Fosi Wi Ben De Wolfu—Now Wi Na Skapu!

Di mi nanga Sakina ben de pikin meisje, wi ben libi na ini a srefi birti. Sakina ben bigi èn a ben stampu, ma mi ben pikin èn mi ben mangri. Wi ben gwenti fu meki trobi nanga makandra, ma wan dei wi feti wan seryusu feti. Sensi a dei dati, wi no ben taki moro nanga makandra èn wi no ben taki makandra odi tu. Te fu kaba, wi ala tu froisi go tan na wan tra presi èn wi no si makandra moro.

Na ini 1994, mi bigin studeri Bijbel nanga Yehovah Kotoigi, èn safrisafri mi bigin kenki den fasi fu mi. Fo yari baka dati mi ben de na wan spesrutu dei-konmakandra na ini a foto Bujumbara di de na ini Burundi, èn mi skreki di mi miti Sakina. Mi ben breiti taki a ben de drape, ma wi taki makandra odi syatu nomo, sondro fu sori switifasi. Moro lati a srefi dei dati, mi skreki di mi si en na mindri den sma di ben o teki dopu! Ensrefi ben kenki den fasi fu en dorodoro. A no ben de a feti-kaka moro di ben gwenti fu meki trobi nanga mi. A trutru ben de wan moi sani fu si fa a ben e teki dopu na watra fu meki bekènti na publiki taki a ben gi ensrefi abra na Gado!

Di a opo komoto na ini a watra, mi lon go brasa en èn mi taigi en safri na ini en yesi: „Yu sabi ete fa wi ben gwenti feti nanga makandra?” „Iya”, a taki, „mi sabi ete, ma dati ben de fosi. Now mi kenki kon tron wan nyun sma.”

Wi ala tu breiti taki wi feni a Bijbel waarheid di e tyari wánfasi kon na mindri sma. Wi breiti tu taki wi no de leki wolfu moro ma leki skapu di de fu a Bigi Skapuman, Yehovah Gado. Iya, Bijbel waarheid trutru e kenki sma.