Wi Musu Abi wan Bribi Leki Di fu Abraham!

„Na den sma di abi bribi, de manpikin fu Abraham.”—GALASIASMA 3:7.

1. Fa Abram ben kakafutu gi wan tra tesi na ini Kanan?

ABRAM ben gowe libi a switi libi di a ben abi na ini Ur, fu di a ben gi yesi na a komando fu Yehovah. Den problema di ben miti en na ini den yari baka dati, ben de a bigin nomo fu a kisi di a bribi fu en ben kisi tesi na ini Egipti baka ten. A Bijbel tori e taki: „Now wan angriten ben kon na ini a kondre.” Abram ben sa kan kragi srefisrefi fu a situwâsi fu en! Ma na presi fu dati a bigin seti sani fu sorgu gi en osofamiri. „Abram saka go na Egipti fu tan drape leki wan freimdesma, bika na angriten ben de tumusi hebi na ini a kondre.” Na osofamiri fu Abram ben bigi. Dati meki den sma na Egipti ben o si den wantewante te den kon na ini a kondre. Yehovah ben o du san a ben pramisi? A ben o kibri Abram fu ogri no miti en?—Genesis 12:10; Exodus 16:2, 3.

2, 3. (a) Fu san ede Abram no ben wani fu sma sabi taki Sarai ben de en wefi? (b) Fa Abram ben handri nanga en wefi na ini a situwâsi fu en?

² Wi e leisi na ini Genesis 12:11-13: „A ben pasa so taki di a ben kon krosibei fu go na ini Egipti, a ben taigi en wefi Sarai: ’Grantangi, yere dya! Mi sabi taki yu na wan moi uma. Te den Egiptisma sa si yu, dan den sa taki, „Disi na en wefi.” Den sa kiri mi fu tru, ma den sa hori yu na libi. Grantangi, taigi den taki yu na mi sisa so taki sani kan waka bun gi mi fu yu ede, èn trutru mi sili kan tan na libi nanga yepi fu yu.’” Ala di Sarai ben abi moro leki 65 yari, toku a ben de wan heri moi uma. Dati meki Abram en libi ben de ini kefar * (Genesis 12:4, 5; 17:17). A moro prenspari sani na taki den prakseri fu Yehovah ben kon ini kefar, bika a ben taki dati ala den nâsi fu grontapu ben o blesi densrefi nanga yepi fu a siri fu Abram (Genesis 12:2, 3, 7). Fu di Abram no ben abi pikin ete, dati meki a ben prenspari srefisrefi fu a tan na libi.

³ Abram ben taki nanga en wefi fu wan taktik di a ben wani gebroiki. Den ala tu ben agri kaba, dati Sarai ben o taki dati a ben de en sisa te dati de fanowdu. Luku taki awinsi Abram ben de famiri-edeman, toku a no ben mesbroiki a makti fu en. A no ben gebroiki en makti fu dwengi en wefi fu du san en wani, ma a ben aksi en fu horibaka gi en èn fu yepi en (Genesis 12:11-13; 20:13). Fu di Abram du dati, meki a de wan tumusi moi eksempre gi masra fu tyari a frantwortu fu den leki edeman, na wan lobi-ati fasi. Sarai na wan eksempre so srefi gi wefi na ini a ten disi fu di a ben sori sakafasi.—Efeisesma 5:23-28; Kolosesma 4:6.

4. Fa getrow futuboi fu Gado na ini a ten disi musu tyari densrefi te a libi fu den brada nanga sisa fu den de ini kefar?

⁴ Sarai ben kan taki dati a ben de a sisa fu Abram, bika a trutru ben de en afu-sisa (Genesis 20:12). Boiti dati, a no ben abi fu fruteri sma wan sani di den no abi reti fu sabi (Mateus 7:6). Den getrow futuboi fu Gado na ini a ten disi e gi yesi na a komando fu Bijbel fu de eerlijk (Hebrewsma 13:18). Fu eksempre, noiti den ben sa lei na fesi krutubangi pe den sweri fu taki san tru. Ma efu den brada nanga sisa fu den ben sa kan lasi den libi, noso te a yeyefasi fu den de ini kefar, soleki te den kisi fu du nanga frufolgu noso borgrufeti, dan den e gi yesi na a rai fu Yesus fu de sma di „koni leki sneki èn toku sondro takrufasi leki doifi”.—Mateus 10:16; luku A Waktitoren fu 1 november 1996, bladzijde 16 paragraaf 19.

