Wan Diploma gi Tumusi Bun Wroko

NA ORGANISÂSI fu nyunsuman fu Afrika nanga Kongo di wani meki a Demokrasia Republiek Kongo go na fesi (AJOCAD) e gi sma a diploma disi. Den e du disi fu „sori taki den e warderi sma noso organisâsi fu a libimakandra di e difrenti fu trawan bika den e yepi fu meki [Kongo] go na fesi”.

Tapu 17 november 2000, Yehovah Kotoigi ben kisi „a diploma di sma e kisi fu di den du tumusi bun wroko”. Den ben kisi disi bika den „e yepi fu meki sma fu Kongo kon moro koni nanga yepi fu den leri di de fu feni na ini den publikâsi fu den”.

A koranti Le Phare fu Kinsyasa ben taki fu a diploma di den ben kisi: „A muilek fu feni wan sma fu Kongo di noiti no leisi den tijdschrift A Waktitoren nanga Ontwaakt!, noso iniwan tra publikâsi di Yehovah Kotoigi tyari kon na doro. Den tijdschrift disi [e taki fu] ala afersi fu a libi.” A pisi disi fu a koranti ben taki tu dati den publikâsi disi e sori „fa fu kakafutu gi den disiten problema” èn den e sori „san den sani di e pasa nownowde, wani taki trutru”. No wan fu den uitgave fu den Ontwaakt! „e moksi ensrefi nanga politiek èn no wan fu den e taki dati wan ras hei moro wan trawan”. Boiti dati, den publikâsi e yepi sma fu „frutrow ini a pramisi fu a Mekiman taki a o tyari wan grontapu nanga vrede kon pe seikerfasi sa de. Heri esi dati o kon ini a presi fu a disiten godelowsu sistema fu sani pe sma no e hori densrefi na a wet”.

Soleki fa AJOCAD ben taki, dan den publikâsi fu Yehovah Kotoigi ben man yepi furu sma di e tan na Kongo. Den de fu feni ini hondrohondro tongo, èn a boskopu fu den di e gi howpu kan yepi yu tu.

Grantangi luku san skrifi na ondrosei so taki yu kan si fa den kan yepi yu tu.