Yehovah Na Wi Kibripresi

„Fu di yu taki: ’Yehovah na mi kibripresi,’ . . . nowan rampu sa miti yu.”—PSALM 91:9, 10.

1. Fu san ede wi kan taki dati Yehovah na wi kibripresi?

YEHOVAH na wan trutru kibripresi gi a pipel fu en. Te wi de getrow dorodoro na Gado, dan a kan taki ’wi e kisi kwinsi na ala fasi, ma wi no e kisi kwinsi na so wan fasi taki wi no man buweigi moro; wi no sabi san fu du moro, ma wi no de sondro wan fasi fu komoto; wi e kisi frufolgu, ma Gado no e libi wi na baka sondro yepi; den e trowe wi na gron, ma wi no e kisi pori.’ Fu san ede? Fu di Yehovah e gi wi „krakti di bigi pasa marki” (2 Korentesma 4:7-9). Iya, wi hemel Tata e yepi wi fu tan meki muiti fu libi na wan fasi di a feni bun, èn wi kan meki den wortu fu a psalm skrifiman abi krakti na wi tapu: „Fu di yu taki: ’Yehovah na mi kibripresi,’ yu meki a Moro Heiwan srefi tron yu tanpe; nowan rampu sa miti yu.”—Psalm 91:9, 10.

2. San wi kan taki fu Psalm 91 èn fu a dyaranti di a e gi wi?

² A kan taki na Moses ben skrifi den wortu fu Psalm 91. Den wortu di skrifi na a bigin fu Psalm 90 e sori taki Moses skrifi a psalm dati. Ala di Psalm 91 e kon leti na baka Psalm 90, toku noti no skrifi na a bigin fu a Psalm 91 di e sori taki wan tra sma skrifi a psalm dati. Kande Psalm 91 na wan singi pe wán sma nomo ben bigin singi fosi  (91:1, 2), baka dati wan grupu fu sma ben e piki tapu a singi fu a sma dati (91:3-8). Baka dati a wan sma ben singi ete wan leisi (91:9a), dan a grupu fu sma ben e piki en baka na tapu san a ben singi (91:9b-13). Dan wán singiman nomo ben e singi den lasti wortu (91:14-16). Awansi fa sma ben e singi Psalm 91, a psalm disi e gi a grupu fu salfu Kresten a dyaranti taki sani sa waka bun nanga den na yeye fasi. Den getrow kompe fu den di gi den srefi abra na Gado e kisi wan srefi sortu dyaranti. * Meki wi luku a psalm disi leki a ben sa abi fu du nanga ala den futuboi disi fu Yehovah.

Kefar No De na ini a ’Kibripresi fu Gado’

3. (a) San na „a kibripresi fu a Moro Heiwan”? (b) San wi e ondrofeni fu di wi ’feni wan tanpresi na ini a kowrupresi fu na Almaktiwan srefi’?

³ A psalm skrifiman e singi: „Iniwan sma di e tan na ini a kibripresi fu a Moro Heiwan, sa feni wan tanpresi na ini a kowru presi fu na Almaktiwan. Mi sa taigi Yehovah: ’Yu na mi kibripresi nanga mi fortresi, mi Gado di mi sa frutrow’” (Psalm 91:1, 2). „A kibripresi fu a Moro Heiwan” na wan agersi kibripresi gi wi èn spesrutu gi den salfuwan, di Didibri e suku nomonomo fu du den ogri (Openbaring 12:15-17). A ben o pori wi alamala efu a no ben de so taki wi e kisi kibri fu di wi na sma di e tan nanga Gado leki yeye fisitiman. Fu di wi ’feni wan tanpresi na ini a kowrupresi fu na Almaktiwan’, meki wi e nyan bun fu a kibri di a kowrupresi fu Gado e gi (Psalm 15:1, 2; 121:5). Wi Soeverein Masra Yehovah na a moro bun kibripresi èn a moro tranga fortresi.—Odo 18:10.

