Kisi wan Ati Di Yehovah Feni Bun
Kisi wan Ati Di Yehovah Feni Bun
„Meki na ini mi, srefi wan soifri ati, o Gado, èn poti na ini mi wan nyun yeye, wan di de stanfaste.”—PSALM 51:10.
1, 2. Fu san ede wi musu kon sabi sortu ati wi abi?
A BEN de wan langa man èn a ben moi. Di a profeiti Samuèl ben si en, a ben de tevrede srefisrefi. A ben prakseri taki a moro bigi manpikin disi fu Isai ben de a sma di Gado ben teki fu tron kownu baka Saul. Ma Yehovah ben taki: „No luku a fesi fu [a manpikin dati] noso a langa di a langa, bika mi no teki en. . . . Libisma e si san na ai e si nomo; ma fu a sei fu Yehovah, a e si fa na ati de.” A ben kon na krin taki Yehovah ben teki David, a moro yongu manpikin fu Isai. David ben de ’wan man di ben plisi na ati fu [Yehovah]”.—1 Samuèl 13:14; 16:7.
2 Gado kan sabi san de na ini na ati fu libisma, soleki fa a ben tyari dati kon na krin baka ten: „Mi, Yehovah, e ondrosuku na ati, e ondrosuku den niri, srefi fu gi ibriwan sma akruderi den pasi fu en, akruderi a bakapisi fu den sani di a e du” (Yeremia 17:10). Iya, „Yehovah na a sma di e ondrosuku den ati” (Odo 17:3). Ma san na a ati na ini wan sma di Yehovah e ondrosuku? Èn san wi kan du fu kisi wan ati di e plisi en?
„A Fasi fa wan Sma De Trutru na ini En Ati”
3, 4. Na sortu fasi a wortu „ati” gebroiki moro furu na ini Bijbel? Gi wan tu eksempre.
3 A wortu „ati” skrifi pikinmoro wán dusun tron na ini den Santa Buku fu Bijbel. Furutron a wortu disi gebroiki na wan agersi fasi. Fu gi wan eksempre, Yehovah ben taigi a profeiti Moses: „Taigi den manpikin fu Israèl, so taki den e tyari wan bijdrage kon gi mi. Fu ibri sma di en ati e naki en fu du dati, un pipel musu tyari wan bijdrage kon gi mi.” Èn den sma di ben gi bijdrage „ben kon, ibriwan sma di en ati ben naki en fu du so” (Exodus 25:2, 35:21). A de krin, taki wan eigifasi fu na agersi ati, na taki a e gi wi deki-ati fu du wan spesrutu sani — a krakti na ini wi di e pusu wi fu handri. Na agersi ati fu wi e sori so srefi sortu firi wi abi, sortu sani wi wani, èn so srefi sortu sani wi lobi. Wan ati kan firi bigi atibron noso a kan frede srefisrefi, a kan firi bigi sari noso a kan firi bigi prisiri (Psalm 27:3; 39:3; Yohanes 16:22; Romesma 9:2). A kan abi bigifasi noso sakafasi, a kan abi lobi-atifasi noso bita-atifasi.—Odo 16:5; Mateus 11:29; 1 Petrus 1:22.
4 Fu dati ede, na „ati” furutron abi fu du nanga a krakti di e pusu sma fu handri èn so srefi nanga den fasi fa sma e firi. Na a tra sei, „frustan” abi fu du spesrutu nanga den prakseri fu sma. Na so wi musu frustan den wortu disi te den de na ini a srefi kontekst na ini den Buku fu Bijbel (Mateus 22:37; Filipisma 4:7). Ma son leisi na ati èn a frustan wani taki a srefi sani. Fu gi wan eksempre, Moses ben gi den Israèlsma leki deki-ati: „Yu musu kari kon baka na ini yu ati, [noso, „yu musu pruberi fu prakseri”, futuwortu] taki Yehovah na a tru Gado” (Deuteronomium 4:39). Yesus ben taigi den leriman fu Wet di ben e wroko makandra fu gens en: „Fu san ede unu e prakseri ogri-ati sani na ini un ati?” (Mateus 9:4). „Frustan”, „sabi”, nanga „rideneri” kan abi fu du nanga na ati so srefi (1 Kownu 3:12; Odo 15:14; Markus 2:6). Fu dati ede, na agersi ati kan abi fu du so srefi nanga wi frustan noso den prakseri fu wi.
