Yu Kan Bribi Trutru na ini Gado

Di Sara Jayne ben abi 19 yari, dan a kon sabi taki a ben abi kanker na en eksi-saka. Baka di a du oparâsi, a ben firi bun èn a ben fruwakti taki sani ben o waka bun na ini a ten di ben de na en fesi. Fu taki en leti, a ben abi so wan bun fruwakti, taki di a ben abi 20 yari, a meki mofo fu trow èn a bigin meki plan gi a trowfesa fu en. A srefi yari dati a kanker kon baka, èn Sara Jayne kisi fu yere taki a ben abi wan tu wiki nomo fu libi. Na ini yuni 2000, Sara Jayne dede, syatu bifo a ben tapu 21 yari.

A BEN naki na ati fu fisitiman di ben go luku Sara Jayne na ati-oso, fu si fa a ben e taki nanga wan korostu firi fu a ten di ben de na en fesi èn fa a ben abi wan dipi bribi na ini Gado nanga en Wortu, Bijbel. Ala di wan kefalek sari sani ben o pasa nanga en, toku a ben de seiker fu na opobaka howpu. A ben de seiker taki a ben o si ala den mati fu en baka (Yohanes 5:28, 29). „Mi sa si unu alamala na ini a nyun grontapu fu Gado”, a ben taki.

Son sma e feni taki a sortu bribi disi na wan winsi nomo. Ludovic Kennedy e taki: „Libi baka te wi dede, na noti moro leki wan sani di sma di no abi seikerfasi e bribi. Den sortu sma disi e bribi taki te a trompeti meki a lasti babari, dan den sa kisi kuku nanga biri, srefi kaviaar (wan tumusi diri sortu nyanyan sani), èn trompeti sa meki babari gi den so srefi. Den e bribi tu taki, na ini Eden di lai nanga bon, den sa abi switi demakandra nanga den sma di dede bifo den èn nanga den sma di sa kon baka te den dede.” Wi musu fu poti wan aksi fu sori taki wi no e agri nanga den wortu disi. San moro bun — fu bribi taki „a libi disi na ala san wi abi, so bun, wi musu du ala san wi man nownow”, soleki fa Kennedy e gi  leki rai, noso a moro bun fu bribi na ini Gado èn na ini a pramisi fu wan opobaka? Sara Jayne ben bribi na ini Gado èn na ini a pramisi fu wan opobaka. Fa a ben kisi so wan bribi?

„Suku Gado . . . èn Trutru Feni En”

Fu kan kisi moro bribi nanga frutrow na ini wan sma, dan yu musu sabi a sma dati èn yu musu leri fa a e denki èn handri. Wi musu gebroiki wi ati nanga frustan te wi e leri sabi wan sma. Yu musu du dati tu te yu wani kisi trutru bribi na ini Gado. Yu musu leri sabi en, yu musu kon sabi den eigifasi fu en èn so srefi a fasi fa a de, yu musu kon sabi taki a hori ensrefi na ala sani di a taki èn du.—Psalm 9:10; 145:1-21.

Son sma e feni taki libisma no kan leri sabi Gado. Gado, na so den e taki, no e broko en ede srefisrefi nanga wi, a dangra tumusi — dati na efu wan Gado de trutru. „Efu Gado de trutru, neleki fa a sori fu de gi Kresten soleki Sara Jayne”, na so a tweifriman e aksi, „dan fu san ede a no e meki den tra sma leki wi kon sabi en?” Ma a tru taki Gado no e broko en ede srefisrefi nanga wi èn taki a dangra tumusi? Di na apostel Paulus ben e taki nanga den filosofiaman nanga den sabiman na ini Ateine, dan a taki dati „a Gado di meki grontapu nanga ala sani na ini” sorgu so srefi gi ala sani di de fanowdu fu sma e „suku [en] . . . èn trutru feni en.” Fu taki en leti, Paulus ben taki: „A no de fara fu ibriwan fu wi.”—Tori fu den Apostel 17:24-27.

Ma fa wi kan „suku Gado . . . èn trutru feni en”, dan? Son sma du disi fu di den e luku na universum na den lontu nomo. Gi furu sma, a sani dati wawan e gi nofo buweisi fu overtoigi den taki wan Mekiman musu fu de * (Psalm 19:1; Yesaya 40:26; Tori fu den Apostel 14:16, 17). Neleki na apostel Paulus, den feni taki „den eigifasi fu [Gado] de krin fu si sensi di grontapu meki, bika den de fu si na ini den sani di a meki, iya, en têgo krakti nanga en makti leki Gado, so taki den no man regtfardiki densrefi”.—Romesma 1:20; Psalm 104:24.

