Didibri—A No wan Kruktubribi Nomo

„Na ini a heri Nyun Testamenti a de fu si taki wan bigi strei de na mindri den legre fu Gado na a wan sei di e du san bun, èn den legre fu den wan di e du san ogri na a tra sei di abi Satan leki fesiman. Disi a no wan tori di wán noso tu Bijbel skrifiman ben prakseri fu densrefi. Ma a tori disi du kon fu di ala den skrifiman ben bribi a srefi sani èn ben frustan en na a srefi fasi. . . . So bun, den buweisi fu a Nyun Testamenti de krin. Satan de trutru èn a ogri srefisrefi. Ala ten a sori taki a de wan feanti fu Gado èn fu a pipel fu Gado.”—„The New Bible Dictionary”.

TOKU furu sma di e taki dati den na Kresten — èn di e taki dati den e bribi na ini Bijbel — no wani bribi taki Didibri de trutru. Fu san ede den no wani bribi dati? Fu taki en leti, na fu di den no wani erken Bijbel leki a Wortu fu Gado (Yeremia 8:9). Den sma disi e taki dati den Bijbel skrifiman ben skrifi filosofia denki fu den nâsi na den lontu, èn taki den no ben skrifi sani akruderi a waarheid fu Gado. Fu eksempre, Hans Küng, wan Katolik theologiaman e skrifi: „Den anansitori di e fruteri fu Satan nanga den legre fu ogri yeye . . . ben komoto na Babilon, dan a Dyu  bribi fu fositen ben teki dati abra èn fu drape den tori dati ben kon na ini a Nyun Testamenti.”—On Being a Christian (Te wan Sma De wan Kresten).

Ma a Bijbel a no wan sani nomo di libisma taki. A de trutru a Wortu fu Gado di a meki sma skrifi nanga yepi fu en santa yeye. Fu dati ede a de wan koni sani, taki wi e poti seryusu prakseri na san a e taki fu Didibri.—2 Timoteus 3:14-17; 2 Petrus 1:20, 21.

San Yesus Ben Prakseri?

Yesus Krestes ben bribi taki Didibri ben de trutru. A no de so taki Yesus ben abi wan takru eigifasi na ini en di ben tesi en. A ben kisi tesi fu wan trutru sma di baka ten a ben kari „a tiriman fu grontapu” (Yohanes 14:30; Mateus 4:1-11). A ben bribi so srefi taki tra yeye mekisani ben e horibaka gi Satan ini den ogri triki fu en. Yesus ben dresi den sma di ’ben abi ogri yeye na den tapu’ (Mateus 12:22-28). Srefi na atheist buku A Rationalist Encyclopædia ben sori sortu krakti disi ben abi tapu sma, te a e taki: „Ala ten den theologiaman e fruwondru fa a du kon taki a sma Yesus fu den Evangelietori ben bribi taki ogri yeye de trutru.” Te Yesus ben taki fu Didibri nanga den ogri yeye fu en, dan a no ben fruteri den srefi kruktubribi nomo di sma ben teki abra fu den anansitori fu Babilon. A ben sabi taki den ben de trutru.

Wi e kon sabi furu fu Didibri te wi e luku san Yesus ben taigi den kerki fesiman na ini a ten fu en: „Unu na fu un tata Didibri, èn unu wani fu du den winsi fu un tata. En ben de wan kiriman di a ben bigin, èn a no ben tan na ini a waarheid, bika waarheid no de na en ini. Te a e fruteri wan lei, a e fruteri soleki fa ensrefi de, bika a de wan leiman èn a tata fu lei.”—Yohanes 8:44.

Akruderi a tekst disi, dan Didibri (na ini Grikitongo, en nen wani taki „ogri-ati leiman”), ben de „wan leiman èn a tata fu lei”. En ben de a fosi mekisani di ben fruteri lei fu Gado, èn a ben du dati na ini a dyari fu Eden. Yehovah ben taki dati a fosi papa nanga mama fu wi ben o „dede nomonomo” efu den ben nyan fu a bon fu sabi bun nanga ogri. Satan ben gebroiki wan sneki fu taki dati a sani dati di Gado ben taki, no de tru (Genesis 2:17; 3:4). A fiti taki a kisi a nen „a fosi sneki, a wan di den e kari Didibri nanga Satan”.—Openbaring 12:9.

