A Blesi fu Yehovah E Meki Wi Kon Gudu

„A blesi fu Yehovah — dati na san e meki sma kon gudu, èn a no e moksi sari nanga dati.”—ODO 10:22.

1, 2. Fu san ede a de di wan sma de koloku, no abi noti fu du nanga materia gudu?

A MORO prenspari sani di e basi a libi fu milyunmilyun sma na ini a ten disi, na a suku di den e suku fu kisi materia sani. Ma materia sani e gi den wan koloku libi? „Mi no man memre taki oiti wan tra ten ben de pe sma ben sari so furu, noso ben lasi-ati fu a fasi fa a libi fu den e waka”, na so a tijdschrift The Australian Women’s Weekly e taki. A e taki moro fara: „A gersi taki a sani disi no kan srefisrefi. Sma e fruteri wi taki Australia e meki en heri bun na ekonomia sei. Den e taki dati noiti a libi ben waka so bun leki now. . . . Ma toku na a tra sei furu sma na ala sei fu a kondre e feni dati sani no e waka bun. Mansma nanga umasma e firi taki wan sani e mankeri na ini den libi, ma den no sabi san na a sani dati.” Den Buku fu Bijbel abi leti fu tru! Den e sori krin taki den gudu di wi abi no man meki wi koloku èn den no man meki wi tan na libi.—Preikiman 5:10; Lukas 12:15.

² Bijbel e leri taki sma de koloku trutru te Gado e blesi den. Ini a tori disi, Odo 10:22 e taki: „A blesi fu Yehovah — dati na san e meki sma kon gudu, èn a no e moksi sari nanga dati.” Nofotron, a feti di wan sma e feti nomonomo na baka materia gudu, e tyari bigi sari kon. A fiti taki na apostel Paulus ben warskow: „Ma den sma di abi a fasti bosroiti fu kon gudu, e kon ini wan tesi èn wan trapu èn furu don èn takru lostu, di e  meki sma fadon go na ini pori. Bika a lobi gi moni na wan rutu fu ala sortu takru sani, èn fu di sonwan e feti na baka a lobi disi, meki den gowe libi a bribi èn den sutu densrefi na den heri skin nanga furu pen.”—1 Timoteus 6:9, 10.

3. Fu san ede den futuboi fu Gado e kisi tesi?

³ Na a tra sei, ala den sma di e „tan arki a sten fu Yehovah”, sa kisi blesi di no e tyari sari noso pen kon (Deuteronomium 28:2). Ma son sma ben sa kan aksi, ’Efu Yehovah no e moksi sari noso pen nanga a blesi di a e gi, dan fu san ede furu fu den futuboi fu Gado e pina?’ Bijbel e sori taki Gado e gi pasi meki tesi kon na den tapu, ma taki den tesi trutru e kon fu Satan, fu a godelowsu seti fu en, èn so srefi fu wi eigi onvolmaaktifasi ede (Genesis 6:5; Deuteronomium 32:4, 5; Yohanes 15:19; Yakobus 1:14, 15). Yehovah na a Sma fu pe „ibri bun presenti nanga ibri volmaakti kado” e komoto (Yakobus 1:17). So bun, den blesi fu en noiti e meki sma pina. Fu dati ede, meki wi poti prakseri na wan tu fu den volmaakti kado fu Gado.

