Waka na ini ’a Pasi fu Opregtifasi’

„A SA go bun nanga a regtfardikiwan, bika den sa nyan a froktu fu den du fu den”, na so a profeiti Yesaya ben taki. Yesaya ben taki so srefi: „A pasi fu a regtfardikiwan na opregtifasi” (Yesaya 3:10; 26:7). A krin fu si taki wi musu du san bun na Gado ai efu wi wani taki den sani di wi e du abi bun bakapisi.

Ma fa wi kan waka na ini a pasi fu opregtifasi dan? Sortu blesi wi kan fruwakti te wi e du dati? Èn fa tra sma kan kisi winimarki fu di wi e hori wisrefi na den regtfardiki markitiki fu Gado? Na ini kapitel 10 fu a Bijbel buku Odo, Kownu Salomo fu owruten Israèl e gi piki tapu den aksi disi ala di a e taki fu den difrenti di de na mindri regtfardiki sma nanga godelowsu sma. Te a e du dati, dan a e gebroiki a wortu „regtfardikiwan” 13 leisi. A wortu disi de fu feni neigi leisi na ini vers 15 te go miti vers 32. Fu dati ede, wi sa kisi deki-ati te wi e luku Odo 10:15-32. *

Tan Teki Trangaleri

Salomo e sori wi o prenspari regtfardikifasi de. A e taki: „Den warti sani fu wan guduman na en tranga foto. A pori fu den pôtiwan na a pôtifasi fu den. Den sani di den regtfardikiwan e du abi libi leki bakapisi; den sani di den godelowsuwan e du abi sondu leki bakapisi.”—Odo 10:15, 16.

Gudu kan meki taki wi no abi fu broko wi ede nanga wan tu sani fu a libi, neleki fa wan tranga foto e gi den sma di e libi na en ini pikinso seikerfasi. Èn pôtifasi kan tyari pori kon te sani e pasa di wi no ben fruwakti (Preikiman 7:12). Ma a kan taki a koni kownu ben e sori go tu na wan kefar di gudu nanga pôtifasi kan tyari kon. Wan gudu man kande sa poti ala en frutrow na tapu den gudu fu en, fu di a e denki taki warti sani de „leki wan skotu di e kibri en” (Odo 18:11). Èn wan pôti sma kan abi a fowtu denki taki fu di a pôti, dan dati sa meki taki sani no sa waka bun srefisrefi nanga en na ini  a ten di e kon. Fu dati ede, nowan fu den tu sma disi e kisi wan bun nen na Gado.

Na a tra sei a de so taki, awansi wan regtfardikisma abi furu noso pikinso materia gudu, na opregtifasi fa a e handri sa meki a kisi libi. Fa so? We, a de tevrede nanga den sani di a abi. A no e meki taki den gudu noso a pôtifasi fu en pori a bun nen di a abi na Gado. Awansi wan regtfardiki sma gudu noso pôti, a fasi fa a e libi e meki taki a de koloku now èn taki a e kisi howpu fu libi fu têgo na ini a ten di e kon (Yob 42:10-13). Srefi te a godelowsu sma e kon gudu, a no e kisi winimarki fu dati. Na presi taki a e warderi a seikerfasi di gudu kan gi en, èn na presi taki a e libi akruderi a wani fu Gado, dan a e gebroiki den gudu fu en fu libi wan sondu libi.

„A sma di e tan teki trangaleri na wan pasi fu libi”, na so a kownu fu Israèl e taki go doro, „ma a sma di no e teki piri-ai e meki taki sma e kon bruya” (Odo 10:17). Wan Bijbel sabiman e taki dati a vers disi kande abi tu fasi fa wi kan fruklari en. Wán fruklari kan de taki a sma di e teki trangaleri èn di e suku regtfardikifasi, de na tapu a pasi fu libi, ma a sma di no e teki piri-ai e gowe libi a pasi dati. Soleki fa wan tra Bijbel e sori, dan a vers disi kande wani taki so srefi dati „a sma di e teki trangaleri e sori a pasi di e tyari go na libi [na trawan fu di den e kisi winimarki fu na eksempre fu en], ma iniwan sma di no e teki piri-ai e tyari bruya kon gi trawan” (Odo 10:17, New International Version). Na ini ala tu kefal, a de tumusi prenspari taki wi e tan teki trangaleri èn taki wi no e wai pasi gi piri-ai!

