Waka Baka na Eksempre fu Yehovah Te Yu E Kweki Den Pikin fu Yu
Waka Baka na Eksempre fu Yehovah Te Yu E Kweki Den Pikin fu Yu
„A no ala papa nanga mama e piri-ai gi den pikin fu den?”—HEBREWSMA 12:7, Contemporary English Version.
1, 2. Fu san ede a muilek gi papa nanga mama fu kweki den pikin fu den na ini a ten disi?
WAN tu yari pasa, sma ben du wan ondrosuku na ini Yapan. Afu fu den bigisma di den interview, ben feni taki papa nanga mama èn den pikin fu den no abi komunikâsi nanga makandra. Den sma disi ben feni tu dati papa nanga mama e gi den pikin fu den tumusi furu primisi. Na ini wan tra ondrosuku na ini a kondre dati, pikinmoro wan di fu fo pisi fu den sma di taki san den ben denki fu a tori disi, ben erken taki den no ben sabi fa den musu handri nanga pikin-nengre. A situwâsi disi no de so na ini den Owstusei kondre wawan. „Furu papa nanga mama na ini Kanada ben erken taki den no sabi seiker fa fu de wan bun papa noso mama”, na so The Toronto Star ben skrifi. Na ala presi, papa nanga mama e feni taki a muilek srefisrefi fu kweki den pikin fu den.
2 Fu san ede a muilek gi papa nanga mama fu kweki den pikin fu den? Wan prenspari reide fu san ede a de so, na taki wi e libi na ini „den lasti dei”, èn taki a de wan „muilek ten di tranga fu pasa” (2 Timoteus 3:1). Boiti dati, „den firi di libisma abi na ini en ati, takru fu sensi en yongu yari”, na so Bijbel e taki (Genesis 8:21). Èn spesrutu yongu sma e brokokindi moro esi te Satan e suku fu kisi den nanga den triki fu en. Satan de „leki wan krasi lew” di e suku fu kisi den wan di no abi ondrofeni ete (1 Petrus 5:8). Kresten papa nanga mama e kisi fu du nanga furu problema te den e meki muiti fu kweki den pikin fu den „na ini a trangaleri èn a seryusu frumane fu Yehovah” (Efeisesma 6:4). Fa papa nanga mama kan yepi den pikin fu den fu gro kon tron lepi anbegiman fu Yehovah di man si krin „san bun èn san ogri”?—Hebrewsma 5:14.
3. Fu san ede a de tumusi prenspari taki papa nanga mama e gi den pikin fu den leri nanga rai?
3 „Lawfasi tai na a ati fu wan boi”, na so a koni Kownu Salomo ben taki (Odo 13:1; 22:15). Fu man puru lawfasi na ini na ati fu yonguwan, dan a de fanowdu taki a papa nanga mama fu den e piri-ai gi den na wan lobi-ati fasi. Ma a no ala ten yongu sma breiti fu kisi a piri-ai disi. Fu taki en leti, nofotron den e weigri fu teki rai, awinsi suma e gi den a rai dati. Fu dati ede papa nanga mama musu leri fa fu „kweki wan boi akruderi a pasi gi en” (Odo 22:6). Efu pikin-nengre e grabu a trangaleri disi hori, dan dati kan meki den tan na libi (Odo 4:13). A de tumusi prenspari taki papa nanga mama sabi san den musu du te den wani kweki den yonguwan fu den!
Trangaleri—San Dati Wani Taki
4. San a wortu „trangaleri” na ini Bijbel wani taki moro furu?
4 Son sma e frede taki te den e piri-ai gi den pikin fu den, dan tra sma o krutu den taki den e fon den pikin fu den, taki den e taki takru sani fu den, noso taki den e hati den firi fu den. Dati meki son papa nanga mama no e piri-ai gi den pikin fu den. Wi no abi fu frede gi dati. A wortu „trangaleri” soleki fa Bijbel e gebroiki en, no wani taki dati sma e meshandri trawan, noso taki den e du tra sma ogri na wan noso tra fasi. Moro furu, a Griki wortu gi „trangaleri” abi fu du nanga a gi di wan sma e gi rai, leri nanga piri-ai, èn son leisi a abi fu du tu nanga a strafu di wan sma e kisi na wan lobi-ati fasi fu di a e frudini dati.
