Ondrofenitori

Wi Ondrofeni Furu Sani Di Wi No Ben Fruwakti na ini a Diniwroko fu Yehovah

SOLEKI FA ERIC NANGA HAZEL BEVERIDGE FRUTERI

„Yu e kisi siksi mun strafu na strafu-oso.” Mi ben e prakseri den wortu disi ete di den teki mi tyari go na Strangeways Prison (wan strafu-oso) na ini a foto Manchester na Ingrisikondre. A ben de december 1950, èn mi ben abi 19 yari. Wan syatu pisi ten bifo, wan fu den moro hebi tesi ben miti mi na ini mi yongu yari — mi ben weigri fu go na ini a legre.—2 Korentesma 10:3-5.

MI BEN de wan dinari na ini a furuten diniwroko fu Yehovah Kotoigi, èn fu dati ede mi ben musu kisi primisi fu no go na ini a legre. Ma den wet fu Ingrisikondre no ben erken wi leki dinari fu wan kerki. Na so a kon taki den poti mi na ini wan strafu-oso kamra pe mi ben de mi wawan. Èn mi ben prakseri mi papa. Mi papa ben de wan fu den reide fu san ede mi ben de na strafu-oso.

A de so taki mi papa di ben e wroko na strafu-oso, ben de wan man fu a presi Yorkshire. A ben abi wan tranga overtoigi èn a ben e hori ensrefi soifri na spesrutu gronprakseri. Fu di a no ben ondrofeni bun sani na ini a legre èn na strafu-oso pe a ben e wroko, dan a no ben abi wan bun denki srefisrefi fu a Lomsu Kerki. A fosi leisi di a ben abi kontakti nanga den Kotoigi, ben de na ini den yari syatu baka 1930 di a ben waka go na a doro fu seni den gowe. Na presi taki a ben du dati a ben kon baka na ini na oso nanga wan tu fu den buku fu den na ini en anu! Baka ten a teki wan abonnement tapu a tijdschrift Vertroosting (now a nen Ontwaakt!). Den Kotoigi ben gwenti fu kon na wi oso ibri yari fu gi en deki-ati fu teki wan nyun abonnement baka. Di mi ben abi wan sani fu 15 yari, dan den ben taki ete wan leisi nanga mi papa fu na abonnement. Mi ben teki prati na a takimakandra disi èn mi ben teki a sei fu den Kotoigi. Na a ten dati mi bigin studeri Bijbel.

Di mi ben abi 17 yari, dan mi gi misrefi abra na Yehovah, fu di mi teki dopu na ini maart 1949. Baka ten na ini a srefi yari dati, mi miti John nanga Michael Charuk, di ben klari a Gilead zendelingskoro nanga bun bakapisi wan syatu pisi ten bifo. Den ben o go na Nigeria. A zendeling yeye fu den trutru naki mi ati. Mi no sabi efu den ben sabi dati, ma na den wiki a firi na ini mi ati fu tron zendeling.

 Ala di mi ben e studeri Bijbel, dan leki bakapisi fu dati mi no ben wani go na wan universiteit moro. Na ini wan yari ten baka di mi gowe libi oso fu go wroko na a Belasting kantoro na ini Londen, dan mi ben feni taki mi no ben o man gi misrefi dorodoro na Gado efu mi ben tan wroko gi lanti. Di mi tapu nanga mi kantoro wroko, dan wán fu den wroko kompe di ben e du a wroko disi yari langa kaba, fristeri mi fu di mi ben gowe libi „wan wroko di ben e meki wan sma lasi en prisiri”.

