Ondrofenitori

Furu Moi Sani Pasa na ini Mi Libi Leki wan Dinari fu Yehovah

SOLEKI FA RUSSELL KURZEN FRUTERI

Mi gebore tapu 22 september 1907, seibi yari bifo a tumusi aparti ten di bigin nanga a fosi grontapufeti. Na osofamiri fu wi ben gudu na wan tumusi prenspari fasi. Te yu kon sabi pikinso fa wi libi ben de fosi, dan mi denki taki yu sa agri nanga mi.

DI MI granmama ben de wan pikin meisje ete, dan a ben e suku a waarheid fu Gado kaba. Bifo a ben tron wan tini, dan a ben go na difrenti kerki na ini a moi foto Spiez na Switserland, pe a ben gebore. Na ini 1887, wan tu yari baka di a ben trow, na osofamiri Kurzen ben de na mindri a bigi grupu fu sma di froisi go tan na Amerkankondre.

A famiri go tan na ini a distrikt Ohio, pe krosibei fu a yari 1900, mi granmama feni a gudu di a ben e suku. A ben feni a gudu disi na ini a buku fu Charles Taze Russell di nen The Time Is at Hand (A Ten De Krosibei), èn di ben skrifi na ini Doisritongo. Heri esi mi granmama ben kon si taki den sani di a ben leisi na ini a buku ben abi a leti fu Bijbel waarheid. Ala di mi granmama pikinmoro no ben man leisi Ingrisitongo, toku a teki wan abonnement tapu A Waktitoren na ini Ingrisitongo. Na so a leri moro waarheid fu Bijbel èn, na a srefi ten, a leri Ingrisitongo. Mi granpapa noiti ben abi a srefi lobi gi yeye afersi soleki fa en wefi ben abi dati.

Fu den 11 pikin fu mi granmama, tu fu den manpikin fu en, John nanga Adolph, warderi a yeye gudu di a ben feni. John ben de mi papa, èn a ben teki dopu na ini 1904 na a kongres fu den Bijbel Ondrosukuman, soleki fa sma ben sabi Yehovah Kotoigi na a ten dati. A kongres disi ben hori na ini a foto St. Louis di de na ini a distrikt Missouri. Fu di furu fu den Bijbel Ondrosukuman ben de pôti sma, dan a kongres ben seti fu hori na a srefi ten di a World’s Fair (wan bigi  jaarbeurs) ben o hori. Fu di a jaarbeurs disi ben e hori, dan den prijs fu den loko ben kon moro lagi, èn den Bijbel Ondrosukuman ben kan kisi wini fu na okasi disi. Bakaten, na ini 1907, mi omu Adolph teki dopu na a kongres na ini Niagara Falls na New York. Mi papa nanga mi omu ben e preiki fayafaya san den ben leri fu Bijbel, èn te fu kaba, den ala tu tron furuten dinari (now den sortu sma disi nen pionier).

Fu dati ede, na a ten di mi gebore na ini 1907, mi famiri ben gudu kaba na yeye fasi (Odo 10:22). Na ini 1908 mi ben de wan beibi ete di mi papa nanga mama, John nanga Ida, teki mi tyari go na a „On to Victory” (Wi E Go Wini) kongres na ini a presi Put-in-Bay di de na Ohio. Drape Joseph F. Rutherford ben de a fesiman fu a kongres. Na a ten dati a ben de wan opziener di e reis. Wan tu wiki bifo, a ben go na a foto Dalton na ini Ohio, pe a kon na wi oso èn a hori lezing gi den Bijbel Ondrosukuman di ben e tan drape.

A no de fu taki dati misrefi no e memre den sani dati, ma mi e memre a kongres di hori na ini 1911 na ini Mountain Lake Park na Maryland. Drape mi nanga mi pikin sisa Esther, miti Charles Taze Russell, di ben e tiri a preikiwroko di den Bijbel Ondrosukuman ben e du na heri grontapu.

Tapu 28 yuni 1914, mi go nanga mi famiri na wan kongres na ini a foto Colombus na Ohio. A kongres dati ben waka sondro problema. A dei dati a bigi grontapufeti broko, fu di wan sma ben kiri a prins fu Sarayefo, Gran Hertog Ferdinand, makandra nanga a wefi fu en. Sensi den bigin yari dati, mi ben abi a grani fu de na furu fu den kongres fu Yehovah en pipel. Wan tu fu den kongres ben de konmakandra fu pikinmoro 100 sma nomo. Trawan fu den ben de bun bigi konmakandra di ben hori na ini wan tu fu den moro bigi stadion fu grontapu.