5. Fu san ede a bun fu poti prakseri na a fasi fa Yehovah e handri nanga en pipel?
5 A Sma di e sori na wan volmaakti fasi fa fu gi piri-ai, na Yehovah Gado. Na apostel Paulus ben teki Yehovah gersi nanga wan libisma papa, di a skrifi: „A no ala papa nanga mama e piri-ai gi den pikin fu den? . . . Den libisma papa fu wi e piri-ai gi wi fu wan syatu pisi ten, èn den e du dati soleki fa den e feni taki a bun. Ma Gado e piri-ai gi Hebrewsma 12:7-10, Contemporary English Version). Iya, Yehovah e piri-ai gi a pipel fu en so taki den kan de santa, noso soifri. Wi kan leri furu srefisrefi fa wi musu piri-ai gi pikin-nengre, te wi e poti prakseri na a fasi fa Yehovah gi a pipel fu en leri.—Deuteronomium 32:4; Mateus 7:11; Efeisesma 5:1.
wi so taki wi kan abi winimarki, bika a wani taki wi de santa” (Lobi—A Krakti Di E Pusu Wi fu Handri
6. Fu san ede a kan de wan muilek sani gi papa nanga mama fu sori a lobi di Yehovah e sori?
6 „Gado na lobi”, na so na apostel Yohanes e taki. So bun, ala ten Yehovah e gi sma leri fu di a lobi den (1 Yohanes 4:8; Odo 3:11, 12). Disi wani taki dan, dati a ben o de wan makriki sani gi papa nanga mama di lobi den pikin fu den, fu handri neleki Yehovah ini a tori disi? Dati no abi fu de so. A lobi fu Gado abi gronprakseri leki fondamenti. Wan Bijbel sabiman fu den Griki Buku fu Bijbel ben sori taki „a no de so ala ten taki na abi di sma abi lobi gi makandra, wani taki dati den abi a lobi disi fu Gado tu”. Gado a no wan sma di e meki den firi fu en basi en krinkrin te a e sori lobi. Ala ten a e prakseri san moro bun gi a pipel fu en.—Yesaya 30:20; 48:17.
7, 8. (a) Fa Yehovah ben sori lobi di abi en fondamenti tapu gronprakseri, di a ben e handri nanga en pipel? (b) Fa papa nanga mama kan handri neleki Yehovah te den e yepi den pikin fu den fu kisi a koni fu hori densrefi na Bijbel gronprakseri?
7 Prakseri a lobi di Yehovah ben sori di a ben e handri nanga den Israèlsma. Moses ben gebroiki wan tumusi moi agersitori fu sori fa Yehovah ben lobi a nyun nâsi Israèl. Wi e leisi: „Neleki fa wan aka e wiki [den pikin na ini] a nesi fu en, èn e tan frei lontu na tapu den pikin fu en, e bradi en frei, e opo den pikin, tyari den go na tapu den frei fu en, na so Yehovah wawan ben tan tyari [Yakob]” (Deuteronomium 32:9, 11, 12). A mama aka wani leri den pikin fu en fa den musu frei. Fu dati ede a e „wiki [den pikin na ini] a nesi fu en”, fu di a e wai nanga den frei fu en fu gi den pikin deki-ati fu frei. Nofotron a nesi de na tapu wan hei stonbergi. Te wan yongu fowru e frei komoto na ini a nesi te fu kaba, dan a mama „e tan frei lontu na tapu” a pikin fowru dati. Te a gersi leki a pikin fowru o fadon, dan a mama e frei esi go na en ondro fu tyari en „na tapu den frei fu en”. Na a srefi fasi Yehovah ben e sorgu a nyun nâsi Israèl na wan lobi-ati fasi tu. A ben gi a pipel a Wet fu Moses (Psalm 78:5-7). Dan Gado ben luku a nâsi, èn a ben de klariklari ala ten fu yepi noso frulusu a pipel fu en te problema miti den.