Bifo disi ben pasa, mi ben kisi fu du nanga wan tra tesi. Mi no ben sabi fa fu fruteri mi papa taki mi ben wani tapu nanga mi bunbun wroko fu tron wan dinari na ini a furuten diniwroko. Wan neti di mi ben de nanga fakansi na a oso fu mi papa, dan mi fruteri en na onfruwakti sani disi. Mi ben fruwakti taki mi papa ben o kosi mi. Ma mi skreki di a taki nomo:„Na yu teki yu bosroiti; na yu sa musu libi nanga den bakapisi fu dati. Ma efu sani no waka bun, no kon suku yepi na mi.” A buku pe mi ben e skrifi sani di ben e pasa na ini mi aladei libi, abi gi 1 yanuari 1950 leki den fosi wortu: „Mi taigi mi papa taki mi o go du pionierwroko. Mi no ben man bribi di a piki mi na wan fasi di ben sori taki a no ben o gens mi. Mi no ben man hori misrefi fu no krei, fu di a ben handri na so wan switi fasi nanga mi.” Mi tapu nanga mi lantiwroko èn mi teki a toewijzing fu tron wan pionier di e du furuten diniwroko.

Wan Toewijzing Di Ben Abi fu Du Nanga wan „Pikin Oso”

Ne mi kisi ete wan tesi tapu mi loyaalfasi na Gado. Mi ben kisi a toewijzing fu go tan na ini wan „pikin oso” na ini Lancashire nanga Lloyd Griffiths, wan tra Kresten fu Wales. Mi ben abi ala sortu moi prakseri nanga fruwakti fu a pikin oso dati di mi doro na ini a soi foto Bacup. Fu di bigi alen ben fadon a dei dati, dati meki a foto ben sungu. Heri esi mi kisi misrefi di mi si taki a pikin oso ben de wan ondrogron kamra! Moisimoisi nanga kakalaka ben e dansi kapelka na ini na oso te neti. Mi ben de kaba fu drai baka go na oso. Na presi fu dati, mi aksi Yehovah safri fu gi mi krakti fu kakafutu gi a tesi disi. Wantronso, mi kisi wan korostu firi, èn mi bigin luku a situwâsi moro bun. Disi ben de a toewijzing di mi ben kisi fu Yehovah en organisâsi. Mi ben o frutrow na Yehovah tapu fu kisi yepi. Mi de nanga tangi na ati trutru taki mi horidoro na ini a situwâsi dati, bika efu mi no ben du dati dan noiti mi libi ben o de soleki fa a de now!—Yesaya 26:3, 4.

Baka di mi preiki sowan neigi mun na ini Rossendale Valley pe sani no ben e waka bun na ekonomia sei na a ten dati, dan mi doro na strafu-oso fu di mi ben weigri fu go na ini a legre. Baka di mi ben de tu wiki na ini Strangeways Prison, dan den seni mi go na Lewes Prison (wan tra strafu-oso) di ben de na a zuidsei syoro fu Ingrisikondre. Te fu kaba, wi ben de wan grupu fu feifi Kotoigi brada di ben de drape makandra, èn wi ben man memre a Memrefesa fu Krestes en dede na ini wan strafu-oso kamra.

Wan leisi mi papa kon luku mi. A ben musu fu firi syen di a kon luku en manpikin na strafu-oso, fu di a ben de wan strafu-oso wrokoman di furu sma ben sabi! Mi sa de nanga tangi na ati ala ten fu di a kon luku mi. Te fu kaba den lusu mi na ini april 1951.

Di mi gowe libi a strafu-oso fu Lewes, dan mi teki loko go na a foto Cardiff na ini Wales, pe mi papa ben de wan hei wrokoman na ini a strafu-oso na a ten dati. Mi ben de a moro bigiwan fu fo pikin, dri boi nanga wán meisje. Mi ben musu feni wroko gi wan tu dei na ini a wiki, so taki mi ben kan abi moni fu pai gi den sani di mi ben abi fanowdu, sondro taki mi ben abi fu tapu nanga a pionierwroko. Mi go wroko na ini wan krosi wenkri, ma a moro prenspari marki na ini mi libi ben de mi Kresten diniwroko. Na ini a pisi ten disi wi mama gowe libi wi alamala. A sani dati trutru hati mi papa èn so srefi wi leki pikin di ben abi aiti te go miti tin na neigi yari. A sari fu taki dati mi papa nanga mama broko trow.

