A Sroto gi wan Koloku Grontapu

„A SMA di ben abi a moro bigi krakti tapu tra sma — no wawan ini den tu dusun yari di pasa ma ini a heri historia fu a libisma famiri — ben de Yesus fu Nasaret”, na so a tijdschrift Time ben taki. Di Yesus ben de na grontapu, dusundusun opregti sma ben si, no wawan taki a ben de wan prenspari man, ma so srefi taki a ben de wan sma di ben e teki broko-ede nanga tra sma. Dati meki a no e fruwondru wi taki den ben wani fu poti en leki a kownu fu den (Yohanes 6:10, 14, 15). Toku, neleki fa wi ben si kaba ini na artikel na fesi, Yesus no ben wani abi noti fu du nanga politiek.

A PIKI fu Yesus ben abi fu du nanga dri prenspari sani. A fosi sani na a fasi fa en Tata e si a muiti di libisma e meki fu tiri densrefi. Disi abi libisma tirimakti na ini tu. A di fu tu sani na taki Yesus sabi taki tranga krakti de di wi no man si; den krakti disi e gens ala muiti di libisma e du fu tiri na wan bun fasi. Èn a di fu dri sani na taki Gado abi na prakseri fu seti wan hemel tiri fu tiri heri grontapu. Te wi sa go luku den dri penti disi moro fini, dan wi o si fu san ede den muiti di libisma du fu meki grontapu tron wan moro betre presi fu libi, no ben abi bun bakapisi. Wi o si so srefi fa wi sa kisi bun bakapisi.

Libisma Man Tiri Densrefi?

Di Gado meki libisma, a ben gi den makti fu tiri ala den meti fu grontapu (Genesis 1:26). Ma a libisma famiri srefi ben de na ondro a moro hei tirimakti fu Gado. A fosi man nanga uma ben musu sori taki den ben e saka densrefi na ondro Gado. Disi ben o de fu si te den ben o gi yesi na En èn tan farawe fu a froktu fu wán spesrutu bon, „a bon fu sabi bun nanga ogri” (Genesis 2:17). A sari pisi na taki, Adam nanga Efa gebroiki a fri wani fu den na wan fowtu fasi èn den trangayesi Gado. Di den teki a froktu di den no ben mag nyan, dan den no ben fufuru nomo. Den ben opo densrefi krinkrin teige a reti di Gado abi fu tiri. Wan futuwortu fu Genesis 2:17 na ini The New Jerusalem Bible e taki dati Adam nanga Efa ben sori krin taki „den ben teki a reti gi densrefi fu de fri dorodoro fu poti den eigi bun gwenti nanga gronprakseri. Na so fasi libisma  sori taki den e weigri fu erken taki den na soso wan mekisani fu Gado . . . A fosi sondu ben de wan fasi fu feti teige a reti di Gado abi fu tiri.”

Na afersi disi ben abi fu du nanga tumusi prenspari gronprakseri. Den gronprakseri disi abi fu du nanga a fasi fa sma musu tyari densrefi. Fu dati ede Gado gi Adam nanga Efa, nanga den bakapikin fu den pasi fu seti den eigi fasi fu libi. Den ben poti den eigi markitiki fu san bun èn san fowtu (Psalm 147:19, 20; Romesma 2:14). Fu taki en leti, a ben de na a ten dati taki libisma bigin fu pruberi fu tiri densrefi. Den ben abi bun bakapisi? Te wi e luku den dusundusun yari di de na wi baka, dan wi kan taki nôno! Preikiman 8:9 e taki: „A wan libisma tiri a tra libisma nanga ogri bakapisi gi en.” A sari fasi fa sani waka fu di libisma ben tiri densrefi, e sori krin taki san skrifi na Yeremia 10:23, na wan tru tori: „Mi sabi heri bun, o Yehovah, taki a no de na a sma fu grontapu fu a bepaal en pasi. A no de na wan man di e waka srefi fu bepaal pe fu poti en futu na pasi.” A historia sori krin taki libisma no man fu tiri nanga bun bakapisi sondro a Mekiman fu den.