8 Fa Kresten papa nanga mama kan sori a lobi di Yehovah sori? Na a fosi presi, den musu leri den pikin fu den, den gronprakseri nanga den markitiki di de fu feni na ini a Wortu fu Gado (Deuteronomium 6:4-9). A marki di den wani doro, na fu leri den yonguwan fa fu teki bosroiti akruderi Bijbel gronprakseri. Te lobi-ati papa nanga mama e du dati, dan den e frei lontu fu taki en so, na tapu den yonguwan fu den, fu luku fa den yonguwan e gebroiki den gronprakseri di den leri. Te den pikin e gro kon bigi, dan a lobi-ati papa nanga mama fu den e gi den moro nanga moro fri. Toku den de klariklari fu ’frei go na ondro den’ pikin fu den èn fu ’tyari den na tapu den frei fu den’ ibri leisi te kefar de. Sortu kefar?
9. Gi sortu spesrutu kefar papa nanga mama di lobi den pikin fu den, musu de na ai? Gi wan eksempre.
9 Yehovah Gado ben warskow den Israèlsma Numeri 25:1-18; Esra 10:10-14). Na ini a ten disi a de wan kefar so srefi fu abi demakandra nanga sma di no e tyari densrefi na wan bun fasi (1 Korentesma 15:33). A de wan bun sani efu Kresten papa nanga mama e waka baka na eksempre fu Yehovah ini a tori disi. Wan meisje di nen Lisa èn di abi 15 yari, ben kon lobi wan boi di no ben tyari ensrefi akruderi Bijbel markitiki èn di no ben libi akruderi bun gwenti nanga gronprakseri soleki fa Lisa en osofamiri ben du dati. „Mi papa nanga mama ben si wantewante taki mi ben tyari misrefi na wan heri tra fasi leki fosi èn den ben du muiti fu yepi mi”, na so Lisa e fruteri. „Son leisi den ben piri-ai gi mi, èn tra leisi den ben gi mi rai na wan lobi-ati fasi.” Den ben sidon arki Lisa nanga pasensi. Fu di den ben du dati, meki den kon si taki a trutru problema ben de taki a ben wani fu den tra yonguwan musu feni en bun. Na so wan fasi den ben man yepi en fu kakafutu gi a problema fu en. *
gi den takru bakapisi di e kon te den abi demakandra nanga takru kompe (Tan Gi Makandra Okasi fu Taki
10. Na sortu fasi Yehovah ben poti wan tumusi moi eksempre nanga a taki di a ben e taki nanga den Israèlsma?
10 Efu papa nanga mama wani kweki pikin-nengre na wan bun fasi, dan den musu meki muiti fu tan gi den yonguwan okasi fu taki nanga den. Ala di Yehovah sabi san de na ini wi ati, toku a e gi wi deki-ati fu taki nanga en (1 Kroniki 28:9). Baka di Yehovah ben gi den Israèlsma a Wet, dan a ben gi den Leifisma a wroko fu gi den sma leri. A ben seni den profeiti fu en so srefi fu taki-go-taki-kon nanga den èn fu piri-ai gi den. A ben sori tu taki a ben de klariklari fu arki den begi fu den.—2 Kroniki 17:7-9; Psalm 65:2; Yesaya 1:1-3, 18-20; Yeremia 25:4; Galasiasma 3:22-24.
11. (a) Fa papa nanga mama kan sorgu taki den e gi den pikin fu den na okasi fu taki nanga den? (b) Fu san ede papa nanga mama musu de bun arkiman te den e taki nanga den pikin fu den?