4. Sortu wrokosani Satan, „a sma di e fanga fowru”, e gebroiki èn fa wi kan lowe komoto fu den?

⁴ A psalm skrifiman e taki moro fara: „Ensrefi [Yehovah] sa frulusu yu fu a trapu fu a sma di e fanga fowru, fu a pestsiki di e tyari bigi rampu kon” (Psalm 91:3). Te wan sma na ini owruten Israèl ben e fanga fowru, dan a ben gwenti fu gebroiki trapu noso krafana fu du dati. Wan tu fu den trapu di Satan, „a sma di e fanga fowru”, e gebroiki, na en ogri-ati organisâsi èn so srefi den „triki” fu en (Efeisesma 6:11, futuwortu). Satan e poti trapu di wi no man si na tapu wi pasi. Den trapu disi de fu hari wi fu go du ogri èn fu pori wi yeyefasi (Psalm 142:3). Ma fu di wi no wani abi noti fu du nanga onregtfardikifasi, meki ’wi sili de leki di fu wan fowru di e lowe komoto fu a trapu’ (Psalm 124:7, 8). Wi de nanga tangi na ati trutru taki Yehovah e frulusu wi fu a godelowsu „sma di e fanga fowru”!—Mateus 6:13.

5, 6. Sortu „pestsiki” tyari „bigi rampu” kon, èn fu san ede a pipel fu Yehovah no e brokokindi gi a „pestsiki” dati?

⁵ A psalm skrifiman e taki fu „pestsiki di e tyari bigi rampu kon”. Neleki wan siki di e panya esi-esi, na so wan sani de tu di e „tyari bigi rampu kon” gi a libisma famiri èn gi den sma di e horibaka gi a reti di Yehovah abi fu tiri. A historia skrifiman Arnold Toynbee ben skrifi fu a tori disi: „Fu sensi a kaba fu a Di fu Tu Grontapufeti, dan a tumusi bigi lobi di sma abi gi den eigi kondre, meki taki a nomru fu kondre di teki srefidensi kon tu tron so furu . . . A fasi fa libisma e denki now, e tyari moro nanga moro pratifasi kon.”

⁶ Na ini den yarihondro di pasa, son tiriman meki taki moro nanga moro trobi kon na mindri difrenti kondre, èn leki bakapisi fu dati pratifasi kon. Den tiriman disi ben komanderi sma so srefi fu anbegi den, noso fu anbegi difrenti popki noso prenki. Ma noiti Yehovah no gi pasi taki den getrow futuboi fu en broko kindi gi so wan „pestsiki” (Danièl 3:1, 2, 20-27; 6:7-10, 16-22). Leki wan lobi-ati bradafasi na heri grontapu, wi e anbegi Yehovah wawan èn wi e hori wisrefi aparti fu sani fu grontapu soleki fa Bijbel e leri wi. So srefi wi e erken na wan opregti fasi taki „na ini ibri nâsi a sma di e frede [Gado] èn di e wroko regtfardikifasi, de bun na en” (Tori fu den Apostel 10:34, 35; Exodus 20:4-6; Yohanes 13:34, 35; 17:16; 1 Petrus 5:8, 9). Ala di „bigi rampu” e miti wi, fu di leki Kresten wi e kisi frufolgu, toku wi de nanga prisiri èn nowan ogri na yeye fasi e miti wi „ini a kibripresi fu a Moro Heiwan”.

7. Fa Yehovah e kibri wi „nanga en frei”?

⁷ Fu di Yehovah na wi kibripresi, meki wi e kisi trowstu fu den wortu: „Nanga en frei a sa tapu  pasi gi trawan fu kon na yu, èn na ondro en frei yu sa feni kibri. En getrowfasi sa de wan bigi skilt nanga wan fortresi” (Psalm 91:4). Gado e kibri wi na a srefi fasi leki fa wan papa noso wan mama fowru e tan frei leti na tapusei fu den pikin fu en fu man kibri den (Yesaya 31:5). ’Nanga en frei Gado e tapu pasi gi trawan fu kon na wi.’ Wan fowru e tapu en pikin nanga den frei fu en, èn na so fasi a e kibri den fu tra meti di ben sa wani du den ogri. Neleki yongu fowru, wi e feni kibri na ondro den agersi frei fu Yehovah, fu di wi go kibri na ini a tru Kresten organisâsi.—Rut 2:12; Psalm 5:1, 11.

