Fa Yu Kan Yepi wan Pikin „Di Lasi”?
Fa Yu Kan Yepi wan Pikin „Di Lasi”?
„Wi musu breiti, bika . . . a ben lasi èn mi ben feni en baka.”—LUKAS 15:32.
1, 2. (a) San wan tu yongusma du ini a tori fu Kresten waarheid? (b) Fa papa nanga mama èn pikin-nengre kan firi te den de na ini den situwâsi disi?
„MI NO wani tan na ini a waarheid moro!” A e hati papa nanga mama di abi frede gi Gado, te wan pikin e taigi den so wan sani ala di den du so furu muiti fu kweki den pikin fu den na ini a Kresten fasi fu libi. Tra yonguwan e „drifi gowe” sondro taki den e fruteri trutru san den abi na prakseri (Hebrewsma 2:1). Wi kan teki furu fu den yongusma disi gersi nanga a lasi manpikin na ini na agersitori fu Yesus. A manpikin dati ben gowe libi na oso fu en papa èn a ben frumorsu ala gudu fu en na ini wan farawe kondre.—Lukas 15:11-16.
2 Moro furu Kotoigi fu Yehovah no abi a problema disi. Ma no wan sani di wi e taki fu trowstu den wan di abi a problema disi, kan puru ala sari fu den. Boiti dati, wi no musu frigiti a sari di a tranga-ede yonguwan srefi kan firi. Dipi na ini en ati, a kan de so taki a konsensi fu en e fon en. Na ini na agersitori fu Yesus, a manpikin di lasi „ben kisi ensrefi” baka te fu kaba. Dati ben gi a papa fu en furu prisiri. Fa papa nanga mama èn trawan na ini a gemeente kan yepi den yongusma di lasi neleki a manpikin dati, fu ’kisi densrefi’ baka?—Lukas 15:17.
Fu San Ede Son Pikin E Bosroiti fu Gowe
3. San na wan tu reide fu san ede son yongu sma e bosroiti fu gowe libi a Kresten gemeente?
3 Hondro dusundusun yongusma de di e dini Yehovah nanga prisiri na ini a Kresten gemeente. Ma fu san ede tra yonguwan e gowe? A kan de so, taki den e firi taki den no e kisi san grontapu kan gi den (2 Timoteus 4:10). Noso kande den e feni taki a skapukoi di e kibri den skapu fu Yehovah, e skotu den tumusi. Wan tra sani di kan meki taki wan yongusma e drifi gowe fu na ipi fu Yehovah, na konsensi fonfon, wan tranga firi fu hori nanga wan sma, noso a wani di a wani taki den speri fu en musu feni en bun. Wan yonguwan kan tapu fu dini Gado te a gersi kande leki a papa nanga mama fu en, noso wan tra Kresten, e tyari densrefi na wan hoigri fasi.
4. San na a problema nofotron di e meki taki yongu sma e lasi pasi?
4 Moro furu a tranga-ede fasi fa a pikin e taki èn e tyari ensrefi e sori taki a pikin swaki na yeye fasi. Den sani dati e sori san de na ini en ati (Odo 15:13; Mateus 12:34). Awinsi san e meki taki wan yonguwan e lasi pasi, nofotron a rutu fu a problema de taki a no abi „wan soifri sabi fu waarheid” (2 Timoteus 3:7). Na presi taki den yongu sma e dini Yehovah soso fu di trawan e fruwakti dati fu den, a prenspari taki den e kweki wan krosibei matifasi nanga en. San o yepi den fu du dati?
Kon Krosibei na Gado
5. San wan yonguwan musu du te a wani kon abi wan matifasi nanga Gado?
5 „Kon krosibei na Gado,” na so a disipel Yakobus ben skrifi, „èn en sa kon krosibei na unu” (Yakobus 4:8). Efu wan yonguwan wani du dati, dan sma musu yepi en fu kisi wan lostu gi a Wortu fu Gado (Psalm 34:8). Na a bigin a sa abi „merki” fanowdu — dati wani taki den moro prenspari sani di Bijbel e leri. Ma o moro a e si taki Gado Wortu bun srefisrefi, o moro a sa kon lobi „tranga nyanyan” noso den dipi sani di de fu feni na ini a Wortu. Na so wan fasi a sa kon lepi na yeye fasi na ini wan syatu pisi ten nomo (Hebrewsma 5:11-14; Psalm 1:2). Wan yonguwan di ben erken taki en heri fasi fu libi ben de leki di fu den sma fu grontapu, ben kisi warderi gi den gronprakseri na ini Gado Wortu. San ben yepi en fu drai en libi? Di a kisi a rai fu leisi a heri Bijbel, dan a ben hori ensrefi na wan schema fu leisi Bijbel doronomo. Iya, a de tumusi prenspari taki wan sma e leisi a Wortu fu Gado doronomo efu a wani kweki wan krosibei matifasi nanga Yehovah.
