Ondrofenitori

Leti na Yeye Fasi E Skèin na ini den Kondre fu a Mindri Owstusei

SOLEKI FA NAJIB SALEM FRUTERI

Na ini a fosi yarihondro G.T., a leti fu Gado Wortu skèin komopo fu a Mindri Owstusei èn a doro den fara uku fu grontapu. Na a di fu 20 yarihondro, a leti dati bigin skèin baka na ini a pisi dati fu grontapu. Meki mi fruteri unu fa dati pasa.

MI GEBORE na ini 1913 na ini a foto Amioun di de na a noordsei fu Libanon. Dati ben de a lasti yari di sani ben waka bun èn sondro bruya na grontapu, bika a yari baka dati a Fosi Grontapufeti broko. Di wan kaba kon na a feti na ini 1918, dan Libanon, di sma ben sabi fosi leki a peri fu a Mindri Owstusei, ben de wan kondre di ben kisi bigi lasi na ekonomia sei èn so srefi na politiek sei.

Na ini 1920, di den post kantoro na ini Libanon ben bigin wroko baka, dan sma kisi brifi fu kondreman fu den di ben e libi na ini tra kondre. Den omu fu mi, Abdullah nanga George Ghantous, ben de na mindri den sma disi. Den skrifi a papa fu den, Habib Ghantous, mi granpapa, fu fruteri en fu a Kownukondre fu Gado (Mateus 24:14). Di mi granpapa fruteri den sma fu a foto pe a ben e tan, fu den sani di den boi fu en ben skrifi kon gi en, dan sma bigin spotu en. Den sma fu a foto fruteri trawan a lei, taki den boi fu Habib ben e gi a papa fu den deki-ati fu seri en gron, èn fu bai wan buriki fu go preiki.

A Fosi Leisi Di Leti Bigin Skèin

A yari baka dati, na ini 1921, dan Michel Aboud, di ben e libi fosi na ini Brooklyn, New York, na ini Amerkankondre, drai go baka na a foto Tripoli di de na ini a kondre Libanon. A ben tron wan Bijbel Ondrosukuman, soleki fa sma ben sabi Yehovah Kotoigi na a ten dati. Ala di furu fu den mati nanga den famiriman fu Brada Aboud no teki a Bijbel boskopu, toku tu barinen  sma du dati. Den sma disi ben de Ibrahim Atiyeh, wan professor, nanga Hanna Shamas, wan tifidatra. Fu taki en leti, datra Shammas ben gi okasi taki den Kresten konmakandra ben hori na ini en oso èn na ini en wrokopresi.

Mi ben de wan yongu boi ete di Brada Aboud nanga Brada Shammas kon na Amioun, pe mi ben e libi. Den sani di den taki di den ben de dyaso trutru naki mi ati, èn mi bigin go nanga Brada Aboud fu du a preikiwroko. Fo tenti yari langa mi nanga en ben e wroko makandra doronomo na ini a preikiwroko, teleki Brada Aboud dede na ini 1963.

Na mindri den yari 1922 nanga 1925, a leti fu Bijbel waarheid skèin na ala sei na ini furu dorpu na a noordsei fu Libanon. Sowan 20 te go miti 30 sma ben e kon makandra na ini na oso fu sma fu abi wan takimakandra fu Bijbel. Na oso fu wi na ini Amioun ben de wan fu den presi pe sma ben e kon makandra. Den kerki tiriman ben e seni pikin-nengre kon fu naki tapu blik èn fu meki babari, so taki wi no ben man hori den konmakandra fu wi. Fu dati ede, son leisi wi ben e kon makandra na ini wan busi di ben lai nanga pina bon.

Di mi ben yongu, dan mi ben de fayafaya fu du diniwroko èn fu go na ala den Kresten konmakandra. A sani dati meki taki mi kisi a dreiginen Timoteus. A driktoro fu mi skoro ben taigi mi fu no go moro na san a ben kari „den konmakandra dati”. Di mi weigri fu du dati, dan a seni mi gowe fu skoro.

Mi E Gi Kotoigi na ini Kondre Di Kari na ini Bijbel

Syatu baka di mi teki dopu na ini 1933, mi bigin du a pionierwroko, soleki fa Yehovah Kotoigi e kari a furuten diniwroko. Ala di wi ben de nanga wan tu sma nomo, toku wi preiki na ini furu fu den dorpu di de na a noordsei fu Libanon. Wi preiki so srefi na ini Beirut èn na ini den birti drape èn so srefi te go miti a zuidsei fu Libanon. Na ini den fosi yari dati, wi ben gwenti fu waka noso wi ben e rei wan buriki, soleki fa Yesus Krestes nanga den bakaman fu en fu a fosi yarihondro, ben e du.