Yesus ben agri dorodoro nanga a tori disi. Srefidensi fu Gado ben de wan tegu sani gi en. „Mi no e du no wan sani sondro fu wan sma taigi mi”, Yesus ben taki. „Ala ten mi e du den sani di e plisi [Gado]” (Yohanes 4:34; 8:28, 29). Fu dati ede, di a no ben kisi a komando fu Gado fu teki kownu tirimakti fu libisma, meki Yesus no ben prakseri srefi fu teki a posisi dati. Toku disi no wani taki dati a no ben wani yepi tra sma. Kontrari fu dati, a ben du ala san a ben man fu yepi sma fu feni a moro bigi prisiri; wan prisiri di den ben kan ondrofeni na ini a ten dati èn na ini a ten di e kon. A ben gi en libi srefi gi a libisma famiri (Mateus 5:3-11; 7:24-27; Yohanes 3:16). Ma Yesus ben sabi taki „gi ala sani wan fasti ten de”, so srefi gi a ten di Gado poti fu sori na wan krakti fasi, taki en na a sma di abi a reti fu tiri libisma (Preikiman 3:1; Mateus 24:14, 21, 22, 36-39). Ma memre taki, na ini a dyari fu Eden den fosi tata fu wi ben saka densrefi na ondro a wani fu wan ogri yeye-mekisani di ben taki nanga yepi fu wan sneki di den ben kan si. Disi e tyari wi kon na a di fu tu reide fu san ede Yesus no ben moksi ensrefi nanga politiek afersi.

A Tiriman fu Grontapu Di Sma No Sabi

Bijbel e fruteri wi taki, Satan ben pristeri Yesus „ala den kownukondre fu grontapu nanga a glori fu den” efu Yesus ben du wán sani nomo fu anbegi en (Mateus 4:8-10). Te yu luku en bun, dan Satan ben pristeri Yesus grontapu tirimakti — ma tapu den kondisi di Didibri ben o poti. Yesus no ben brokokindi gi a tesi disi. Ma a ben de wan tesi gi en trutru, dan? Satan ben man fu pristeri en so wan bigi sani? Iya, bika Yesus srefi ben kari Didibri „a tiriman fu grontapu”, èn na apostel Paulus ben kari en „a gado  fu a seti fu sani disi”.—Yohanes 14:30; 2 Korentesma 4:4; Efeisesma 6:12.

A no de fu taki dati Yesus ben sabi taki Didibri no ben abi a tanbun fu a libisma famiri na prakseri. A ben kari Satan „wan kiriman” èn so srefi „a tata fu den leiman èn fu ala sani di falsi” (Yohanes 8:44, The Amplified Bible). A no de fu taki dati wan grontapu di „didon na ini a makti” fu so wan takru yeye, noiti no kan abi trutru koloku (1 Yohanes 5:19). Ma Didibri no sa abi a makti disi fu ala ten. Heri esi, Yesus, di de wan makti yeye-mekisani now, sa puru Satan na pasi èn a sa puru ala krakti di a abi tapu sma.—Hebrewsma 2:14; Openbaring 20:1-3.

Satan srefi sabi taki en ten leki a tiriman fu gron tapu no langa moro srefisrefi. Dati meki a e du ala san a man fu pori libisma na so wan fasi taki den no man kon bun moro, neleki fa a ben du dati na ini a ten fosi a Frudu fu Noa (Genesis 6:1-5; Yudas 6). „Helu fu grontapu nanga se,” na so Openbaring 12:12 e taki, „bika Didibri saka kon na unu, èn a abi bigi atibron, fu di a sabi taki a abi wan syatu pisi ten nomo.” Den Bijbel profeititori makandra nanga den sani di e pasa na ini grontapu, e sori taki wi e libi krosibei fu a kaba fu a „syatu pisi ten” disi (2 Timoteus 3:1-5). Frulusu de krosibei now.

Wan Tiri Di Sa Tyari Koloku Kon

A di fu dri reide fu san ede Yesus no ben moksi ensrefi nanga politiek, ben de taki a ben sabi taki na wan ten di ben poti na fesi kaba, Gado ben sa seti wan hemel tirimakti di ben sa tiri grontapu. Bijbel e kari a tirimakti disi Gado Kownukondre, èn a ben de a moro prenspari thema fu den leri di Yesus ben e gi sma (Lukas 4:43; Openbaring 11:15). Yesus ben leri den disipel fu en fu begi fu a Kownukondre dati kon, bika soso te a Kownukondre dati o tiri ’a wani fu Gado sa pasa, soleki na hemel, so tu na grontapu’ (Mateus 6:9, 10). Kande yu e aksi yusrefi: ’Efu a Kownukondre disi sa tiri heri grontapu, san sa pasa dan nanga libisma tirimakti?’

