Wan Sani Di Wi Kan Leri fu a Palmbon

„WAN bon di tanapu kánkan èn di moi srefisrefi.” Na so wan Bijbel encyclopedie e kari a palmbon di e gi den dadel froktu. Na ini Bijbel ten èn so srefi na ini a ten disi, den dadelbon e moi a Lagipresi fu a Nijl-liba na ini Egipti, èn den e gi switi kowrupe na kontren fu a Gran Sabana fu Negeb, pe sani e gro.

Leki fa a de nanga furu fu den difrenti palmbon, a dadelbon abi wan tumusi moi fasi fu gro leti-opo. Son wan fu den kan hei 30 meter èn den e tan gi froktu 150 yari langa. Fu tru, a dadelbon moi fu si èn a e meki furu froktu tu. Ibri yari a e meki furu bosu nanga dadel. Na ini wán bosu nomo yu kan abi moro leki 1000 fu den froktu disi. Wan sabiman ben skrifi a sani disi fu dadel: „Den sma di . . . sabi dadel soso leki wan drei froktu di yu e si na ini paki ini den grasi kasi fu den wenkri, no sa man frustan o switi a froktu disi de efu yu nyan en sondro fu drei en.”

A fiti fu dati ede taki a Bijbel e agersi son libisma nanga palmbon. Efu wan sma wani plisi Gado, dan neleki wan palmbon di e meki furu froktu, a musu tanapu kánkan na a sei fu bun gwenti nanga gronprakseri èn a musu tan du bun wroko (Mateus 7:17-20). Fu dati ede den ben moi a tempel fu Salomo nanga a tempel ini a fisyun fu Esekièl nanga palmbon di ben kerfu na tapu den skotu (1 Kownu 6:29, 32, 35; Esekièl 40:14-16, 20, 22). So bun, efu wan sma wani taki en anbegi bun gi Gado, dan a musu abi den moi eigifasi fu wan dadelbon. A Wortu fu Gado e fruteri wi: „A regtfardikiwan srefi sa gro leki fa wan palmbon e gro.”—Psalm 92:12.