Na ini 1936, Yousef Rahhal, wan Kotoigi fu Libanon di fosi ben libi furu yari langa na ini Amerkankondre, drai kon baka na Libanon fu kon luku a kondre. A ben tyari wan geluid-sistema kon èn so srefi tu gramafon. Wi poti a sistema na tapu wan Ford oto fu 1931 èn wi go na Libanon nanga Siria fu tyari a Kownukondre boskopu go na den farawe presi. Den sma di ben de sowan tin kilometer moro fara ben man yere a geluid. Sma ben go sidon na tapu a daki fu den oso fu yere san den ben e kari den sten di ben komopo fu hemel. Den sma di ben e wroko na ini den gron, tapu nanga a wroko fu den èn den kon moro krosibei fu arki.

Wan fu den lasti waka di mi ben teki nanga Yousef Rahhal ben de di wi ben go na a foto Aleppo di de na ini Siria. Dati ben de na ini a winter fu 1937. Bifo a ben drai go baka na Amerkankondre, dan wi teki waka go so srefi na Palestina. Drape wi go na den foto Haifa nanga Yerusalem, èn wi go tu na ini den dorpu fu a kondre. Wan fu den sma di wi miti drape na Ibrahim Shehadi. Mi ben kon leri sabi en kaba nanga yepi fu brifi di wi ben e skrifi gi makandra. Ibrahim ben kon kisi so furu sabi fu Bijbel taki di wi ben de drape, a ben e teki prati makandra nanga wi na a oso-fu-oso preikiwroko.—Tori fu den Apostel 20:20.

Mi ben de fayafaya so srefi fu miti Professor Khalil Kobrossi, wan fromsu Katholiksma di ben e studeri Bijbel nanga Yehovah Kotoigi nanga yepi fu brifi. Fa a ben kisi na adres fu den Kotoigi na ini Libanon? We, di a ben de na ini wan wenkri na ini Haifa, dan a man di ben abi a wenkri domru wan tu fu den sani di Khalil ben bai na ini wan papira di a ben priti puru fu wan fu  den publikâsi fu Yehovah Kotoigi. A papira dati ben abi wi adres na en tapu. Wi ben prisiri fu miti makandra, èn baka ten na ini 1939, a professor disi kon na Tripoli fu teki dopu.

Na ini 1937, Petros Lagakos nanga en wefi doro na ini Tripoli. Na ini den yari syatu baka dati, wi ala dri preiki na ini a moro bigi pisi fu Libanon nanga Siria, fu di wi ben e go na den sma oso nanga a Kownukondre boskopu. Na a ten di Brada Lagakos dede na ini 1943, den Kotoigi ben tyari a leti na yeye fasi go kaba na pikinmoro ala den foto nanga dorpu na ini Libanon, Siria, nanga Palestina. Son leisi, wi ben de nanga sowan 30 sma èn wi ben e lusu dri yuru mamanten kaba nanga oto noso bus, so taki wi ben man doro den farawe presi.

Na ini den yari di de na mindri 1940 nanga 1950, Ibrahim Atiyeh vertaal A Waktitoren na ini Arabiatongo. Baka dati, mi ben skrifi fo eksemplaar nanga anu èn mi ben seni den go gi Kotoigi na ini Palestina, Siria, nanga Egipti. Na a ten fu a di fu Tu Grontapufeti, a preikiwroko fu wi ben kisi bun furu gens, ma wi ben tan abi kontakti nanga ala den sma na ini a Mindri Owstusei di ben lobi a waarheid fu Bijbel. Misrefi meki karta fu foto èn so srefi fu den dorpu na den lontu, èn wi ben abi a fasti bosroiti fu tyari a bun nyunsu go na den presi disi.

Na ini 1944, ala di a di fu Tu Grontapu ben de fayafaya ete, mi trow nanga Evelien, na umapikin fu mi pionier patna Michel Aboud. Te fu kaba wi kisi dri pikin, wán umapikin nanga tu manpikin.