A Man Di Feni wan Bun Wefi . . .

A gemeente ben abi wan tu pionier. Wán fu den ben de wan sisa di ben de fu Rhondda Valley pe sma ben e diki krofaya. Ala dei a ben e komoto fu drape fu kon du en grontapuwroko èn fu teki prati na ini a preikiwroko. A ben nen Hazel Green èn a ben de wan heri bun pionier. Hazel ben kon sabi a waarheid wan tu yari fosi mi. En papa nanga mama ben e go na konmakandra fu den Bijbel Ondrosukuman (now wi sabi den leki Yehovah Kotoigi) na ini den yari di ben de na mindri 1920 nanga 1930. Ma meki ensrefi fruteri unu a tori.

„Mi no ben e denki seryusu fu Bijbel teleki  1944 di mi leisi a pikin buku Religion Reaps the Whirlwind. Mi mama gi mi deki-ati fu go na wan kringkonmakandra na ini Cardiff. Ala di mi ben sabi pikinso nomo fu Bijbel, toku mi feni misrefi na ini wan pisi fu a foto pe furu wenkri ben de, ala di wan bord ben anga na mi neki. Nanga yepi fu a bord disi wi ben e meki bekènti taki wan publikitaki ben o hori. Sani waka bun nanga mi, ala di kerki tiriman nanga tra sma ben trobi mi. Mi teki dopu na ini 1946 èn mi bigin pionier na ini december fu a yari dati. Ne na ini 1951, wan yongu pionier kon na ini Cardiff. A ben lusu fu strafu-oso wan syatu pisi ten bifo. A ben de Eric.

Wi go wroko nanga makandra na ini a preikiwroko. Mi nanga en ben man feni en bun nanga makandra. Wi ben abi den srefi marki na ini a libi — wi ben wani wroko fu a bun fu den Kownukondre afersi fu Gado. So bun, wi trow na ini december 1952. Fu di wi ala tu ben de pionier na ini a furuten diniwroko, wi no ben kisi furu moni. Toku, noiti wi ben mankeri den prenspari sani di wi ben abi fanowdu. Son leisi wi ben e kisi syam noso sopo fu wan Kotoigi di ben bai tumusi furu fu den sani disi — èn dati ben de soifri na a ten di wi ben abi den sani disi fanowdu! Wi ben warderi en trutru te sma ben yepi wi na den sortu fasi dati. Ma moro bigi sani di wi no ben fruwakti ben o pasa nanga wi.”

Wi Libi Kenki fu Di Wan Sani Pasa Di Wi No Ben Fruwakti

Na ini november 1954, wan sani pasa di wi no ben fruwakti. Mi nanga Hazel kisi wan formulier fu a bijkantoro fu Yehovah Kotoigi na ini Londen. Den ben aksi mi fu tron kringopziener, san ben wani taki dati mi ben o musu go na wan tra gemeente ibri wiki. Wi ben de seiker taki den ben meki wan fowtu, fu dati ede wi no taigi no wan sma na ini a gemeente. Ma mi skrifi san mi ben musu skrifi na tapu a formulier èn mi seni en go baka na a bijkantoro. Wi wakti nanga ala span. Wan tu dei baka dati wi kisi a piki: „Kon na Londen so taki yu kan leri fa fu du sani”!

Na a Londen bijkantoro, mi no ben man bribi taki ala di mi ben abi 23 yari, mi ben de drape nanga den bun brada di mi ben si leki soso bigibigi man na yeye fasi. Brada soleki Pryce Hughes, Emlyn Wynes, Ernie Beavor, Ernie Guiver, Bob Gough, Glynn Parr, Stan nanga Martin Woodburn, èn furu trawan. Furu fu den brada disi dede kaba now. Na ini den yari di ben de na mindri 1940 nanga 1960 den brada disi wroko fayafaya èn den ben de getrow. Den ben de wan bun eksempre gi den brada nanga sisa na ini a ten disi.