6, 7. Fa papa nanga mama kan yepi den pikin fu den fu kon lobi a Wortu fu Gado?
6 A de tumusi prenspari taki papa nanga mama e yepi den pikin fu den fu kon lobi a Wortu fu Gado! Na osofamiri fu wan tini meisje ben abi wan osofamiri studie doronomo, toku a tini disi ben waka nanga tra yonguwan di ben du ogri nomo. Te a e prakseri na osofamiri studie fu en, dan a e memre ete: „Te mi papa ben aksi mi sani, dan mi ben leisi den piki nomo, sondro fu luku en.” Papa nanga mama musu gebroiki koni te den e gi leri, na presi taki den e studeri a pisi nomo san den ben wani studeri nanga na osofamiri (2 Timoteus 4:2). Wan yonguwan sa prisiri fu a studie te a e firi taki a studie abi fu du nanga en eigi libi èn te a e si taki a kan yepi en nanga den broko-ede fu en. Fu san ede yu no e poti aksi gi en, meki a fruteri san a e denki fu wan tori? Meki a yonguwan fruteri fa a kan gebroiki den sani di yu e leri en. *
7 Boiti dati, yu musu meki a takimakandra fu Bijbel tori tron wan prisiri sani. Te a fiti, dan yu kan meki den yonguwan prei den sani di pasa na ini Bijbel ten. Yepi den fu si pe a kondre ben de di yu e taki fu en, fa a kondre dati tan èn pe den sani ben pasa. Yu kan du dati nanga yepi fu karta nanga tra sani di den kan si nanga ai. Iya, efu yu e teki a ten nomo fu prakseri den sani dati, dan yu kan meki wan osofamiri studie tron wan prisiri sani di no soi kwetikweti. Papa nanga mama musu ondrosuku den eigi matifasi nanga Yehovah so srefi. Efu densrefi e kon krosibei na Yehovah, dan den kan yepi den pikin fu den fu du dati tu.—Deuteronomium 6:5-7.
8. Fa begi e yepi wan sma fu kon krosibei na Gado?
8 A begi di wan sma e begi, e yepi en so srefi fu kon krosibei na Gado. Wan meisje di ben abi wan sani fu 13 te go miti 15 yari, ben bruya fu di a no ben man bosroiti efu a ben musu tyari ensrefi akruderi a Kresten fasi fu libi noso efu a ben o tan abi demakandra nanga mati di no ben de na bribi (Yakobus 4:4). San a ben du fu lusu a problema dati? A e erken: „Fosi tron mi begi Yehovah trutru fu fruteri en fa mi ben firi”. A kon si taki Gado piki a begi fu en, bika te fu kaba a ben feni wan mati na ini a Kresten gemeente di a ben kan fruteri ala sani. Fu di a ben firi taki Yehovah ben e yepi en, meki a bigin kisi wan matifasi nanga Gado. Papa nanga mama kan yepi den pikin fu den te densrefi e meki den begi fu den kon moro bun. Te papa nanga mama e begi makandra nanga na osofamiri, dan den kan taki fu ala san de tapu den ati, so taki den pikin kan firi taki a papa nanga mama srefi abi wan matifasi nanga Yehovah.
Abi Pasensi, ma Tan Hori Yusrefi na Regtfardiki Markitiki
9, 10. Sortu eksempre Yehovah ben poti fu di a ben abi langa pasensi nanga den tranga-ede Israèlsma?
9 Te wan yonguwan e bigin drifi gowe, dan a kan de so taki a no wani de nanga tra sma èn a kan weigri fu arki a papa nanga mama fu en te den e meki muiti fu taki nanga en fu yeye afersi. San papa nanga mama kan du na ini so wan muilek situwâsi? Luku san Yehovah ben du nanga Israèl fu owruten. A ben tan frudrage den „tranga-ede” Israèlsma moro leki 900 yari bifo a ben drai en baka gi den, meki den tan waka na ini a takru pasi fu den (Exodus 34:9; 2 Kroniki 36:17-21; Romesma 10:21). Awinsi den ben ’e tesi’ Yehovah ibri tron baka, toku a „ben abi sari-ati” gi den. „Furu tron a ben puru en ati-bron, èn a no ben meki ala en faya ati-bron opo kon” (Psalm 78:38-42). Gado no ben handri na wan fowtu fasi kwetikweti te a ben e handri nanga den. Lobi-ati papa nanga mama e waka baka na eksempre fu Yehovah èn den abi pasensi te a pikin no e tyari kenki kon wantewante te den meki muiti fu yepi en.