8. Fa a „getrowfasi” fu Yehovah de leki wan bigi skilt èn wan tranga fortresi?

⁸ Wi e frutrow tapu „getrowfasi”. A de leki wan bigi owruten skilt, di furutron ben gersi wan doro èn a ben bigi nofo fu tapu wan sma en heri skin (Psalm 5:12). Te wi e frutrow taki wi o kisi kibri na so wan fasi, dan dati e meki taki wi de sondro frede (Genesis 15:1; Psalm 84:11). Neleki fa a de nanga a bribi fu wi, na so a getrowfasi fu Gado na wan bigi skilt di e tapu den faya peiri fu Satan èn e kibri wi gi den kofu fu wi feanti (Efeisesma 6:16). A de wan tranga fortresi tu, wan bigi bergi di e kibri wi, èn dati meki wi e tanapu kánkan.

’Wi No Sa Frede’

9. Fu san ede meki a neti kan de wan ten di e meki wi frede? Ma fu san ede meki wi no e frede?

⁹ A psalm skrifiman e taki fu a kibri di Gado e gi sma: „Yu no sa frede nowan sani di kan meki yu skreki na neti, èn yu no sa frede a peiri di e frei na deiten, yu no sa frede tu gi a pestsiki di e waka na ini a dungru, noso gi a pori di e pori sani na wan ogri-ati fasi na mindridei” (Psalm 91:5, 6). Fu di furu ogri e du na ini dungru, meki a neti kan de wan ten di e meki sma frede. Na ini a dungru na yeye fasi di e tapu grontapu nownowde, den feanti fu wi e gebroiki triki fasi fu meki taki wi no e warderi yeye afersi moro èn fu meki wi tapu nanga wi preikiwroko. Ma ’wi no e frede nowan sani di kan meki wi skreki na neti’, fu di Yehovah e kibri wi.—Psalm 64:1, 2; 121:4; Yesaya 60:2.

10. (a) San a sori taki „a peiri di e frei na deiten” wani taki, èn fa wi e handri te wi e kisi fu du nanga dati? (b) San „a pestsiki di e waka na ini a dungru” e du èn fu san ede meki wi no e frede en?

¹⁰ A sori taki „a peiri di e frei na deiten” abi fu du nanga na ogri sani di sma e taki (Psalm 64:3-5; 94:20). Sma kan gens a santa diniwroko na a fasi disi. Ma te wi e tan fruteri den, den tru tori fu Gado ala di den e gens wi na so wan fasi, dan dati no sa abi bun bakapisi. Boiti dati, wi no e frede „a pestsiki di e waka na ini a dungru”. Disi na wan pestsiki na agersifasi di kweki na ini a dungru fu a grontapu disi di lai nanga takru gwenti nanga gronprakseri èn nanga kerki leri di no bun; wan grontapu di de na ini a makti fu Satan (1 Yohanes 5:19). A pestsiki disi e pori na frustan nanga na ati fu sma, èn a e meki taki den no e kon sabi fu Yehovah, fu den prakseri fu en, noso fu den lobi-ati seti fu en (1 Timoteus 6:4). Ala di wi de na ini a dungru disi, toku wi no e frede, fu di wi abi bogobogo leti na yeye fasi.—Psalm 43:3.

11. San e pasa nanga den sma di e ondrofeni ’a pori di e pori sani na wan ogri-ati fasi na mindridei’?

 ¹¹ „A pori di e pori sani na wan ogri-ati fasi na mindridei” no e frede wi tu. „Na mindridei” wani taki kande a sokari leti fu grontapu. Den sma di e bigin si materia sani na a fasi fa grontapu en si den, sa ondrofeni bigi pori na yeye fasi (1 Timoteus 6:20, 21). Te wi e meki a Kownukondre boskopu bekènti nanga deki-ati, dan wi no e frede nowan feanti, bika Yehovah na wi Kibriman.—Psalm 64:1; Odo 3:25, 26.

