„San E Pasa na ini Fransikondre?”

„Fri, switi fri”, na wortu fu „La Marseillaise”, a singi fu Fransikondre. A no de fu taki dati fri na wan warti sani. Toku, wan tu sani di pasa na ini Fransikondre no so langa pasa, e meki taki sma e frede taki den sa lasi den moro prenspari sani di wan sma di de fri musu abi. A sani disi meki taki, tapu freida 3 november 2000, tin dusundusun Kotoigi fu Yehovah prati 12 milyun eksemplaar fu wan spesrutu traktaat di abi leki nen „San E Pasa na ini Fransikondre? Wi Sa Lasi a Fri Di Wi Abi?”

WAN tu yari kaba, difrenti politiekman nanga grupu fu sma di de teige tra kerki grupu, e suku fu pori a nen fu Yehovah Kotoigi na ini Fransikondre. A sani disi meki taki Kotoigi kisi problema nanga tra sma, na den Kownukondre zaal fu den, èn so srefi na ini a heri kondre fu den. Ma tapu 23 yuni 2000, a Conseil d’État, wan fu den moro hei krutubangi na ini Fransikondre, teki wan tumusi prenspari bosroiti di gi krakti na a bosroiti di 31 moro lagi krutubangi ben teki kaba na ini moro leki 1100 krutu afersi. A hei krutubangi bosroiti taki na anbegi fu Yehovah Kotoigi e kruderi dorodoro nanga den wet fu Fransikondre èn taki neleki tra kerki, Yehovah Kotoigi no abi fu pai belasting gi den Kownukondre zaal fu den.

Ma a Ministeria fu Moni Afersi fu Fransikondre no e lespeki a bosroiti disi srefisrefi, bika den e tan dwengi Yehovah Kotoigi fu pai belasting, ala di a wet e taki dati kerki organisâsi no abi fu du dati. A Ministeria e dwengi den kotoigi fu pai 60 procent belasting tapu den bijdrage di den e kisi fu Kotoigi nanga tra sma di e kon makandra na ini den 1500 gemeente di de na ini Fransikondre. Krutubangi e luku na afersi disi now.

A marki fu a bariwroko di na artikel disi e taki fu en na ini a bigin, ben de fu sori sma taki a Ministeria no e hori ensrefi na a wet. Wan tra marki di a bariwroko ben abi, ben de fu tyari kon na krin sortu takru bakapisi kan kon te lanti e  dwengi sma fu pai belasting ala di wet no e taki so, èn te lanti e suku fu poti wet di sa meki taki sma no sa abi a fri moro fu anbegi soleki fa den wani. *

Wan Langa Dei

Tu yuru mamanten, Kotoigi fu wan tu gemeente bigin prati a traktaat na den treinstation nanga den fabriki èn baka dati na den opolanigron. Siksi yuru ten, den sma na ini Parijs ben bigin nanga a dei. Sowan 6000 friwani wrokoman ben tanapu na spesrutu presi fu miti sma di ben e reis go na den wrokopresi. Wan yongu uma ben taki: „A strei di unu e strei fu man anbegi fa unu wani, na wan bun sani. A no Yehovah Kotoigi wawan de na ini a tori.” Na ini a foto Marseilles, moro leki 350 Kotoigi ben prati a traktaat na den ondrogron stasyon èn na strati. Na ini wán yuru ten nomo, den radiostation fu Fransikondre meki a bariwroko fu den Kotoigi bekènti, èn den taigi den arkiman fu no skreki te Yehovah Kotoigi ben kon taki nanga den. Na ini a foto Strasbourg, pe na Europese Hof voor de Rechten van de Mens (wan hei krutubangi di e feti gi den reti fu libisma) de, sma di ben de na a treinstation di de mindrisei fu a foto, ben teki den ten fu go tanapu na ini wan rei fu kisi wan traktaat. Wan afkati ben taki dati, ala di a abi wan tra bribi, toku a ben tan luku fu si fa a krutu afersi fu wi ben o waka, fu di wi ben e feti gi wan sani di de prenspari èn di de opregti so srefi.

Aiti yuru ten, 507 Kotoigi na ini Grenoble, wan foto na ini den Alpen, ben e wroko ala strati finifini noso den ben poti a traktaat na ini den brifiboksu fu sma. Den ben e du disi ala di hebi alen ben e fadon. Sma di ben e rei oto nanga loko èn di ben si taki wan sani ben e pasa, stop fu aksi wan traktaat. Na ini a foto Poitiers di de na a westsei fu a kondre, sma di ben e doro drape nanga loko neigi yuru ten, ben kisi a traktaat kaba na a presi fu pe den ben komopo. Na ini a presi Mulhouse di de na a lanki fu Doisrikondre, Kotoigi ben prati 40.000 traktaat kaba.

Di tin yuru doro, dan furu gemeente ben prati moro leki afu fu den traktaat di den ben abi. Na a ten di dei broko, wan tu sma nomo weigri fu teki a traktaat, èn den Kotoigi ben abi wan tu moi takimakandra nanga sma leki bakapisi fu dati. Na ini Besançon, di de sowan 80 kilometer bifo yu doro a lanki fu Switserland, wan yonkuman ben wani sabi moro fu Bijbel èn a aksi wan Kotoigi fu san ede Gado e gi pasi taki pina de. A Kotoigi aksi en fu go doro nanga a takimakandra na wan Kownukondre zaal di ben de krosibei, èn den bigin wan bijbelstudie wantron drape nanga yepi fu a brochure San Gado e aksi foe wi?