10 Na abi di wan sma abi langa pasensi wani taki dati a e tan howpu taki wan matifasi di broko, sa kon bun baka. Yehovah ben sori wi fa wi musu abi langa pasensi. Ensrefi ben tan seni den boskopuman fu en go na den Israèlsma „ibritron baka”. Yehovah „ben abi sari-ati gi en pipel”, ala di „den ben e dreigi den boskopuman fu a tru Gado doronomo èn ben e wisiwasi den wortu fu en” (2 Kroniki 36:15, 16). A ben pruberi fu doro na ati fu den Israèlsma di a ben e taki: „Grantangi, drai kon baka un alamala, komoto na a takru pasi” (Yeremia 25:4, 5). Ma toku, Yehovah no ben poti den regtfardiki markitiki fu en na wan sei fu yepi den. Den Israèlsma ben kisi a rai fu „drai kon baka” na Gado èn so srefi na den pasi fu en.
11. Fa papa nanga mama kan abi langa pasensi gi wan pikin di lasi, ala di den e tan hori densrefi na regtfardiki markitiki?
11 Papa nanga mama kan abi pasensi neleki Yehovah efu den e weigri fu denki taki howpu no de moro gi a pikin di lasi. Sondro fu lasi-ati, densrefi kan gi a pikin deki-ati fu a kon taki nanga den, noso den kan du muiti tu fu go na a pikin fu taki nanga en. Ala di den e tan hori densrefi na regtfardiki gronprakseri, toku den kan pruberi „ibri leisi baka” fu doro na ati fu a pikin so taki a ben sa wani drai kon baka na a pasi fu a waarheid.
Te Den E Puru wan Pikin fu a Gemeente
12. San na a frantwortu fu papa nanga mama di abi wan pikin di e tan nanga den ete, ma di puru fu a gemeente?
12 San papa nanga mama musu du te wan pikin di e tan nanga den ete, ben du wan seryusu ogri èn te a puru fu a gemeente fu di a no wani sori berow? Fu di a pikin e tan nanga en papa nanga mama, meki den abi a frantwortu ete fu gi en rai nanga trangaleri akruderi a Wortu fu Gado. Fa den kan du disi?—Odo 6:20-22; 29:17.
13. Fa papa nanga mama kan pruberi fu doro na ati fu a pikin fu den di meki wan fowtu?
13 A ben sa moro bun efu den e gi a rai nanga a trangaleri dati te den e hori wan studie fu Bijbel nanga a pikin wawan. Wan papa noso mama no musu luku a tranga-ede fasi nomo fa a pikin e handri, ma a musu pruberi fu si san de ini en ati. San meki taki a kon siki na yeye fasi? (Odo 20:5) San mi kan du fu doro na ati fu a pikin? Sortu bijbeltekst mi kan gebroiki fu man yepi en? Na apostel Paulus ben gi wi a dyaranti: „A wortu fu Gado de libilibi èn a abi krakti èn a srapu moro leki iniwan feti-owru di e koti na tu sei, èn a e boro go srefi so dipi taki a e prati sili nanga yeye, èn den skrufu fu a skin nanga a fatu na ini den bonyo fu den, èn a man fu si krin san na ati e denki èn abi na prakseri” (Hebrewsma 4:12). Iya, papa nanga mama kan du moro leki fu taigi den pikin fu den nomo taki den no musu du ogri baka. Den kan bigin du wan sani fu yepi a pikin fu kon bun baka èn den no musu tapu nanga a yepi di den e yepi en.
14. San na a fosi sani di wan yonguwan di meki wan fowtu musu du fu meki en matifasi nanga Yehovah kon bun baka? Fa papa nanga mama kan yepi a pikin fu den fu du dati?