Gado Wortu Na wan Tumusi Warti Presenti

4. Sortu blesi nanga warti presenti a pipel fu Yehovah kisi na ini ’a ten disi fu a kaba’?

⁴ A profeititori fu Danièl e taki fu a „ten fu a kaba”: „A tru sabi sa kon de pasa marki.” Ma den wortu di e kon now e fruteri syatu san disi wani taki: „No wan godelowsu sma srefisrefi sa frustan; ma den wan di abi inzicht sa frustan” (Danièl 12:4, 10). Prakseri fu dati! Gado meki sma skrifi a Wortu fu en — spesrutu den profeititori — na so wan fasi taki den godelowsuwan no sabi san den sani na ini en Wortu wani taki trutru, ala di a pipel fu Yehovah man frustan den heri bun. „Mi e prèise yu na fesi ala sma, Tata, Masra fu hemel nanga grontapu,” na so Gado en Manpikin ben e begi, „bika yu kibri den sani disi heri bun gi den koniwan nanga den sabiman, èn yu tyari den kon na krin gi nyofi pikin” (Lukas 10:21). A de wan blesi trutru taki wi abi Gado Wortu, a Bijbel, di de wan warti presenti srefisrefi, èn taki wi de na mindri den wan di Yehovah ben gi a koni fu man frustan yeye sani krinkrin!—1 Korentesma 1:21, 27, 28; 2:14, 15.

5. San na koni, èn fa wi kan kisi dati?

⁵ Wi no ben sa man frustan yeye sani kwetikweti efu wi no ben kisi „a koni fu tapusei” (Yakobus 3:17). Te wan sma abi koni, dan dati wani taki dati a man gebroiki a sabi nanga a frustan di a abi, fu lusu problema, fu wai pasi gi kefar, fu doro marki, noso fu gi bun rai. Fa wi kan kisi a koni dati? Odo 2:6 e taki: „Yehovah srefi e gi koni; fu en mofo sabi nanga koni fu si sani krin e komoto.” Iya, Yehovah sa gi wi koni efu wi e tan aksi en fu dati na ini begi, neleki fa a ben gi Kownu Salomo „wan ati di koni èn di e frustan sani” (1 Kownu 3:11, 12; Yakobus 1:5-8). Efu wi wani tron sma di abi koni, dan wi musu tan arki Yehovah so srefi fu di wi e studeri èn e gebroiki en Wortu na ini wi libi doronomo.

6. Fu san ede a de wan koni sani fu gebroiki den wet nanga den gronprakseri fu Gado na ini wi libi?

⁶ A koni fu Gado de krin fu si na ini den wet nanga gronprakseri fu Bijbel. Den e gi wi winimarki na ala sortu fasi — na skin sei, na frustan sei, na a sei fu den firi fu wi, èn den e gi wi winimarki na yeye fasi. Nanga reti, a psalm skrifiman ben singi: „A wet fu Yehovah de volmaakti, a e tyari a sili kon baka. A frumane fu Yehovah de getrow, a e meki a sma di no abi ondrofeni kon koni. Den komando fu Yehovah de reti, den e meki na ati prisiri;  a komando fu Yehovah krin, a e meki den ai brenki. A frede gi Yehovah de soifri, e tan fu têgo. Den krutu bosroiti fu Yehovah de tru; den alamala makandra sori fu de regtfardiki. Sma musu angri fu dati moro leki gowtu, iya, moro leki furu gowtu di meki kon krin.”—Psalm 19:7-10; 119:72.

7. San na a bakapisi te sma e wisiwasi den regtfardiki markitiki fu Gado?

⁷ Na a tra sei, den sma di e wisiwasi den regtfardiki markitiki fu Gado, no sa feni a koloku libi nanga a fri di den e suku. Te fu kaba, den e kon si taki Gado no e meki sma spotu nanga en, bika san wan sma e sai na dati a sa koti tu (Galasiasma 6:7). Milyunmilyun sma di e wisiwasi den Bijbel gronprakseri no e koti bun sani srefisrefi. Fu eksempre, den e kisi bere sondro taki den wani dati, den e kisi takru siki, noso den e gebroiki sani di e meki den skin kon swaki srefisrefi. Efu den no abi berow èn no e drai den libi, dan a fasi fa den e tyari densrefi sa meki den lasi den libi te fu kaba èn kande den sa dede fu di Gado sa pori den.—Mateus 7:13, 14.