Wi Oso Ben De na wan Yoisti Presi

Fu wan sani fu 1908 te go miti 1918, wan pikin gemeente fu Bijbel Ondrosukuman ben e hori den konmakandra fu den na ini wi oso di ben de na ini a foto Dalton. A foto disi ben de na mindri a foto Pittsburgh di ben de na ini Pennsylvania, èn a foto Cleveland di ben de na ini Ohio. Na oso fu wi ben tron wan presi pe furu takiman di ben e reis go na tra gemeente, ben kan kon fu rostu wan pisi ten. Den ben gwenti fu tai den asi nanga den asiwagi fu den baka a maksin  fu wi èn den ben e fruteri den sma di ben kon makandra na wi oso moi ondrofenitori èn so srefi tra warti yeye sani. Den pisi ten dati trutru gi mi deki-ati!

Mi papa ben de wan skoromeester, ma san a ben lobi trutru ben de a moro bigi leri wroko fu ala ten, a Kresten diniwroko. A ben sorgu taki a ben leri en famiri moro fu Yehovah èn ala neti wi ben e begi nanga makandra leki wan osofamiri. Na ini a lente fu 1919, mi papa seri na asi nanga na asiwagi fu wi, èn a bai wan Ford oto di ben de fu 1914, gi 175 Amerkan dala. A ben du dati so taki wi ben kan miti moro sma na ini a preikiwroko. Na ini 1919 nanga 1922 na oto dati tyari wi osofamiri go na den prenspari kongres fu den Bijbel Ondrosukuman na ini Cedar Point na Ohio.

Wi heri famiri — mi mama, mi papa; Esther, mi pikin brada, John, nanga mi — wi alamala teki prati na a preikiwroko. Mi e memre bun a fosi leisi di wan ososma poti wan aksi gi mi di ben abi fu du nanga Bijbel. Mi ben abi wan sani fu seibi yari. „Yu boi, san na Armagedon?” a man ben aksi mi. Nanga pikinso yepi fu mi papa, mi ben man gi en wan piki di skrifi na ini Bijbel.

Mi E Tron wan Dinari na ini a Furuten Diniwroko

Na ini 1931 wi famiri go na a kongres na ini a foto Colombus na Ohio, èn drape wi prisiri srefisrefi fu teki a nyun nen, Yehovah Kotoigi. Mi pikin brada John ben prisiri sote taki a bosroiti dati mi nanga en ben musu go du pionierwroko. * Wi du dati, èn mi mama, mi papa, nanga Esther du dati tu. Wi ben abi wan gudu trutru — wan famiri di ben de na ini wánfasi na ini a prisiri wroko fu preiki a bun nyunsu fu Gado en Kownukondre! Noiti mi no e weri fu taki Yehovah tangi gi a blesi disi. Ma ala di wi ben prisiri srefisrefi, toku moro prisiri ben e wakti wi.

Na ini februari fu a yari 1934, mi bigin dini na a edekantoro fu Yehovah Kotoigi (di nen Bethel) na ini Brooklyn na New York. John kon dini drape tu wan tu wiki baka dati. Wi ben e tan na ini a srefi kamra, teleki a trow nanga en lobi wefi, Jessie, na ini 1953.

Baka di mi nanga John go dini na Bethel, dan wi papa nanga mama teki pionier toewijzing na difrenti pisi fu a kondre èn Esther nanga en masra, George Read, go nanga den na den toewijzing disi. Wi papa nanga mama tan pionier te nanga 1963 di a libi fu den na grontapu kon na wan kaba. Esther nanga en masra kweki wan bun famiri, èn Yehovah blesi mi nanga wan tu neef nanga nicht di mi lobi fu tru.

Wroko Nanga Demakandra na Bethel

John ben gebroiki a technisch koni fu en na Bethel èn a ben e wroko makandra nanga tra memre fu a Bethelfamiri. Wan fu den sani di den ben meki, na gramafon di yu ben kan tyari go na ala presi. Dusundusun Yehovah Kotoigi ben gebroiki den gramafon disi ini na oso-fu-oso preikiwroko. John ben yepi tu fu seti èn fu bow masyin di ben musu domru den tijdschrift èn plak sticker na den tapu. Den tijdschrift disi ben de fu seni go gi den sma di ben abi wan abonnement.

