Kownukondre Preikiman E Fruteri

Feni Den Wan Di Tranga fu Miti

YEHOVAH KOTOIGI e pruberi fu taki nanga iniwan sma di den man miti nanga a Kownukondre boskopu. Son leisi, spesrutu muiti musu meki fu miti den wan di no de na oso furufuru (Markus 13:10). Nanga disi na prakseri, wan furuten dinari di e dini leki spesrutu pionier na ini wan kondre na ini Zuid-Amerika e fruteri na ondrofenitori disi.

„Wan dei mi ben yere taki a Distrikt Komsarsi ben o kon na a kontren pe mi nanga mi wefi kisi a toewijzing fu wroko. Fu di wi ben de seiker taki a Komsarsi na wan fu den sma di no de na oso furufuru, meki mi ben skrifi en wan brifi èn makandra nanga a brifi mi seni wan tu Bijbel publikâsi gi en, soleki a brochure San Gado e aksi foe wi? nanga den buku De mens op zoek naar God (A Suku Di Libisma E Suku Gado) èn Sabi di e tjari joe go na têgo libi. Na ini mi brifi mi ben fruteri san na a marki fu iniwan fu den publikâsi disi.

Fu di mi ben wani sabi fa a e prakseri fu den buku disi, meki mi ben aksi fu miti nanga en. Wan tu wiki baka dati mi kisi na okasi fu miti nanga en, èn mi tyari mi eigi eksemplaar fu a video Jehovah’s Getuigen — De organisatie achter de naam (Yehovah Kotoigi — Na Organisâsi Baka a Nen). Wi ben de makandra so wan tu yuru langa. Baka di mi kaba luku a video makandra nanga a Komsarsi, mi aksi en san a prakseri fu dati. A piki: ’No wan tra organisâsi no de na grontapu di de leki a di fu unu. Mi e winsi taki mi ben abi sma leki unu fu klari den lanti wroko fu mi!’ Baka dati a aksi mi efu oiti mi ben go na a edekantoro fu wi organisâsi. Mi fruteri en taki ala di a ben de a marki fu mi sensi di mi ben abi 14 yari, toku noiti mi ben feni na okasi fu fisiti na edekantoro na ini Brooklyn, New York. A ben de wan fu den marki di muilek fu doro. A luku mi so dûn leki a ben prakseri wan sani. Dan a taki dati a ben wani gi mi na okasi fu go. A sorgu gi den lanti papira di wi ben abi fanowdu èn a gi wi tu ticket leki kado!

Now a Komsarsi e kisi A Waktitoren nanga Ontwaakt! doronomo. Wi howpu taki wi man bigin wan bijbelstudie nanga en heri esi.”