Lobi Trawan na Presi Taki Yu No Wani Si Den na Ai

Now Salomo e pristeri wan odo di abi tu pisi di e taki fu a srefi sani, a di fu tu pisi e poti krakti na tapu a fosi pisi. A e taki: „Pe wan sma de di e kibri bita-ati, mofobuba de di e taki bedrigi sani.” Efu wan man abi bita-ati gi wan trawan na ini en ati èn e kibri dati baka switi noso moi wortu, dan a sma dati no de eerlijk — a abi „mofobuba di e taki bedrigi sani”. A koni kownu e taki moro fara: „A sma di e taki takru fu trawan na wan don sma” (Odo 10:18). Na presi taki son sma e kibri a bita-ati firi fu den, dan den e fruteri lei fu trawan noso den e pori a nen fu a sma di den no wani si na ai. A sani disi na wan don sani fu di a leitori, fu taki en leti, no e kenki suma a sma de trutru. Èn wan bun arkiman sa kon si taki a sma abi bita-ati fasi gi a trawan èn a no sa abi lespeki moro gi a sma di e fruteri a leitori. So bun, a sma di e fruteri leitori fu trawan e du ensrefi ogri.

Fu waka na wan regtfardikifasi wani taki dati wi no musu abi bedrigifasi, èn wi no musu fruteri ogri-ati lei fu trawan so srefi. Gado ben fruteri den Israèlsma: „Unu no musu abi bita-ati gi un brada na ini un ati” (Lefitikus 19:17). Èn Yesus ben gi den sma di ben e arki en a rai disi: „Tan lobi srefi den feanti fu unu èn tan begi gi den wan di e frufolgu unu, so taki unu kan sori taki unu na manpikin fu un Tata di de na hemel” (Mateus 5:44, 45). Wi e handri trutru na wan moro bun fasi te wi e furu wi ati nanga lobi na presi fu bita-ati!

’Luku Bun San Yu E Taki’

A koni kownu e sori krinkrin o prenspari a de fu basi wi tongo, te a e taki: „Te sma e taki furu wortu pasa marki, dan fowtu no e mankeri, ma a sma di e dwengi en mofobuba, e handri nanga koni.”—Odo 10:19.

„A don sma e taki furu wortu” (Preikiman 10:14). A mofo fu en „e meki lawfasi kon na tapu” (Odo 15:2). Disi no wani taki dati iniwan sma di lobi fu taki furu na wan don sma. Ma a kan pasa makriki taki wan sma di e taki tumusi furu e tron wan sma di e fruteri trawan ogri-ati lei noso konkru tori! Te wi no e prakseri san wi e taki, dan dati furutron kan meki taki wan sma e kisi porinen, wi kan hati den firi fu trawan, wi kan kisi trobi nanga trawan, èn wan sma kan kisi mankeri na skin sei so srefi. „Foeroe woortu no sa mankeri sondoe; ma da soema disi hori hem mofo-boeba abi koni” (Odo 10:19, Da Bijbel na ini Sranantongo). Boiti dati, a no switi fu abi demakandra nanga wan sma di ala ten abi wan sani fu taki fu ala tori. Meki a de so taki wi no e taki tumusi furu wortu.

A sma di e dwengi en mofobuba no e wai pasi gi leitori wawan, ma a e handri nanga koni so srefi. A e denki bifo a e taki. Fu di a sma disi lobi a pasi fu Yehovah èn fu di a wani yepi tra libisma  trutru, dati meki a e poti prakseri na a krakti di den wortu fu en kan abi na tapu trawan. Den sani di a e taki e sori taki a abi lobi nanga bunfasi. A e denki dipi fa fu taki sani na so wan fasi taki den e du trawan bun èn taki den de wan yepi gi den so srefi. Den wortu fu a sma disi de leki „gowtu apra ini solfru kerfu wroko” — den taki nanga koni èn sma sa lespeki den ala ten.—Odo 25:11.

„Tan Wei Furu Sma”

„A tongo fu a regtfardikiwan meki fu a moro fini solfru”, Salomo e taki go moro fara, „na ati fu a godelowsuwan abi pikinso waarde” (Odo 10:20). Den sani di den regtfardikiwan e taki de soifri — neleki fini solfru di no abi doti. A sani disi tru srefisrefi fu den futuboi fu Yehovah, fu di den e gi trawan a sabi fu Gado Wortu di e kibri libi. A Bigi Leriman fu den, Yehovah Gado, gi den leri en a ’gi den a tongo fu den sma di kisi leri, so taki den kan sabi fa fu piki den wan di weri, nanga wan wortu’ (Yesaya 30:20; 50:4). Iya, a tongo fu den de neleki fini solfru fu di a e fruteri trawan a waarheid fu Bijbel. Gi den opregti-ati sma, den sani di den futuboi fu Yehovah e taki, trutru abi moro bigi waarde leki den prakseri fu den godelowsu sma. Meki wi de fayafaya fu taki fu Gado en Kownukondre èn so srefi fu den wondruwroko fu en.