Di mi bigin dini na Bethel, dan mi ben e wroko na a presi pe den ben e tai den buku. Tra yonkuman di ben e wroko tu na ini a drukkerij na a ten dati, e dini getrow ete na Bethel. Wan tu fu den man disi ben de Carey Barber nanga Robert Hatzfeld. Wan tu fu den tra brada di mi ben lobi srefisrefi, ma di dede now, na Nathan Knorr, Karl Klein, Lyman Swingle, Klaus Jensen, Grant Suiter, George Gangas, Orin Hibbard, John Sioras, Robert Payne, Charles Fekel, Benno Burczyk, nanga John Perry. Den tan du a wroko disi furu yari baka makandra, èn noiti den kragi noso fruwakti fu kisi wan „moro bun toewijzing”. Ma ala di na organisâsi ben e gro, dan wan tu fu den loyaal, salfu Kresten disi, kisi moro bigi frantwortu. Wan tu fu den ben dini srefi leki memre fu a Tiri Skin fu Yehovah Kotoigi.

Mi leri wan prenspari les di mi ben e wroko nanga den brada disi di ben de klariklari fu gi densrefi fu du a wroko fu Gado. Sma di e du grontapuwroko e kisi moni gi a wroko di den e du. Dati na a pai di den e kisi. A wroko di wi e du na Bethel e tyari bigi blesi na yeye fasi kon gi wi,  èn soso yeye mansma nanga umasma e frustan èn e warderi den pai disi.—1 Korentesma 2:6-16.

Nathan Knorr, di ben kon na Bethel na ini 1923 di a ben de wan tini, ben de opziener fu a drukkerij na ini den yari na mindri 1930-1940. Ala dei a ben e waka na ini a heri drukkerij èn a ben e gi ibriwan fu den wrokoman odi. Den wan fu wi di ben de nyun na Bethel ben e warderi en taki a ben e poti prakseri na wi na so wan fasi. Na ini 1936 wi kisi wan nyun drukpers fu Doisrikondre, èn wan tu fu den yongu brada ben abi problema fu poti den pisi fu a pers disi kon na wan, so taki a ben kan drai. So bun, Brada Knorr weri wan ketelpaki èn a wroko moro leki wán mun langa makandra nanga den, teleki a drukpers ben e drai.

Brada Knorr ben e wroko so tranga taki furu fu wi no ben man du sani soleki fa en ben e du den. Ma a ben sabi tu fa fu abi wan bun prisiriten. Na ini yanuari 1942 a ben kisi a frantwortu fu a preikiwroko di Yehovah Kotoigi e du na heri grontapu, ma toku a ben tan prei baseball son leisi nanga den memre fu a Bethelfamiri èn nanga studenti fu a Gilead zendelingskoro di ben de krosibei fu South Lansing na New York.

Na ini april 1950, a Bethelfamiri froisi go tan na a nyun gebow di ben abi tin sodro. A gebow disi de na 124 Colombia Heights, Brooklyn, New York. A nyun nyanyan kamra fu a Bethelfamiri ben gi okasi taki wi alamala ben man sidon makandra fu nyan. Na ini den pikinmoro dri yari di a gebow disi ben meki, wi no ben man hori wi mamanten anbegi programa. A ben de trutru wan prisiri ten di wi ben kan hori a programa dati baka! Brada Knorr ben gi mi a toewijzing fu sidon nanga en na a tafra fu a fesiman, so taki mi ben kan yepi en fu memre den nen fu den nyun memre fu a Bethelfamiri fu wi. Disi ben de mi sidonpresi 50 yari langa te mi ben e teki prati na a mamanten anbegi èn na a mamanten nyanyan. Ne, tapu 4 augustus 2000, den sroto a nyanyan kamra dati, èn mi ben musu go na wán fu den nyun nyanyan kamra na ini a gebow di fosi ben de a Towers Hotel.

