Yehovah Kotoigi Wini wan Prenspari Krutu-afersi na wan Hei Krutubangi
Yehovah Kotoigi Wini wan Prenspari Krutu-afersi na wan Hei Krutubangi
YEHOVAH KOTOIGI na ini Doisrikondre wini wan tumusi prenspari krutu-afersi na a Federale Hooggerechtshof (wan hei krutubangi) na ini Karlsruhe. A sani disi na wan bigi winimarki fu di a e tyari den moro krosibei fu a marki di den abi. Den wani taki a wet fu Doisrikondre e erken den leki wan kerki organisâsi.
Yehovah Kotoigi e preiki moro leki wán hondro yari kaba na ini Doisrikondre. Ala di den ben kisi hebi frufolgu fu den Nazi nanga den Kommunist, tu ogri-ati tirimakti fu a di fu twenti yarihondro, toku den de ete. Sensi 1990, den Kotoigi du muiti taki a wet fu a kondre e erken den leki wan kerki organisâsi di e wroko gi a bun fu sma. Baka di wan krutubangi ben teki tu bosroiti fu a bun fu den Kotoigi èn wán teige den, dan den tyari na afersi fu den go na a Federale Hooggerechtshof. Tapu 19 december 2000, a hei krutubangi disi meki a bosroiti bekènti di a ben teki na ini na afersi disi.
Ala Krutuman Ben Agri Nanga a Bosroiti na ini a Krutu-afersi fu Yehovah Kotoigi
Ala den seibi krutuman ben teki a sei fu den Kotoigi. Den krutuman kenki wan bosroiti di wan tra hei krutubangi ben teki na ini 1997 èn den taigi a krutubangi dati fu luku na krutu-afersi fu den Kotoigi baka.
A hei Krutubangi teki na okasi fu taki fu a prenspari banti di de na mindri Lanti nanga kerki grupu. Fu taki en leti, efu wet e erken wan grupu leki wan kerki grupu, dan dati „e anga fu a fasi fa a grupu disi e tyari ensrefi, èn no fu den sani di a grupu disi e bribi”.
A krutubangi ben taki so srefi dati te Kotoigi no e „teki partei fu di den na Kresten”, dan nanga dati den no e sori taki den „de teige demokrasia”; so srefi den „no wani poti wan tra sortu tiri na ini a presi fu demokrasia”. Fu dati ede, a no fu di den Kotoigi no e stem, dan wet no musu erken den leki wan kerki organisâsi.—Yohanes 18:36; Romesma 13:1.
A krutubangi ben taki moro fara taki wan sma di abi wan bribi, wanwan leisi kan kon feni ensrefi na ini wan situwâsi pe den wet fu Lanti no e kruderi nanga den gronprakseri fu a bribi fu en. A sma dati kan de wan Kotoigi noso wan sma fu wan tra bribi. Efu a sma disi e handri akruderi en konsensi fu di a e „hori ensrefi na den gronprakseri fu en bribi, moro leki na a wet”, dan Lanti kande sa feni taki a sma disi handri bun, fu di a sma abi a fri fu anbegi na a fasi fa a wani.—Tori fu den Apostel 5:29.
A bosroiti di a krutubangi teki, ben meki bekènti na ala sei. Pikinmoro ibri koranti na ini Doisrikondre ben skrifi fu a krutu-afersi disi. Ala den bigi radiostation nanga telefisistation meki a sani disi bekènti nanga yepi fu nyunsu noso interview. Noiti bifo a nen fu Yehovah kisi so furu barinen na ini Doisrikondre.
[Sma di abi a reti fu a prenki na tapu bladzijde 8]
AP Fowtow/Daniel Maurer