A Tru Anbegi E Tyari Wánfasi Kon na Mindri Sma

ALA di moro furu kerki e tyari pratifasi kon na mindri libisma, toku na anbegi fu a wan-enkri tru Gado abi a krakti fu tyari wánfasi kon na mindri sma. Di Israèl ben de a nâsi di Gado ben frukisi, dan furu opregti Heiden go na a tru anbegi. Fu gi wan eksempre, Rut ben gowe libi den gado fu a foto Moab pe a ben gebore èn a taigi Naomi: „Yu pipel sa de mi pipel èn yu Gado mi Gado” (Rut 1:16). Na a ten fu a fosi yarihondro G.T., ipi-ipi Heiden tron anbegiman fu a tru Gado (Tori fu den Apostel 13:48; 17:4). Baka ten di den apostel fu Yesus bigin tyari a bun nyunsu go na farawe presi, dan tra opregti sma kon de wán na ini na anbegi fu a tru Gado. Na apostel Paulus ben skrifi: „Unu gowe libi den kruktu gado fu go na Gado fu de srafu fu wan libilibi èn tru Gado” (1 Tesalonikasma 1:9). A tru taki na ini a ten disi na anbegi fu a tru Gado abi so wan krakti tu fu tyari wánfasi kon na mindri sma?

Tweifriman e feni nomonomo taki a no bun fu taki fu „tru anbegiman” noso fu „a tru Gado”. Kande den e denki so fu di den no sabi srefisrefi fa den kan kon leri sabi waarheid. Ma sma fu difrenti kulturu di e suku waarheid, kon si taki libisma no kan anbegi Gado na a fasi fa densrefi wani. A wan-enkri sma di wi musu anbegi na a Mekiman fu ala sani — Yehovah Gado (Openbaring 4:11). En na a tru Gado, èn na en abi a reti fu taki fa a wani taki libisma musu anbegi en.

Fu yepi wi fu kon sabi den markitiki fu en, dan Yehovah gi wi sabi nanga yepi fu en Wortu, Bijbel. Pikinmoro ibriwan sma na grontapu na ini a ten disi kan leisi a heri Bijbel noso pisi fu en. Boiti dati, Gado en manpikin ben taki: „Efu unu e tan na ini mi wortu, . . . dan unu sa sabi a waarheid” (Yohanes 8:31, 32). Fu dati ede, libisma kan kon sabi a waarheid. Èn milyunmilyun opregti sma fu difrenti kerki e teki a waarheid disi nanga deki-ati èn den e kon de wán na ini a tru anbegi.—Mateus 28:19, 20; Openbaring 7:9, 10.

Wánfasi na Heri Grontapu na ini a Ten Disi!

Wan tumusi moi profeititori na ini a Bijbel buku Sefania e taki dati sma fu difrenti kondre nanga ras sa kon makandra. A profeititori e taki: „Na a ten dati mi [Yehovah Gado] sa meki den pipel taki wan soifri tongo, so taki den alamala kan kari a nen fu Yehovah, so taki den kan dini en skowru na skowru” (Sefania 3:9). A tekst disi trutru e sori na wan moi fasi fa sma di kenki e dini Gado na ini wánfasi!

O ten a sani disi ben o pasa? Sefania 3:8 e taki: „’Fu dati ede, tan fruwakti mi,’ na so Yehovah taki, ’teleki a dei doro taki mi e opo tanapu fu wini sani, bika a krutu bosroiti fu mi, na fu tyari den nâsi kon na makandra, fu tyari den kownukondre kon na makandra, so taki mi kan kanti a krutu fu mi kon na den tapu, ala mi faya atibron; bika a faya di mi abi fu du sani fayafaya, sa nyan heri grontapu’”. Iya, bifo Yehovah e kanti faya atibron na den nâsi tapu, a e gi den safri-atiwan fu grontapu wan soifri tongo. Dati ben o pasa na a ten di a e tyari den nâsi kon na wan. A ten dati de now, bika wan heri pisi ten kaba den nâsi e kon makandra gi na orloku fu a bigi dei fu Gado na Almaktiwan na Armagedon.—Openbaring 16:14, 16.

Fu kan tyari wánfasi na mindri en pipel, Yehovah e gi den wan soifri tongo. A nyun tongo disi na a yoisti sabi fu Bijbel di e fruteri a waarheid fu Gado èn so srefi fu den prakseri fu en. Te sma e taki a soifri tongo, dan dati wani taki dati den e bribi a waarheid, taki den e meki trawan kon sabi a waarheid dati, èn taki den e libi akruderi den wet nanga den gronprakseri fu Gado. Sma di e taki a soifri tongo, no musu du sani di e tyari pratifasi kon, den musu puru eigifasi na ini den ati di e sori taki den e prakseri densrefi nomo; eigifasi soleki a desko di sma e desko tra ras, èn a pratifasi di e kon fu di sma abi tranga  lobi gi a kondre fu den; den sani disi na eigifasi fu grontapu (Yohanes 17:14; Tori fu den Apostel 10:34, 35). Ala den opregti sma di lobi waarheid kan leri a tongo disi. Luku fa den feifi sma di a fosi artikel ben taki fu den de na ini wánfasi now na ini na anbegi fu a wan-enkri tru Gado, Yehovah, ala di iniwan fu den sma disi ben abi wan heri tra fasi fu anbegi fosi.