5. San na agersi ati e prenki?
5 Soleki fa wan buku e taki, dan na agersi ati e prenki „a moro prenspari pisi fu wan sma, den firi noso den prakseri fu wan sma. So bun, na agersi ati wani taki na inisei fu wan sma, soleki fa dati e kon de fu si na ini den difrenti sani di a sma dati e du, den sani di a wani, den sani di a lobi, den firi fu en, den lostu fu en, den marki di a abi, den sani di a e si, den sani di a e prakseri, a koni fu en, a sabi fu en, den sani di a e bribi èn a fasi fa a e rideneri, den sani di a e memre èn den sani di a sabi”. A e sori suma wi de trutru, „a fasi fa wan sma de trutru na ini en ati” (1 Petrus 3:4). Dati na san Yehovah e si èn e ondrosuku. Fu dati ede, David ben kan begi: „Meki na ini mi, srefi wan soifri ati, o Gado, èn poti na ini mi wan nyun yeye, wan di de stanfaste” (Psalm 51:10). Fa wi kan kisi wan soifri ati?
’Kibri Ala den Wortu fu Gado na ini Yu Ati’
6. Sortu frumane Moses ben gi a nâsi Israèl di den ben seti kampu na tapu den Opo Presi fu Moab?
6 Syatu bifo den manpikin fu Israèl ben o go na ini a Pramisi Kondre, dan den ben kon makandra na tapu den Opo Presi fu Moab. Moses ben frumane den èn a ben taki: „Kibri ala den wortu di mi e taigi unu leki wan warskow tide, na ini un ati, so taki unu kan komanderi den manpikin fu unu fu sorgu taki den du ala den wortu fu a wet disi” (Deuteronomium 32:46). Den Israèlsma ben musu poti bun prakseri na den wortu. Soso te den ben sabi den komando fu Gado heri bun, dan den ben kan poti den go dipi na ini den bakapikin fu den.—Deuteronomium 6:6-8.
7. San a wani taki fu ’kibri a Wortu fu Gado na ini wi ati’?
7 Fu man kisi wan soifri ati, a de tumusi prenspari fu kisi soifri sabi fu a wani fu Gado èn fu den prakseri fu en. A sabi disi de fu feni soso na ini a Wortu fu Gado di skrifi na ondro a krakti fu a santa yeye (2 Timoteus 3:16, 17). Ma sabi wawan, no sa yepi wi fu kisi wan ati di Yehovah feni bun. Efu wi wani taki sabi abi krakti na tapu a sma di wi de trutru, dan wi musu ’kibri den sani di wi e leri na ini wi ati’, noso wi musu „teki ala den wortu” na ini wi ati (Deuteronomium 32:46, Da Bijbel na ini Sranantongo. Fa wi musu du dati? A psalm skrifiman David e fruklari: „Mi memre den dei fu granwe; mi prakseri dipi fu ala den sani di yu e du; nanga prisiri mi ben prakseri furu fu a wroko fu yu eigi anu.”—Psalm 143:5.
8. Sortu sani wi kan aksi wisrefi te wi e studeri?
8 Wi tu musu abi bigi warderi te wi e denki dipi fu den sani di Yehovah e du. Te wi e leisi Bijbel noso Bijbel publikâsi, dan wi musu poti prakseri na aksi soleki: „San disi e leri mi fu Yehovah? Sortu eigifasi fu Yehovah mi e si dyaso? San a tori disi e fruteri mi fu den sani di Yehovah lobi èn den sani di a no lobi? San na den bakapisi te mi e waka wan pasi di Yehovah lobi èn san na den bakapisi te mi e waka wan pasi di a no lobi srefisrefi? San den tori disi abi fu du nanga den sani di mi sabi kaba?’
