Fa Yu E Handri te Yu E Kisi fu Du Nanga Hoigrifasi?

NA INI a dyari fu Getsemane, Yudas Iskariot ben go na Yesus èn a „bosi en na wan lobi-ati fasi”. Sma ben gwenti fu du dati te den ben wani sori wan trawan taki den ben lobi en. Ma Yudas ben du dati soso fu sori den sma di ben kon te neti fu grabu Yesus, taki a man dati ben de a wan di den ben e suku (Mateus 26:48, 49). Yudas ben de wan hoigriman — wan sma di e tyari ensrefi tra fasi leki fa a de trutru, wan sma di e du neleki a de wan opregti sma, ala di a abi soso takru prakseri. A Griki wortu di vertaal leki „hoigriman”, wani taki „wan sma di e gi piki” èn a e sori go so srefi na wan preiman na tapu wan podium. Baka ten, sma ben gebroiki a wortu disi te den ben e taki fu iniwan sma di ben e tyari ensrefi tra fasi leki fa a ben de trutru, soso fu bedrigi trawan.

Fa yu e handri te yu e kisi fu du nanga hoigrifasi? Fu gi wan eksempre, yu e kisi atibron te yu e si taki den sma di e meki sigaret e meki reklame fu gi trawan deki-ati fu smoko, ala di datra buweisi taki sigaret no bun gi a gosontu? Yu e mandi nanga a hoigrifasi fu den sma di e sorgu trawan, fu di den e handri na wan ogri-ati fasi nanga den sma disi? A e hati yu te a e kon na krin taki wan sma di yu ben si leki wan trutru mati, sori fu de wan sma di no de fu frutrow? Sortu krakti a hoigrifasi fu den kerki abi na yu tapu?

„Helu fu Unu . . . Un Hoigriman!”

Prakseri a situwâsi di ben de na kerki sei na a ten di Yesus ben de na grontapu. Den leriman fu Wet nanga den Fariseiman ben du neleki den ben de getrow leriman fu a Wet fu Gado, ma den ben gi trawan leri di e kon fu libisma, èn den leri disi ben hari a prakseri fu sma puru fu Gado. Den leriman fu Wet nanga den Fariseiman ben wani taki sma ben musu hori densrefi soifri na iniwan fu den pikinpikin sani di ben skrifi na ini a wet, ma den trutru ben poti na wan sei den moro prenspari gronprakseri di ben abi fu du nanga lobi èn nanga sari-ati. Te den ben de na mindri tra sma, dan den ben du neleki den ben de getrow na Gado, ma te den ben de den wawan dan den ben abi soso takrufasi. Den noiti ben e handri akruderi den sani di den ben taki. Den ben e du sani soso fu di den ben wani taki „[tra] sma [ben musu] si den”. Den ben gersi „grebi di den [ben] karki weti, di e luku moi na dorosei, ma na inisei den lai nanga dedesma bonyo èn nanga ala sortu sani di no krin.” Yesus ben puru a hoigrifasi fu den kon na doro sondro taki a ben frede den. A ben taigi den doronomo: „Helu fu unu, leriman fu Wet nanga Fariseiman, un hoigriman!”—Mateus 23:5, 13-31.

Efu yu ben libi na ini a ten dati, dan neleki iniwan tra opregti-ati sma yu trutru ben o tegu gi a hoigrifasi fu den kerki tiriman disi (Romesma 2:21-24; 2 Petrus 2:1-3). Ma yu ben o gi pasi taki a hoigrifasi fu den leriman fu Wet nanga den Fariseiman meki yu lasi-ati na so wan fasi taki yu ben o drai baka gi ala sortu bribi, so srefi gi a wan di Yesus Krestes nanga den disipel fu en ben leri sma? Yu no ben o lasi te yu ben o handri na so wan fasi?

