Fa Yu Kan Teki Bun Bosroiti

A FRI wani di wi abi na wan presenti fu Gado. Efu wi no ben abi en, dan wi ben o de leki robot, èn wi no ben o man handri soleki fa wisrefi ben sa wani. Ma fu di wi abi wan fri wani, dan dati e tyari tyalensi kon gi wi. A fri wani di wi abi e meki taki wi musu teki bosroiti na ini wi libi.

A no de fu taki, dati furu fu den bosroiti di wi musu teki na pikin bosroiti. Tra bosroiti, soleki sortu wroko wi musu teki noso efu wi o trow, na bosroiti di kan abi krakti tapu wi heri libi. Dan tra bosroiti de ete di kan abi krakti tapu a libi fu tra sma. Sonwan fu den bosroiti di papa nanga mama e teki abi bigi krakti tapu den pikin fu den. Boiti dati, wi musu gi Gado frantwortu fu furu bosroiti di wi e teki.—Romesma 14:12.

Wi Abi Yepi Fanowdu

Na ini den yari di pasa, libisma furutron teki don bosroiti. Wan fu den fosi bosroiti di libisma ben teki èn di sma skrifi fu en, tyari bigi rampu kon. Efa ben bosroiti fu nyan fu a froktu di Gado ben warskow en nanga wortu di ben de krin fu frustan, fu no nyan fu en. Efa ben teki wan bosroiti di ben sori taki a ben prakseri ensrefi nomo, èn a sani dati meki taki a masra fu en trangayesi Gado tu makandra nanga en. A bakapisi fu dati tyari pina kon gi a libisma famiri. Moro furu, libisma abi a gwenti ete fu prakseri soso densrefi te den e teki bosroiti, na presi taki den e handri akruderi den yoisti gronprakseri (Genesis 3:6-19; Yeremia 17:9). Èn te wi musu teki seryusu bosroiti, dan furutron wi e si taki wi no kan handri ala ten soleki fa wi ben sa wani.

Fu dati ede a no e fruwondru wi taki te sma musu teki bigi bosroiti, dan furu fu den e go suku rai na wan makti di hei moro libisma. Bijbel e taki fu wan leisi di Nebukadnesar ben musu teki wan bosroiti di a ben de na ini wan srudati feti. Ala di a ben de wan kownu, a ben feni taki a ben musu „go na sma di e du lukuman-wroko”, dati wani taki a ben go suku rai na den yeye. Fu dati ede, Bijbel e taki: „A seki den peiri. A aksi nanga yepi fu a terafim; a luku na ini a lefre” (Esekièl 21:21). Na so a de tu na ini a ten disi. Furu sma e go suku rai na lukuman nanga astrologiaman, èn den e gebroiki tra fasi so srefi fu suku yepi na den yeye. A sari fu taki dati den fasi disi fu suku yepi e kori sma.—Lefitikus 19:31.

Wan Sma de di wi kan frutrow na en tapu dorodoro èn di yepi libisma fu teki koni bosroiti na ini den yari di pasa. A sma dati na Yehovah Gado. Fu gi wan eksempre, na ini owruten Gado ben gi a nâsi fu en, Israèl, na Urim nanga a Tumim. A kan de so taki den sani disi ben de lot di ben santa èn di sma ben trowe te a nâsi ben abi fu du nanga wan seryusu situwâsi. Nanga yepi fu na Urim nanga a Tumim, Yehovah ben gi krinkrin piki tapu aksi èn a ben yepi den owruman fu Israèl fu de seiker taki den ben teki bosroiti akruderi a wani fu en.—Exodus 28:30; Lefitikus 8:8; Numeri 27:21.

