Unu Musu De Lepi Sma Di Abi Wan Tranga Bribi

Kongres—Prisiri Fasi fu Sori Taki Wi De wan Bradafasi Trutru

A BEN abi 50 yari en a no ben abi wan bun gosontu baka di a ben koti strafu sondro reide, pikinmoro wán yari langa. Toku a ben prisiri fu tyari bagasi gi tra sma. A man disi, Joseph F. Rutherford, ben e gebroiki ala en krakti fu tyari den kofru fu tra Kresten go na a hotelkamra pe den ben o tan. Tu fu den sma di ben de na strafu-oso makandra nanga en — den ben de Bijbel Ondrosukuman neleki en — ben e taigi wan bigi grupu fu sma di ben e wakti fu kisi sribipresi, sortuwan fu den kamra den ben kisi. A wunyuwunyu disi ben e go doro te wan moi pisi ten baka mindri neti. A sani disi ben meki taki ala sma drape ben e prisiri. San ben pasa?

A yari ben de 1919. Baka wan pisi ten fu ogri-ati frufolgu, den Bijbel Ondrosukuman (di sma sabi leki Yehovah Kotoigi now) ben e kisi densrefi baka. Fu man gi a bradafasi fu den deki-ati baka, dan den hori wan kongres na ini Cedar Point di de na ini a distrikt Ohio na Amerkankondre. Den ben hori a kongres disi fu 1 te go miti 8 september 1919. Tapu a lasti dei fu a kongres, wan bigi ipi fu 7000 sma di ben e prisiri, ben arki bun di Brada Rutherford ben gi ibriwan fu den sma drape deki-ati nanga den wortu: „Unu na boskopuman fu a Kownu fu den kownu nanga a Masra fu den masra, ala di unu e meki a glori kownukondre fu wi Masra . . . bekènti na sma.”

Yehovah en pipel gwenti fu hori kongres sensi a ten di owruten Israèl ben de (Exodus 23:14-17; Lukas 2:41-43). Den sortu konmakandra disi ben de prisiri okasi, èn den ben e yepi den sma di ben de drape fu poti prakseri na a Wortu fu Gado. Na a srefi fasi, den kongres fu Kotoigi fu Yehovah na ini a ten disi e poti prakseri na yeye afersi. Gi opregti sma di e luku fa den kongres e waka, den prisiri konmakandra disi na wan trutru buweisi taki wan tranga banti fu Kresten bradafasi e meki taki wánfasi de na mindri den Kotoigi.

A Muiti Di Sma E Du fu De na den Kongres

Kresten na ini a ten disi e frustan taki den kongres fu den na okasi fu kisi krakti baka na yeye fasi, èn so srefi rai fu a Wortu fu Gado. Den e si den bigi konmakandra disi leki wan tumusi prenspari fasi fa den kan kisi yepi fu „de lepi sma di abi wan tranga bribi na ini ala sani di Gado wani” (Kolosesma 4:12). Fu dati ede, den Kotoigi e horibaka gi den konmakandra disi nanga den heri ati, èn den e du ala sortu muiti fu no misi den.

Sonwan fu den Kotoigi musu abi furu bribi èn den musu kakafutu gi bun furu problema fu man de na den kongres disi. Fu gi wan eksempre, luku na ondrofenitori fu wan owru Kotoigi na ini Oostenrijk. Ala di a abi sukru siki èn a musu kisi spoiti ala dei, toku a ben sorgu taki ala dei a ben de na a distrikt kongres na ini en kondre. Na ini India, wan bigi osofamiri fu Kotoigi di pôti srefisrefi, no ben sabi kwetikweti fa den ben o go na a kongres. Wan memre fu na osofamiri ben kon nanga a lusu fu a problema. „Fu di mi no ben wani misi a kongres”, a taki, „meki mi seri mi gowtu yesi-linga fu man pai fu go drape. Mi no lasi fu di mi du dati, fu di a demakandra èn so srefi den ondrofeni, tranga a bribi fu wi.”

Na ini Papua Nyun Ginea, wan grupu fu sma di no dopu ete, ma di wani sabi moro, ben abi a fasti bosroiti fu go na a distrikt kongres na ini a mamafoto. Den go na wan man fu a dorpu fu den. A man disi ben e rei sma go na presi nanga en oto. Den aksi en omeni den ben musu pai en fu tyari den go na a kongres. Fu di a aksi den wan prijs di den no ben o man pai, meki den seti sani fu du bow-wroko na a man en oso; den ben o kenki a kukru fu a man. Na so fasi den ben man go na a distrikt kongres èn den kisi winimarki fu di den ben de na a heri programa.

Te Kotoigi fu Yehovah abi a fasti bosroiti fu de na den kongres, dan den sa du ala muiti fu doro a marki dati, awansi o fara den musu go. Na ini 1978, wan yonkuman di ben komoto fu Polen èn di ben abi a  grani fu go na wan kongres na ini Lille, na Fransikondre, ben reis 1200 kilometer tapu baisigri na ini siksi dei. Na ini a zomer fu 1997 tu Kotoigi fu Mongolia reis 1200 kilometer fu de na wan Kresten konmakandra na ini a foto Irkutsk, na Rosiakondre.

Wan Buweisi fu Tru Bradafasi

Opregti sma krinkrin e si a wánfasi nanga a bradafasi na mindri den Kotoigi te den de na den kongres fu den. Furu sma feni en wan moi sani fu si taki pratifasi no de srefi na mindri den sma na a kongres èn taki trutru lobi de na mindri den sma di kande e miti makandra fu a fosi leisi.

Na wan internationaal kongres di no hori so langa pasa na ini Australia, wan grupu fu Kotoigi fu tra kondre ben de drape wan wiki langa fu de na wan kongres. Wan sma di ben abi a wroko fu sori den sma disi den moi presi fu a kondre, ben wani tan pikinso moro langa nanga den fu di a ben lobi a demakandra di a ben abi nanga den. A lobi èn a wánfasi di ben de na mindri den ben naki en ati, èn a no ben man bribi taki den ben abi so wan bun demakandra ala di furu fu den no ben sabi makandra bun. Di a ten ben doro taki a man disi ben musu gowe, dan a aksi den fu poti yesi arki en. A kari den „brada nanga sisa”, èn a ben bigin fu taki den tangi, ma a no ben man klari san a ben wani taki, bika a ben firi fu krei èn en ai ben bigin lon watra.

Na ini 1997, Sri Lanka ben hori en fosi distrikt kongres na ini dri tongo na ini wan bigi stadion. Den brada pristeri a heri programa na ini Ingrisitongo, èn na a srefi ten na ini Singaleisi, nanga Tamil. Na ini wan grontapu pe moro nanga moro trobi e kon na mindri sma fu difrenti tongo, furu sma ben abi wan sani fu taki fu a konmakandra fu den dri grupu di e taki wan difrenti tongo. Wan skowtu ben aksi wan brada: „Suma e drai a kongres disi — den Singaleisisma, den Tamilsma, noso den Ingrisisma? „Nowan fu den grupu disi e drai a kongres”, a brada piki. „Wi alamala e drai a kongres.” A skowtu no ben man bribi dati. Di ala dri grupu di ben taki den eigi tongo, arki a lasti begi èn di den alamala makandra taki „Amen” na so wan fasi taki a ben de fu yere na ini a heri stadion, dan den sma na a kongres naki anu nanga ala prisiri, sondro taki wan sma ben aksi den fu du dati. Pikinmoro ala den sma drape krei. Iya, kongres trutru na prisiri fasi fu sori taki wi de trutru wan bradafasi.—Psalm 133:1. *

[Futuwortu]