Kringwroko na ini Ingrisikondre—Noiti No Soi

Wi bigin du kringwroko na ini a winter fu 1954/1955 na a ten di furu snew ben e fadon. Wi ben musu wroko na ini a kontren fu East Anglia, wan pisi fu Ingrisikondre di no abi bergi èn pe den kowru winti fu a Noord Se e wai. Na a ten dati, 31.000 Kotoigi ben de nomo na ini Ingrisikondre. A fosi kring dati ben de wan tranga ondrofeni gi wi; èn a no ben makriki ala ten tu gi den brada di wi ben go fisiti. Fu di mi no ben abi ondrofeni èn fu di mi ben de wan sma fu Yorkshire, dan mi ben de priti-panyi neleki den tra sma fu a kontren dati. Disi ben meki taki mi ben afrontu sma son leisi. Na ini den yari baka dati, mi leri taki switifasi de moro prenspari leki fu wani nomo taki ala sani e waka soleki fa a musu. Mi leri so srefi taki libisma prenspari moro leki fu hori yusrefi na markitiki di skrifi. Ala di mi no abi bun bakapisi ala ten, toku mi e tan du muiti fu gi trawan deki-ati soleki fa Yesus ben du dati.—Mateus 11:28-30.

Baka di wi ben de 18 mun na ini East Anglia, dan wi kisi a wroko fu go dini na ini wan kring na a noord-owstu sei fu Ingrisikondre, na den presi Newcastle upon Tyne nanga Northumberland. Mi ben lobi den bun-ati sma fu a moi kontren dati. A distriktopziener, Don Ward, fu a foto Seattle di de na ini a distrikt Washington na Amerkankondre, ben de wan bigi yepi gi mi na a ten di a ben de na  ini Ingrisikondre. A ben de wán fu den sma di ben klari a di fu 20 klas fu a Gileadskoro. Mi ben gwenti fu taki tumusi esi te mi ben e hori lezing. A leri mi fu taki moro safri, fu stop wan pisi ten, èn fu gi sma leri.

Wi Libi Kenki fu Di Ete wan Tra Sani Pasa Di Wi No Ben Fruwakti

Na ini 1958 wi kisi wan brifi di kenki wi libi. Wi kisi kari fu go na a Gileadskoro na ini a foto South Lansing, na ini New York, na Amerkankondre. Wi seri a pikin Austin Seven oto di wi ben abi èn wi bai a ticket fu wi fu go na New York nanga sipi. Wi go fosi na wan internationaal kongres fu Yehovah Kotoigi na ini New York City. Di wi gowe libi drape dan wi go na a foto Petersborough na ini a distrikt Ontario, èn drape wi pionier siksi mun langa bifo wi go na a Gileadskoro di ben de na Amerkankondre.

Albert Schroeder di now de wan memre fu a Tiri Skin, ben de wán fu den leriman na a skoro, makandra nanga Maxwell Friend nanga Jack Redford di dede now. Wi kisi deki-ati fu di wi ben abi demakandra nanga den 82 studenti di ben de fu 14 difrenti kondre. Wi bigin frustan a kulturu fu makandra pikinso. Fu di wi ben abi demakandra nanga den studenti fu tra kondre di ben abi muiti nanga Ingrisitongo, dan wi ben man si sortu problema wi ben o kisi te wisrefi ben o leri wan tra tongo. Wi klari a skoro na ini feifi mun èn den studenti ben musu go na 27 kondre. Ne wi kisi wi toewijzing, èn baka wan tu dei nomo wi ben de na ini New York City, pe wi wakti a boto Queen Elizabeth, di ben o tyari wi go baka na Europa.

A Fosi Toewijzing fu Wi na wan Doroseikondre

Sortu toewijzing wi ben kisi? Potogisikondre! Wi doro na ini a foto Lissabon na ini november 1959. Now wi ben musu fiti wisrefi na wan nyun tongo èn na wan nyun kulturu. Na ini 1959 Potogisikondre ben abi 643 Kotoigi di ben e teki prati na a preikiwroko èn pikinmoro 9 milyun sma ben e libi na ini a kondre. Ma lanti drape no ben erken a preikiwroko fu wi. Ala di wi ben abi Kownukondre zaal, noti ben skrifi na dorosei fu den zaal fu sori taki wi ben e hori konmakandra drape.