11 Fa papa nanga mama kan waka baka na eksempre fu Yehovah te den e taki nanga den pikin fu den? Na a fosi presi, a prenspari taki papa nanga mama e poti ten na wan sei fu taki nanga den pikin. Papa nanga mama musu luku bun so srefi taki den no e taki sani di e hati den firi fu a pikin, soleki „Na so wan pikin sani nomo e trobi yu? Mi prakseri taki yu kon fruteri mi wan prenspari sani”, noso „So wan don sani”, noso „We, san yu ben fruwakti dan? Yu de wan pikin ete” (Odo 12:18). Den papa nanga mama di abi koni e meki muiti fu de bun arkiman, so taki den pikin e kisi deki-ati fu taki san de tapu den ati. Papa nanga mama di no e arki den pikin fu den te den pikin yongu ete, e kon si taki den pikin no e arki den tu te den e kon moro owru. Yehovah ben de klariklari ala ten fu arki a pipel fu en. Ala ten a e arki den wan di e taki nanga sakafasi nanga en na ini begi.—Psalm 91:15; Yeremia 29:12; Lukas 11:9-13.
12. Sortu eigifasi papa nanga mama kan sori, di e meki en moro makriki gi den pikin fu taki nanga den?
12 Poti prakseri tu na wan tu eigifasi fu Gado di meki taki sma ben man taki na wan fri fasi nanga en. Fu eksempre, Kownu David fu na Israèl fu owruten ben du wan bigi sondu fu di a ben du sutadu nanga Batseiba. Fu di David no ben de volmaakti, meki a du tra seryusu sondu tu na ini en libi. Ma toku a ben begi Yehovah ala ten fu suku pardon èn fu kisi piri-ai. A no de fu taki, dati a lobi bun-ati nanga a sari-ati fu Gado meki taki David ben man drai go baka na Yehovah moro makriki (Psalm 103:8). Efu papa nanga mama e sori den srefi eigifasi disi fu Gado, soleki lobi nanga sari-ati, dan dati kan yepi den fu tan gi den pikin okasi fu taki nanga den te den pikin e meki fowtu.—Psalm 103:13; Maleaki 3:17.
Unu Musu De Reidelek
13. San a wani taki fu de reidelek?
13 Te papa nanga mama e arki den pikin fu den, dan den musu de reidelek èn den musu sori „a koni fu tapusei” (Yakobus 3:17). „Meki ala sma kon sabi a reidelekfasi fu unu”, na so na apostel Paulus ben skrifi (Filipisma 4:5). San a wani taki fu de reidelek? Wan fasi fu fruklari a Griki wortu di vertaal nanga „reidelek”, na taki wan sma „no e tan hori nomonomo na den sani di skrifi na ini a wet”. Fa papa nanga mama kan de reidelek, ala di den e tan hori densrefi na den markitiki di e sori fa wan sma musu tyari ensrefi na skin sei èn na yeye fasi?
14. Fa Yehovah ben sori reidelekfasi di a ben handri nanga Lot?
14 Yehovah e sori wi na wan tumusi moi fasi san a wani taki fu de reidelek (Psalm 10:17). Di a gi Lot nanga en osofamiri a komando fu komoto na a foto Sodom di ben o kisi pori, dan Lot „ben tan draidrai”. Baka ten, di na engel fu Yehovah aksi en fu lowe go na a bergi kontren, dan Lot taki: „Mi no man lowe go na a bergi kontren . . . Grantangi, a foto [Soar] de krosibei fu mi kan lowe go drape èn a de wan pikin foto. Grantangi, meki mi lowe go drape — a de wan pikin foto, a no so?” Fa Yehovah ben piki di Lot aksi en dati? A ben taki: „Luku, now tu mi e hori yu na prakseri trutru, fu di mi no sa drai a foto tapu, a foto di yu kari” (Genesis 19:16-21, 30). Yehovah ben de klariklari fu du san Lot ben aksi. Iya, papa nanga mama musu hori densrefi na den markitiki di Yehovah Gado poti na ini en Wortu, Bijbel. Ma toku den kan poti prakseri na san den yonguwan e aksi, solanga den sani dati no e meki den pasa Bijbel gronprakseri.
15, 16. San papa nanga mama kan leri fu na agersitori di de fu feni na ini Yesaya 28:24, 25?