Twarfu yuru ten, furu Kotoigi ben gebroiki a brektenpauze fu den fu preiki wán noso tu yuru. Den tan prati a traktaat a heri bakadina, èn furu gemeente tapu nanga a wroko dri yuru noso fo yuru fu a bakadina dati. Na ini a foto Reims pe den e meki champagne, son sma di fosi studeri nanga Kotoigi fu Yehovah noso ben abi demakandra nanga den, taigi den Kotoigi taki den ben wani abi demakandra baka nanga a gemeente. Na ini a foto Bordeaux Kotoigi bigin dri bijbelstudie. Na ini a srefi foto, wan Kotoigi ben go na ini wan wenkri fu bai wan koranti èn a si wan ipi traktaat na tapu a wenkribangi. A sma di ben abi a wenkri, ben de wan Kotoigi fosi. Di a kisi a traktaat èn ben kon si o prenspari a de, dan a meki kopie fu den so taki ensrefi ben kan prati den na sma.

Na ini a foto Le Havre di de na ini Normandia, wan uma di abi a Protestant bribi ben skreki trutru di a yere na radio taki den Kotoigi fu Yehovah musu pai belasting tapu den bijdrage di den e kisi.  A ben breiti srefisrefi di a kisi a traktaat èn a fristeri den Kotoigi fu di den ben opo den sten teige so wan onregtfardiki sani. Na 7:20 neti yuru, a nyunsu na telefisi na ini a foto Lyons ben taki so fu a wroko di den Kotoigi ben du: „Di mamanten, a ben de moro makriki fu wai pasi gi na alen di ben e fadon leki fu wai pasi gi den traktaat fu den Kotoigi fu Yehovah.” Wan interview ben hori nanga tu Kotoigi èn den fruteri fu san ede den ben e du a bariwroko disi.

Kotoigi di ben wani teki prati na a wroko baka di den ben kaba du a grontapu wroko fu den, prati wan tu traktaat na sma di ben e reis go baka na den oso. Wan tu fu den traktaat den poti na ini den brifiboksu fu sma. Na ini den foto soleki Brest nanga Limoges — di furu sma sabi fu di posren e meki drape — sma di ben komopo fu kino na a ten fu 11 yuru na neti, ben de den lasti sma di kisi a traktaat a dei dati. Den Kotoigi tyari den traktaat di ben tan abra kon makandra, èn den prati den a mamanten baka dati.

A Bakapisi fu a Wroko

Wan Kotoigi ben skrifi: „Den gensman fu wi e denki taki den e swaki wi. Fu taki en leti, yoisti wan tra sani e pasa.” Na ini furu gemeente, moro leki 75 procent fu den Kotoigi ben abi wan prati na a wroko a dei dati. Wan tu fu den ben wroko 10, 12 noso 14 yuru langa. Na ini a foto Hem di de na a noordsei fu Fransikondre, wan Kotoigi di ben wroko na neti, prati a traktaat fu feifi yuru mamanten te go miti dri yuru bakadina. Sensi 1906, wan gemeente de na ini a foto Denain di de krosibei fu Hem, èn tapu freida 75 Kotoigi wroko 200 yuru langa fu prati a traktaat drape. Trawan ben wani nomonomo fu teki prati na a wroko, ala di den ben owru noso den ben siki, èn ala di a weer ben takru. Fu gi wan eksempre, na ini a foto Le Mans, dri sisa di ben pasa 80 yari, wroko tu yuru langa fu poti a traktaat na ini den brifiboksu fu sma. Wan Kotoigi di de na ini wan rolsturu, prati a traktaat na sma fesisei fu wan treinstation. A ben gi deki-ati trutru fu si taki furu Kotoigi di fosi ben tapu fu teki prati na a preikiwroko, ben e teki prati na a aparti wroko disi!

Sondro tweifri, a wroko disi ben de wan bigi kotoigi. Ala sortu sma, srefi furu fu den sma di pikinmoro noiti den Kotoigi ben miti na den oso, ben kisi wan eksemplaar fu a traktaat. Furu sma ben feni taki a wroko disi no ben de fu a bun fu den Kotoigi wawan. Furu sma ben si a wroko disi leki wan fasi fu feti gi a fri fu eigi denki èn so srefi gi fri gi ala sma na ini Fransikondre fu man anbegi soleki fa den wani. Leki buweisi fu dati, wan tu sma ben aksi fu kisi moro traktaat fu gi mati, wrokokompe, noso famiriman fu den.

Iya, Yehovah Kotoigi na ini Fransikondre breiti fu meki Yehovah en nen bekènti èn fu feti gi a bun fu a Kownukondre (1 Petrus 3:15). Den abi na opregti howpu fu kan ’tan libi wan libi sondro bruya, ala di den e gi densrefi dorodoro èn na wan seryusu fasi na ini a dini fu Gado’. Den e howpu so srefi taki dusundusun tra sma sa prèise den hemel Tata, Yehovah, makandra nanga den.—1 Timoteus 2:2.

[Futuwortu]