Yu E Memre Disi Ete?

Yu warderi en fu leisi den uitgave fu A Waktitoren di ben kon no so langa pasa? We, luku efu yu kan gi wan piki tapu den aksi di e kon now:

• Fu san ede srefi na ini a ten disi, a bun fu luku den aksi di e opo ede kon na ini Yob kapitel 38?

Srefi den disiten sabiman no kaba frustan furu fu den wondruwroko di Gado e poti prakseri na den. Den sani disi na so srefi a fasi fa zwaartekracht e hori grontapu na en yoisti presi, san na leti trutru, den furu difrenti sortu pikinpikin pisi snew, a fasi fa den alen dropu meki, èn san krakti abi fu du nanga bigi alen.—15/4, bladzijde 4-11.

• Sortu eksempre fu Bijbel kan yepi wi fu basi den firi di e meki wi lasi-ati?

Ten na ten Asaf, Baruk, nanga Naomi ben abi momenti te den ben e firi lasi-ati noso te tra firi ben e meki den brokosaka. Den sani di skrifi na ini den Buku fu Bijbel di e fruteri fa den ben man kakafutu gi den sortu situwâsi disi, kan yepi wi.—15/4, bladzijde 22-24.

• San na wan tu bun fasi fu yepi Kresten weduwe?

Mati kan yepi den na wan switi fasi. Famiriman noso trawan kan yepi kande nanga moni noso materia sani, te dati de trutru fanowdu. Tra Kresten kan yepi tu fu di den wani de wan trutru mati di e gi yepi nanga trowstu na yeye fasi.—1/5, bladzijde 5-7.

• Fu san ede a de prenspari fu trow „soso na ini Masra”, soleki fa 1 Korentesma 7:39 e gi leki rai?

A trow di sma trow nanga trawan di no de na bribi, abi takru bakapisi furutron. Boiti dati, te wi e teki a rai disi fu Gado dan dati e sori taki wi de loyaal na Yehovah Gado. Te wi e du san Gado Wortu e taki, dan na ati fu wi no sa krutu wi (1 Yohanes 3:21, 22).—15/5, bladzijde 20, 21.

• Fu di Yehovah na a wan di kan gi sma pardon gi den sondu fu den, dan fu san ede Kresten di du wan seryusu sondu musu fruteri den owruman ini a gemeente fu a sondu disi?

Iya, wan Kresten musu meki muiti fu Yehovah kan gi en pardon te a du wan seryusu sondu (2 Samuèl 12:13). Ma neleki fa a profeiti Natan ben yepi David, so srefi lepi owruman ini a gemeente kan yepi sondari di abi berow. Te wan sma e go na den owruman, dan dati de akruderi a rai di gi na ini Yakobus 5:14, 15.—1/6, bladzijde 31.

• Sortu buweisi de taki wi musu sorgu gi den pikin di no abi papa nanga mama èn gi den weduwe di de na ini nowtu?

A historia tori e sori taki a yepi di sma ben gi trawan na so wan fasi, ben de wan marki fu a tru anbegi fu den owruten Hebrewsma nanga den fosi Kresten (Exodus 22:22, 23; Galasiasma 2:9, 10; Yakobus 1:27). Na ini den Buku fu Bijbel na apostel Paulus ben gi krin bodoi tu di ben sori Kresten fa fu sorgu gi den weduwe di de na ini nowtu (1 Timoteus 5:3-16).—15/6, bladzijde 9-11.

• San na a sani di kan yepi wi fu libi wan koloku libi di abi wan marki?

Wi musu abi wan bun matifasi nanga Yehovah, wi hemel Tata. Wan prenspari sani di o yepi wi fu kan du dati na te wi e studeri Bijbel.—1/7, bladzijde 4, 5.

• A de so taki ibri sma abi wan yeye di no man dede èn di e tan libi baka te wan sma dede?

Ala di son sma e bribi taki wan yeye — no wan sili — no man dede, toku Bijbel no e horibaka gi a prakseri disi. A e sori wi taki te wan sma dede, dan a e drai go baka na doti, èn a no de moro kwetikweti. Ma Gado man gi a sma dati libi baka, so bun iniwan howpu taki a man libi baka ini a ten di e kon fu di a o kisi wan opobaka, e anga fu Gado (Preikiman 12:7).—15/7, bladzijde 3-6.

• Pe Danièl ben de di den dri Hebrewsma ben kisi tesi na a lagipresi fu Dura?

Bijbel no e fruteri dati. A kan taki Danièl no ben de fruplekti fu de drape fu a posisi fu en ede, noso kande a ben gowe go du wan lanti wroko. Ma wi kan de seiker taki a ben de getrow na Yehovah èn taki a ben hori ensrefi tranga na den gronprakseri fu En.—1/8, bladzijde 31.