5. Fu san ede Sarai ben de klariklari fu du san Abram ben aksi en?

⁵ Fa Sarai ben piki tapu na aksi fu Abram? Na  apostel Petrus ben taki dati umasma di de leki Sarai „e howpu tapu Gado”. Fu dati ede Sarai ben frustan taki a situwâsi ben abi fu du nanga yeye afersi. Boiti dati, a ben lobi en masra èn a ben lespeki en. So bun, Sarai teki a bosroiti fu ’saka ensrefi na ondro en masra’ fu di a no ben fruteri sma taki a trow (1 Petrus 3:5). A no de fu taki dati ogri ben kan miti en te a ben du dati. „So esi leki Abram ben doro na Egipti, dan den Egiptisma ben kon si na uma, taki a ben moi srefisrefi. Èn den granman fu Farao ben si en tu. Den ben go fruteri Farao o moi na uma de, so taki a seni sma fu teki na uma tyari en kon na Farao oso.”—Genesis 12:14, 15.

Yehovah Ben Frulusu Den

6, 7. Na ini sortu banawtu situwâsi Abram nanga Sarai ben de? Fa Yehovah ben frulusu Sarai?

⁶ Disi ben musu meki Abram nanga Sarai firi banawtu srefisrefi! A gersi taki sma ben o didon nanga Sarai nanga tranga. Boiti dati, Farao di no ben sabi taki Sarai trow, ben gi Abram bogobogo presenti, so taki „a ben kon abi skapu, kaw, buriki, man nanga uma futuboi, uma buriki nanga kameili” * (Genesis 12:16). Abram ben musu tegu gi den presenti disi di a ben kisi! A gersi leki sani no ben o waka bun srefisrefi. Toku Yehovah no drai baka gi Abram.

⁷ „Baka dati, Yehovah ben seni bigi plaag kon tapu Farao nanga den sma fu en oso, bika a ben wani teki Abram wefi Sarai” (Genesis 12:17). Na wan fasi di wi no sabi, Farao ben kon sabi fu san ede den „plaag” disi ben kon na en tapu. Wantewante a ben piki: „Dan Farao ben seni kari Abram kon, èn a ben taki: ’San yu du nanga mi? Fu san ede yu no fruteri mi taki na uma na yu wefi? Fu san ede yu ben taki, „En na mi sisa”? Na dati meki mi ben o teki en leki mi wefi. Yu kan teki yu wefi baka, a dya. Un gowe now!’ Dan Farao ben gi wan tu man a komando fu go a pasi nanga Abram nanga en wefi nanga ala sani di a ben abi, fu den man komoto na a kondre.”—Genesis 12:18-20; Psalm 105:14, 15.

8. Fa Yehovah pramisi Kresten taki a sa kibri den na ini a ten disi?

⁸ Na ini a ten disi, Yehovah no e gi wi a dyaranti taki a sa kibri wi gi den takru bakapisi fu a dede di sma e dede, na ogri di sma e du nanga tranga, angriten, noso naturu rampu. Wi kisi a pramisi taki Yehovah sa kibri wi ala ten gi sani di kan pori wi matifasi nanga en (Psalm 91:1-4). A e du dati fu di a e gi wi warskow na a reti ten nanga yepi fu en Wortu èn „a getrow èn koni srafu” (Mateus 24:45). Fa a de efu sma e dede fu di den e kisi frufolgu? A kan de so taki Gado e gi pasi taki sma e dede. Ma noiti a sa gi pasi taki sma e wai a heri pipel fu en puru (Psalm 116:15). Efu a de so taki wan tu getrow sma dede, dan wi kan de seiker taki den sa kisi wan opobaka.—Yohanes 5:28, 29.

A Ben De Klariklari fu Gi Abra, so Taki Vrede Ben Kan De

9. San e sori taki Abram ben froisi go fu a wan presi go na wan tra presi ala ten di a ben de na ini Kanan?

⁹ Soleki fa a sori, na angriten na ini Kanan ben pasa kaba. Ne „Abram ben teki en wefi nanga ala sani di a ben abi, komoto na Egipti go na Negeb [a drei kontren na a zuidsei fu den bergi fu Yuda]. Lot ben gowe tu nanga en. Abram ben abi bun furu meti nanga solfru nanga gowtu” (Genesis 13:1, 2). Fu dati ede, sma di ben libi na ini a kontren dati ben si en leki wan makti edeman di abi barinen (Genesis 23:6). Abram no ben abi na prakseri fu seti ensrefi fu tan na ini a kondre. A no ben wani abi noti fu du nanga a politiek fu Kanan. Na presi fu dati „a ben go fu a wan kampu go na a tra kampu. A komoto na Negeb go na Bethel te a doro a presi pe en tenti ben de fosi, na mindri Bethel nanga Ai.” Soleki fa Abram ben du ala ten, dan a ben poti na anbegi fu Yehovah na a fosi presi, awinsi pe a ben go.—Genesis 13:3, 4.