Te kerkisma e hoigri dan dati kan meki taki wi e drai baka gi kerki fu di wi e tegu gi den. Ma efu wi e handri na so wan fasi, dan dati kan meki so srefi taki wi no e si na opregtifasi fu tru anbegiman. Fu taki en leti, den srefi sani di wi e du fu kibri wisrefi gi hoigrifasi, kan meki taki wi e drai baka gi tru mati. Fu dati ede wi musu handri na wan reidelijk fasi èn na wan yoisti fasi te wi e kisi fu du nanga hoigrifasi.

„Tan na Ai”

Na a fosi presi, wi musu leri fu kon sabi suma na hoigriman. A sani disi a no wan sani di  makriki ala ten. Wan famiri kisi wan bigi lasi bifo den kon si taki den trutru ben abi fu du nanga wan hoigriman. A mama fu a famiri disi ben go na ini wan coma (a ben gersi leki a ben dede kaba). Fu di a mama no ben kisi bun yepi, meki a famiri ben wani tyari na ati-oso go na krutu. Na afkati di ben musu krutu na afersi fu den ben de so srefi wan domri na ini wan fu den kerki drape. Ala di na ati-oso ben pai 3,4 milyun Amerkan dala fu seti na afersi disi, toku a famiri kisi moro bigi problema. A mama dede leki wan pôtisma, èn moni no ben de fu pai gi a beri fu en. Fu san ede? Bika na afkati ben teki pikinmoro ala a moni. Wan koranti di e skrifi tori fu krutubangi ben taki fu na afkati disi: „Efu a ben e preiki na ini kerki fu leri trawan fu handri soleki fa a ben du . . . , dan a boskopu fu en ben sa musu de disi: meki wi fufuru sani fu trawan, na presi fu: meki wi begi.” Fa wi kan kibri wisrefi fu den sortu sma dati?

Den sma na ini a ten fu Yesus ben kisi fu du nanga hoigrifasi fu kerki tiriman. Fu dati ede a ben gi den a rai fu „tan na ai” (Mateus 16:6; Lukas 12:1). Iya, wi musu luku bun san wi e du. Sma kan du neleki den abi den moro bun prakseri èn den kan tyari densrefi na wan fasi di e meki trawan denki taki den na opregti sma, ma wi musu luku bun fu no teki sma wantewante leki fa den sori fu de. Wi no ben o luku wi moni finifini fu si efu a bun, te wi kon sabi taki trawan e gebroiki falsi moni?

Hoigriman ben kon srefi na ini a tru Kresten gemeente. Na disipel Yudas ben warskow sma gi den, fu di a ben taki: „Den sma disi na den klepston di kibri na ondro watra tapu den lobi fesa fu unu ala di den e hori fesa makandra nanga unu, skapuman di e wei densrefi sondro fu frede; den de leki wolku sondro watra di winti e wai go-kon, den de leki bon na ini herfst, ma sondro froktu.”—Yudas 12.

Wan sma kan du neleki a abi lobi-ati fasi, ma fu taki en leti, a e prakseri ensrefi nomo èn e fruteri sma sani di no de akruderi a Wortu fu Gado. Fu ’tan na ai’ wani taki dati wi musu sorgu taki so wan sma no e kori wi. A sma dati de leki wan klepston nanga srapu penti di de leti na ondro tiri watra, a kan tyari pori na yeye fasi kon gi wan trawan di no e luku bun (1 Timoteus 1:19). A hoigriman kande sa pramisi wi furu kowru-ati na yeye fasi, ma a e sori fu de leki wan ’wolku sondro watra’ di no e meki alen kon. Neleki wan bon di no e meki froktu, na so wan bedrigiman no e meki tru Kresten froktu (Mateus 7:15-20; Galasiasma 5:19-21). Iya, wi musu luku bun nanga den sortu bedrigiman dati. Ma wi no musu denki taki ala sma e prakseri fu bedrigi wi.