Baka di wan zendeling Elsa Piccone leri mi nanga Hazel fu taki Potogisi, dan wi go luku den gemeente nanga den grupu di ben de na a lanki fu den foto Lissabon, Faro, Evora, nanga Beja. Ne na ini 1961, sani bigin kenki. Mi ben e studeri Bijbel nanga wan yonkuman di nen João Gonçalves Mateus. A teki wan bosroiti fu no go du srudati wroko, fu di leki wan Kresten a no ben wani teki partèi na ini feti. Wan syatu pisi ten baka dati mi ben kisi kari fu go na skowtu-oso fu piki wan tu aksi. Drape ete wan sani pasa di wi no ben fruwakti! Wan tu dei baka dati wi kisi fu yere taki wi ben musu gowe libi a kondre baka 30 dei! A srefi sani disi pasa nanga Eric nanga Christina Britten èn nanga Domenick nanga Elsa Piccone.

Mi aksi den skowtu efu mi ben kan taki nanga den fu sori den ala tu sei fu a tori, èn wi kisi okasi fu go na a edeman fu den sikrit skowtu. A taigi wi krinkrin èn nanga wan krakti sten, fu san ede den ben wani taki wi gowe libi a kondre èn a kari a nen fu João Gonçalves Mateus, mi bijbelstudenti! A sikrit skowtu taigi mi taki tra fasi leki Ingrisikondre, Potogisikondre no ben kan gi sma primisi fu no tron srudati soso fu di den sma disi ben e hori densrefi na spesrutu gronprakseri. Fu dati ede wi ben musu gowe libi Potogisikondre, èn mi no yere noti moro fu João. Ne, 26 yari baka dati, mi prisiri srefisrefi fu si en makandra nanga en wefi nanga en dri umapikin na a inwijding fu a nyun Bethel fu  Potogisikondre! A diniwroko fu wi na ini Potogisikondre no ben de fu soso!—1 Korentesma 3:6-9.

Sortu toewijzing wi kisi baka dati? Ete wan sani pasa di wi no ben fruwakti! Wi ben musu go na Spanyorokondre di ben de krosibei fu Potogisikondre. Nanga watra-ai, wi teki loko na ini Lissabon na ini februari 1962, èn wi go na Madrid.

Wi E Fiti Wisrefi na wan Tra Kulturu

Na ini Spanyorokondre wi ben musu leri fu preiki èn fu hori konmakandra na wan kibri fasi. Te wi ben e preiki dan noiti wi ben e go na a oso di ben de na sei a wán di wi ben fisiti fosi. Baka di wi ben gi kotoigi na wan oso, dan wi ben gwenti fu go na wan tra strati, na wan tra gebow. A sani dati no ben e meki en makriki gi skowtu noso den priester fu kisi wi. Yu no musu frigiti taki wi ben libi drape na ini wan ten di wan Fascist Lomsu ogri-ati tiriman ben abi a makti na ini a kondre, èn wi no ben abi primisi fu preiki. Fu di wi ben de sma fu wan tra kondre, dati meki wi teki Spanyoro nen fu sorgu taki tra sma no ben o kon sabi suma na wi. Mi ben kisi a nen Pablo, èn Hazel ben kisi a nen Juana.

Baka wan tu mun na ini Madrid, wi kisi a toewijzing fu go du kringwroko na ini a foto Barcelona. Wi fisiti difrenti gemeente na ini a foto, èn furutron wi ben e tan tu noso dri wiki na ini wán gemeente. Wi ben e tan so langa fu di wi ben musu go na iniwan fu den bukustudie grupu neleki den ben de wan gemeente, èn furutron dati ben wani taki dati wi ben musu go na tu grupu na ini wán wiki.