Luku wan tra eksempre. Di Gideon ben musu teki fesi na ini a legre fu Israèl fu feti teige Midian, dan a ben musu bosroiti efu a ben o teki so wan bigi grani. Gideon ben wani de seiker taki Yehovah ben o horibaka gi en. Dati meki a aksi  Yehovah fu sori en nanga yepi fu wan wondru taki A ben o horibaka gi en. Gideon begi Yehovah taki dow ben musu nati wan skapububa di a ben o libi na dorosei te neti, ma a gron lontu a skapububa disi ben musu tan drei. A neti baka dati, a aksi Yehovah fu meki a skapububa tan drei, ma a gron na en lontu ben musu nati dorodoro. Na wan switi fasi Yehovah du san Gideon ben aksi en fu du. Leki bakapisi fu dati, Gideon teki a yoisti bosroiti, èn fu di Gado ben horibaka gi en, meki a wini den feanti fu Israèl dorodoro.—Krutubakra 6:33-40; 7:21, 22.

Fa a De na ini a Ten Disi?

Na ini a ten disi, Yehovah e yepi den futuboi fu en ete te den musu teki prenspari bosroiti. Fa a e du dati? A de so taki wi musu handri neleki Gideon, fu di wi e aksi Yehovah fu sori wi ’nanga yepi fu wan skapububa’ san na a yoisti bosroiti di wi musu teki? Wan trowpaar ben aksi densrefi efu den ben musu froisi go tan na wan presi pe moro Kownukondre preikiman ben de fanowdu. A fasi fa wan plan fu den ben o waka, ben o yepi den fu teki a yoisti bosroiti. Den bosroiti fu seri na oso fu den gi wan spesrutu prijs. Efu wan sma ben bai na oso tapu wan spesrutu dei èn gi a srefi prijs noso gi wan moro hei prijs, dan dati ben o de wan buweisi taki Gado ben wani taki den ben musu froisi. Efu no wan sma ben bai na oso, dan dati ben o de wan buweisi taki Gado no ben wani taki den ben musu froisi.

No wan sma bai na oso. A sani dati ben de wan buweisi taki Yehovah no ben wani taki a trowpaar disi ben musu go dini na ini wan kontren pe moro preikiman ben de fanowdu? A no de fu taki, dati wi no abi a reti fu taki san Yehovah e du noso san a no e du gi den futuboi fu en. Wi no man taki dati na ini a ten disi, Gado no e du noti fu sori wi san na a wani fu en (Yesaya 59:1). Ma wi no kan fruwakti taki Yehovah o du wan sani fu sori wi fa fu handri te wi musu teki bigi bosroiti, bika na so fasi wi e meki Gado teki bosroiti gi wi. We, pikinmoro en heri libi langa, Gideon srefi ben musu teki bosroiti sondro taki Yehovah ben e gebroiki wondru fu sori en san a ben musu du!

Toku, Bijbel e taki dati Gado kan sori wi sortu bosroiti wi musu teki. A e taki na fesi fu a ten fu wi: „Un eigi yesi sa yere wan wortu na un baka di e taki: ’Disi na a pasi. Waka na tapu’, efu unu musu go na un reti-anusei noso efu unu musu go na un kruktu-anusei” (Yesaya 30:21). Te wi musu teki prenspari bosroiti, dan a bun srefisrefi fu kon sabi seiker taki wi e teki bosroiti akruderi a wani fu Gado. Wi wani de seiker tu taki den bosroiti di wi e teki e sori taki wi e handri akruderi a koni fu Gado. Fa wi kan du dati? Wi musu suku rai na ini a Wortu fu en èn wi musu meki a de ’wan lampu gi wi futu, èn wan leti na tapu wi pasi’ (Psalm 119:105; Odo 2:1-6). Fu man du so wi musu kisi a gwenti fu teki a soifri sabi fu Bijbel (Kolosesma 1:9, 10). Èn te wi musu teki wan bosroiti, dan wi musu ondrosuku ala den Bijbel gronprakseri di abi fu du nanga a tori. Te wi e ondrosuku sani na so wan fasi, dan dati sa yepi wi fu „kon sabi seiker san na den moro prenspari sani”.—Filipisma 1:9, 10.