14 Wan yonguwan di meki wan fowtu musu meki en matifasi nanga Yehovah kon bun baka. A fosi sani di a musu du na fu „abi berow . . . èn drai kon baka” (Tori fu den Apostel 3:19; Yesaya 55:6, 7). Te papa nanga mama e yepi a yonguwan na ini na oso fu den fu abi berow, dan den musu ’hori densrefi te ogri e miti den, èn den musu gi leri nanga safri-ati’ na a pikin di no wani arki (2 Timoteus 2:24-26). Den musu „piri-ai” gi en soleki fa Bijbel e sori dati. A Griki wortu di vertaal nanga „piri-ai” kan vertaal so srefi nanga den wortu „tyari buweisi kon na fesi fu overtoigi sma” (Openbaring 3:19; Yohanes 16:8). Fu dati ede, te papa nanga mama e piri-ai gi a pikin, dan dati wani taki dati den e tyari nofo buweisi kon na fesi fu overtoigi a pikin taki a fasi fa a e tyari ensrefi no bun kwetikweti. A tru taki a no makriki fu du disi. Efu a kan, dan papa nanga mama kan doro en ati fu di den e gebroiki rai di de fu feni na ini Bijbel, fu overtoigi en. Den musu pruberi fu yepi en frustan fu san ede a de fanowdu fu „tegu gi san ogri, èn fu lobi san bun” (Amos 5:15). A ben kan ’kisi ensrefi baka èn komoto na a trapu fu Didibri’.
15. San begi abi fu du nanga a kon di a wan sma e kon bun baka nanga Yehovah?
15 Te wan sma wani meki en matifasi nanga Yehovah kon bun baka, dan a prenspari srefisrefi taki a e begi. A no de fu taki, efu wan sma di ben de na ini a Kresten gemeente fosi e du seryusu sondu sondro taki a e sori berow, dan no wan sma sa „aksi” Gado fu yepi a sma dati di e du sondu (1 Yohanes 5:16, 17; Yeremia 7:16-20; Hebrewsma 10:26, 27). Ma toku, papa nanga mama kan aksi Yehovah efu a kan gi den a koni fu handri na a yoisti fasi na ini a situwâsi (Yakobus 1:5). Efu wan yonguwan di puru fu a gemeente e sori taki a abi berow, ma a no man „taki nanga Gado na wan fri fasi”, dan a papa nanga mama ben sa kan begi gi en. Den ben sa kan aksi Gado, taki efu a feni dati a kan gi a pikin pardon fu a sondu fu en, dan Gado musu du soleki fa A wani (1 Yohanes 3:21). A yere di a yonguwan e yere den begi disi, musu yepi en fu si taki Yehovah na wan Gado di abi sari-ati. *—Exodus 34:6, 7; Yakobus 5:16.
16. Fa wi kan yepi den memre fu a famiri fu den yonguwan di puru fu a gemeente?
16 Efu wan yonguwan di dopu puru fu a gemeente, dan den memre fu a gemeente no ’musu moksi densrefi moro nanga’ en (1 Korentesma 5:11; 2 Yohanes 10, 11). A du di den e du disi kan yepi en te fu kaba fu ’kisi ensrefi baka’ èn fu drai go baka na a skapukoi pe Gado e gi kibri (Lukas 15:17). Ma awansi a e drai kon baka efu no, toku den memre fu a gemeente kan gi deki-ati na a famiri fu a yonguwan di puru fu a gemeente. Wi alamala kan luku fa wi kan „sori [waran] firi” gi den èn fa wi kan „abi safu sari-atifasi” gi den.—1 Petrus 3:8, 9.
Fa Tra Sma Kan Yepi
17. San den memre fu a gemeente musu hori na prakseri te den e pruberi fu yepi wan pikin di lasi pasi?
17 Fa a de nanga wan yonguwan di no puru fu a Kresten gemeente, ma di kon swaki na ini a bribi fu en? „Efu wan memre e pina,” na so na apostel Paulus ben skrifi, „dan ala den tra memre e pina nanga en” (1 Korentesma 12:26). Trawan kan du sani di e sori taki den trutru wani yepi a yonguwan dati. A no de fu taki dati wi musu de na ai, bika wan yonguwan di e siki na yeye fasi ben kan abi krakti tapu tra yongu sma (Galasiasma 5:7-9). Na ini wan gemeente fu eksempre, bigisma di ben abi bun sani na prakseri ben wani yepi wan tu yonguwan di kon swaki na yeye fasi. Den ben gi den yonguwan dati wan kari fu kon makandra so taki den kan prei pôpi poku nanga makandra. Den yonguwan ben teki a kari wantewante èn den ben prisiri tapu den momenti dati, ma te fu kaba a krakti di den ben abi tapu makandra ben meki taki den gowe libi a gemeente (1 Korentesma 15:33; Yudas 22, 23). Wan prisiri demakandra sondro bun tiri na yeye fasi, no sa yepi wan pikin di e siki na yeye fasi. Ma a abi demakandra fanowdu nanga sma di kan yepi en fu kon lobi yeye sani. *