Wan Tyalensi Di Wi No Ben Fruwakti

Na ini 1963 wi kisi kari fu bigin nanga a distriktwroko na ini Spanyorokondre. Fu ben man dini den pikinmoro 3000 Kotoigi di ben e teki prati na a preikiwroko, dan wi ben musu reis go na ala sei fu a kondre fu go na den neigi kring di ben de na a ten dati. Wi hori kringkonmakandra na wan kibri fasi na ini wan busi krosibei fu a foto Seville, na ini wan burugron krosibei fu a foto Gijon, èn na a lanki fu den liba di ben de krosibei fu Madrid, Barcelona, nanga Logroño. Noiti wi sa frigiti den kringkonmakandra dati.

Fu sorgu taki ala sani ben waka bun te wi ben de na ini a preikiwroko, dan mi ben gwenti fu luku a gebiedkarta fu si fa wi ben o man lon gowe na ini den strati di ben de krosibei, efu wan sani ben o pasa di ben kan tyari wi na ini problema. Wan leisi di mi nanga wan tra Kotoigi ben e preiki na ini Madrid na a tapusei pisi fu wan gebow, dan wantronso wi yere sma e bari na gron. Di wi doro na gron, wan grupu fu tini meisje ben de drape. Den ben de memre fu wan Lomsu grupu di nen Hijas de María (Umapikin fu Maria). Den ben e warskow den birtisma fu no taki nanga wi. Wi no ben man kisi den fu arki wi, èn wi ben sabi taki wi ben musu fu gowe wantewante noso skowtu ben o hori wi. So bun, wi lon gowe, èn heri esi tu!

Den yari dati ben prisiri srefisrefi fu de na ini Spanyorokondre. Wi ben e pruberi fu gi den brada nanga sisa èn so srefi den spesrutu pionier drape deki-ati. Den no ben e frede fu preiki, ala di den ben kan go na strafu-oso gi dati, èn furutron problema no ben tapu den fu preiki a bun nyunsu fu Gado en Kownukondre, fu seti gemeente èn fu gi den brada nanga sisa deki-ati.

Na a pisi ten disi wi kisi wan takru nyunsu fu yere so srefi. Hazel e fruklari: „Na ini 1964 mi mama, wan getrow Kotoigi, dede. A ben de wan bigi sari fu lasi en sondro taki wi ben man taki en odi. Dati na wán fu den sani di e kon nanga a zendelingwroko èn furu tra zendeling ondrofeni disi tu.”

Fri Te fu Kaba

Baka di wi kisi frufolgu omeni yari langa, dan a tirimakti fu Franco erken a wroko fu wi te fu kaba na ini yuli 1970. Mi nanga Hazel ben prisiri di wan nyun Kownukondre zaal ben opo, a fosi wan na ini Madrid èn a di fu tu na ini Lesseps na ini Barcelona. Ala ten den bord fu den Kownukondre zaal disi ben  skrifi nanga bigi letter, èn furutron leti ben e skèin na tapu den letter disi. Wi ben wani taki den sma ben musu sabi taki lanti ben erken wi èn taki wi ben o tan na ini Spanyorokondre! Na a ten disi, na ini 1972, a nomru fu Kotoigi na ini Spanyorokondre ben doro pikinmoro 17.000.

Na a ten disi mi kisi wan tumusi moi nyunsu fu Ingrisikondre. Mi papa ben kon luku wi na ini Spanyorokondre na ini 1969. A fasi fa den Spanyoro Kotoigi ben handri nanga en ben naki en ati sote, taki di a drai go baka na Ingrisikondre, a bigin studeri Bijbel. Ne na ini 1971, mi kisi fu yere taki mi papa ben teki dopu! A ben de wan moi momenti di mi go na en oso, èn leki mi Kresten brada, a aksi Gado blesi gi nyanyan di ben de na tapu tafra. Mi ben wakti a dei disi moro leki 20 yari langa. Mi brada Bob nanga en wefi, Iris, ben tron Kotoigi na ini 1958. A manpikin fu den, Phillip, e dini now leki wan kringopziener na ini Spanyorokondre makandra nanga en wefi, Jean. Wi breiti sote taki den e preiki na ini a moi kondre dati.