8. Fu san ede den wan di lobi Gado Wortu de koloku?

⁸ Ma den wan di lobi Gado Wortu èn di e gebroiki en na ini den libi, sa kisi furu blesi now èn na ini a ten di e kon. Den e firi trutru taki a wet fu Gado meki den kon fri. Den de koloku trutru, èn so srefi den e wakti fayafaya tapu a ten pe den sa kon fri fu sondu nanga den bakapisi fu dati di e kiri sma (Romesma 8:20, 21; Yakobus 1:25). A howpu disi de seiker bika a abi en fondamenti tapu a moro moi presenti di Gado ben gi a libisma famiri, namku a frulusu-ofrandi fu en wan-enkri gebore Manpikin, Yesus Krestes (Mateus 20:28; Yohanes 3:16; Romesma 6:23). A tumusi moi presenti disi e sori krin o bigi a lobi fu Gado de gi a libisma famiri. A e gi wi a dyaranti so srefi taki den wan di e tan arki Yehovah, sa kisi blesi sondro kaba.—Romesma 8:32.

Wi E Prisiri Srefisrefi Taki Wi Kisi Santa Yeye

9, 10. Fa wi e kisi winimarki fu a santa yeye di Yehovah gi wi leki presenti? Gi wan eksempre.

⁹ Wan tra moi presenti fu Gado di wi musu warderi srefisrefi, na a santa yeye fu en. Tapu a dei fu a Pinksterfesa fu 33 G.T., na apostel Petrus ben gi den ipi-ipi sma drape na ini Yerusalem a tranga: „Abi berow, èn meki ibriwan fu unu teki dopu na ini a nen fu Yesus Krestes fu kisi pardon fu den sondu fu unu, èn unu sa kisi a fri presenti fu a santa yeye” (Tori fu den Apostel 2:38). Na ini a ten disi, Yehovah e gi santa yeye na den loyaal futuboi fu en di e begi en fu dati èn di wani du a wani fu en (Lukas 11:9-13). Gado en santa yeye, noso wroko krakti, na a moro bigi krakti na ini na universum. Na ini owruten, Gado ben gebroiki a santa yeye disi fu gi krakti na den man nanga uma di ben abi bribi, èn so srefi na den fosi Kresten (Sakaria 4:6; Tori fu den Apostel 4:31). Na a srefi fasi a krakti disi kan yepi wi tu, awinsi sortu problema noso tyalensi wi ben sa kan kisi leki a pipel fu Yehovah.—Yoèl 2:28, 29.

¹⁰ Prakseri na eksempre fu Laurel di ben abi polio (wan siki di e meki sma kon lan). Fu di den fokofoko fu en no ben wroko bun moro, meki a ben musu didon 37 yari langa na ini wan isri apparaat di ben yepi en bro. * Awinsi a ben de na ini so wan tumusi muilek situwâsi, toku a ben dini Gado fayafaya te na en dede. Na ini den yari di pasa, Yehovah ben blesi Laurel srefisrefi. Fu eksempre, a ben man yepi sowan 17 sma fu kisi soifri sabi fu Bijbel waarheid, awinsi a ben musu tan heri dei nanga neti na ini na apparaat dati! A situwâsi fu en e meki wi prakseri san na apostel Paulus ben taki: „Te mi swaki, dan mi tranga” (2 Korentesma 12:10). Iya, den bun bakapisi di wi ben kan abi na ini a preiki di wi e preiki a bun nyunsu, no de wan  sani di wi du nanga wi eigi koni nanga krakti. Ma na Gado e yepi wi nanga en santa yeye, di a e gi na den wan di e tan arki en sten.—Yesaya 40:29-31.

11. Sortu eigifasi a yeye fu Gado e meki den sma abi di e weri „a nyun fasi fa wan sma musu de”?

¹¹ Efu wi e arki Gado èn e du san a wani, dan a yeye fu en e meki wi abi den eigifasi lobi, prisiri, vrede, langa pasensi, switifasi, bun-ati, bribi, safri-atifasi, nanga a dwengi di wan sma e dwengi ensrefi (Galasiasma 5:22, 23). A „froktu” disi „fu a yeye” na wan pisi fu „a nyun fasi fa wan sma musu de”, èn Kresten e kweki a nyun fasi disi na presi fu den takru eigifasi di den ben abi fosi, soleki gridifasi (Efeisesma 4:20-24; Yesaya 11:6-9). Wan tumusi prenspari eigifasi na ini a froktu disi na lobi, di de „wan volmaakti banti fu wánfasi”.—Kolosesma 3:14.

