Yu Musu Abi wan Konsensi Di Kisi Leri

A sori leki a ben o de wan tumusi moi dei gi den sma nanga den wrokoman na ini na opolani di abi leki nen Air New Zealand. A Vlucht 901 disi ben e frei go na Antartika. Sma ben seti den kamera fu den kaba fu meki fowtow nanga felem. Den ben prisiri srefisrefi di a DC-10 opolani bigin frei go moro lagi na ini a birti fu Antartika, so taki den ben man si a moi presi moro bun.

A KAPTEN ben de wan piloot 15 yari kaba èn ala nanga ala a frei 11.000 yuru. Bifo a ben meki na opolani opo go, dan a luku bun pe a ben o frei. A luku den nomru finifini di ben sori en sortu pasi a musu frei, dan a poti den na ini a computer fu na opolani. Ma a no ben sabi taki a kisi fowtu nomru fu poti na ini a computer. Di a frei nanga a DC-10 go na ini wan wolku pikinmoro ondro 600 meter, dan a naki wan pisi fu na Erebusbergi. Ala 257 sma na ini na opolani dede.

Soleki fa den opolani fu now abi computer fanowdu fu sori den pe den musu frei te den de na loktu, na so libisma kisi wan konsensi fu sori den fa den musu tyari densrefi na ini a libi. A kefalek ogri rampu fu a Vlucht 901 kan leri wi furu fu a konsensi fu wi. Fu eksempre, te sma di e frei opolani no wani taki ogri e miti den, dan den abi apparaat fanowdu di e wroko bun èn den musu abi markitiki di e sori den krinkrin pe den musu frei. Na a srefi fasi, te wi abi wan konsensi di man yepi wi si den yoisti markitiki di e sori san bun èn san ogri, dan sani sa waka bun nanga wi na yeye fasi; wi sa sabi fa wi musu tyari wisrefi èn sani sa waka bun nanga wi na skin sei srefi.

A de wan sari sani na ini a grontapu disi taki den markitiki dati e lasi gowe, noso taki sma e weigri fu hori densrefi na den. „Na ini a ten disi wi e yere bun furu taki skoroboi na Amerkankondre no man leisi, den no man skrifi èn den no man frustan aardrijkskunde”, na so wan Amerkan leriman taki. „A de so tu taki den skoroboi disi no man si krin san bun èn san ogri. Den abi muiti fu leisi èn den no man reken bun, ma wan tra sani di wi kan si leki wan fu den furu problema na skoro tu, na taki den no sabi krinkrin moro san na a moro bun fasi fu tyari densrefi.” A ben taki so srefi dati „yongu sma na ini a ten disi no sabi kwetikweti san bun noso san ogri. Aksi wan yonguwan fu a kari wan ’bun’ sani nanga wan ’ogri’ sani. Wantronso a e bigin tweifri, a no sabi moro san a musu taki, a e senwe, a no de seiker fu ensrefi. . . . Te den yonguwan disi e go na heiskoro, dan den e kon tweifri moro nanga moro na a tori disi fu san bun èn san ogri, na presi taki den e kon sabi moro fu dati.”

Wan sani di meki sma tweifri so, na a bribi di den abi taki ibri sma musu teki en eigi bosroiti sortu markitiki a wani hori. Den e feni taki den markitiki disi e difrenti, fu di ibri sma abi en eigi kulturu. Prakseri san ben o pasa efu piloot no ben o frei nanga yepi fu fasti markitiki. San ben o pasa efu a ben o frei nanga yepi fu lampu di wan leisi e buweigi go na wan sei, dan tra leisi den e go na a tra sei èn son leisi den no de fu si moro srefi? A no de fu taki dati rampu ben o pasa ala dei, neleki san ben pasa na Erebusbergi. Na so a de tu nanga sma na grontapu. Fu di den no e hori densrefi moro na markitiki di e sori san bun èn san ogri, meki den e ondrofeni kefalek takru sani. Moro nanga moro den e kisi fu du nanga sari nanga dede, fu di osofamiri e prati te a papa noso mama no tan getrow na a trowpatna fu den, èn fu di milyunmilyun sma e pina fu AIDS noso fu wan tra siki ede di den kisi nanga yepi fu seks.

Kande a gersi wan kefalek koni sani fu bosroiti gi yusrefi sortu markitiki yu wani hori. Ma te yu luku en bun, dan den sma di abi a denki dati fu tyari densrefi leki fa den wani, de neleki den Ninifeisma di no ben sabi „a difrenti na mindri a reti-anu nanga a kruktu-anu fu den”. Sma di e tyari densrefi akruderi den eigi markitiki de neleki den Israèlsma di fadon komoto na bribi èn di ben taki dati „bun na ogri èn ogri na bun”.—Yona 4:11; Yesaya 5:20.

 So bun, pe wi kan feni den yoisti wet nanga gronprakseri fu leri a konsensi fu wi so taki a sa yepi wi teki yoisti bosroiti? Milyunmilyun sma kon si taki Bijbel na a moro bun sani di e yepi den fu feni den wet nanga gronprakseri dati. Bijbel e taki fu ala den prenspari markitiki. A e sori fa sma musu tyari densrefi, a e sori den taki a bun fu wroko, a e sori fa den musu gi pikin-nengre leri èn fa den musu anbegi Gado (2 Timoteus 3:16). Hondrohondro yari langa kaba, sma kon si taki den kan frutrow Bijbel dorodoro. Wi Mekiman, a Sma di abi a moro hei makti, seti den markitiki na ini Bijbel di e sori san bun èn san ogri. Dati meki den markitiki disi kan yepi ala libisma. So bun, wi no abi no wan reide fu libi leki den sma di no sabi san bun èn san ogri.

Ma na ini a ten disi furu sani de di kan pori a konsensi fu yu. Fa sani kan pori a konsensi fu yu? Fa yu kan hori wan krin konsensi? Wan bun fasi fu du dati na fu kon sabi suma wani pori a konsensi fu yu èn sortu fasi a sma dati e gebroiki fu du dati. Na artikel di e kon now sa taki fu den sani disi.