„Wan Spesrutu Dei fu Sori Taki Wi E Lespeki a Kerki fu Tra Sma”

WAN uma di de edeman fu wan skoro na ini Polen ben feni wan takimakandra di a ben abi nanga Yehovah Kotoigi moi srefisrefi. Dati ben meki a teki a bosroiti fu poti ’wan spesrutu dei pe ala sma tapu a skoro ben kan sori taki den e lespeki a kerki fu tra sma’. A ben taki dati den studenti di ben wani — a ben kan de Lomsu studenti, studenti di abi a Buda bribi, nanga studenti di de Yehovah Kotoigi — ben kan sreka wan syatu takimakandra fu meki trawan kon sabi moro fu san den e bribi èn san na den gwenti fu a kerki fu den. Wantewante, dri Kotoigi fu Yehovah di de tini ete ben taki dati den ben wani du wan sani.

Di a dei doro, a fosi wan fu den di taki wan sani, ben de Malwina di abi 15 yari. Disi na wan pisi fu san a ben taki: „Furu fu unu ben sabi wi kaba fosi wi bigin kon na a skoro disi, fu di wi ben kon na un oso. Kande unu e aksi unsrefi fu san ede wi e tan du dati. A de fu di wi e waka baka na eksempre fu Yesus Krestes, a Sma di Seti a Kresten Bribi. A ben preiki a bun nyunsu fu a Kownukondre fu Gado awansi pe sma ben de. Den apostel nanga tra fosi Kresten ben du a srefi sani. Na furu presi, Yehovah Kotoigi e ondrofeni hebi tesi tapu a bribi fu den, ma wi breiti taki wi abi vrede tapu a skoro disi, fu di unu alamala e yepi fu a vrede disi de. Wi e taigi unu tangi fu dati!”

Na a kaba fu a takimakandra fu en, Malwina ben taki: „Wan tra reide de fu san ede wi e kon na un oso. Wi e broko wi ede nanga unu. A Bijbel e fruteri wi taki heri esi a libisma famiri sa ondrofeni tumusi bigi èn prenspari sani. So bun te wi naki tapu un doro wan tra leisi, grantangi meki pikin ten fu arki wi. Nanga prisiri wi ben sa wani fruteri unu fa wi kan libi makandra fu têgo na ini wan paradijs grontapu.”

A tra takiman ben de Mateusz, di abi 15 yari tu. Mateusz ben fruteri den arkiman fu en taki na ini den yari di pasa, Yehovah Kotoigi gebroiki difrenti fasi fu panya a bun nyunsu. Fu eksempre, na ini 1914 — di felem ben e meki sondro taki sma ben e taki èn sondro poku — den Kotoigi ben e sori sma a „Photo-Drama der Schepping” (A Fowtow-Drama fu den Mekisani), wan felem nanga atosigi pe yu ben kan yere sani ala di yu e luku en.

Mateusz fruteri fa wi ben gebroiki radio  fu panya a Kownukondre boskopu. Dan a fruteri fa Yehovah Kotoigi ben meki a MEPS computer sistema; wan aparti sistema fu poti sani leki buku nanga tijdschrift na ini furu difrenti tongo. A ben fruteri tu fa Yehovah Kotoigi gi datra bodoi fu den difrenti fasi fa den kan dresi sma sondro brudu. „Now, wan tu prenspari Pôlsu datra e taki bun fu a fasti bosroiti fu wi ini a tori fu brudu èn den e poti krakti na tapu taki ibri yari moro nanga moro sma di no de Kotoigi e abi wan oparâsi sondro brudu”, na so Mateusz ben taki.

Mateusz tapu a takimakandra fu en nanga wan tu tori fu a bow fu Kownukondre zaal èn a taki: „Un ben sa wani fu kon luku a di fu wi? Un de fri fu kon na inisei, èn wi no e piki moni.” Di a ben e fruteri fu a presi pe a kongres e hori na ini Sosnowiec, dan Mateusz ben taki: „Un musu go luku a bigi oso disi di fiti a marki fu en srefisrefi. Fu san ede wi no ben sa go drape makandra? Wi abi wan sani na prakseri èn wi mati Katarzyna sa fruteri unu fu dati.”

Baka dati Katarzyna, di abi 15 yari, ben taki na wan fayafaya fasi: „Wi e gi unu wan switi kari fu kon na Sosnowiec gi a distrikt kongres fu Yehovah Kotoigi. Den sa taki tu fu tori di abi fu du nanga yongu sma.” Katarzyna ben sori so srefi go na a moro prenspari fesa di Kresten musu hori — a Memrefesa fu a dede fu Yesus Krestes. A ben gi den arkiman fu en a deki-ati: „A yari di pasa moro leki 14 milyun sma na heri grontapu ben go na a fesa dati. Unu no ben sa wani fu kon makandra nanga wi tra leisi?”

Baka di den kaba nanga a takimakandra fu den, dan Malwina, Mateusz, nanga Katarzyna ben pristeri den skoromeester nanga skoromisi fu den a buku Jehovah’s Getuigen — Verkondigers van God’s Koninkrijk (Yehovah Kotoigi — Preikiman fu Gado Kownukondre) makandra nanga tu video lolo di e taki fu a bribi nanga a wroko fu Yehovah Kotoigi. * Den skoromeester teki den sani di den yonguwan disi pristeri den nanga tangi èn den pramisi taki den sa gebroiki den gi den historia les.

Na a kaba fu a takimakandra, dan Martyna di abi 12 yari ben prei a singi „Grantangi Yehovah” gi ala den sma di ben de drape. Den yongu Kotoigi disi ’ben teki deki-ati nanga yepi fu a Gado fu den’ èn ben gi wan moi kotoigi (1 Tesalonikasma 2:2). Disi na trutru wan tumusi moi eksempre gi yonguwan fu Kotoigi, awansi pe den de!

[Futuwortu]

[Prenki na tapu bladzijde 26]

Katarznya e luku sortu bijbeltekst a sa gebroiki gi a takimakandra fu en

[Prenki na tapu bladzijde 26]

Malwina e sreka a takimakandra fu en wan tu dei fosi a hori en na skoro