18. Fa wi kan handri neleki a papa fu a manpikin di ben lasi, soleki fa a sori na ini na agersitori fu Yesus?
18 Te wan yonguwan di gowe libi a gemeente e kon baka na a Kownukondre zaal, noso te a e kon na wan bigi konmakandra, dan prakseri fa a kan firi. Wi no musu sori taki wi breiti fu si en, neleki fa a papa na ini na agersitori fu Yesus ben breiti fu si en manpikin di ben lasi? (Lukas 15:18-20, 25-32). Wan tini di ben gowe libi a Kresten gemeente èn di go na wan distrikt kongres baka ten, ben taki: „Mi ben prakseri taki no wan sma ben sa wani taki nanga mi, ma den brada nanga sisa ben kon na mi èn den ben gi mi wan switikon. Dati ben naki mi ati srefisrefi.” A ben bigin studeri Bijbel baka èn baka ten a teki dopu.
No Tapu fu Du Muiti
19, 20. Fu san ede wi musu tan howpu taki wan pikin di lasi kan drai kon baka?
19 Te papa nanga mama èn tra sma wani yepi wan pikin „di lasi” fu a ’kisi ensrefi baka’, dan den musu abi furu pasensi nanga en èn dati kan de wan tyalensi gi den. Ma den no musu tapu fu du muiti. „Yehovah no e draidrai nanga a pramisi fu en, soleki fa son sma e denki taki a e draidrai, ma a abi pasensi nanga unu fu di a no wani taki wan sma e kisi pori, ma a wani taki ala sma musu abi berow” (2 Petrus 3:9). Bijbel e gi wi a dyaranti taki Yehovah wani taki sma musu abi berow so taki den kan tan na libi. Fu taki en leti, Yehovah srefi ben teki a bosroiti fu seti sani so taki libisma kan kon bun baka nanga en (2 Korentesma 5:18, 19). Fu di a abi pasensi, meki milyunmilyun sma kisi na okasi fu kisi densrefi baka.—Yesaya 2:2, 3.
20 A no de so dan, taki papa nanga mama musu gebroiki ala rai di Bijbel e gi den, fu yepi a pikin fu den kisi ensrefi baka? Waka baka na eksempre fu Yehovah fu di yu e sori langa pasensi te yu e meki muiti trutru fu yepi yu pikin kon bun baka nanga Yehovah. Tan hori yusrefi na Bijbel gronprakseri èn pruberi fu sori den eigifasi fu Yehovah, soleki lobi, regtfardikifasi, nanga koni, ala di yu e begi en fu yepi yu. Neleki fa furu tranga-ede sma drai den libi, di Yehovah ben gi den wan kari na wan lobi-ati fasi fu drai kon baka na en, na so yu manpikin noso umapikin di lasi kan drai kon baka na a ipi di Gado e kibri.—Lukas 15:6, 7.
[Futuwortu]
^ paragraaf 6 Efu yu wani sabi moro fu a fasi fa yu kan gi yongu sma leri na wan bun fasi, dan yu kan luku A Waktitoren fu 1 yuli 1999, bladzijde 13-17.
^ paragraaf 15 Sma no sa begi na gemeente konmakandra gi wan pikin di puru fu a gemeente, fu di a kan de so taki trawan no sabi san na a situwâsi fu a sma di puru fu a gemeente.—Luku De Wachttoren fu 15 yanuari 1980, bladzijde 30.
^ paragraaf 17 Moro fini rai de fu feni na ini na Ontwaakt! fu 22 oktober 1972, bladzijde 13-16; 22 september 1996, bladzijde 21-23.
Yu E Memre Disi Ete?
• San kan de a rutu fu a problema te yonguwan e gowe libi a gemeente?
• Fa wi kan yepi yongu sma fu kweki wan matifasi nanga Yehovah?
• Fu san ede papa nanga mama musu abi langa pasensi te den e yepi wan pikin di lasi, ala di den e tan hori densrefi na regtfardiki markitiki?
• Fa den wan na ini a gemeente kan yepi wan yonguwan di lasi fu drai kon baka?
[Aksi fu a tori disi]
[Prenki na tapu bladzijde 15]
A de tumusi prenspari fu leisi a Wortu fu Gado efu wi wani kweki wan krosibei matifasi nanga Yehovah
[Prenki na tapu bladzijde 15]
Te papa nanga mama e begi nanga den heri ati, dan dati kan meki den pikin fu den firi taki a papa nanga mama srefi abi wan krosibei matifasi nanga Yehovah
[Prenki na tapu bladzijde 17]
Meki wi gi wan pikin di lasi, wan switikon te a ’e kisi ensrefi baka’
[Prenki na tapu bladzijde 18]
Yu musu seti sani fu yepi a pikin fu yu fu kon bun baka nanga Yehovah