Aksi fu Leisiman

Fa a sneki na ini a dyari fu Eden ben taigi Efa fu pasa a wet fu Gado di ben abi fu du nanga a bon fu sabi bun nanga ogri?

Genesis 3:1 e taki: „Now a sneki ben sori fu de a moro trikiwan fu ala den busimeti di Yehovah Gado ben meki. Ne a bigin taigi na uma: ’A de trutru so, taki Gado ben taki dati unu no musu nyan fu ibri bon fu a dyari?’” Sma e fruteri difrenti sani fu a fasi fa kande a sneki ben taki nanga Efa. Wan sani di den e prakseri, na taki a sneki buweigi en skin noso en ede na wan noso tra fasi fu taigi Efa san a ben abi na prakseri. Fu eksempre, na Ingrisi kerki tiriman Joseph Benson ben taki fu a tori disi: „A kan de so trutru dati a ben buweigi en skin na wan spesrutu sortu fasi fu taki nanga en. Iya, son sma feni taki na ini a ten dati, sneki ben man denki èn taki, . . . ma buweisi fu dati no de.”

Ma efu a sneki ben gebroiki soso en skin fu taki nanga Efa, dan fa a ben kan taigi Efa taki a ben o tron leki Gado èn taki a ben o sabi san bun èn san ogri, efu a ben nyan a froktu di a no ben mag nyan? Boiti dati, Efa ben taki tu, fu di a ben gi piki tapu na aksi fu a sneki (Genesis 3:2-5). Efu a de so taki a sneki ben buweigi en skin noso en ede na wan noso tra fasi fu taki nanga Efa, dan dati wani taki dati Efa ben buweigi en anu noso en ede tu fu piki en baka. Ma Bijbel e sori taki Efa ben taki nanga en mofo.

Na apostel Paulus ben sori go na a kefal disi, di a ben warskow tra Kresten: „Mi e frede taki na a wán noso tra fasi, neleki fa a sneki nanga en trikifasi ben kori Efa, a denki fu unu ben sa kan kon pori.” A kefar di Paulus ben taki fu dati, ben kon fu „falsi apostel, bedrigi wrokoman”. A kefar di den „tumusi bun apostel” disi ben tyari kon, no ben abi fu du nomo nanga a fasi fa den ben e buweigi den anu noso na ede fu den te den ben e taigi sma sani. A ben abi fu du so srefi nanga den sani di den ben e taki nanga a mofo fu den. Den ben e gebroiki wortu na wan triki fasi fu kan bedrigi tra sma.—2 Korentesma 11:3-5, 13.

Ala di wan sten ben kori Efa na ini a dyari fu Eden, toku wi no abi reide fu denki taki a trutru sneki ben abi neki titei. A no ben abi den sani dati fanowdu srefisrefi. Di na engel fu Gado ben taki nanga Bileam nanga yepi fu wan uma buriki, dan a meti disi no ben abi wan frekti sistema na ini en gorogoro fanowdu leki san libisma abi fanowdu fu man taki (Numeri 22:26-31). A de krin taki, di a ’babaw meti disi di e tyari lai, ben taki nanga a sten fu wan libisma’, dan a krakti di ben du dati, ben komoto na a yeye kondre.—2 Petrus 2:16.

Bijbel e sori taki a yeye mekisani di meki a sneki taki nanga Efa, na „a fosi sneki, a wan di den e kari Didibri nanga Satan” (Openbaring 12:9). Den wortu di Efa ben man yere krin èn di a ben gi piki na tapu, ben komoto fu Satan di „e tan kenki ensrefi na ini wan engel fu leti”.—2 Korentesma 11:14.

[Prenki na tapu bladzijde 27]

„Seiker unu sa de leki Gado, unu sa sabi bun nanga ogri”