Den De na ini Wánfasi na ini a Tru Anbegi

Di Fidelia, a fromsu Lomsu uma, ben bai wan Bijbel gi en umapikin so taki a ben kan du en skorowroko, dan a aksi a priester fu en fu fruklari nanga yepi fu a Bijbel disi, san ben pasa nanga den feifi pikin fu en di dede. „Mi no ben de tevrede srefisrefi nanga den piki fu en!”, na so Fidelia e taki. Fu dati ede, di Yehovah Kotoigi kon na en oso, a aksi den a srefi sani. Di a leisi na ini en eigi Bijbel san na trutru a situwâsi fu den dedewan, dan a kon si fa a kerki ben hori en na spotu. A kon sabi taki den dedewan no sabi noti èn fu dati ede den no e pina na ini Limbo noso iniwan tra presi (Psalm 146:4; Preikiman 9:5). Fidelia trowe ala den kerki popki fu en, a gowe libi a kerki, èn a bigin studeri Bijbel (1 Yohanes 5:21). Na ini den tin yari di pasa, a kisi prisiri fu di e a leri trawan a waarheid fu Bijbel.

Tara froisi gowe fu a foto Kathmandu fu go tan na wan kondre pe wan tu Hindu tempel nomo de. Fu dati ede a go na wan Metodist kerki fu di a ben wani fu satisferi a yeye nowtu fu en. Ma a no kisi piki tapu na aksi fu san ede libisma e pina. Ne Yehovah Kotoigi kon na en oso èn den aksi en efu a ben wani wan bijbelstudie. Tara e taki: „Mi kon si taki wan Gado fu lobi no ben kan de frantwortu gi ala pina di sma e pina na grontapu . . . Mi ben breiti nanga a nyun grontapu fu vrede nanga wánfasi di wi kan fruwakti” (Openbaring 21:3, 4). Tara trowe den Hindu popki fu en, a tapu nanga den gwenti fu a bribi fu a kondre pe a ben gebore, èn a feni trutru koloku fu di a e yepi fu satisferi a yeye nowtu fu trawan leki wan Kotoigi fu Yehovah.

Panya, a Budasma, ben de wan sortu lukuman di Yehovah Kotoigi kon na en oso a fosi leisi na ini Bangkok. Fu dati ede den profeititori na ini Bijbel ben naki en ati. Panya e fruteri: „Di mi kon sabi fu san ede a situwâsi di de na grontapu now e difrenti fu a marki di a Mekiman ben abi na prakseri na ini a bigin, dan a ben de neleki wan sma ben puru wan duku na fesi mi ai. Mi ben firi a srefi fasi di mi kon sabi fa a seti sani fu puru den takru bakapisi di kon fu di sma no wani dini en èn fu di sma no wani erken a reti di a abi fu tiri. Ala sani na ini a Bijbel boskopu ben kruderi nanga makandra. Mi kon lobi Yehovah neleki a ben sa de wan trutru libisma èn a sani disi gi mi a deki-ati fu du san mi ben denki ben de yoisti. Mi ben de fayafaya fu yepi trawan fu si a difrenti na mindri koni fu libisma nanga koni fu Gado. Trutru koni kenki mi libi fu tru.”

Baka wan pisi ten, Virgil bigin tweifri seryusu na den kerki bribi fu en. Virgil no begi Gado fu sori en fa fu yepi den nengre. A no begi tu gi na organisâsi di a ben si leki wan organisâsi di ben e desko sma fu tra ras èn di ben e sori fu gi sma deki-ati fu abi bita-ati gi wetiman. Na presi fu dati Virgil begi gi a waarheid, awansi san dati ben de, awansi pe a ben de. „Di mi wiki a dei baka dati, baka di mi ben begi Gado fayafaya”, Virgil e memre, „dan mi feni wan Waktitoren tijdschrift na ini na oso. . . . A ben musu fu de taki wan sma ben pusu en kon na ondro a doro.” Heri esi a ben e studeri Bijbel fayafaya nanga Yehovah Kotoigi. A e taki moro fara: „Disi ben de a fosi leisi na ini mi libi, di mi ben firi tevrede. . . . Mi bigin kisi howpu baka.” Heri esi Virgil ben wroko makandra nanga den sma di e gi trawan a  wan-enkri tru howpu soleki fa a skrifi na ini Gado Wortu, Bijbel.

Di wan Kotoigi di nen Gladys ben si taki Charo fu Latijns-Amerika ben abi problema nanga den nyofi pikin fu en, dan a bigin yepi na uma disi. A ben e teki en tyari go na wowoyo. A sani disi ben naki na ati fu Charo. Baka wan pisi ten, Charo teki wan oso-bijbelstudie, fu di Gladys ben aksi en efu a ben wani dati. Di Charo kon si na ini en eigi Bijbel taki a no ala bun sma e go na hemel, ma taki Yehovah sa blesi so srefi libisma na grontapu nanga têgo libi, dan a no ben man bribi dati (Psalm 37:11, 29). Charo srefi e prati a howpu disi nanga trawan, 15 yari kaba.

Prakseri taki a heri grontapu lai soso opregti sma di e anbegi Yehovah, a wan-enkri tru Gado, na ini wánfasi! A sani disi no de wan anansitori. Disi na wan sani di Yehovah pramisi. Nanga yepi fu en profeiti Sefania, Gado ben taki: „Fu tru mi sa meki wan pipel di abi sakafasi èn di mofina, tan abra na yu mindri, èn den trutru sa kon suku kibri na a nen fu Yehovah. . . . Den no sa du onregtfardikifasi, èn den no sa taki wan lei, èn sma no sa feni wan bedrigi tongo na ini den mofo; . . . èn no wan sma sa de di sa meki den beifi” (Sefania 3:12, 13). Efu yu lobi a pramisi disi, dan gi yesi na a rai di Bijbel e gi: „Suku Yehovah, ala un safri-atisma fu grontapu, di du den krutu bosroiti fu En. Suku regtfardikifasi, suku safri-atifasi. Kande unu sa kisi kibri tapu a dei fu Yehovah en atibron.”—Sefania 2:3.