Na ini den yari di ben de na mindri 1950-1960, mi wroko wan pisi ten na ini a drukkerij. Mi ben e wroko tapu wan Linotype masyin (wan sortu skrifimasyin), èn mi ben e seti den langa pisi papira fu tron bladzijde di ben o de fanowdu fu meki plaat fu druk publikâsi. Mi no ben lobi a wroko dati so furu, ma William Peterson, di ben abi a frantwortu fu den masyin, ben abi so wan switifasi gi mi, taki awansi fa a no fa, mi ben abi wan prisiri ten drape. Ne, na ini 1960, friwani-wrokoman ben de fanowdu fu ferfi a nyun gebow di de na Columbia Hights 107. Mi ben prisiri taki mi ben man yepi fu sreka a nyun gebow disi gi wi Bethelfamiri di ben e gro.

Wan syatu pisi ten baka di wi ferfi a gebow fu Colombia Heights 107, dan wan moi sani di mi no ben fruwakti pasa nanga mi. Mi kisi a toewijzing fu gi fisitiman di e kon na Bethel, wan switikon. Den lasti 40 yari di mi du a wroko disi, ben moi neleki iniwan fu den tra yari di mi ben de na Bethel. Awansi na fisitiman noso nyun memre fu a Bethelfamiri di ben kon na Bethel, mi ben prisiri srefisrefi fu taki nanga den fu den marki di Yehovah en pipel doro fu di den du muiti fu wroko fu a bun fu a Kownukondre.

Fayafaya Ondrosukuman fu Bijbel

Fu di den memre fu a Bethelfamiri lobi Bijbel, dan sani e waka bun nanga den na yeye fasi. A fosi leisi di mi kon na Bethel, dan mi aksi Emma Hamilton, di ben abi a wroko fu puru pikinpikin fowtu na ini sani di ben vertaal, omeni tron a ben leisi Bijbel. „Dritenti a feifi leisi” a ben piki, „èn baka dati mi no teri moro.” Anton Koerber, wan tra getrow Kresten di ben e dini na Bethel na a srefi ten dati, ben gwenti fu taki: „Ala ten poti a Bijbel na wan presi pe yu kan feni en makriki te yu abi en fanowdu.”

Baka di Brada Russell dede na ini 1916, dan Joseph Rutherford kisi a frantwortu di Russell ben abi na ini na organisâsi. Rutherford ben de wan krakti takiman di ben abi furu ondrofeni, èn fu di a ben de wan afkati, dan a ben krutu afersi fu a bun fu Yehovah Kotoigi, na fesi a Hei Krutubangi fu Amerkankondre. Baka di Rutherford dede na ini 1942, dan Brada Knorr teki en presi èn a wroko tranga fu kon tron wan bun publiki takiman. Fu di mi ben e tan na ini wan kamra krosibei fu a di fu en, dan mi ben gwenti fu yere fa a ben e oefen den lezing fu en furu leisi baka  makandra. Fu di a ben meki so furu muiti, dan a tron wan bun takiman te fu kaba.

Na ini februari 1942, Brada Knorr yepi fu seti wan nyun programa. A programa disi ben de fu yepi ala brada na Bethel fu tron moro bun leriman nanga takiman. A skoro disi ben leri den brada fa fu ondrosuku Bijbel èn fa fu tron bun publiki takiman. Na a bigin fu a skoro, iniwan fu wi ben kisi a toewijzing fu hori syatu lezing di ben abi fu du nanga sma na ini Bijbel. A fosi taki di mi ben hori ben abi fu du nanga Moses. Na ini 1943 wan srefi sortu skoro ben bigin na ini den gemeente fu Yehovah Kotoigi, èn te nanga a dei fu tide, a skoro dati e hori ete. Na Bethel a de prenspari ete fu kisi sabi fu Bijbel èn fu tron bun leriman.

Na ini februari 1943 a fosi klas fu a Gilead zendelingskoro bigin. We, wan syatu pisi ten bifo, a di fu 111 klas fu Gilead kon na wan kaba! Na ini den pikinmoro 58 yari di a skoro disi e drai, moro leki 7000 sma kisi leri fu dini leki zendeling na heri grontapu. A no de fu taki dati na ini 1943 di a skoro bigin, sowan 100.000 Yehovah Kotoigi ben de nomo na heri grontapu. Now moro leki 6.000.000 Kotoigi e preiki a bun nyunsu fu Gado en Kownukondre!