Kresten Lobi na wan Presenti Di Wi Musu Warderi Srefisrefi

12. Fa Tabita nanga tra Kresten fu a fosi yarihondro ben sori lobi?

¹² Kresten lobi na wan tra moi presenti di Yehovah gi wi. A de wan presenti di wi e warderi trutru. Gronprakseri e tiri a lobi dati, ma fu di a de wan lobi di e meki sma abi someni waran firi gi makandra, meki a e hari sma na makandra srefisrefi, taki den e kon abi wan banti di moro tranga leki a banti di famiriman abi nanga makandra (Yohanes 15:12, 13; 1 Petrus 1:22). Fu eksempre, prakseri Tabita, wan bun Kresten uma fu a fosi yarihondro. „A ben du furu bun sani èn ben abi furu presenti fu sari-ati”. A ben du den sani disi spesrutu gi den weduwe na ini a gemeente (Tori fu den Apostel 9:36). A kan de so taki den uma disi ben abi famiriman, ma Tabita ben wani du ala san a ben man, fu yepi den weduwe èn fu gi den deki-ati (1 Yohanes 3:18). Tabita ben poti wan tumusi moi eksempre srefisrefi! Brada lobi ben meki taki Priska nanga Akwila ben ’tyari den eigi libi kon ini kefar’ gi Paulus. Lobi ben meki so srefi taki Epafras, Lukas, Oneisiforus nanga trawan ben yepi na apostel Paulus di a ben de na strafu na ini Rome (Romesma 16:3, 4; 2 Timoteus 1:16; 4:11; Fileimon 23, 24). Iya, Kresten na ini a ten disi di e tyari densrefi na a srefi fasi, e sori tu taki den ’abi lobi na den mindri’. A lobi disi na wan blesi di Gado gi den leki presenti èn a e sori taki den na tru disipel fu Yesus.—Yohanes 13:34, 35.

13. Fa wi kan sori taki wi trutru e warderi a Kresten bradafasi fu wi?

¹³ Yu e warderi a lobi di trawan e sori na ini  a Kresten gemeente? Yu e prisiri taki wi abi wan yeye bradafasi na heri grontapu? Den sani disi na tumusi moi presenti so srefi fu Yehovah di e gi wi prisiri srefisrefi èn di e meki wi kon gudu. Fa wi kan sori taki wi e warderi den? Wi kan du dati efu wi e du santa diniwroko gi Gado, efu wi e teki prati na den Kresten konmakandra, èn efu wi e sori lobi nanga den tra froktu fu a yeye fu Gado.—Filipisma 1:9; Hebrewsma 10:24, 25.

„Presenti ini Libisma”

14. San wan Kresten musu du efu a wani dini leki wan owruman noso wan dinari ini a diniwroko?

¹⁴ Kresten man di wani dini den brada nanga sisa fu den leki owruman noso dinari ini a diniwroko, abi wan moi marki na prakseri (1 Timoteus 3:1, 8). Efu wan brada wani kisi den spesrutu grani disi fu diniwroko, dan a musu de wan man di tranga na yeye fasi. A musu sabi den Buku fu Bijbel heri bun èn a musu de fayafaya na ini a preikiwroko (Tori fu den Apostel 18:24; 1 Timoteus 4:15; 2 Timoteus 4:5). A musu sori sakafasi, bescheidenfasi nanga pasensi, bika Gado no e blesi den sma di abi heimemre nanga bigifasi, noso sma di e suku fu kisi biginen (Odo 11:2; Hebrewsma 6:15; 3 Yohanes 9, 10). Efu a trow, dan a musu de wan edeman di lobi en osofamiri. A musu man tiri en heri osofamiri na wan bun fasi (1 Timoteus 3:4, 5, 12). Fu di a e warderi yeye gudu, meki sowan man sa kisi a blesi fu Yehovah.—Mateus 6:19-21.