9. O prenspari a de fu studeri èn fu denki dipi fu den sani di wi e leri?
9 Lisa * di abi dritenti na tu yari e fruklari fa a du kon taki a bigin warderi taki a ben man studeri nanga wan marki èn taki a ben man denki dipi fu sani. A e taki: „Baka di mi teki dopu na ini 1994, dan pikinmoro tu yari langa mi ben de fayafaya na ini a tru anbegi. Mi ben go na ala den Kresten konmakandra, mi ben e wroko sowan 30 te go miti 40 yuru ala mun na ini a preikiwroko, èn mi ben abi demakandra nanga tra Kresten brada nanga sisa. Ne mi bigin drifi gowe. Mi ben kon swaki sote na yeye fasi taki mi pasa a wet fu Gado srefi. Ma mi kisi misrefi baka èn mi bosroiti fu tyari wan kenki kon na ini mi libi. Mi breiti srefisrefi taki Yehovah si taki mi abi berow èn taki a teki mi baka! Furutron mi aksi misrefi: ’Fa a du kon taki mi ben drifi gowe?’ San mi e tan prakseri doronomo na taki mi no ben studeri nanga wan marki èn mi no ben denki dipi fu den sani di mi ben e leri. A waarheid fu Bijbel no ben doro mi ati srefisrefi. Bigin fu now, mi sa tan studeri èn mi sa tan denki dipi ala ten fu den sani di mi e leri.” Te wi e kisi moro sabi fu Yehovah, fu en Manpikin èn fu en Wortu, dan a de tumusi prenspari taki wi e teki ten fu denki dipi fu den sani di wi e leri!
10. Fu san ede a de tumusi prenspari taki wi e teki ten fu studeri èn fu denki dipi fu den sani di wi e leri?
10 Na ini a grontapu disi pe wi abi so furu sani fu du, a trutru de wan tyalensi fu feni ten fu studeri èn fu denki dipi fu sani. Ma Kresten na ini a ten disi de na a mofodoro fu wan tumusi moi Pramisi Kondre — a regtfardiki nyun grontapu fu Gado (2 Petrus 3:13). Bigi sani de fu pasa heri esi, soleki a pori fu „Babilon a Bigiwan” èn a feti di „Gog fu a kondre fu Magog” sa kon feti nanga Yehovah en pipel (Openbaring 17:1, 2, 5, 15-17; Esekièl 38:1-4, 14-16 39:2). Den sani di de na wi fesi kan tron wan tesi gi wi, èn kande wi sa musu sori o furu wi lobi Yehovah. A de tumusi prenspari taki wi e gebroiki a ten di wi abi na wan bun fasi èn taki wi e kibri a Wortu fu Gado na ini wi ati!—Efeisesma 5:15, 16.
’Sreka Yu Ati fu Go Suku Rai na ini Gado Wortu’
11. Fa wi kan agersi wi ati nanga doti?
11 Wi kan si na agersi ati leki doti pe wi kan prani a siri fu a waarheid na ini (Mateus 13:18-23). Furutron sma e sreka trutru doti fu de seiker taki den sani di den e prani sa gro bun. Na a srefi fasi wi musu sreka wi ati, so taki a sa teki a Wortu fu Gado moro bun. Esra, a priester, „ben sreka na ati fu en fu go suku rai na a wet fu Yehovah èn fu du en” (Esra 7:10). Fa wi kan sreka wi ati?
12. San sa yepi wi fu sreka wi ati te wi e studeri?
12 Wan heri bun fasi fu sreka wi ati te wi e suku rai na ini Gado Wortu, na fu begi nanga wi heri ati. Den Kresten konmakandra fu tru anbegiman e bigin èn e tapu nanga begi. A e fiti trutru fu bigin nanga wan opregti begi ibri leisi te wisrefi e bigin studeri Bijbel èn baka dati wi musu tan poti ala wi prakseri na den sani di wi e studeri!