A regtfardikiwan na wan blesi gi den sma na en lontu. „Na den mofobuba fu a regtfardikiwan e tan wei furu sma”, na so Salomo e go doro, „ma fu di den donwan e mankeri ati, dati e meki taki den e tan lasi den libi.”—Odo 10:21.

Fa „a regtfardikiwan e tan wei furu sma”? A Hebrew wortu di gebroiki dyaso, wani taki „a luku di wan skapuman e luku den skapu fu en” (Odo 10:21, futuwortu). A wani taki dati wan sma e tiri wan trawan èn a e gi en nyanyan so srefi, pikinmoro na a srefi fasi fa wan skapuman fu owruten ben e sorgu gi den skapu fu en (1 Samuèl 16:11; Psalm 23:1-3; Heisingi 1:7). A regtfardiki sma e tiri trawan noso a e tyari den go na tapu a pasi fu regtfardikifasi, èn den sani di a e taki e meki den sma di e arki den firi bun. Leki bakapisi fu dati, den e firi moro koloku, den abi moro satisfaksi, èn den kan kisi têgo libi srefi.

Ma fa a de nanga a donwan? Fu di a e mankeri ati, dan a e sori taki a no e broko en ede nanga den bakapisi fu a fasi fa a e handri. So wan sma e du san a wani, a no e prakseri den bakapisi fu dati. Fu dati ede, a e kisi a strafu fu den sani di a e du. Ala di a regtfardikiwan e yepi fu hori trawan na libi, a sma di e mankeri ati no man hori ensrefi na libi.

Wai Pasi Gi wan Lusu Fasi fu Libi

Furutron wi e kon sabi a fasi fa wan sma de, te wi e luku den sani di a lobi èn den sani di a no lobi. A kownu fu Israèl e sori taki disi tru te a e taki: „Gi a sma sondro frustan a tyari di a e tyari ensrefi na wan lusu fasi de leki wan sport, ma koni de gi a sma di abi koni fu si sani krin.”—Odo 10:23.

Son sma e si wan lusu fasi fu libi leki wan sport, noso wan wega, èn den e teki prati na en soso fu kisi „prisiri”. Den sortu sma disi no e si Gado leki a sma di ala sma musu gi frantwortu na en, èn den no wani si taki den no e libi bun (Romesma 4:12). Den e kon si sani na so wan kruktu fasi taki den e prakseri dati Gado no e si na ogri di den e du. Nanga a fasi fa den e handri, den e taki trutru: „No wan Yehovah no de” (Psalm 14:1-3; Yesaya 29:15, 16). Disi na trutru wan don fasi fu handri!

Na a tra sei, a sma di abi a koni fu man si sani krin, e frustan taki wan lusu fasi fu libi a no wan sport. A sabi taki Gado no e feni so wan fasi fu  libi bun èn taki a sani dati kan pori a matifasi di wan sma abi nanga en. So wan fasi fu libi don, fu di a e meki taki wan sma e lasi lespeki gi ensrefi, a e pori trowlibi, a e du ogri na a frustan èn so srefi na a skin, èn a e meki taki wan sma no abi warderi gi yeye afersi moro. Wi e handri nanga koni te wi e wai pasi gi wan lusu fasi fu libi èn e kweki lobi gi koni neleki fa wi ben o kweki lobi gi wan lobi sisa fu wi.—Odo 7:4.

Bow na Tapu a Yoisti Fondamenti

Salomo e sori o prenspari a de fu bow wi libi na tapu wan yoisti fondamenti, te a e taki: „A sani di e frede a godelowsuwan — na dati sa pasa nanga en; ma na den regtfardikiwan sa kisi den sani di den wani. Neleki fa na ogri winti e wai pasa, na so a godelowsuwan no de moro; ma a regtfardikiwan na wan fondamenti teleki ten di no skotu.”—Odo 10:24, 25.