Mi E Wroko Nanga den Zendeling

Heri esi baka di a feti ben kaba, den fosi sma di ben klari a Gileadskoro gi zendeling, doro na ini Libanon. A bakapisi fu dati ben de taki a fosi gemeente ben seti na ini Libanon, èn mi tron fesiman opziener fu a gemeente dati. Ne, na ini 1947, Nathan H. Knorr nanga en sekretarsi, Milton G. Henschel, kon na Libanon èn den gi den brada furu deki-ati. Heri esi moro zendeling doro dyaso, èn den ben yepi wi furu, fu di den leri wi fa fu orga wi diniwroko èn fa fu hori den gemeente konmakandra.

Wan fu den leisi di wi ben e go na wan farawe presi na ini Siria, dan wi kisi gens fu a beskopu fu a presi drape. A ben taki dati wi ben e prati san a ben kari publikâsi fu den Zionist (Dyusma). A switi fu a tori de taki bifo 1948 den kerkiman ben kari wi „Komunist”. A leisi disi, skowtu hori wi èn den tan dwengi wi tu yuru langa fu piki ala  sortu aksi. Na ini a pisi ten dati wi gi den wan moi Kotoigi.

Te fu kaba, a krutuman di ben arki na afersi, taki: „Ala di mi e fluku a barba [na so a ben kari a beskopu] di ben abi kragi teige unu, toku mi musu taki en tangi fu di a gi mi na okasi disi fu miti unu èn fu kon sabi den leri fu unu.” Ne a aksi wi pardon fu den problema di wi ben kisi.

Tin yari baka dati, di wi ben e drai go baka na Beirut, mi bigin wan takimakandra nanga wan man di ben sidon na mi sei; a ben de wan sabiman na tapu a kontren fu gronwroko. Baka di a arki wan tu miniti na den sani di wi ben bribi, dan a taki dati a ben yere den srefi sortu sani disi fu wan mati fu en na ini Siria. Suma ben de a mati dati? A krutuman di ben arki a krutu afersi fu wi tin yari bifo!

Na ini den yari na mindri 1950 nanga 1960, mi go luku Kotoigi na ini Irak èn mi wroko makandra nanga den na ini na oso-fu-oso preikiwroko. Mi go furu leisi so srefi na Yordania èn na a Westelijke Oever. Na ini 1951, wan grupu fu fo Kotoigi go na Betlehem èn mi ben de wan fu den sma dati. Drape wi hori na Avondmaal fu Masra. Moro fruku tapu a dei dati, den sma di ben de drape gi na Avondmaal ben go na a Yordanliba nanga bus, èn 22 fu den teki dopu leki buweisi taki den ben gi densrefi abra na Yehovah. Ibri leisi te sma ben gens wi na ini a kontren dati, wi ben e taki: „Wi kon fruteri unu taki wán fu den manpikin fu un eigi kondre sa tron Kownu fu heri grontapu! Fu san ede unu e atibron? Unu musu prisiri!”

Wi E Preiki ala di Problema De

Den sma na ini a Mindri Owstusei moro furu na sma di abi wan bun ati, den abi sakafasi, èn di abi switifasi. Furu fu den e arki bun te wi e fruteri den fu Gado en Kownukondre. A no de fu taki, dati noti e gi moro kowru-ati leki te yu sabi taki heri esi a Bijbel pramisi disi sa kon tru: „Gado srefi sa de nanga [en pipel]. Èn a sa figi puru ala watra na den ai, èn dede no sa de moro, no wan sari, no wan babari, no wan pen no sa de moro.”—Openbaring 21:3, 4.

Mi si taki furu sma di e gens a wroko fu wi no  sabi soifri sortu wroko wi e du èn sortu boskopu wi e tyari. Den kerki tiriman fu Krestenhèit du so furu sani fu meki taki sma e kisi wan takru denki fu wi! Fu dati ede, na a ten fu a borgu orloku di bigin na ini Libanon na ini 1975 èn di teki moro leki 15 yari, den Kotoigi kisi furu problema.