Yu Abi Bijbel Fanowdu

Ma fu man kisi trutru bribi na ini a Mekiman, dan yu abi wan tra sani fanowdu di a gi wi. San na dati? Bijbel — a Wortu fu Gado di skrifi nanga yepi fu en santa yeye. Na ini a buku disi a e tyari a wani èn a prakseri fu en kon na krin (2 Timoteus 3:16, 17). „Ma wakti”, son sma kande sa taki, „fa yu kan bribi iniwan sani di Bijbel e taki te yu e si den takru sani di sma e du, ala di den sma disi e taki dati den e hori densrefi na Bijbel?” A tru taki Krestenhèit du bun furu takru sani di abi fu du nanga hoigrifasi, ogri-ati fasi, èn so srefi hurudu. Ma iniwan sma di e gebroiki en frustan kan si taki Krestenhèit e du nomo leki a e hori ensrefi na den Bijbel gronprakseri.—Mateus 15:8.

Bijbel srefi e warskow taki furu sma ben o taki dati den e anbegi Gado, ma toku, fu taki en leti, ’den e sori taki den no wani sabi srefi na eiginari di bai den’. „Na fu den sani disi ede”, na so na apostel Petrus ben taki, „sma no sa taki bun fu a pasi fu waarheid” (2 Petrus 2:1, 2). Yesus Krestes ben taki dati den sma disi na „wrokoman fu kruktudu” di sma ben o kon sabi krinkrin nanga yepi fu den takru sani di den e du (Mateus 7:15-23). Te wi e poti a Wortu fu Gado na wan sei fu den sani ede di Krestenhèit du, dan dati na a srefi leki te wi e fringi wan brifi gowe di wi kisi fu wan trutru mati, soso fu di a sma di tyari a brifi kon abi wan takru nen.

Sondro Gado Wortu wi no sa man kweki trutru bribi. Soso na ini Bijbel wi kan leisi fa Yehovah srefi e denki fu sani, fu taki en so. A buku disi e gi piki na tapu prenspari aksi soleki fu san ede a gi pasi na pina nanga sari èn san a sa du fu kenki a situwâsi disi (Psalm 119:105; Romesma 15:4). Sara Jayne kon bribi taki Bijbel na a Wortu fu Gado di skrifi nanga yepi fu en santa yeye (1 Tesalonikasma 2:13; 2 Petrus 1:19-21). Fa so? A no du dati nomo fu di en papa nanga en mama ben taigi en dati, ma fu di a teki ten fu ondrosuku na wan opregtifasi ala den buweisi di e sori taki Bijbel e tyari kon na krin na wan aparti fasi fa Gado e denki (Romesma 12:2). A kon si, fu gi wan eksempre, a bigi krakti di Bijbel abi na tapu a libi fu den sma di e hori densrefi na en gronprakseri. Nanga yepi fu den publikâsi soleki De bijbel — Gods woord of dat van mensen? *, a ben ondrosuku finifini so srefi den someni buweisi na ini di e sori taki Bijbel skrifi nanga yepi fu a santa yeye fu Gado.

 „Bribi E Kon Baka Di Sma Yere Sani”

Ma a no sari wawan fu abi wan Bijbel noso fu bribi nomo taki a skrifi nanga yepi fu Gado en santa yeye. „Bribi”, na so na apostel Paulus e skrifi, „e kon baka di sma yere sani” (Romesma 10:17). A no a abi di wi abi wan Bijbel e meki wi kisi wan moro tranga bribi, ma a yere di wi e yere Bijbel. Yu e „yere” san Gado abi fu taki, fu di yu e leisi èn e studeri a Wortu fu en. Srefi pikin-nengre kan du dati. Paulus e taki dati „fu sensi pikin-nengreten” Timoteus en mama nanga en granmama ben leri en „den santa buku”. A sani disi wani taki dati den ben drai en ede? Kwetikweti! Den no dwengi noso kori Timoteus na no wan enkri fasi. A ben kisi ’na overtoigi fu bribi’ san a ben yere èn san a ben leisi.—2 Timoteus 1:5; 3:14, 15.