Wi musu taki so srefi nanga Yehovah na ini begi, èn wi musu abi a frutrow taki a sa arki wi. A trutru e gi wi trowstu te wi e fruteri wi lobi Gado fu a bosroiti di wi musu teki en fu den difrenti fasi fa wi e prakseri fu handri. Baka dati, wi kan aksi en nanga ala frutrow fu sori wi fa fu teki a yoisti bosroiti. Furutron, santa yeye sa memre wi na den Bijbel gronprakseri di abi fu du nanga a  tori, noso a kan yepi wi fu frustan wan bijbeltekst moro bun di abi fu du nanga a situwasi fu wi.—Yakobus 1:5, 6.

Yehovah e sorgu so srefi taki lepi sma de na ini a gemeente di wi kan taki nanga den fu den bosroiti di wi musu teki (Efeisesma 4:11, 12). Ma te wi e suku rai na trawan, wi no musu du leki den sma di e go na a wán sma baka a trawan, teleki den e feni wan sma te fu kaba, di e taigi den san den wani yere. Te dati pasa, dan den e teki a rai fu a sma disi. Wi musu memre so srefi na eksempre fu Rehabeam di de wan warskow gi wi. Di a ben musu teki wan seryusu bosroiti, a kisi bun rai fu den owru man di fosi ben dini makandra nanga en papa. Ma na presi taki Rehabeam ben teki a rai fu den, a go suku rai na den speri fu en. Fu di a ben teki a rai fu den, meki a teki wan don bosroiti èn leki bakapisi fu dati a lasi wan bigi pisi fu en kownukondre.—1 Kownu 12:1-17.

Te yu e suku rai, dan suku dati na den sma di abi ondrofeni na ini a libi, sma di sabi den Buku fu Bijbel bun èn di abi dipi lespeki gi den yoisti gronprakseri (Odo 1:5; 11:14; 13:20). Te a kan, teki ten fu denki dipi fu den gronprakseri di abi fu du nanga a tori èn denki dipi tu fu ala den sani di yu kon sabi fu di yu ondrosuku a tori. Te yu e kon frustan san a Wortu fu Yehovah e taki fu a tori, dan yu sa kon si moro krin san na a yoisti bosroiti di yu musu teki.—Filipisma 4:6, 7.

Den Bosroiti Di Wi E Teki

Son bosroiti makriki fu teki. Di den apostel ben kisi a komando fu tapu nanga a preikiwroko dan den ben sabi taki den ben musu tan preiki fu Yesus. Wantewante den taigi a Sanhedrin taki den ben teki a bosroiti fu gi yesi na Gado moro leki na libisma (Tori fu den Apostel 5:28, 29). Kande wi musu poti moro prakseri na tra bosroiti di wi musu teki, fu di Bijbel no e taki krinkrin fu a tori. Toku, Bijbel gronprakseri moro furu sa sori wi san na a moro bun bosroiti fu teki. Fu gi wan eksempre: na ini a ten disi wi abi furu sortu fasi fu prisiriten di no ben de na ini a ten fu Yesus. Ala di dati de so, toku Bijbel e taki krinkrin fu den sani di Yehovah e feni bun èn den sani di a no e feni bun. Fu dati ede, iniwan Kresten di e teki prati na prisiriten di abi fu du nanga ogridu, hurudu, noso nanga na a opo di sma e opo densrefi teige trawan, no teki wan bun bosroiti kwetikweti.—Psalm 97:10; Yohanes 3:19-21; Galasiasma 5:19-23; Efeisesma 5:3-5.

Son leisi tu difrenti bosroiti kan bun. A de wan moi grani fu dini na ini kontren pe moro preikiman de fanowdu, èn a sani disi kan tyari bigi blesi kon. Ma efu wan sma e bosroiti fu no du dati fu a wan noso tra reide ede, dan a kan du bun wroko ete na ini a gemeente fu a kontren pe a e tan. Son leisi wi sa musu teki wan bosroiti di sa gi wi okasi fu sori o bigi a lobi de di wi abi gi Yehovah noso san na den moro prenspari sani na ini wi libi. Na so fasi Yehovah e gi wi okasi fu gebroiki a fri wani di wi abi fu sori san de trutru na ini wi ati.