Den sani di Didibri ben taki fu a bon fu sabi bun nanga ogri, no ben tru. A ben feni taki Gado no ben abi a reti fu taigi den taki den no musu nyan fu a bon. Fu taki en leti, a ben feni taki Gado ben gebroiki a makti fu en na wan fowtu fasi. A ben taki dati Adam nanga Efa ben kan „de leki Gado”, dati den ben kan teki den eigi bosroiti fu san bun èn san ogri. Fu di den ben abi wan friwani, meki Satan ben feni taki den musu de fri dorodoro fu teki den eigi bosroiti sondro a yepi fu Gado (Genesis 3:1-5). Fu di Satan ben sori krinkrin taki a no e agri nanga a fasi fa Gado e tiri libisma, meki prenspari strei ben opo ede kon.  So bun, Yehovah ben gi pasi meki wan pisi ten pasa fu lusu den strei disi. Disi wani taki dati Satan kisi na okasi fu tan na libi fu wan pisi ten ete. A syatu pisi ten disi di a abi, e kon na wan kaba esi-esi (Openbaring 12:12). Toku a e tan hari libisma puru fu Gado nanga yepi fu lei nanga bedrigifasi, fu di a e gebroiki sma fu panya den leri fu en neleki fa a ben gebroiki den leriman fu Wet nanga den Fariseiman na ini a ten fu Yesus.—Mateus 23:13, 15.

Yesus ben taki tu dati Didibri ben de „wan kiriman di a ben bigin”. Boiti dati a ben taki so srefi taki „a no ben tan na ini a waarheid”. Disi no wani taki dati Yehovah ben meki Didibri leki „wan kiriman”. Gado no ben meki en fu a tron wan sortu takru bubu di e tiri wan presi fu faya pe iniwan sma di opo ensrefi teige Gado, sa kisi skin-ati doronomo. A „hel”, soleki fa Bijbel e taki fu en, a no a tanpresi fu Satan. A de a grebi nomo pe ala libisma e go te den dede.—Tori fu den Apostel 2:25-27; Openbaring 20:13, 14.

Didibri ben de „na ini a waarheid” fosi. Wan ten, a ben de wan pisi fu Yehovah en famiri na ini hemel leki wan volmaakti yeye manpikin fu Gado. Ma a no ben „tan na ini a waarheid”. A ben wani waka en eigi pasi. A ben wani du san ensrefi wani akruderi en eigi gronprakseri di de soso leitori. „A ben bigin” di a ben tron Didibri nanga kiriman, èn dati no ben de na a ten di Gado meki en leki wan engel manpikin fu en. Dati ben de di a ben opo ensrefi teige Yehovah fu en eigi friwani èn ben lei gi Adam nanga Efa. Didibri de leki den sma di ben opo densrefi teige Yehovah na ini a ten fu Moses. Wi kan leisi fu den: „Den fu den sei, handri na wan pori fasi; den no de en pikin, a mankeri didon na densrefi” (Deuteronomium 32:5). Wi kan taki a srefi sani fu Satan. A ben tron „wan kiriman” di a ben opo ensrefi teige Gado. Fu di a ben du dati, meki en abi a frantwortu fu a dede fu Adam nanga Efa, èn te yu e luku en bun, fu a heri libisma famiri.—Romesma 5:12.

Den Engel Di Ben Trangayesi

Tra engel ben opo densrefi teige Gado tu, neleki fa Satan ben du dati (Lukas 11:14, 15). Den engel disi „ben gowe libi den eigi reti tanpresi”, dan den ben teki libisma skin, so taki den ben man abi seks demakandra nanga „den umapikin fu libisma” na ini a ten fu Noa (Yudas 6; Genesis 6:1-4; 1 Petrus 3:19, 20). „Wan di fu dri pisi fu den stari fu hemel”, noso wan pikin grupu fu yeye mekisani teki a fasi fu libi dati.—Openbaring 12:4.

A buku Openbaring di e fruteri pikinmoro ala sani na wan agersi fasi, e agersi Didibri nanga „wan bigi redi draak” (Openbaring 12:3). Fu san ede? A no fu di Didibri abi wan takru skin trutru di e skreki sma. Fu taki en leti, wi no sabi sortu skin yeye mekisani abi, ma a kan de so taki Satan no e difrenti fu den tra engel ini a tori disi. Ma „wan bigi redi draak” na wan tumusi bun nen gi Satan, bika a gridi, a e frede sma, a abi furu krakti, èn a lobi fu tyari pori kon.