10. Sortu problema den skapuman fu Abram nanga di fu Lot ben kon abi? Fu san ede a ben prenspari fu lusu a problema wantewante?

¹⁰ „Now Lot di ben go nanga Abram, ben abi skapu tu nanga kaw nanga tenti. So bun, a kondre no ben bigi nofo fu den alamala tan na wan enkri presi. Fu di den ben kon abi furu sani, meki den no ben man tan alamala makandra. Den skapuman fu Abram nanga den skapuman fu Lot  ben kisi trobi nanga makandra. Na a ten dati, a Kanansma nanga a Feresitsma ben tan na ini a kondre” (Genesis 13:5-7). A watra nanga a grasi na ini a kondre no ben nofo fu hori den ipi meti fu Abram nanga di fu Lot na libi. Fu dati ede den skapuman ben kisi trobi nanga makandra. Den ben atibron srefisrefi. A meki di den ben e meki trobi no ben de wan sani di fiti gi anbegiman fu a tru Gado. Efu den ben o tan abi kesekese nanga makandra, dan dati ben kan meki den kon prati fu makandra fu ala ten. So bun, san Abram ben o du na ini a situwâsi disi? A ben teki Lot leki en eigi pikin, baka di a papa fu Lot dede. Kande a ben kweki en neleki fa a ben o du nanga en eigi pikin. Abram ben de a moro owruwan. Abram no ben abi a reti dan fu teki a moro bun pisi fu a kondre gi ensrefi?

11, 12. Sortu tumusi moi grani Abram ben gi Lot? Fu san ede a bosroiti di Lot ben teki, no ben de wan koni sani?

¹¹ Ma „Abram ben taigi Lot: ’Grantangi, no meki trobi de moro na mindri mi nanga yu èn na mindri den skapuman fu mi nanga di fu yu, bika wi na brada. A no de so, taki yu kan go na a heri kondre? Grantangi, prati fu mi. Efu yu e go na a kruktu-anusei, dan mi sa go na a reti-anusei. Ma efu yu e go na a reti-anusei, dan mi sa go na a kruktu-anusei.’” Krosibei fu Bethel, wan presi de di den ben kari „wan fu den heipresi na Palestina fu pe yu ben kan si a kondre heri bun”. Kande na fu drape „Lot ben luku, èn a ben si a heri Yordandistrikt, taki furu watra ben de na ini a heri kontren. Dati ben de bifo Yehovah ben pori Sodom nanga Gomora, èn a kontren disi ben de neleki a dyari fu Yehovah, neleki a kondre Egipti te go miti Soar.”—Genesis 13:8-10.

¹² Ala di Bijbel e kari Lot wan „regtfardiki” man, toku wan sani meki taki a no ben arki san Abram ben prakseri fu na afersi disi. A no gersi tu taki a ben aksi Abram rai fosi (2 Petrus 2:7). „Lot ben teki a heri Yordandistrikt gi ensrefi, èn Lot ben froisi en kampu go na a owstusei. Na so den ben prati fu makandra. Abram ben tan na ini a kondre Kanan, ma Lot ben tan na ini a birti fu den foto fu a Distrikt. Te fu kaba, a seti en tenti krosibei fu Sodom (Genesis 13:11, 12). Sodom ben de wan gudu foto pe sma ben man kisi furu bun sani na materia sei (Esekièl 16:49, 50). Kande a gersi leki Lot ben teki wan bun bosroiti bika a ben man kisi furu wini na materia sei, ma na yeye fasi dati no ben de wan koni bosroiti kwetikweti. Fu san ede? Bika „den man fu Sodom ben ogri srefisrefi. Den ben du tumusi furu takru sondu na fesi Yehovah”, na so Genesis 13:13 e taki. A bosroiti di Lot ben teki, ben o tyari furu sari kon gi en osofamiri te fu kaba.