Na a srefi fasi Sara Jayne ben kisi na overtoigi. Neleki den Bereasma na ini a fosi yarihondro, a „ben teki a wortu [fu en papa nanga mama èn fu tra leriman] nanga a moro bigi yeye angri”. Di a ben de wan pikin meisje, dan sondro tweifri a ben e frutrow san en papa nanga mama ben e fruteri en sondro fu tweifri. Baka ten, di a ben e gro kon bigi, a no ben e bribi ala sani di sma ben e leri. Ala dei a ben e „ondrosuku den Buku fu Bijbel finifini fu si efu den sani disi ben de so trutru”.—Tori fu den Apostel 17:11.

Yu Kan Kisi Trutru Bribi

Yu tu kan kweki trutru bribi — a sortu bribi di na apostel Paulus e taki fu en na ini a brifi di a skrifi gi den Hebrew Kresten. So wan bribi, na so Paulus ben taki, na „a seiker fruwakti fu sani di wan sma e howpu na tapu, a krin buweisi fu tru sani, ma di sma no e si” (Hebrewsma 11:1). Te yu abi so wan bribi, dan yu sa de seiker srefisrefi taki ala den sani di yu e howpu èn e fruwakti, so srefi Gado en pramisi fu wan opobaka, sa kisi wan kontru. Yu sa abi na overtoigi taki den sortu sani disi tapu san yu e howpu na trutru dyaranti, den no de sani di sma e winsi nomo. Yu sa sabi taki Yehovah ala ten hori ensrefi na den pramisi fu en (Yosua 21:45; 23:14; Yesaya 55:10, 11; Hebrewsma 6:18). A nyun grontapu di Gado pramisi sa de so tru gi yu, neleki a de dyaso kaba (2 Petrus 3:13). Èn yu sa si krinkrin nanga yu eigi ai fu bribi taki Yehovah Gado, Yesus Krestes, nanga a Kownukondre fu Gado na sani di tru, den no de sani di sma e winsi nomo.

Yepi de fu kisi wan moro tranga bribi. Boiti taki Yehovah sorgu taki ala sma kan kon sabi a Wortu fu en, a gi wi so srefi wan Kresten organisâsi na  heri grontapu di e teki en leki wan plekti fu yepi opregtisma fu kisi wan moro tranga bribi na in Gado (Yohanes 17:20; Romesma 10:14, 15). Teki ala yepi di Yehovah e gi wi nanga yepi fu na organisâsi dati (Tori fu den Apostel 8:30, 31). Èn fu di bribi na wan froktu fu Gado en santa yeye, begi doronomo so taki a yeye dati kan yepi yu fu kisi trutru bribi.—Galasiasma 5:22.

No meki tweifriman di e spotu iniwan sma di e bribi na ini Gado nanga en Wortu, tapu yu fu kisi a trutru bribi (1 Korentesma 1:18-21; 2 Petrus 3:3, 4). Fu taki en leti, a de tumusi prenspari fu abi wan tranga bribi efu yu wani kakafutu na wan moro krakti fasi gi den sortu sma disi (Efeisesma 6:16). Sara Jayne ben kon si taki dati tru, èn ala ten te sma ben kon luku en na ati-oso, a ben gi den deki-ati fu kisi wan moro tranga bribi. „Meki a waarheid tron wan pisi fu un libi”, na so a ben gwenti fu taigi den. „Studeri a Wortu fu Gado. Tan skinskin nanga Gado en organisâsi. Begi doronomo. Tan teki prati na a diniwroko fu Yehovah.”—Yakobus 2:17, 26.

Di den ati-oso zuster ben si o tranga a bribi fu en ben de na ini Gado, dan wán fu den taki: „Ai, yu e bribi a sani disi trutru.” Di a zuster aksi Sara Jayne san ben meki taki a ben de sondro broko-ede, ala di a abi so furu problema, dan a piki: „Na fu di mi e bribi na ini Yehovah. A de wan trutru mati gi mi, èn mi lobi èn sote.”

[Futuwortu]

[Prenki na tapu bladzijde 6]

„Fu sensi pikin-nengreten” Timoteus en mama nanga en granmama ben leri en „den santa buku”

[Prenki na tapu bladzijde 6]

Den Bereasma ben kisi prèise fu di den ben ondrosuku den Buku fu Bijbel ala dei

[Sma di abi a reti fu a prenki]

Fu „Photo-Drama der Schepping”, 1914

[Prenki na tapu bladzijde 7]

Efu wi wani taki wi bribi e kisi tranga, dan wi no musu abi wan Bijbel wawan, ma wi musu yere èn du so srefi san skrifi na ini

[Prenki na tapu bladzijde 7]

„Mi sa si un alamala na ini a nyun grontapu fu Gado”