Wan Sani Di Pasa No So Langa Ete ala di Wi No Ben Fruwakti Dati

Na ini februari 1980, wan memre fu a Tiri Skin kon na Spanyorokondre leki zone opziener. A aksi mi fu wroko nanga en na ini a preikiwroko, wan sani di mi no ben fruwakti. Mi no ben sabi srefisrefi taki a ben kon fu luku suma na mi! Ne na ini september, wi kisi kari fu froisi go tan na a edekantoro fu Yehovah Kotoigi na ini Brooklyn, New York! Wi no ben man bribi dati! Wi bosroiti fu go, ala di a ben hati wi fu libi den Spanyoro brada fu wi na baka. Na a ten dati 48.000 Kotoigi ben de na ini a kondre.

Di wi ben de fu gowe, dan wan brada gi mi wan saka-oloisi leki presenti. Tu tekst ben skrifi na tapu na oloisi, „Lukas 16:10; Lukas 17:10”. A brada ben taki dati den tekst disi na tekst di mi ben lobi gebroiki. Lukas 16:10 e poti krakti na tapu taki wi musu de getrow na ini pikin sani; èn Lukas 17:10 e taki dati wi na „soso-srafu” èn fu dati ede wi no abi nowan reide fu meki bigi. Ala ten mi ben sabi taki awansi san wi e du na ini a diniwroko fu Yehovah, na a plekti nomo di wi abi leki Kresten di gi densrefi abra.

Wan Sani Di Mi No Ben Fruwakti Pasa Nanga Mi Gosontu

Na ini 1990, mi bigin kisi problema nanga mi ati. Te fu kaba datra ben musu poti wan peipi na ini wan brudutitei fu mi fu di a ben tapu. Na ini a muilek pisi ten disi di mi skin ben swaki, Hazel yepi mi na furu fasi, èn furu tron a tyari den tas nanga den kofru di mi no ben man tyari, fu di mi ben swaki tumusi. Ne na ini mei 2000, datra poti wan pacemaker (wan apparaat di e yepi na ati fu naki moro bun) na ini mi skin. A sani dati trutru yepi mi fu firi moro bun!

Na ini den 50 yari di pasa, mi nanga Hazel si taki Yehovah en anu no syatu èn taki den prakseri fu en e kisi wan kontru te ensrefi wani dati, èn no te wi wani dati (Yesaya 59:1; Habakuk 2:3). So furu prisiri sani di wi no ben fruwakti, pasa na ini wi libi èn wan tu sari sani pasa tu, ma Yehovah horibaka gi wi na ini ala den situwâsi dati. Dyaso na a edekantoro fu Yehovah en pipel di e tiri a wroko na heri grontapu, wi e kisi blesi ala dei fu di wi abi kontakti nanga den memre fu a Tiri Skin. Son leisi mi e aksi misrefi, ’Wi de dyaso trutru?’ A de a no frudini bun-ati fu Gado (2 Korentesma 12:9). Wi e frutrow na tapu taki Yehovah sa tan kibri wi fu Satan en trikifasi èn taki a sa horibaka gi wi so taki wi kan nyan bun fu a dei di en regtfardiki tirimakti sa tiri na grontapu.—Efeisesma 6:11-18; Openbaring 21:1-4.

[Prenki na tapu bladzijde 26]

Strangeways Prison na ini a foto Manchester, pe mi bigin koti strafu

[Prenki na tapu bladzijde 27]

Mi nanga Hazel makandra nanga wi Austin Seven oto na ini a kringwroko na Ingrisikondre

[Prenki na tapu bladzijde 28]

Wan konmakandra di ben hori na wan kibri fasi, na ini Cercedilla di de na ini a foto Madrid na Spanyorokondre, na ini 1962

[Prenki na tapu bladzijde 29]

Wi e sidon na a tafra fu wi nanga Bijbel publikâsi na ini Brooklyn