13. Fa na eksempre fu Abram kan yepi den Kresten di ben sa kan kisi wan problema nanga wan tra sma fu moni ede?

¹³ Ma Abram ben sori bribi na ini a pramisi fu Yehovah, taki a siri fu en ben o kisi a heri kondre te fu kaba. A no ben haritaki nanga Lot fu wan pikin pisi fu a kondre dati. Fu di a ben lobi fu gi sani, meki a ben handri akruderi a gronprakseri di 1 Korentesma 10:24 ben taki fu en baka ten: „Meki ibri sma no tan suku en eigi bun, ma di fu a tra sma.” Disi na wan bun frumane gi den wan di ben sa kan kisi wan problema nanga wan tra bribiman fu moni ede. Na presi fu hori densrefi na a rai na ini Mateus 18:15-17, dan son sma tyari den brada fu den go na krutu (1 Korentesma 6:1, 7). Na eksempre fu Abram e sori taki a moro bun fu lasi moni, leki fu gi a nen fu Yehovah syen noso pori a vrede na ini a Kresten gemeente.—Yakobus 3:18.

14. Fa Abram ben o kisi pai fu di a ben lobi fu gi sani?

¹⁴ Abram ben o kisi pai, fu di a ben de wan sma di lobi fu gi sani. Gado ben fruklari: „Mi sa meki  a siri fu yu kon so furu leki a santi fu a gron so taki te wan sma ben sa man teri a santi fu gron, dan a ben sa man teri a siri fu yu tu.” A nyunsu disi ben musu gi deki-ati trutru na Abram di no ben abi pikin! Baka dati, Gado ben gi a komando: „Opo, waka go na ala sei fu a kondre na a langa fu en èn na a bradi fu en, bika na yu mi sa gi en” (Genesis 13:16, 17). Nôno, Abram no ben o kisi na okasi fu go libi wan switi libi na ini wan foto. A ben musu tan aparti fu den Kanansma. Na a srefi fasi, Kresten no musu de wan pisi fu grontapu. Den no e prakseri taki den hei moro leki tra sma, ma den no abi tumusi furu demakandra nanga sma di ben sa kan kori den fu du sani di no e kruderi nanga Bijbel.—1 Petrus 4:3, 4.

15. (a) O prenspari den waka di Abram ben teki ben de kande? (b) Sortu eksempre Abram ben poti gi Kresten osofamiri na ini a ten disi?

¹⁵ Na ini Bijbel ten, bifo wan sma ben kisi wan pisi kondre, dan a ben abi reti fu luku fa a de. So bun, te Abram ben go fu a wan presi go na wan trawan, dan dati ben memre en doronomo taki wan dei a kondre disi ben o de fu den bakapikin fu en. „Abram” di ben gi yesi „ben tan libi na ini tenti. Baka ten a ben go tan na ini a birti fu den bon fu Mamre, di de na Hebron. Na drape a ben bow wan altari gi Yehovah” (Genesis 13:18). Ete wan leisi, Abram ben sori o prenspari anbegi ben de gi en. A de wan tumusi prenspari sani so srefi na ini yu osofamiri fu hori osofamiri-studie, fu begi makandra nanga na osofamiri, èn fu go na den konmakandra?

A Feanti E Opo Kon fu Feti

16. (a) Fu san ede den wortu fu Genesis 14:1 skrifi na wan fasi di e sori taki wan takru sani ben o pasa? (b) Fu san ede den fo kownu fu owstusei ben broko go na ini a kondre?

¹⁶ „Now a ben pasa so na ini den dei fu Amrafel a kownu fu Sinear, Ariok a kownu fu Elasar, Kedorlaomer a kownu fu Elam, * nanga Tideal a kownu fu Goyim, taki den disi ben opo kon fu feti.” Na ini a Hebrewtongo fu fosi, den wortu na a bigin fu a tekst („Now a ben pasa so na ini den dei fu . . . ”), skrifi na wan fasi di e sori taki wan takru sani ben o pasa. A e sori go „na wan pisi ten fu tesi di sa tyari blesi kon te fu kaba” (Genesis 14:1, 2, futuwortu). A tesi disi ben bigin di den fo kownu disi fu owstusei, makandra nanga den legre fu den ben broko go na ini Kanan na wan ogri-ati fasi. Fu san ede den ben du dati? Den ben wani tyari wan kaba kon na den sma fu den feifi foto Sodom, Gomora, Adma, Sebo-im nanga Bela di ben meki opruru. Ala di den ben e wai ala den fetiman nanga fetisani fu den feifi foto puru, dan den ben „bondru kon makandra leki wán, go na a Lagipresi Sidim, dati wani taki a Sowtu Se”. Lot nanga en osofamiri ben e libi krosibei.—Genesis 14:3-7.