15, 16. Suma sori fu de „presenti ini libisma”? Gi wan tu eksempre.

¹⁵ Te den wan di e dini leki owruman na ini a gemeente e wroko tranga leki preikiman, skapuman nanga leriman, dan dati e gi wi bun reide fu warderi den „presenti” disi „ini libisma” (Efeisesma 4:8, 11). A kan de so taki, a no ala ten den wan di e kisi wini fu a diniwroko fu den e taki nanga mofo dati den e warderi a wroko fu den, ma Yehovah e si ala san den getrow owruman e du. A no sa frigiti a lobi di den e sori gi en nen fu di den e dini a pipel fu en.—1 Timoteus 5:17; Hebrewsma 6:10.

¹⁶ Luku a kefal fu wan owruman di e du en diniwroko fayafaya, èn di ben go luku wan Kresten umapikin di ben musu du wan oparâsi na en ede-tonton. „A ben abi switifasi trutru, a ben de klariklari fu yepi, a trutru ben broko en ede nanga a pikin”, na so wan mati fu na osofamiri ben taki. „A ben aksi efu a ben kan begi Yehovah makandra nanga wi. Di a ben e begi, dan a papa [di no de wan Kotoigi fu Yehovah] ben e krei srefisrefi èn den ai fu ala sma na ini na ati-oso kamra ben lon watra. A begi fu na owruman dati ben naki na ati trutru. A de wan lobi-ati sani srefisrefi taki Yehovah ben seni en yoisti na ini so wan muilek ten! Wan tra Kotoigi ben taki fu den owruman di ben kon luku en na ati-oso: „Di den ben kon tanapu na mi bedi na ini na intensive care afdeling (wan presi pe sma di abi wan seryusu siki e kisi spesrutu datra yepi), dan mi ben sabi taki mi ben o man horidoro awinsi san ben o pasa baka dati. Mi ben kon tranga èn mi ben kisi vrede na ini mi ati.” Wan sma ben sa kan bai a lobi disi? Kwetikweti! A de wan presenti fu Gado, di wi kan kisi nanga yepi fu a Kresten gemeente.—Yesaya 32:1, 2.

 Wi Kisi a Presenti fu Du a Preikiwroko

17, 18. (a) Sortu moi diniwroko Yehovah e gi a pipel fu en leki presenti? (b) Sortu yepi Gado e gi wi so taki wi man klari a diniwroko fu wi?

¹⁷ A moro bigi grani di wan libisma ben kan kisi na fu dini Yehovah, a Moro Heiwan (Yesaya 43:10; 2 Korentesma 4:7; 1 Petrus 2:9). Ma toku, ala sma di trutru wani dini Gado kan kisi a grani fu teki prati na ini a publiki diniwroko, efu na yongusma noso owrusma, mansma noso umasma. Yu e gebroiki a warti presenti disi? Son sma e draidrai fu preiki fu di den e feni taki den no bun nofo fu du dati. Ma yu musu hori na prakseri taki Yehovah e gi santa yeye na den wan di e dini en, èn taki a yeye dati e yepi wi fu du san wisrefi no man.—Yeremia 1:6-8; 20:11.

¹⁸ Yehovah gi a Kownukondre preikiwroko na den futuboi fu en di abi sakafasi. A no gi dati na sma di abi bigifasi èn di e frutrow tapu den eigi koni (1 Korentesma 1:20, 26-29). Sma di abi sakafasi èn di de bescheiden e erken taki den no man du ala sani den wawan. Den e frutrow tapu Gado taki a sa yepi den te den de na ini a preikiwroko. Den abi warderi so srefi gi a yepi na yeye fasi di Gado e gi den nanga yepi fu „a getrow basya”.—Lukas 12:42-44; Odo 22:4.