13. San wi musu du fu kisi wan ati di Yehovah feni bun?
13 Wi musu sreka na agersi ati fu kenki den fowtu denki di wi abi fu sani. Den kerki tiriman fu a ten fu Yesus no ben wani du disi (Mateus 13:15). Na a tra sei, Yesus en mama Maria, ben prakseri fu sani „na ini en ati”. A ben prakseri den sani disi fu di a ben yere tru tori (Lukas 2:19, 51). A ben tron wan getrow disipel fu Yesus. Lidia fu Tiatira ben arki Paulus, „èn Yehovah opo en ati bradi so taki a poti yesi arki”. Lidia ben tron wan bribiman tu (Tori fu den Apostel 16:14, 15). Meki wi noiti tan hori wisrefi na wi eigi denki noso na kerki leri di wi lobi. Na presi fu dati, meki wi de klariklari fu „meki Gado de tru, awansi ibri libisma sori fu de wan leiman”.—Romesma 3:4.
14. Fa wi kan sreka wi ati fu poti yesi arki na den Kresten konmakandra?
14 A de prenspari srefisrefi taki wi e sreka wi ati fu man poti yesi arki na den Kresten konmakandra. Sani di e hari wi prakseri kan meki taki wi no e arki a takiman moro. Den sani di a takiman e taki, no sa abi furu krakti na wi tapu efu wi e poti wi prakseri na sani di pasa a dei dati noso te wi e broko wi ede nanga den sani di sa miti wi tamara. Wi musu abi a fasti bosroiti fu arki èn fu leri efu wi wani kisi winimarki fu den sani di a takiman e taki. Wi kan kisi winimarki trutru te wi teki a fasti bosroiti fu arki fa a takiman e fruklari den bijbeltekst!—Nehemia 8:5-8, 12.
15. Fa sakafasi e yepi wi fu leri moro sani?
15 Neleki fa trutru doti e kon moro bun te wi e sreka en na a yoisti fasi, na so wi kan meki na agersi ati fu wi kon moro bun te wi e kweki sakafasi, wan angri gi yeye afersi, frutrow, frede gi Gado, èn so srefi lobi gi Gado. Sakafasi e safu na ati, èn a e yepi wi fu leri moro sani. Yehovah ben taigi Yosia, a Kownu fu Yudea: „Fu di yu ati ben safu, so taki yu ben saka yusrefi fu Yehovah ede di yu yere san mi taki . . . èn ben bigin krei na mi fesi, dati meki mi, misrefi yere” (2 Kownu 22:19). Yosia ben abi sakafasi èn a ben wani teki leri. Den disipel fu Yesus ’no ben sabi leisi noso skrifi èn den ben de neleki ala tra sma’. Ma fu di den ben abi sakafasi, meki den ben man frustan èn gebroiki tru tori na yeye fasi di den „koniwan nanga den sabiman” no ben man frustan (Tori fu den Apostel 4:13; Lukas 10:21). Meki wi „saka wisrefi na fesi wi Gado” ala di wi e pruberi fu kisi wan ati di Yehovah feni bun.—Esra 8:21.
16. Fu san ede wi musu meki muiti fu kweki wan angri gi yeye nyanyan?
16 Yesus ben taki: „Koloku fu den sma di sabi den nowtu na yeye fasi” (Mateus 5:3). Ala di wi man kweki yeye fasi, toku den krakti di a godelowsu grontapu disi abi na wi tapu noso gwenti soleki lesifasi, kan meki taki wi no e si so krin moro taki wi abi wan nowtu na yeye fasi (Mateus 4:4). Wi musu kweki wan gosontu angri gi yeye nyanyan. Kande na ini a bigin wi no e kisi prisiri te wi e leisi Bijbel èn te wi e studeri. Ma te wi e horidoro, dan wi sa si taki a sabi di wi e kon sabi sani, sa ’tron wan prisiri sani gi wi eigi sili’. Disi sa meki taki wi sa kisi moro angri fu studeri.—Odo 2:10, 11.
17. (a) Fu san ede Yehovah warti taki wi e frutrow en dorodoro? (b) Fa wi kan kisi frutrow na ini Gado?