Furutron, den bosroiti di wi e teki abi krakti tapu trawan. Fu gi wan eksempre, den Kresten fu a fosi yarihondro ben prisiri fu di den no ben abi fu hori densrefi na furu fu den komando fu a Wet. A sani disi ben wani taki, fu gi wan eksempre, taki den ben kan teki noso weigri nyanyan di no ben krin akruderi a Wet. Toku den ben kisi deki-ati fu poti prakseri na a konsensi fu trawan  te den ben o bosroiti fu gebroiki a fri di den ben abi ini a tori disi. Wi kan gebroiki den wortu fu Paulus ini a tori disi, èn wi kan fiti den na furu fu den bosroiti di wi e teki: ’Sorgu taki unu no e meki sma naki futu’ (1 Korentesma 10:32). Te wi no wani taki tra sma e naki futu, dan dati kan yepi furutron fu teki wan yoisti bosroiti. Boiti dati, lobi gi a sma na wi sei na a di fu tu moro bigi komando.—Mateus 22:36, 39.

A Bakapisi fu den Bosroiti fu Wi

Te wi e teki bosroiti di e kruderi nanga wi konsensi èn te wi gebroiki Bijbel gronprakseri fu teki bosroiti, dan ala ten den sa abi bun bakapisi te fu kaba. A no de fu taki, dati na ini a bigin a bosroiti di wi teki kande sa meki taki wi musu gi furu fu wisrefi. Di den apostel ben taigi a Sanhedrin taki den ben bosroiti fu tan preiki fu Yesus, dan den kisi fonfon bifo sma ben lusu den (Tori fu den Apostel 5:40). Di den dri Hebrewsma — Sadrak, Mesak, nanga Abednego — ben bosroiti fu no boigi gi a gowtu stonpopki fu Nebukadnesar, dan den poti den eigi libi na ini kefar. Den ben sabi taki a bosroiti di den ben teki, kande ben o meki den lasi den libi. Ma den ben sabi taki Gado ben o agri nanga san den ben o du, èn taki a ben o blesi den.—Danièl 3:16-19.

Efu wi e kisi problema baka di wi teki wan bosroiti di e kruderi nanga a konsensi fu wi, dan dati no wani taki dati wi teki wan don bosroiti. „Ten nanga sani di e pasa” kan meki taki den bun bosroiti di wi e teki no e waka na a fasi fa wi wani (Preikiman 9:11). Boiti dati, son leisi Yehovah e gi pasi fu problema miti wi, soso fu kon sabi efu wi trutru wani wan sani nanga wi heri ati. Yakob ben musu feti heri neti nanga wan engel bifo a ben kisi wan blesi (Genesis 32:24-26). Kande wi srefi e kisi fu du nanga problema, ala di wi e du a yoisti sani. Toku, wi kan frutrow tapu taki Yehovah sa yepi wi fu horidoro èn taki a sa blesi wi te fu kaba, te wi e teki bosroiti akruderi a wani fu en.—2 Korentesma 4:7.

Fu dati ede, no frutrow na tapu yu eigi koni te yu musu teki wan prenspari bosroiti. Suku fu kon sabi sortu Bijbel gronprakseri abi fu du nanga a tori. Taki fu a tori nanga Yehovah. Te a de fanowdu, suku rai na lepi Kresten. Dan de nanga deki-ati. Gebroiki a fri wani di Gado gi yu na wan frantwortu fasi. Teki wan bun bosroiti èn sori Yehovah taki yu abi wan opregti ati.

[Prenki na tapu bladzijde 28]

Suku rai na ini a Wortu fu Gado bifo yu e teki prenspari bosroiti

[Prenki na tapu bladzijde 28, 29]

Taki nanga Yehovah fu den bosroiti di yu musu teki

[Prenki na tapu bladzijde 30]

Yu kan taki nanga lepi Kresten fu den bigi bosroiti di yu musu teki