Aksi fu Leisiman

Efu 1 Kownu 8:8 e taki dati den sma na ini a Santapresi ben man si den postu di den ben gebroiki fu tyari na ark fu a frubontu, dan fa den postu ben seti?

Di Yehovah sori Moses na ini a gran sabana fa a ben musu meki a tabernakel, dan wan prenspari pisi fu dati ben de na ark fu a frubontu. A kisi disi ben abi tu langa sei nanga tu bradi sei èn a skin fu en ben tapu nanga gowtu. Den ston pe a Wet ben skrifi na tapu èn tra sani so srefi, ben de na ini. Den ben poti en na ini a moro inisei pisi, a Moro Santapresi. Na tapu a tapun fu na Ark, tu gowtu kerubim popki ben de di ben langa den frei fu den go na fesi. Na ala tu sei fu na Ark tu linga ben de, so taki den ben kan tyari en nanga tu postu. Den ben meki den postu dati fu akasia udu èn den ben tapu a skin fu den nanga gowtu. A no de fu taki dati den ben pusu den postu go na ini den linga, langalanga na seisei fu na Ark. Den ben poti na Ark na ini a Moro Santapresi fu a tabernakel èn dati ben sori go na owstusei. So bun, den postu ben e sori go na a noord-zuidsei. Na so den ben poti na Ark tu di a ben de na ini a tempel di Salomo ben bow.—Exodus 25:10-22; 37:4-9; 40:17-21. *

Wan garden ben prati a Moro Santapresi fu a Santapresi (a dorosei pisi). Den priester na ini a Santapresi no ben man go na ini a Moro Santapresi fu luku na Ark pe Gado ben sori ensrefi (Hebrewsma 9:1-7). So bun, 1 Kownu 8:8 ben sa kan gersi wan dangra tori, fu di a tekst e taki: „Den postu ben langa, so taki den sma na ini a Santapresi fesisei fu a moro inisei pisi, ben man si den mofo fu den postu, ma den sma na dorosei no ben man si den.” A srefi sani disi skrifi na ini 2 Kroniki 5:9. Fa iniwan sma na ini a Santapresi fu a tempel ben man si den postu?

Wan tu sma prakseri taki den postu ben kisi a garden, so taki sma ben man si den kundu na a garden. Ma dati no kan, bika efu den postu ben sori go na a noord-zuidsei, dan a garden ben anga langalanga sei den postu (Numeri 3:38). Wan moro bun fruklari de di kan meki wi frustan a tori disi. Den postu ben sa man de fu si efu wan olo ben de na mindri a garden nanga a skotu fu a tempel, noso efu a granpriester ben musu go na ini a Moro Santapresi. Sma no ben man si notinoti fu na Ark fu di a garden ben anga leti na fesi, ma kande den mofo fu den postu ben de fu si fu di sma ben man luku pasa na olo. Ala di a fruklari disi ben sa kan de wan bun fruklari, toku wi no kan si disi leki a wan-enkri fasi nomo fu luku a tori.

A de krin taki wi kan kon sabi furu sani ete. Na apostel Paulus ben kari wan tu sani fu a tabernakel na ini a brifi di a ben skrifi gi den Hebrewsma. Baka dati a ben taki: „Now a no a ten fu taki finifini fu ibri sani di abi fu du nanga den sani disi” (Hebrewsma 9:5). Na opobaka di den getrow sma o kisi na ini a ten di e kon, sa gi wi na okasi fu kon sabi den sani disi fu man soleki Moses, Aron, Besaleèl, èn trawan di ben sabi fa a tabernakel ben meki èn fa a ben e wroko.—Exodus 36:1.

[Futuwortu]