Wan Koloku Osofamiri-Libi Na wan Tumusi Moi Presenti

19. Sortu sani e meki taki pikin-nengre kisi bun kweki?

¹⁹ A trowlibi nanga wan koloku osofamiri-libi na presenti fu Gado (Rut 1:9; Efeisesma 3:14, 15). Pikin-nengre srefi na wan warti „gudu di e kon fu Yehovah”. Den e gi prisiri na den papa nanga mama fu den di e du muiti fu meki den eigifasi fu Gado doro na ati fu den pikin fu den (Psalm 127:3). Efu yu na wan papa noso mama, dan yu musu tan arki Yehovah fu di yu e gi den yonguwan fu yu leri akruderi a Wortu fu en. Den wan di e du dati kan abi a frutrow taki Yehovah sa horibaka gi den èn taki a sa blesi den srefisrefi.—Odo 3:5, 6; 22:6; Efeisesma 6:1-4.

20. San kan yepi papa nanga mama di abi pikin di gowe libi a tru anbegi?

²⁰ Ala di papa nanga mama di abi frede gi Gado e meki furu muiti, toku a kan de so taki wan tu fu den pikin fu den e bosroiti fu libi a tru anbegi te den gro kon bigi (Genesis 26:34, 35). A sani disi kan meki papa nanga mama brokosaka dorodoro (Odo 17:21, 25). Ma na presi fu lasi-ati krinkrin so taki den e du noti moro fu yepi den, dan den ben sa kan hori na agersitori fu Yesus na prakseri di ben taki fu a manpikin di ben lasi. Ala di a manpikin dati ben gowe libi en oso fu go libi wan yayo libi, toku a ben drai kon baka na a oso fu en papa. A papa dati ben gi en manpikin wan waran switikon èn a ben prisiri srefisrefi fu si en (Lukas 15:11-32). Awinsi san kan pasa, getrow Kresten papa nanga mama kan abi a frutrow taki Yehovah e frustan a situwâsi fu den. Den kan de seiker taki Yehovah e broko en ede nanga den èn taki a sa horibaka gi den.—Psalm 145:14.

21. Suma wi musu arki, èn fu san ede?

²¹ Fu dati ede, meki ibriwan fu wi luku san de prenspari trutru na ini wi libi. Wi e feti fu kisi furu materia sani, di kan tyari pen nanga sari kon gi wi osofamiri? Noso wi e suku den ’bun presenti nanga den volmaakti kado’ di e kon fu „a Tata fu den hemel leti” (Yakobus 1:17). Satan, „a tata fu lei”, wani taki wi musu feti nomonomo fu kon gudu; a no wani taki wi musu de koloku èn a wani so srefi taki wi musu lasi wi libi (Yohanes 8:44; Lukas 12:15). Ma Yehovah e broko en ede nanga wi trutru èn a wani taki sani e waka bun gi wi (Yesaya 48:17, 18). So bun, meki wi tan arki wi lobi-ati hemel Tata èn meki wi ala ten „abi switi prisiri” na ini en (Psalm 37:4). Efu wi e tyari wi libi na so wan fasi, dan den tumusi warti presenti fu Yehovah nanga den bogobogo blesi fu en sa meki wi kon gudu — èn wi sa man kisi dati sondro pen nanga sari.

[Futuwortu]

Yu E Memre Disi Ete?

• Pe wi kan feni trutru koloku?

• San na wan tu presenti di Yehovah e gi a pipel fu en?

• Fu san ede a preikiwroko na wan presenti?

• San papa nanga mama kan du fu kisi a blesi fu Gado te den e kweki den pikin fu den?

[Aksi fu a tori disi]

[Prenki na tapu bladzijde 16]

Yu e sori warderi gi a Wortu di Gado gi wi leki presenti?

[Prenki na tapu bladzijde 17]

Ala di Laurel Nisbet ben de na ini tumusi muilek situwâsi, toku a ben dini Gado fayafaya

[Prenki na tapu bladzijde 18]

Neleki Tabita, sma kon sabi den disiten Kresten leki sma di e du sani gi trawan, fu di den lobi den

[Prenki na tapu bladzijde 19]

Kresten owruman e broko den ede nanga tra bribiman