A godelowsuwan kan du bun furu sani di e meki trawan frede. Ma te fu kaba, den sani di ensrefi e frede e pasa nanga en. Fu di a godelowsuwan no e libi akruderi regtfardiki gronprakseri di de leki wan fondamenti, dan a de leki wan swaki gebow di e broko fadon na ini wan ogri winti. A e broko fadon te a e kisi kwinsi. Na a tra sei, a regtfardikiwan de leki a man di e handri akruderi den wortu fu Yesus. A de „wan man di e handri nanga koni, di bow en oso na tapu a klepston”. „Èn”, na so Yesus ben taki, „alen ben fadon kon èn den frudu ben kon èn den winti ben wai en ben naki teige na oso dati, ma a no ben fadon, bika a ben bow na tapu a klepston” (Mateus 7:24, 25). So wan sma na wan sma di e tanapu kánkan — den prakseri fu en èn so srefi den sani di a e du gron steifi na tapu den gronprakseri fu Gado.

Bifo a koni kownu e go doro fu taki fu den difrenti na mindri a godelowsuwan nanga a regtfardikiwan, dan a e gi wi wan warskow di syatu ma di de prenspari. A e taki: „Neleki fa asin de gi tifi en neleki fa smoko de gi ai, na so a lesiman de gi den sma di e seni en fu go du wan boskopu” (Odo 10:26). Asin na wan sani di no bun gi wi tifi. A swa di de na ini asin, e swa wi mofo nanga wi tifi. Smoko e bron wi ai. Na a srefi fasi, iniwan sma di e gi wan lesi sma wroko noso e gebroiki en fu du sani gi en, seiker sa kisi atibron èn sa kisi lasi na moni sei so srefi.

„A Pasi fu Yehovah Na wan Fortresi”

A kownu fu Israèl e go doro fu taki: „A frede gi Yehovah sa tyari moro dei kon, ma den yari fu den godelowsuwan sa meki kon syatu. A fruwakti fu den regtfardikiwan na wan prisiri, ma a howpu fu den godelowsuwan no sa de moro.”—Odo 10:27, 28.

A regtfardikiwan e kisi tiri fu di a abi frede gi Gado èn fu di a e pruberi fu plisi Yehovah nanga yepi fu en denki, en wortu, èn so srefi nanga yepi fu den sani di a e du. Gado e sorgu gi en èn a e meki den regtfardiki fruwakti fu en kon tru. Ma a godelowsuwan e libi wan libi sondro Gado. Son leisi a kan sori taki den fruwakti fu en e kon tru, ma dati na gi wan pisi ten nomo, bika den dei fu en furutron e meki kon syatu fu di sma e du ogri nanga tranga noso fu di a kisi wan siki di kon fu di a ben libi na so wan fasi. Tapu a dei di a dede ala den fruwakti fu en e lasi.—Odo 11:7.

„A pasi fu Yehovah na wan fortresi gi a sma di de sondro fowtu”, na so Salomo e taki, „ma pori de gi den wan di e du san ogri” (Odo 10:29). Dyaso a pasi fu Yehovah no e sori go na a pasi fu libi di wi musu waka na tapu, ma a e sori go na a fasi fa Gado e handri nanga a libisma famiri. „A Klepston, volmaakti en wroko de”, Moses ben taki, „bika ala den pasi fu en na retidu” (Deuteronomium 32:4). Den regtfardiki fasi fu Gado wani taki seikerfasi gi den regtfardikiwan èn a wani taki pori gi den godelowsuwan.

Yehovah trutru e sori fu de wan fortresi gi en pipel! „Fu a sei fu a regtfardikiwan, sani no sa meki a degedege te ten di no skotu; ma fu a sei fu den  godelowsuwan, den no sa tan na libi na grontapu. A mofo fu a regtfardikiwan — a e tyari den froktu fu regtfardikifasi, ma a tongo fu krukafasi sa koti puru. Den mofobuba fu a regtfardikiwan — den e kon sabi bun wani, ma a mofo fu den godelowsuwan na krukafasi.”—Odo 10:30-32.

Sani sa waka bun trutru nanga den regtfardikiwan èn den sa kisi blesi fu di den e waka na ini a pasi fu opregtifasi. Iya, „a blesi fu Yehovah — dati na san e meki sma kon gudu, èn A no e meki wi firi sari” (Odo 10:22). Fu dati ede, meki wi sorgu taki ala ten wi e handri akruderi den gronprakseri fu Gado. Meki wi luku bun san wi e taki èn meki wi gebroiki wi tongo fu gi trawan deki-ati nanga a waarheid fu Gado Wortu di e frulusu libi, èn meki wi tyari den go na tapu a pasi fu regtfardikifasi.

[Futuwortu]

[Prenki na tapu bladzijde 26]

A tongo kan de neleki „fini solfru”