Wan Sani De Di Trutru Kan Tyari Wánfasi Kon na Mindri Libisma?

AWANSI sortu bribi yu abi, kande yu e agri taki na ini pikinmoro ala kerki sma de fu feni di lobi waarheid. Sma di abi dipi warderi gi waarheid èn di de klariklari so srefi fu suku en, de fu feni na mindri Hindusma, Lomsusma, Dyu, nanga sma fu tra bribi. Toku, a sori taki bribi e tyari pratifasi kon na mindri libisma. Son sma e gebroiki kerki srefi fu du takru sani. Oiti opregti sma fu ala kerki di lobi opregtifasi nanga waarheid sa man bondru kon tron wán? Wan sani de di kan tyari den sma disi kon makandra fu doro a srefi marki?

A de trutru wan sari sani fu si taki moro nanga moro kerki e tyari pratifasi kon na mindri libisma! Luku wan tu fu den trobi disi. Na ini Sri Lanka, Hindusma e feti nanga Budasma. Protestantsma, Lomsusma, nanga Dyu kiri sma na ini difrenti feti. Na ini Bosnia, Tyetyenia, Indonesia, nanga Kosofo, sokari Kresten e feti nanga Moslimsma. Na ini maart fu a yari 2000, so wan 300 sma fu Nigeria lasi den libi na ini wan feti di teki tu dei èn di ben abi fu du nanga kerki afersi. Iya, den feti disi kon moro ogri fu di den sma fu den difrenti kerki no wani si makandra na ai.

Den takru sani disi di e pasa na ini a nen fu kerki, furutron e gi opregti sma sari. Fu gi wan eksempre, furu sma di e go na kerki no man bribi srefisrefi taki kerki tiriman di mesbroiki pikin-nengre na seks sei, e kisi primisi ete fu tan dini na ini sonwan fu den kerki disi. Tra kerkiman e firi syen srefisrefi fu di den kerki tiriman na ini furu sokari Kresten kerki no e agri nanga makandra na ini afersi soleki homo-sekslibi nanga purubere. A krin fu si taki kerki no tyari wánfasi kon na mindri libisma. Toku, na ini furu kerki, sma de fu feni di lobi waarheid trutru, soleki fa den ondrofenitori di e kon now sa sori.

Den Ben Angri gi a Waarheid

Fidelia ben de wan opregti anbegiman na ini a Lomsu Kerki fu San Francisco di de na ini a foto La Paz na Bolivia. Na uma disi ben gwenti fu didon langalanga na tapu a gron na fesi wan popki fu Maria èn a ben e poti den moro bun kandra di a ben man bai, na fesi a kroisi. Ibri wiki a ben e gi a priester bun furu nyanyan, so taki a ben kan prati dati na mindri den pôtiwan. Ma feifi beibi fu Fidelia dede bifo den ben man teki dopu. Di a priester taigi en taki ala den beibi disi ben e pina na ini a dungru fu Limbo, dan Fidelia aksi ensrefi, ’Efu Gado na wan bun Gado di lobi sma, dan fa dati kan?’

Tara, wan datra, ben kweki leki wan Hindusma na ini a foto Kathmandu, na Nepal. Soleki fa den fositen tata fu en ben gwenti fu du hondrohondro yari kaba, na so ensrefi ben e anbegi den gado fu en na ini den Hindu tempel èn a ben abi kruktu gado srefi na ini en oso. Ma Tara ben e broko en ede nanga aksi soleki: Fu san ede so furu pina de? Fu san ede libisma e dede? A kerki fu en no ben man piki den aksi disi na wan bun fasi srefisrefi.

Panya, na a tra sei, ben kweki leki wan Budasma èn a ben e libi na ini wan oso, sei wan kanaal na ini a foto Bangkok, na Thailand. A man disi ben leri taki pina na a bakapisi fu den sani di sma ben du na ini den fosi libi fu den èn taki sma kan kon fri fu pina te den e fri densrefi fu ala lostu di den ben abi fu sani. Neleki tra opregti Budasma, a ben leri fu abi dipi lespeki gi a koni fu den  moniki di e weri dyeri krosi èn di e kon na sma oso ibri musudei fu kisi moni nanga tra sani. A ben e du meditatie (wan fasi fu denki dipi fu sani fu man kakafutu gi den problema ini a libi) èn a ben abi difrenti popki nanga prenki fu a Buda, fu di a ben e bribi taki den ben o kibri en. Baka di a ben kisi wan seryusu ongoloku di meki taki a no ben man waka moro, dan Panya go na den tempel fu den Budasma, fu di a ben e howpu opregti taki a ben o kon betre na wan wondru fasi. A no kon betre èn a no kisi frulekti na yeye fasi. Na presi fu dati, a kisi fu du nanga afkodrei èn wanwan leisi ensrefi bigin du den sortu tori disi.

Virgil gebore na ini Amerkankondre èn di a ben de na a universiteit, a tron wan memre fu a Black Muslim grupu. A ben prati den publikâsi fu a grupu disi fayafaya na sma. Den publikâsi disi ben e fruteri taki wetiman na Didibri. A grupu disi ben feni taki dati ben de a reide fu san ede den wetiman ben e handri so takru nanga den nengre. Ala di Virgil ben de opregti na den sani di a ben e bribi, toku a ben broko en ede nanga aksi soleki: Fa ala weti sma kan de takru sma? Èn fu san ede so furu sani di a grupu ben e taki ben abi fu du nanga moni?

Ala di Charo ben gro kon bigi na ini Zuid-Amerika pe furu sma abi a Lomsu bribi, toku a ben de wan opregti Protestant uma. A ben breiti taki a no ben abi wan prati na a falsi anbegi di ben de na en lontu. Ala sonde a ben lobi fu go na kerki fu man teki prati na a programa di ben wroko srefisrefi na tapu den firi fu sma. Drape a ben e bari „Haleluyah!” èn a ben e singi kerkisingi. A ben e dansi so srefi nanga den trawan baka dati. Charo ben abi a fasti overtoigi taki a ben kisi frulusu èn taki a ben gebore baka. A ben e pai kerki wan di fu tin pisi fu a moni di a ben e kisi, èn di a telefisi preikiman di a ben lobi sote, aksi sma fu gi bijdrage, dan a seni moni go so taki a ben kan gi dati na den pikin na ini Afrika. Ma di a aksi a fesiman fu en kerki fu san ede wan Gado fu lobi e pina sma na ini hel, dan a kon si taki a man disi no ben man gi en wan bun piki. Baka ten, a kon sabi so srefi taki a telefisi preikiman no ben gebroiki den bijdrage fu en fu yepi den pikin na ini Afrika.

Ala di den feifi sma disi ben kweki na difrenti fasi, toku wan sani de di den alamala ben abi: Den ben abi lobi gi waarheid èn den trutru ben suku fu kisi yoisti piki tapu den aksi fu den. Ma den sa man abi wánfasi na ini tru anbegi? Na artikel di e kon now sa piki na aksi dati.

[Prenki na tapu bladzijde 4]

A de so taki sma di kweki na difrenti fasi trutru kan de wán?

[Sma di abi a reti fu a prenki na tapu bladzijde 3]

G.P.O., Yerusalem