17. Fu san ede a teki di sma ben teki Lot tyari gowe, ben de wan tesi tapu a bribi fu Abram?

¹⁷ Den Kanansma ben feti tranga fu kakafutu gi den sma di ben broko kon na ini a kondre fu den, ma den ben lasi a feti na wan tumusi ogri fasi. „Ne den winiman ben teki ala gudu fu Sodom nanga Gomora, so srefi ala nyanyan sani fu den, dan den gowe. Den ben tyari Lot, a manpikin fu Abram en brada, gowe tu nanga den gudu fu en, dan den teki pasi gowe. Na a ten dati a ben tan na Sodom.” No langa baka dati, Abram ben kisi fu yere taki den ogri sani disi ben pasa: „Baka dati, wan man di lowe komoto ben kon fruteri Abram a Hebrewman san pasa. Na a ten dati a  ben libi na ini a birti fu den bigi bon fu Mamre, na Amoriet, a brada fu Eskol èn a brada fu Aner. Den man disi ben meki wan kruderi nanga Abram taki den sa yepi makandra. Na so fasi Abram ben kon yere taki sma ben teki en brada tyari gowe” (Genesis 14:8-14). Dati ben de wan tesi tapu en bribi trutru! Abram ben o hori en brada pikin na ati fu di a ben teki a moro bun pisi fu a kondre? Hori na prakseri tu taki den sma disi di ben broko go na ini a kondre, ben komoto na en mamakondre Sinear. Efu a ben o opo go fu feti nanga den, dan dati ben kan meki taki a no ben sa man drai go na en kondre moro. Boiti dati, fa Abram ben sa man wini wan legre di den legre fu Kanan makandra, no ben man wini?

18, 19. (a) Fa Abram ben man frulusu Lot? (b) Suma ben kisi a grani fu a wini di den ben wini a feti disi?

¹⁸ Abram ben frutrow dorodoro tapu Yehovah agen. „Fu dati ede a ben tyari den futuboi fu en di man feti kon na makandra, dri hondro tin na aiti srafu di ben gebore na ini na osofamiri fu en, dan a ben lon go na den feanti baka te na Dan. Na neti a ben prati den fetiman fu en na grupu, en nanga den srafu fu en, fu go feti nanga den feanti. Na so fasi a ben wini den èn ben tan lon na den baka te na Hoba, di de na noordsei fu Damaskus. A ben teki ala den gudu baka. So srefi tu a ben tyari en brada Lot nanga den gudu fu en nanga den uma nanga a pipel kon baka” (Genesis 14:14-16). Abram ben sori taki a ben bribi tranga na ini Yehovah, di a ben frulusu Lot nanga en osofamiri nanga yepi fu a legre fu en di ben moro pikin srefisrefi leki di fu den feanti fu en. Now Abram ben miti Mèlkiseidèk, a kownu-priester fu Salem. „Mèlkiseidèk, a kownu fu Salem, ben tyari brede nanga win kon, èn a ben de priester fu a Moro Hei Gado. Ne a ben blesi en, èn a ben taki: ’Meki Abram fu a Moro Hei Gado, Mekiman fu hemel nanga grontapu, kisi blesi. Meki a Moro Hei Gado kisi blesi, di ben gi den sma di ben kwinsi yu na ini yu anu!’ Dan, Abram ben gi en wan di fu tin pisi fu ala sani.”—Genesis 14:18-20.

¹⁹ Iya, na Yehovah musu kisi a grani taki den ben wini a feti. Fu di Abram ben abi bribi, meki a ben man si ete wan leisi fa Yehovah ben gi frulusu. A pipel fu Gado na ini a ten disi no e teki prati na trutru feti, ma den e kisi fu du nanga furu tesi nanga tyalensi. Na artikel di e kon sa sori fa na eksempre fu Abram kan yepi wi fu kakafutu gi den tesi dati nanga bun bakapisi.

[Futuwortu]

Yu Ben Si Disi?

• Fa na angriten na ini a kondre Kanan ben de wan trutru tesi tapu a bribi fu Abram?

• Fa Abram èn so srefi Sarai, ben poti wan eksempre gi masra nanga wefi na ini a ten disi?

• San wi kan leri fu a fasi fa Abram ben lusu a problema di den futuboi fu en nanga di fu Lot ben abi?

[Aksi fu a tori disi]

[Prenki na tapu bladzijde 22]

Abram no ben taki nomonomo dati a ben musu kisi san a ben abi reti na tapu, ma a ben poti den winsi fu Lot fosi di fu en

[Prenki na tapu bladzijde 24]

Abram ben sori taki a ben frutrow tapu Yehovah di a ben frulusu en brada pikin, Lot