Aksi fu Leisiman

Pe Yehovah ben seti a frubontu nanga Abraham — Na Ur noso na Haran?

A fosi tori di e taki fu a frubontu fu Yehovah nanga Abraham de na ini Genesis 12:1-3, pe skrifi: „Yehovah ben taigi Abram: ’Komoto na yu kondre èn na yu famiri èn na a oso fu yu papa, go na a kondre di mi sa sori yu; èn mi sa meki yu tron wan bigi nâsi . . . Èn nanga yepi fu yu ala famiri fu grontapu fu tru sa blesi densrefi.’” * A kan taki Yehovah ben seti a frubontu disi nanga Abraham, di Abraham ben de na ini Ur èn A ben poti krakti baka tapu dati di Abraham ben de na ini Haran.

Na ini a fosi yarihondro, Stefanus ben sori go na a komando di Yehovah ben gi Abraham taki a ben musu froisi go na Kanan. A ben taigi a Sanhedrin taki: „A Gado fu glori ben sori ensrefi na wi fositen tata Abraham ala di a ben de na Mesopotamia, bifo a ben go libi na Haran, èn a ben taigi en: ’Gowe libi yu kondre nanga yu famiri èn kon na a kondre di mi sa sori yu’” (Tori fu den Apostel 7:2, 3). Abraham ben gebore na ini Ur, èn soleki fa Stefanus ben sori, dan drape a ben yere a fosi tron a komando fu go na Kanan (Genesis 15:7; Nehemia 9:7). Stefanus no ben taki fu a frubontu fu Gado nanga Abraham, ma na ini Genesis 12:1-3 skrifi taki a frubontu abi fu du nanga a komando fu go na Kanan. So bun a no de wan tranga sani fu bribi taki Yehovah ben meki a frubontu disi nanga Abraham na ini Ur.

Ma te yu e leisi a tori fu Genesis finifini dan dati e gi yu na idea taki di Abraham ben de na ini Haran, Yehovah ben fruteri en ete wan leisi fu a frubontu. Na furu tra okasi na ini Kanan, Yehovah ben fruteri moro sani fu a frubontu disi (Genesis 15:5; 17:1-5; 18:18; 22:16-18). Akruderi Genesis 11:31, 32, Abraham en papa, Tera, ben gowe libi Ur fu go na Kanan, makandra nanga Abraham, Sara nanga Lot. Den ben kon na Haran èn den tan drape te leki Tera dede. Abraham ben libi langa nofo na ini Haran fu kan feni furu gudu (Genesis 12:5). Wi no sabi o ten ma Abraham brada, Nahor, ben froisi kon tan drape tu.

Baka di Bijbel fruteri taki Tera dede, dan a e fruteri san Yehovah e taigi Abraham: „Baka dati Abraham ben go neleki fa Yehovah ben taigi en” (Genesis 12:4). Fu dati ede, Genesis 11:31–12:4 e meki furu sma denki taki Yehovah ben taki den wortu disi di skrifi na ini Genesis 12:1-3, baka di Tera dede. Efu dati tru, dan Abraham ben gowe libi Haran èn a froisi go tan na a kondre pe Yehovah ben seni en go. A ben du dati fu di a ben gi yesi na wan komando di a ben yere wan syatu pisi ten bifo èn a ben gi yesi tu na a komando di a ben yere furu yari na fesi na ini Ur.

Akruderi Genesis 12:1, Yehovah ben taigi Abraham: „Komoto na yu kondre èn na yu famiri èn na a oso fu yu papa.” Wan ten ben de di Ur ben de Abraham „kondre”, èn en papa „oso” ben de drape. Ma Abraham en papa ben froisi nanga en heri osofamiri go libi na Haran, èn baka ten Abraham ben kari a presi dati en kondre. Baka di Abraham ben de na ini Kanan furu yari kaba, dan a ben seni en futuboi go na ’en kondre èn en famiri’ fu suku wan wefi gi Isak. Dan a futuboi ben go na „a foto fu Nahor” (kande Haran noso wan presi krosibei) (Genesis 24:4, 10). Drape a futuboi ben feni Rebeka na mindri den famiriman fu Abraham, a bigi famiri fu Nahor.—Genesis 22:20-24; 24:15, 24, 29; 27:42, 43.

Di Stefanus ben taki nanga a Sanhedrin, a ben taki fu Abraham: „Baka di en papa dede, Gado ben meki a kenki en tanpresi go na a kondre disi pe unu e libi now” (Tori fu den Apostel 7:4). Disi e sori taki Yehovah ben taki nanga Abraham na ini Haran. A no tranga fu bribi taki na a okasi dati Yehovah ben poti krakti ete wan leisi tapu a frubontu nanga Abraham, so leki fa skrifi na ini Genesis 12:1-3, bika a frubontu bigin abi krakti di Abraham ben froisi go na Kanan. Fu dati ede, te wi e luku ala den sani di pasa dan wi kon si taki kande Yehovah ben seti a frubontu fu en nanga Abraham na ini Ur èn a ben poti krakti tapu en baka ten na ini Haran.

[Futuwortu]