17 Kownu Salomo ben frumane: „Frutrow tapu Yehovah nanga yu heri ati èn no frutrow tapu yu eigi frustan” (Odo 3:5). Te wi e frutrow tapu Yehovah, dan wi sabi taki iniwan sani di Yehovah e aksi noso e sori wi nanga yepi fu en Wortu, ala ten na wan bun sani (Yesaya 48:17). Yehovah warti trutru taki wi e frutrow en dorodoro. A man meki ala den prakseri fu en kon tru (Yesaya 40:26, 29). Fu taki en leti, en eigi nen wani taki trutru „A E Meki Sani Du Kon”. Disi e gi wi wan moro krakti frutrow taki a man du san a pramisi! A de „regtfardiki na ini den pasi fu en èn a de loyaal na ini ala den wroko fu en” (Psalm 145:17). A no de fu taki, dati efu wi wani kisi frutrow na ini en, dan wi musu „tesi en si taki Yehovah bun”. Wi kan du disi fu di wi e gebroiki den sani di wi e leri fu Bijbel na ini wi eigi libi èn fu di wi e poti prakseri na den winimarki di e kon leki bakapisi fu dati.—Psalm 34:8.
18. Fa frede gi Gado e yepi wi fu teki a tiri fu en?
18 Salomo ben sori go na ete wan tra eigifasi di e meki taki wi ati e teki tiri fu Gado. A ben taki: „Frede Yehovah èn drai yu baka gi san no bun” (Odo 3:7). Yehovah ben taki fu Israèl fu owruten: „Efu den ben o sreka na ati disi fu den nomo fu frede mi èn fu hori ala den komando fu mi ala ten, so taki a ben sa kan go bun nanga den èn nanga den manpikin fu den te ten di no skotu!” (Deuteronomium 5:29). Iya, den sma di e frede Gado e gi yesi na en. Yehovah man „sori en krakti fu a bun fu den sma di lobi en nanga den heri ati” èn a man gi strafu na den wan di no e gi yesi na en (2 Kroniki 16:9). Meki a bigi frede di wi abi fu no gi Gado sari, tiri ala den sani di wi e du, ala den prakseri fu wi, èn so srefi ala den firi fu wi.
’Lobi Yehovah Nanga Yu Heri Ati’
19. Fa lobi e meki wi ati wani teki a tiri fu Gado?
19 Moro leki ala tra eigifasi, lobi trutru e meki wi ati wani teki a tiri fu Yehovah. Wan ati di abi furu lobi gi Gado e meki wan sma de fayafaya fu leri san Gado feni bun èn san a no feni bun (1 Yohanes 5:3). Yesus ben taki: „Yu musu lobi Yehovah, yu Gado nanga yu heri ati èn nanga yu heri sili èn nanga yu heri frustan” (Mateus 22:37). Meki wi kisi wan moro dipi lobi gi Gado, fu di wi e teki en leki wan gwenti fu denki dipi fu a bunfasi fu en. Disi wi kan du fu di wi e taki nanga en doronomo neleki te wi e taki nanga wan krosibei mati, èn fu di wi e taki fayafaya fu en nanga trawan.
20. Fa wi kan kisi wan ati di Yehovah feni bun?
20 Fu taki en ete wan leisi: Efu wi wani kisi wan ati di Yehovah feni bun, dan wi musu meki Gado en Wortu abi krakti na tapu a sma di wi de trutru, a fasi fa wi de trutru na ini wi ati. A de fanowdu trutru fu studeri den Buku fu Bijbel bun èn fu abi warderi te wi e denki dipi fu den sani di wi leri. A moro bun fasi fa wi kan du dati, na te wi abi wan ati di sreka — wan ati di no abi fowtu denki fu sani, wan ati di abi furu eigifasi di e meki taki wi wani leri sani! Iya, nanga yepi fu Yehovah, wi kan kisi wan ati di Gado feni bun. Ma sortu sani wi kan du fu kibri wi ati?
[Futuwortu]
^ paragraaf 9 Wi kenki a nen.
San Yu Ben Sa Piki?
• San na a agersi ati di Yehovah e ondrosuku?
• Fa wi kan ’kibri a Wortu fu Gado na ini wi ati’?
• Fa wi musu sreka wi ati fu suku rai na ini a Wortu fu Gado?
• Baka di wi studeri den sani disi, dan sortu deki-ati yu kisi?
[Aksi fu a tori disi]
[Prenki na tapu bladzijde 17]
David ben abi warderi di a ben denki dipi fu yeye afersi. A de so tu nanga yu?
[Prenki na tapu bladzijde 18]
Sreka yu ati bifo yu e bigin studeri a Wortu fu Gado