„No Krutu Sma Moro”

A makriki srefisrefi gi sma di no de volmaakti fu taki fu den fowtu fu trawan, ala di den no e luku den eigi fowtu! Ma a gwenti disi kan meki taki wi e tron hoigriman. „Hoigriman!” na so Yesus ben taki. „Puru fosi a barki fu yu eigi ai, èn dan yu sa si krin fa yu kan puru a pikin splentri na ini na ai fu yu brada.” Wi e handri nanga koni te wi e gi yesi na a rai disi: „No krutu sma moro, so taki sma no kan krutu unu; bika nanga a krutu di unu e krutu trawan, nanga dati unu sa kisi krutu . . . Fu san ede dan yu e luku a pikin splentri na ini na ai fu yu brada, ma yu no e si a barki na ini yu eigi ai?”—Mateus 7:1-5.

Te a gersi leki trawan e handri na wan hoigri fasi, dan wi musu luku bun fu no taki wantewante taki den na hoigriman. Fu gi wan eksempre, na ini Antiokia, na apostel Petrus ben „bigin hari ensrefi puru èn a bigin hori ensrefi aparti” fu den  Kresten di no ben de Dyu, fu di a ben wani plisi den Dyu fisitiman fu Yerusalem. Barnabas so srefi ’ben bigin handri tu na wan falsi fasi makandra nanga Petrus èn nanga trawan’. Petrus ben du disi ala di a ben kisi a spesrutu grani fu opo a pasi gi den Heiden so taki den ben kan tron memre fu a Kresten gemeente (Galasiasma 2:11-14; Tori fu den Apostel 10:24-28, 34, 35). Ma a fowtu disi di Barnabas nanga Petrus ben meki, seiker no ben de wan buweisi taki den ben abi den srefi takru eigifasi di den leriman fu Wet nanga den Fariseiman, noso Yudas Iskariot ben abi.

„Meki Un Lobi De Sondro Hoigrifasi”

„Te joe gi presenti na dem poti soema, no blo wan trompeti na fesi — so leki dem falsi soema lobi foe doe na ini dem Djoe kerki efoe na tapoe strati so dati dem kan kisi bigi nem foe libisoema” (Mateus 6:2, Da Bijbel na ini Sranantongo). „Meki un lobi de sondro hoigrifasi”, na so na apostel Paulus ben skrifi (Romesma 12:9). A ben gi a yonkuman Timoteus deki-ati fu abi „lobi di komoto na wan krin ati . . . èn di komoto na bribi di de sondro hoigrifasi” (1 Timoteus 1:5). Efu wi abi trutru lobi nanga bribi — sondro taki den pori fu di wi e prakseri wisrefi nomo èn fu di wi abi bedrigifasi — dan trawan sa frutrow wi. Wi sa gi den sma na wi lontu trutru tranga nanga deki-ati (Filipisma 2:4; 1 Yohanes 3:17, 18; 4:20, 21). Èn san de moro prenspari, Yehovah sa feni wi bun.

Na a tra sei, hoigrifasi sa tyari dede kon te fu kaba gi sma di de hoigriman. Te fu kaba, a sa de krin fu si suma na hoigriman. „Nowan sani kibri di no sa kon na krin”, na so Yesus Krestes ben taki, „èn nowan kibritori de di sma no sa kon sabi” (Mateus 10:26; Lukas 12:2). A koni Kownu Salomo ben fruklari: „A tru Gado srefi sa krutu ibri sortu wroko di abi fu du nanga ibri sani di kibri, fu si efu a bun noso efu a takru.”—Preikiman 12:14.

Na a srefi ten, fu san ede wi ben o meki a hoigrifasi fu trawan abi so wan krakti na wi tapu taki wi no e nyan bun fu a lobi fu den tru mati fu wi moro? Wi kan luku bun san wi e du, sondro taki wi e tweifri tumusi na san tra sma e du. Èn san moro prenspari, meki wi sori taki wi eigi lobi nanga bribi e tan sondro hoigrifasi.—Yakobus 3:17; 1 Petrus 1:22.

[Prenki na tapu bladzijde 22, 23]

Yu ben o drai baka gi Yesus Krestes nanga den bakaman fu en, fu di den leriman fu Wet nanga den Fariseiman ben de hoigriman?