A piki de fu feni na ini Danièl 2:44: „Na ini den dei fu den kownu [di e tiri na a kaba fu a disiten seti fu sani] dati, a Gado fu hemel sa opo wan kownukondre di noiti no sa kisi pori. Èn a kownukondre srefi no sa gi na no wan tra pipel. A sa broko ala den [libisma] kownukondre disi na pisipisi èn tyari wan kaba kon na den, èn ensrefi sa tan te ten di no skotu.” Fu san ede meki a Kownukondre fu Gado musu „broko” den grontapu tiri „na pisipisi”? Bika den tirimakti disi e tan tyalensi Gado nanga a prakseri di den abi fu tan tiri densrefi; wan fasi fu denki di Satan ben wani tra sma abi na ini a dyari fu Eden. Boiti taki a denki dati no de gi a tanbun fu libisma, dan den wan di wani tan hori a denki o kisi problema nanga a Mekiman (Psalm 2:6-12; Openbaring 16:14, 16). So bun wi musu aksi wisrefi: ’Wi wani a tiri fu Gado noso wi no wani en?’

Suma Yu Feni Taki Abi a Reti fu Tiri?

Fu yepi sma fu teki wan bosroiti di e sori taki den abi soifri sabi fu na afersi fu tirimakti, dan Yesus ben leri den disipel fu en fu preiki a „bun nyunsu disi fu a kownukondre . . . na heri grontapu pe sma e libi, leki wan kotoigi gi ala nâsi”, bifo a kaba fu a disiten sistema kon (Mateus 24:14). Suma na den sma di trawan sabi na ini a ten disi leki den wan di e preiki fu Gado Kownukondre na heri grontapu? Na den Yehovah Kotoigi. Te yu luku en bun, dan langa ten kaba den wortu, „A E Bariwroko gi Yehovah Kownukondre”, skrifi na tapu a kafti, fesisei fu a tijdschrift disi. Na ini a ten disi so wan siksi milyun Kotoigi na ini moro leki 230 kondre e yepi sma fu kisi soifri sabi fu a Kownukondre dati. *

Blesi gi Den Wan Di Sa Libi na Ondro a Kownukondre Tiri

Ala ten Yesus ben du sani na a fasi fa Gado ben wani. So bun, Yesus no teki wan pasi fu srefidensi èn a no pruberi fu horibaka gi a grontapu seti fu sani, noso fu meki a kon moro bun nanga yepi fu politiek. Na presi fu dati a ben wroko tranga fu  meki den afersi fu a Kownukondre fu Gado go na fesi, bika a Kownukondre na a wan enkri lusu gi den problema fu grontapu. Fu di Yesus ben de loyaal meki Yesus ben kisi a glori kownusturu na ini hemel leki paiman èn a ben tron Kownu fu a Kownukondre dati. Dati na wan tumusi moi pai gi a saka di a ben saka ensrefi na ondro Gado!—Danièl 7:13, 14.

Na ini a ten disi milyunmilyun sma de di e waka baka Yesus, fu di den e poti a Kownukondre fu Gado fosi ini den libi èn fu di den e saka densrefi fu du a wani fu Gado. Leki bakapisi fu dati den so srefi sa nyan bun fu wan tumusi moi presenti — a grani fu de borgu na grontapu fu a Kownukondre fu Gado (Mateus 6:33). Na ondro a lobi tiri fu a Kownukondre, den sma disi sa gro go miti libisma volmaakti fasi, nanga a howpu fu libi fu têgo (Openbaring 21:3, 4). Soleki fa 1 Yohanes 2:17 e taki: „Grontapu e pasa gowe èn so srefi a lostu fu en, ma a sma di e du a wani fu Gado, e tan fu têgo.” Te Satan nanga den bakaman fu en komoto na pasi kaba èn heri grontapu tron wan paradijs di fri fu kruka, falsi kerki èn fu pratifasi di e kon fu di sma lobi a kondre fu den pasamarki, dan trutru a sa de wan bigi prisiri fu tan libi fu têgo dyaso na grontapu!—Psalm 37:29; 72:16.

Iya, Gado Kownukondre na a trutru sroto gi wan tumusi koloku grontapu, èn nanga reti den e kari a boskopu di abi fu du nanga dati, bun nyunsu. Efu yu no ben du dati ete, dan fu san ede yu no ben sa arki a bun nyunsu wan tra leisi te Yehovah Kotoigi tyari en kon na yu oso?

[Futuwortu]

[Prenki na tapu bladzijde 5]

A historia e sori krin taki sondro Gado, libisma no man tiri nanga bun bakapisi

[Prenki na tapu bladzijde 5]

Fu di Satan e tiri a disiten „seti fu sani”, meki a ben kan pristeri Yesus „ala den kownukondre fu grontapu”

[Prenki na tapu bladzijde 7]

Yesus ben e leri sma taki na ondro a Kownukondre seti fu Gado, grontapu sa de wan tumusi switi presi fu libi