Wan leisi mi ben e studeri Bijbel nanga wan osofamiri di fosi ben de fayafaya kerkisma. Den kerki tiriman ben kisi atibron nanga den sma disi fu di den ben kon sabi furu fu a waarheid fu Bijbel. Leki bakapisi fu dati, wan neti wan kerki grupu fu a presi drape gi den memre fu en tranga fu broko kon na ini a wenkri fu na osofamiri disi, èn den bron sani di ben de na ini a wenkri. Den sani disi ben abi wan waarde fu sowan 10.000 Amerkan dala. A srefi neti dati, den memre fu a kerki kon èn den teki mi tyari gowe nanga tranga. Ma mi ben man rideneri nanga a fesiman fu den, fu di mi taigi en taki efu trutru den ben de Kresten, dan den no ben o handri na so wan ogri-atifasi. Fu a sani dati, a fesiman gi komando fu stop na oto èn a taigi mi fu komopo na ini.

Wan tra leisi, fo man fu wan fetigrupu tyari mi gowe nanga tranga. Baka di den ben warskow mi furu leisi taki den ben o du mi ogri, dan a fesiman fu den di ben taki dati a ben o sutu mi kiri, wantronso kisi wan tra prakseri èn a lusu mi. Tu fu den man disi de na strafu-oso now fu di den kiri wan sma èn fu di den ben fufuru, èn den tra tu man lasi den libi fu di den kisi dedestrafu.

Tra Okasi fu Gi Kotoigi

Mi kisi na okasi furutron fu frei nanga opolani go fu a wán kondre go na a trawan. Wan leisi di mi ben e frei fu Beirut go na Amerkankondre, dan mi ben e sidon sei Charles Malek. A man disi ben de minister fu dorosei afersi fu Libanon fosi. A ben arki mi heri bun, èn a frustan ala den vers di mi leisi gi en fu Bijbel. Te fu kaba, a taki dati a ben go na wan skoro na ini Tripoli èn a skoromeester fu en drape ben de Ibrahim Atiyeh. A papa fu mi wefi ben yepi a man disi fu kon sabi a waarheid fu Bijbel! Masra Malek ben taki dati Ibrahim ben leri en fu lespeki Bijbel.

Wan tra leisi di mi ben e frei go nanga opolani na wan presi, mi ben sidon sei wan sma fu Palestina di ben de wan ambasadoro na den Verenigde Nâsi gi a kondre fu en. Mi ben kisi na okasi fu fruteri en fu a bun nyunsu fu Gado en Kownukondre. Te fu kaba a meki mi kon sabi a famiri fu en brada di ben e libi na ini New York, èn mi ben gwenti fu go luku den. Wan famiriman fu mi ben e wroko tu na ini a gebow fu den Verenigde Nâsi na ini New York. Wan dei di mi go na a kantoro fu en, mi tan drape dri yuru langa. Na ini a pisi ten dati mi ben man gi en wan kotoigi fu Gado en Kownukondre.

Now mi abi 88 yari, èn mi man yepi ete fu sorgu gi den frantwortu fu a gemeente. A wefi fu mi, Evelien, e dini Yehovah ete makandra nanga mi. Wi umapikin trow nanga wan kringopziener fu Yehovah Kotoigi, di e dini now leki owruman na ini wan gemeente na Beirut. Na umapikin fu den na wan Kotoigi tu. A moro yongu manpikin fu wi na wan Kotoigi makandra nanga a wefi fu en, èn na umapikin fu den de na ini a waarheid so srefi. Èn a moro bigi manpikin fu wi? We, wi poti a Kresten bribi dipi na ini en ati, èn mi e howpu taki wan dei a sa teki a bribi disi.

Na ini 1933, mi bigin dini leki pionier. Mi ben de a fosiwan na ini a Mindri Owstusei. Mi no ben o man feni wan moro bun sani fu du nanga mi libi, leki fu dini Yehovah leki wan pionier na ini ala den 68 yari di pasa. Èn mi abi a fasti bosroiti fu tan waka na ini a leti na yeye fasi di a e gi wi.

[Prenki na tapu bladzijde 23]

Najib na ini 1935

[Prenki na tapu bladzijde 24]

Mi de nanga wan oto di ben abi wan geluid sistema na tapu, na ini den bergi fu Libanon, na ini 1940

[Prenki na tapu bladzijde 25]

Fu bigin na a kruktu-anusei saka go na ondro na a reti-anusei: Najib, Evelien, na umapikin fu den, Brada Aboud nanga a moro bigi manpikin fu Najib, na ini 1952

Na ondrosei (a fosi rei): Brada Shammas, Knorr, Aboud, nanga Henschel na Najib en oso, Tripoli, na ini 1952

[Prenki na tapu bladzijde 26]

Najib nanga en wefi, Evelien