Mi E Warderi Mi Yeye Gudu

Wan syatu pisi ten bifo a Gileadskoro ben seti, mi nanga tu tra sma fu Bethel ben kisi a toewijzing fu fisiti gemeente na ini heri Amerkankondre. Wi tan wán dei, wan tu dei, noso wan wiki srefi fu pruberi fu tranga den gemeente disi na yeye fasi. Den ben e kari wi dinari fu den brada, wan nen di bakaten kenki kon tron kringdinari, noso kringopziener. Ma syatu baka di Gileadskoro opo, dan den aksi mi fu drai baka go drape fu dini wan pisi ten leki wan leriman na a skoro disi. Mi dini leki wan leriman fu klas 2 te go miti klas 5, èn mi ben teki a presi so srefi fu wan fu den faste sma di ben e gi leri, èn so a du kon taki mi gi leri na a di fu 14 klas. Fu di mi ben man taki nanga den studenti fu den tumusi moi sani  di pasa na ini a disiten historia fu Yehovah en organisâsi — furu fu den sani disi mi ben man fruteri fu di misrefi ben ondrofeni den — dan dati meki taki mi kisi moro bigi warderi gi mi yeye gudu.

Wan tra grani di mi ben abi na ini den yari di pasa, na a grani fu go na den internationaal kongres fu Yehovah en pipel. Na ini 1963, mi reis heri grontapu makandra nanga moro leki 500 sma di ben go na den „Têgo Bun Nyunsu” kongres. Tra kongres di mi fisiti èn di sma no sa frigiti, ben de den wan di hori na ini Warsaw na Polen, na ini 1989; na ini Berlijn na Doisrikondre, na ini 1990; èn na ini Moskow na Russiakondre, na ini 1993. Na iniwan fu den kongres, mi ben abi na okasi fu miti wan tu fu wi lobi brada nanga sisa di ben horidoro someni tenti yari langa na ondro a Nazi tirimakti, a Komunist tirimakti, noso na ondro ala den tu tirimakti disi. Dati trutru ben de ondrofenitori di krakti a bribi fu sma!

Furu moi sani pasa trutru na ini mi libi leki dinari fu Yehovah! Mi e tan kisi blesi na yeye fasi. Èn tra fasi leki materia gudu, a de so taki o moro wi e prati den warti sani disi nanga trawan, o moro wi e kon gudu. Wawan leisi mi e yere wan tu sma e taki dati den ben winsi taki den no ben kweki leki Yehovah Kotoigi. Den e feni taki kande den ben o abi moro warderi gi waarheid fu Bijbel efu den no ben de na ini Yehovah en organisâsi fosi.

Ala ten mi e mandi te mi e yere yonguwan e taki den sortu sani dati, bika san den e taki trutru, na taki a moro bun fu no gro kon bigi nanga sabi fu a pasi fu Yehovah. Ma prakseri ala den takru gwenti nanga kruktu denki di wan sma musu libi na baka te den e feni Bijbel waarheid leki bigisma. Ala ten mi ben de nanga furu tangi na ati taki mi papa nanga mama kweki den dri pikin fu den na ini a pasi fu regtfardikifasi. John tan wan getrow dinari fu Yehovah teleki a dede na ini yuli 1980, èn Esther tan wan getrow Kotoigi te nanga a dei fu tide.

Nanga bigi warderi mi e prakseri den furu bun matifasi di mi abi nanga getrow Kresten brada nanga sisa. Now mi de moro leki 67 moi yari na Bethel. Noiti mi trow, ma toku mi abi furu manpikin nanga umapikin èn so srefi granpikin na yeye fasi. Èn mi e prisiri te mi e prakseri ala den lobi nyun memre fu wi yeye famiri na heri grontapu di mi musu miti ete; iniwan fu den na warti sma. Den wortu disi tru srefisrefi: „A blesi fu Yehovah — dati na san e meki sma kon gudu”!—Odo 10:22.

[Futuwortu]

[Prenki na tapu bladzijde 20]

Fu a kruktu-anusei go na a leti-anusei; mi papa nanga mi brada John di e sidon na tapu en bowtu, Esther, mi, nanga mi mama

[Prenki na tapu bladzijde 23]

Mi e gi wan Gileadklas leri na ini 1945

Tapusei na a leti-anusei: Leriman fu a Gileadskoro Eduardo Keller, Fred Franz, mi, nanga Albert Schroeder

[Prenki na tapu bladzijde 24]

Mi e prakseri den moi sani di pasa na ini a libi fu mi leki dinari fu Yehovah