15 Te papa nanga mama de reidelek, dan dati wani taki so srefi dati den e sreka na ati fu den pikin, so taki den sa de klariklari fu teki rai. Yesaya ben fruteri wan agersitori pe a ben teki Yehovah gersi nanga wan gronman, èn a ben taki: „Na heri dei a sma di e prugu, e prugu fu sai siri, taki a e drai a doti fu en èn e lusu en? A no de so, taki te a e meki a gron kon grati, dan a e panya blaka komijn èn e trowe a komijn, èn a no musu poti tarwe, gierst nanga gerst na ini na a fasti presi, èn poti spelt leki a grens fu en?”—Yesaya 28:24, 25.
16 Yehovah „e prugu fu sai siri” èn „a e drai a doti fu en èn e lusu en”. Na so wan fasi a e sreka na ati fu en pipel fosi a e gi den piri-ai. Fa papa nanga mama kan „prugu” na ati fu den pikin fu den te den e piri-ai gi den? Wan papa ben handri leki Yehovah, di a piri-ai gi a boi fu en di abi fo yari. Di en manpikin naki wan boi fu a birti pe den ben libi, dan a papa ben arki en manpikin fosi, di ben fruteri fu san ede a naki a tra boi. Dan fu di a papa ben wani ’prugu’ na ati fu a manpikin, meki a fruteri wan tori fu wan pikin boi di ben kisi kwinsi fu wan ogri boi di ben trobi en. Di a manpikin fu en yere a tori dati, dan a ben feni taki na ogri boi dati musu kisi strafu. A fasi disi fa a papa ben ’e prugu’, ben sreka na ati fu en manpikin, so taki a kon frustan moro esi taki a naki di a naki a tra boi, ben de wan sani di soso ogri boi e du èn taki a fowtu.—2 Samuèl 12:1-14.
17. San papa nanga mama kan leri fu a tori na ini Yesaya 28:26-29 te den e piri-ai gi den pikin fu den?
17 Yesaya ben teki a piri-ai di Yehovah e gi, gersi nanga wan tra sani di gronman e du — a masi di den e masi siri-nyanyan. Wan gronman e gebroiki difrenti wrokosani fu masi den siri, fu di a e luku o tranga a buba fu den difrenti sortu siri de. Yesaya 28:26-29). Yu abi son pikin-nengre di a papa noso mama fu den abi fu luku den nomo, dan den sabi kaba san den musu du. Tra pikin-nengre musu kisi frumane ibri leisi baka, èn ete trawan musu kisi strafu kande. Papa nanga mama di de reidelek sa gi den pikin piri-ai na wan fasi di fiti gi ibri pikin aparti.
A e gebroiki wan fini tiki gi den safu blaka komijn èn wan tra sortu tiki gi a komijn, ma a e gebroiki wan wagi noso wiel fu masi den siri di abi wan moro tranga buba. Ma toku a no sa masi den moro tranga siri dorodoro. Na a srefi fasi, te Yehovah wani puru wan takru eigifasi di en pipel abi, dan a e gebroiki difrenti sani fu yepi den, fu di den no abi den srefi nowtu èn fu di den de na ini difrenti situwâsi. Noiti a e gebroiki en makti na wan ogri-ati fasi, èn noiti a e kwinsi den (Meki den Osofamiri Takimakandra De wan Switi Okasi
18. Fa papa nanga mama kan poti ten na wan sei fu hori na osofamiri studie doronomo?
18 Wan tu fu den moro bun fasi fu gi den pikin fu yu leri, na fu abi wan bijbelstudie nanga na osofamiri doronomo, èn wan aladei takimakandra fu den Buku fu Bijbel. Wan osofamiri studie abi moro bun bakapisi te a e hori doronomo. Te yu no meki mofo na fesi o ten yu wani hori a studie, noso te yu e hori en soso na a momenti te yu kisi wan okasi, dan soleki fa a sori, yu no sa tan hori a studie doronomo. So bun, papa nanga mama musu ’bai ten’ fu studeri (Efeisesma 5:15-17). A kan de wan tyalensi fu feni wan fasti ten di bun gi ala sma. Wan papa ben kon si taki di den pikin ben e gro kon bigi, dan den alamala ben kon abi difrenti schema. Fu dati ede den no ben man kon makandra so makriki moro nanga a heri osofamiri. Ma toku, na osofamiri ben de makandra ala ten tapu den neti te den gemeente konmakandra e hori. Fu dati ede a papa ben seti sani so, taki na osofamiri ben kan studeri tapu wan fu den neti dati. A seti disi ben waka bun. Ala dri pikin na dopu futuboi fu Yehovah now.