Nownow, Satan nanga den ogri yeye fu en no man du ala san den ben man du fosi. Den no man teki wan libisma skin moro, soleki fa den ben man du fosi. Syatu baka di a Kownukondre fu Gado ben seti na ini 1914 na ini na anu fu Krestes, dan den ben fringi go na ini a birti fu grontapu.—Openbaring 12:7-9.

Didibri Na wan Feanti Di Wi No Man Wini So Makriki

Awansi fa no fa, toku Didibri na wan feanti di wi no man wini so makriki. A „e waka lontu leki wan krasi lew, di e suku fu nyan wan sma” (1 Petrus 5:8). Satan no de leki wan takru eigifasi di no de krin fu si èn di e tan na ini wi sondu skin. A tru taki ibri dei wi abi fu feti srefisrefi nanga den firi di e meki wi du sondu (Romesma 7:18-20). Ma a trutru feti di wi musu feti, de „nanga den grontapu tiriman fu a dungru disi,  nanga den godelowsu yeye makti na den hemel presi”.—Efeisesma 6:12.

Tapu omeni sma Didibri abi krakti? „Heri grontapu e didon na ini a makti fu a godelowsuwan”, na so na apostel Yohanes e taki (1 Yohanes 5:19). A no de fu taki, dati wi no wani taki Didibri abi someni krakti na wi tapu noso taki kruktubribi e meki wi kon frede pasa marki. Ma a de wan koni sani fu tan na ai gi den muiti di a e du fu breni wi, bika a no wani taki wi musu kon sabi suma na en trutru èn a wani broko wi soifri retifasi na Gado.—Yob 2:3-5; 2 Korentesma 4:3, 4.

A no ala ten Didibri e gebroiki ogri-ati sani fu du ogri na den sma di e angri fu du a wani fu Gado. Sontron a e meki ensrefi kon gersi „wan engel fu leti”. Na apostel Paulus ben warskow Kresten gi a kefar disi di a ben skrifi: „Mi e frede taki na a wán noso tra fasi, neleki fa a sneki nanga en trikifasi ben kori Efa, a denki fu unu ben sa kan kon pori èn no ben sa tan ini na opregtifasi nanga a krinfasi di de fu a Krestes.”—2 Korentesma 11:3, 14.

Fu dati ede wi musu ’hori wisrefi, de na ai, èn kakafutu gi en, hori fasti na a bribi’ (1 Petrus 5:8, 9; 2 Korentesma 2:11). Meki wi luku bun taki wi no abi noti fu du nanga afkodrei, bika Satan kan bedrigi wi makriki nanga dati (Deuteronomium 18:10-12). Yu musu studeri Gado Wortu fayafaya, fu di yu e memre ete taki Yesus Krestes ben sori go na Gado Wortu ibritron baka di Didibri ben tesi en (Mateus 4:4, 7, 10). Begi fu kisi a yeye fu Gado. Ala di Satan sabi heri bun fa fu gi sma deki-ati fu du den wroko fu a skin, toku a froktu fu Gado en yeye kan yepi yu fu wai pasi gi den wroko dati (Galasiasma 5:16-24). Boiti dati, yu musu begi Yehovah fayafaya te yu e firi taki Didibri nanga den ogri yeye fu en e poti hebi na yu tapu na wan noso tra fasi.—Filipisma 4:6, 7.

Wi no abi fu frede Didibri. Yehovah e pramisi taki a sa kibri wi trutru gi iniwan sani di Satan kan du (Psalm 91:1-4; Odo 18:10; Yakobus 4:7, 8). „Tan kisi krakti na ini Masra èn na ini a makti fu a tranga fu en”, na so na apostel Paulus e taki. Te yu e du dati, dan yu sa „man tanapu kánkan gi den triki fu Didibri”.—Efeisesma 6:10, 11.

[Prenki na tapu bladzijde 5]

Yesus ben sabi taki Didibri ben de wan trutru sma

[Prenki na tapu bladzijde 6]

„Heri grontapu e didon na ini a makti fu a godelowsuwan”

[Sma di abi a reti fu a prenki]

NASA photo

[Prenki na tapu bladzijde 7]

Kakafutu gi Didibri fu di yu e studeri Gado Wortu èn e begi doronomo