Trutru Bribi na ini Gado—Sma Kan Abi Dati Ete?

„Bribi na wan fasti frutrow di sma abi na ini a bunfasi fu Gado. A sma di abi bribi abi so wan seikerfasi, taki a ben o de klariklari dusun tron fu lasi en libi leki bakapisi fu dati.”—MAARTEN LUTHER, 1522.

„Fu taki en leti, wi tron wan grontapu libimakandra kaba pe Kresten bribi nanga gwenti kon tron sani di pikinmoro no de fu feni.”—LUDOVIC KENNEDY, 1999.

BIGI difrenti de na mindri den fasi fa libisma e si bribi. Fosi, furu sma ben e bribi na ini Gado. Now, ini wan grontapu pe furu sma e tweifri na sani èn e pina, trutru bribi na ini Gado èn na ini Bijbel heri esi e lasi gowe.

Trutru Bribi na ini Gado

Furu sma e si „bribi” nomo leki a abi di wan sma abi wan kerki bribi noso a hori di a e hori ensrefi na wan fasi fu anbegi. Fu taki en leti, soleki fa Bijbel e sori, dan „bribi” wani taki dati wan sma e frutrow dorodoro tapu wan trawan. A de wan fasti frutrow na ini Gado èn so srefi na ini den pramisi fu en. A de wan eigifasi di e sori taki wan sma na wan disipel fu Yesus Krestes.

Wan leisi, Yesus Krestes ben taki o prenspari a de fu begi èn „fu no lasi ati”. Di a ben e du dati, dan a aksi efu tru bribi na ini Gado ben o de fu feni na ini a ten fu wi. A ben aksi: „Te a Manpikin fu libisma e doro, a sa feni trutru a bribi disi na grontapu?” Fu san ede a ben aksi so wan sani?—Lukas 18: 1, 8, futuwortu.

A Bribi Di Sma Lasi na ini Gado

Furu sani kan meki taki libisma e lasi bribi na ini Gado. Wan tu fu den sani disi na den takru ondrofeni nanga den tesi fu na aladei libi. Professor Michael Goulder di ben de wan priester fu wan kontren na ini a foto Manchester na Ingrisikondre. Na a ten dati, na ini 1958, wan ongoloku ben pasa na ini a foto Munich nanga wan opolani. Na ongoloku disi ben abi leki bakapisi taki furu memre fu a Manchester United futubal grupu lasi den libi. Na ini wan telefisi programa fu BBC (wan telefisistation na Ingrisikondre), Joan Bakewell di ben e wroko drape, fruklari taki Goulder „no ben sabi san a ben musu du di a si fa so furu sma ben e sari”. Wan bakapisi fu dati ben de taki a „lasi bribi na ini Gado di abi krakti na tapu a fasi fa a libi fu sma e  waka.” Goulder ben taki dati a ben bribi taki „Bijbel a no . . . wan wortu fu Gado di no kan abi fowtu”, ma na presi fu dati, „a de a wortu fu libisma di kan abi fowtu; kande a de so taki wan tu sani na ini skrifi na ondro a krakti fu Gado en santa yeye”.

Son leisi bribi e dede gowe nomo. Na dati pasa nanga Ludovic Kennedy, wan man di ben de skrifiman nanga nyunsuman so srefi. A e taki dati sensi di a ben de pikin, a „ben tweifri efu Gado trutru de, èn moro nanga moro mi no ben wani bribi na ini en”. A sori taki nowan sma ben man gi en bun piki tapu den aksi fu en. Di en papa dede na se, wan sani di a no ben fruwakti, dan dati ben abi leki bakapisi taki a bribi fu en di ben swaki kaba, kon moro swaki now. Ala di en papa ben begi Gado fu ’kibri den fu kefar fu a se èn fu na ogridu di a feanti e du nanga tranga (wan pisi fu a begi fu den srudati di e feti na se), toku den begi no kisi piki. Den Doisri sipi di ben e feti nanga den na a ten fu a di fu Tu Grontapufeti sutu èn pori a sipi di ben e tyari en papa.—All in the Mind — A Farewell to God (A nen fu a buku fu Ludovic Kennedy).

Furu sma abi den ondrofeni disi. „A no ala sma abi bribi”, na so na apostel Paulus e taki (2 Tesalonikasma 3:2). Fa yu e denki fu dati? A tru taki sma kan bribi ete na ini Gado nanga en Wortu, ala di wi e libi na ini wan grontapu pe moro nanga moro sma e tron tweifriman? Ondrosuku san na artikel di e kon now abi fu taki fu a tori disi.