19. Fa papa nanga mama kan waka baka na eksempre fu Yehovah te den e hori wan osofamiri studie?
19 Ma a no de nofo fu taki nomo fu wan tu Bijbel tori na a studie. Yehovah ben gebroiki den priester fu gi leri na den Israèlsma di drai go baka na a kondre fu den. Den priester disi ’ben tyari a Wet kon na krin, èn den ben sori san a wani taki’, ala di „den ben tan meki sma kon frustan san den ben leisi” (Nehemia 8:8). Wan papa di yepi ala den seibi pikin fu en fu lobi Yehovah, ben go na en kamra ala ten bifo na osofamiri studie. A ben du dati, fu man sreka ensrefi gi den tori di a ben o studeri nanga den pikin èn fu luku fa dati e fiti gi ibri pikin. A ben meki a studie de wan prisiri sani gi den pikin fu en. „A studie ben de wan prisiri sani ala ten”, na so wan fu en manpikin di gro kon bigi kaba e memre. „Efu wi ben de na dorosei e plèi bal ini a dyari te den ben kari wi fu kon na a osofamiri studie, dan wi ben poti a bal na wan sei wantewante, èn wi ben lon go na inisei fu studeri. Dati ben de wan fu den moro prisiri mofoneti na ini a wiki.”
20. Na sortu problema di ben kan opo kon na ini a kweki fu pikin-nengre, wi musu poti prakseri ete?
20 A psalm skrifiman ben fruklari: „Luku! Manpikin na wan gudu di e kon fu Yehovah; a froktu fu a bere na wan pai” (Psalm 127:3). A e teki furu ten nanga muiti fu kweki den pikin fu wi, ma te wi e du dati na a yoisti fasi, dan dati kan meki den kisi têgo libi. Dati ben sa de wan tumusi moi blesi! Fu dati ede, meki wi de fayafaya fu waka baka na eksempre fu Yehovah te wi e kweki den pikin fu wi. Ma ala di papa nanga mama kisi a frantwortu fu „kweki den [pikin] na ini a trangaleri èn a seryusu frumane fu Yehovah”, toku den no abi a dyaranti taki sani sa waka bun (Efeisesma 6:4). Srefi te papa nanga mama e sorgu den pikin fu den so bun leki den man, toku wan pikin kan drai en baka gi Yehovah èn tapu fu dini en. San den musu du na ini so wan situwâsi? Wi sa taki fu dati na ini na artikel di e kon.
[Futuwortu]
^ paragraaf 9 A kan de so taki den ondrofenitori na ini na artikel disi èn den wan na ini a tra artikel di e kon, komoto na kondre di no abi a srefi kulturu leki a di fu yu. Yu musu pruberi fu si den gronprakseri di abi fu du nanga den tori disi, èn yu musu luku fa yu kan gebroiki den na ini yu kulturu.
San Yu E Piki
• Fa papa nanga mama kan sori a lobi di Yehovah ben sori èn di Deuteronomium 32:11, 12 e taki fu en?
• San yu leri fu a fasi fa Yehovah ben taki nanga den Israèlsma?
• San wi e leri fu na arki di Yehovah ben arki san Lot ben aksi en nomonomo?
• San Yesaya 28:24-29 e leri yu fu a fasi fa yu musu gi pikin-nengre piri-ai?
[Aksi fu a tori disi]
[Prenki na tapu bladzijde 8, 9]
Moses ben agersi a leri di Yehovah e gi en pipel nanga a fasi fa wan aka e du nanga den pikin fu en
[Prenki na tapu bladzijde 10]
Papa nanga mama musu poti ten na wan sei gi den pikin fu den
[Prenki na tapu bladzijde 12]
„A ben de wan fu den moro prisiri mofoneti na ini a wiki”