Aksi fu Leisiman

San na a „rostu” di Hebrewsma 4:9-11 e taki fu dati, èn fa wan sma e „go na ini a rostu dati”?

Na apostel Paulus ben skrifi den fosi yarihondro Hebrew Kresten taki: „Wan sabadei rostu libi abra ete gi a pipel fu Gado. Bika a sma di go na ini a rostu fu Gado, ensrefi rostu tu fu en eigi wroko, neleki fa Gado ben rostu fu di fu en. Fu dati ede, meki wi du ala muiti fu go na ini a rostu dati.”—Hebrewsma 4:9-11.

Di Paulus ben e taki fu a rostu di Gado ben rostu fu En wroko, dan neleki fa a sori a ben e taki fu san skrifi na ini Genesis 2:2, pe wi e leisi: „Na a di fu seibi dei Gado ben kaba nanga en wroko di a ben meki, èn a ben go rostu tapu a di fu seibi dei fu ala en wroko di a ben meki.” Fu san ede meki Yehovah „go rostu tapu a di fu seibi dei”? A no de fu taki dati a no ben abi fu kisi ensrefi „fu ala en wroko di a ben meki”. A tra vers e yepi wi pikinso: „Gado ben blesi a di fu seibi dei èn a ben santa en, fu di a tan rostu na a dei dati fu ala en wroko di Gado meki fu meki sani.”—Genesis 2:3; Yesaya 40:26, 28.

A sani di ben meki taki a „di fu seibi dei” ben de difrenti fu iniwan fu den tra siksi dei, na taki a ben de a dei di Gado ben blesi èn ben santa. Dati wani taki a ben poti a dei dati aparti, noso a ben poti en aparti nanga wan spesrutu marki na prakseri. San ben de a marki dati? Gado ben tyari kon na krin na fesi kaba, san a marki fu en ben de nanga a libisma famiri èn nanga grontapu. Gado ben taigi a fosi man nanga uma: „Un meki pikin èn un kon furu èn un furu grontapu èn un poti en na un ondro, èn poti na un ondro den fisi fu se nanga den hemel mekisani di e frei, nanga ibri libi mekisani di e buweigi na grontapu” (Genesis 1:28). Gado ben gi a libisma famiri nanga a grontapu wan volmaakti bigin. Toku a ben sa teki ten fu poti a heri grontapu na den ondro èn fu kenki en kon tron wan paradijs di furu nanga wan volmaakti libisma famiri, soleki fa Gado ben abi na prakseri. Fu dati ede, tapu „a di fu seibi dei” Gado ben rostu fu en wroko, noso ben tapu nanga a wroko fu meki tra mekisani, so taki ala den sani di a ben meki kaba ben kan waka soleki fa en ben wani. Na a kaba fu a „dei” dati, dan ala sani sa pasa soleki fa Gado ben abi na prakseri. O langa a rostu disi sa de?

Efu wi kon baka na a sani di Paulus ben taki na ini Hebrewsma, dan a ben sori taki „wan sabadei rostu libi abra ete gi a pipel fu Gado,” èn a ben gi den tra Kresten a deki-ati fu du ala san den ben man fu „go na ini a rostu dati”. Disi e sori taki di Paulus skrifi den wortu disi, „a di fu seibi dei” fu a rostu fu Gado, di ben bigin so wan 4000 yari na fesi, no ben kon na wan kaba ete. A no sa kon na wan kaba tu te leki a prakseri fu Gado nanga a libisma famiri èn grontapu kon tru. Dati sa de na a kaba fu a Dusun Yari Tiri fu Yesus Krestes, di de a „Masra fu a sabadei”.—Mateus 12:8; Openbaring 20:1-6; 21:1-4.

Nanga a tumusi moi pramisi dati na prakseri, Paulus ben fruteri fa wan sma kan go na ini a rostu fu Gado. A ben skrifi: „A sma di go na ini a rostu fu Gado, ensrefi rostu tu fu en eigi wroko.” Disi e sori wi taki ala di a libisma famiri ben abi wan tumusi bun bigin, dan toku a libisma famiri leki grupu no ben go na ini a rostu fu Gado. Disi ben kon pasa fu di Adam nanga Efa no ben hori densrefi langa na a rostu fu Gado tapu „a di fu seibi dei”. Den ben kan hori densrefi na a rostu fu Gado te den ben sa handri akruderi den sani di Gado ben seti gi den. Na presi fu dati, den opo densrefi èn ben wani fu kon de sma di no abi a yepi fu Gado fanowdu. Te yu luku en bun, den ben hori baka gi den plan fu Satan na presi fu waka na baka lobi-ati tiri fu Gado (Genesis 2:15-17). Leki bakapisi fu dati, den lasi a howpu fu libi fu têgo na ini wan paradijs grontapu. Sensi a momenti dati, a heri libisma famiri ben tron srafu fu sondu nanga dede.—Romesma 5:12, 14.

Na opo di a libisma famiri opo densrefi teige Gado, no ben pori a prakseri fu Gado. En dei fu rostu e go doro. Ma toku a ben poti wan lobi-ati seti — a lusu paiman — nanga yepi fu en Manpikin, Yesus Krestes. Na so fasi ala sma di e teki a seti disi fu di den e sori bribi, kan fruwakti frulusu èn rostu fu sondu nanga dede (Romesma 6:23). Fu dati ede Paulus e gi den tra Kresten fu en a deki-ati fu ‘rostu fu den eigi wroko.’ Den ben abi fu teki a seti fu Gado di e gi sma frulusu èn den no ben musu pruberi fu seti den eigi tamara na den eigi fasi, soleki fa Adam nanga Efa ben du dati. Den ben musu luku  bun fu no suku den eigi regtfardikifasi nanga yepi fu den sani di den ben e du.

Te wan sma e poti en eigi gridi lostu noso den grontapu sani na wan sei fu kan du a wani fu Gado, dan a de wan switi sani di e gi rostu trutru. Yesus ben gi a kari disi: „Kon na mi, un alamala di e wroko tranga èn di abi hebi lai, èn mi sa gi unu kowru-ati. Teki mi tyatyari na un tapu èn leri fu mi, bika mi abi safrifasi èn sakafasi fu ati, èn unu sa feni kowru-ati gi un sili. Bika mi tyatyari safu èn mi lai lekti.”—Mateus 11:28-30.

Den Hebrew Kresten na ini Yerusalem ben miti nanga furu frufolgu nanga spotu fu a bribi fu den ede. Fu dati ede a tori di Paulus ben taki fu a rostu fu Gado èn a fasi fa wan sma kan go na ini a rostu dati, ben de wan deki-ati gi den (Tori fu den Apostel 8:1; 12:1-5). Na a srefi fasi, den wortu fu Paulus kan de wan bigi deki-ati gi Kresten na ini a ten disi. Wi sabi taki a kontru fu a pramisi fu Gado, fu tyari wan paradijs grontapu kon na ondro a tiri fu en regtfardiki Kownukondre, de krosibei. Fu dati ede wisrefi musu rostu tu fu wi eigi wroko èn wi musu du ala san wi man fu go na ini a rostu fu Gado dati.—Mateus 6:10, 33; 2 Petrus 3:13.

[Prenki na tapu bladzijde 31]

A pramisi fu Gado fu tyari wan paradijs grontapu kon, sa kon tru na a kaba fu a rostu dei fu en