libi, so taki ’a sa feni wi sondro flaka èn sondro fowtu èn na ini vrede te fu kaba’ (2 Petrus 3:14). Wi no musu breiti dan taki Gado abi pasensi nanga wi?
Fa Wi Kan Prisiri Awinsi Sortu Problema Miti Wi
15. Fa Yesus ben man tan abi prisiri ala di tesi ben miti en? Fa Kresten na ini a ten disi e kisi winimarki te den e waka na en baka?
15 A libi fu Abraham e leri Kresten furu sani na ini a ten disi. Abraham no ben sori taki a abi bribi nomo, ma so srefi pasensi, koni nanga deki-ati, èn a ben sori lobi tu sondro fu prakseri ensrefi nomo. Na anbegi fu Yehovah ben de a moro prenspari sani na ini en libi. Ma wi musu hori na prakseri taki a sma di ben poti a moro bun eksempre gi wi fu waka na baka, na Yesus Krestes. Ala di Yesus srefi ben miti furu problema nanga tesi, toku a ben tan abi prisiri na ini ala den tesi disi. Fu san ede? Fu di a ben poti ala en prakseri na a howpu di ben de na en fesi (Hebrewsma 12:2, 3). Fu dati ede Paulus ben begi: „Meki a Gado now di e gi horidoro nanga trowstu, sorgu taki unu abi a srefi fasi fu denki na un mindri di Krestes Yesus ben abi” (Romesma 15:5). Te wi abi a yoisti fasi fu denki, dan wi kan prisiri awinsi sortu sani Satan e poti tapu wi pasi fu gens wi.
16. San wi kan du te a gersi leki wi no man tyari den problema fu wi moro?
16 Te a gersi leki yu no man tyari den problema fu yu moro, dan memre taki Yehovah lobi yu neleki fa a ben lobi Abraham. A wani taki sani e waka bun gi yu (Filipisma 1:6). Frutrow dorodoro tapu Yehovah. Yu musu bribi trutru taki ’a no sa gi pasi dati yu kisi tesi pasa san yu man tyari, ma nanga a tesi a sa opo a pasi tu fu komoto so taki yu man frudrage en’ (1 Korentesma 10:13). Kweki a gwenti fu leisi Gado Wortu ibri dei (Psalm 1:2). Tan begi Yehovah, ala di yu e aksi en fu yepi yu fu horidoro (Filipisma 4:6). A sa „gi santa yeye na den wan di e aksi en fu dati” (Lukas 11:13). Gebroiki den sani di Yehovah seti fu yepi yu na yeye fasi, soleki den Bijbel publikâsi fu wi. Suku yepi so srefi na den brada nanga sisa na ini a bradafasi fu wi (1 Petrus 2:17). Go na den Kresten konmakandra doronomo, bika drape yu sa kisi a deki-ati di yu abi fanowdu fu horidoro (Hebrewsma 10:24, 25). Yu kan de seiker taki a horidoro di yu e horidoro e meki taki Gado sa feni yu bun te fu kaba. Boiti dati, a getrowfasi fu yu e meki en ati prisiri!—Odo 27:11; Romesma 5:3-5.
17. Fu san ede Kresten no e gi pasi taki den e lasi-ati?
17 Gado ben lobi Abraham leki a „mati” fu en (Yakobus 2:23). Ma toku a libi fu Abraham ben lai nanga hebi tesi nanga problema. Fu dati ede Kresten kan fruwakti den srefi sani na ini den takru „lasti dei” disi. Fu taki en leti, Bijbel e warskow wi taki „godelowsu sma nanga bedrigisma sa kon moro ogri” (2 Timoteus 3:1, 13). Ma yu no musu lasi-ati. Na presi fu dati, yu musu frustan taki den problema di e miti wi e sori krin taki a kaba fu a godelowsu seti fu Satan de krosibei. Ma Yesus e memre wi taki „a sma di horidoro te na a kaba, na en sa kisi frulusu” (Mateus 24:13). So bun, ’no tapu fu du san bun!’ Waka baka Abraham, so taki yu sa de na mindri den wan di „nanga bribi èn nanga pasensi e kisi den pramisi”.—Hebrewsma 6:12.
Yu Ben Si Disi?
• Fu san ede a pipel fu Yehovah na ini a ten disi kan fruwakti taki den sa kisi tesi nanga problema?
• Na sortu fasi Satan ben sa kan frufolgu wi?
• Fa Kresten kan lusu den problema di den ben sa kan abi nanga makandra?
• Fa a kan de wan tesi te sma abi bigifasi èn e denki densrefi nomo?
• Fa Abraham ben poti wan bun eksempre fu di a ben wakti a kontru fu den pramisi fu Gado?
[Aksi fu a tori disi]
[Prenki na tapu bladzijde 26]
Furu Kresten yonguwan e kisi frufolgu, fu di den speri fu den e tanteri den
[Prenki na tapu bladzijde 29]
Na ini a ten fu Abraham a kontru fu den pramisi fu Gado ben de „farawe”, ma toku den ben de a moro prenspari sani na ini en libi