12. Na a sei fu suma den dusundusun sma e „fadon”, èn na sortu fasi den e fadon?

¹² A psalm skrifiman e taki moro fara: „Wán dusun sma sa fadon leti na yu sei èn tin dusun na yu reti-anu sei; ma a no sa kon krosibei fu yu. Nanga yu ai nomo yu sa luku èn yu sa si a strafu srefi di den ogriwan sa kisi” (Psalm 91:7, 8). Fu di furu sma no meki Yehovah tron a kibripresi fu den, meki taki na yeye fasi den e „fadon leti na yu sei”. Te yu luku en bun, dan „tin dusun” fadon na a „reti-anusei” fu den yeye Israèlsma na ini a ten disi (Galasiasma 6:16). Ma awansi wi na salfu Kresten noso wi na den getrow kompe fu den di gi wisrefi abra na Gado, nowan ogri sa miti wi na ini „a kibripresi” fu Gado’. Wi e ’luku nomo èn wi e si a strafu di den ogriwan wan e kisi’. Den e kisi problema na ini bisnis afersi, na kerki sei, èn na tra fasi.—Galasiasma 6:7.

 ’Nowan Ogri No Sa Miti Wi’

13. Sortu rampu no e miti wi èn fu san ede dati de so?

¹³ Ala di seikerfasi pikinmoro no de fu feni na a grontapu disi, toku wi e poti Gado na a fosi presi na ini wi libi èn wi e kisi deki-ati fu den wortu fu a psalm skrifiman: „Fu di yu taki: ’Yehovah na mi kibripresi’, yu meki a Moro Heiwan srefi tron yu tanpe; nowan rampu sa miti yu, èn nowan takru siki srefi sa kon krosibei fu yu tenti” (Psalm 91:9, 10). Iya, Yehovah na wi kibripresi. Ma wi so srefi e meki a Moro Hei Gado tron ’wi tanpe’, pe wi e kisi kibri. Wi e prèise Yehovah fu di En na a Moro Hei Makti na ini hemel nanga grontapu. Wi e ’tan’ na ini en fu di En na a Sma di e gi seikerfasi, èn wi e preiki a bun nyunsu fu en Kownukondre (Mateus 24:14). Fu dati ede, ’nowan rampu sa miti wi’, dati wani taki nowan fu den rampu di kari na fesi ini a psalm disi. Srefi te wi nanga tra sma e ondrofeni rampu soleki gronseki, bigi winti, frudu, angriten, nanga den takru bakapisi fu orloku, dan toku den sani disi no e pori wi bribi noso wi yeye seikerfasi.

14. Fu san ede wi leki futuboi fu Yehovah no e kisi takru siki di e tyari dede kon na yeye fasi?

¹⁴ Den salfu Kresten de leki freimde sma di e tan na ini tenti èn den e hori densrefi aparti fu a seti fu sani disi (1 Petrus 2:11). ’Nowan takru siki srefi e kon krosibei fu a tenti fu den.’ Awansi wi abi a howpu fu libi na hemel noso a howpu fu libi na grontapu, wi no de wan pisi fu grontapu. Fu dati ede, wi no e kisi den takru siki fu en di e tyari dede kon na yeye fasi; siki soleki hurudu, a lobi gi materia gudu, falsi bribi, èn na anbegi fu a „werdri meti” nanga a „popki” fu en, den Verenigde Nâsi.—Openbaring 9:20, 21; 13:1-18; Yohanes 17:16.

15. Na sortu fasi wi e kisi yepi fu den engel?

¹⁵ A psalm skrifiman e taki moro fara fu a kibri di wi e kisi: „A [Yehovah] sa gi en eigi engel wan komando di abi fu du nanga yu, fu kibri yu na ini ala den pasi fu yu. Na tapu den anu den sa tyari yu, so taki yu no sa naki yu futu na nowan ston” (Psalm 91:11, 12). Den engel kisi makti fu kibri wi (2 Kownu 6:17; Psalm 34:7-9; 104:4; Mateus 26:53; Lukas 1:19). Den e kibri wi na ini ’ala den pasi fu wi’ (Mateus 18:10). Leki Kownukondre preikiman wi e kisi tiri fu den engel èn den e kibri wi. Fu dati ede wi no e naki futu fadon na yeye sei (Openbaring 14:6, 7). Srefi ’ston’ soleki a tapu di lanti kan tapu a wroko fu wi, no meki wi naki futu fadon èn lasi a bun-ati fu Gado.

16. San na a difrenti na mindri a fasi fa wan „yongu lew” e du sma ogri nanga a fasi fa wan „kobrasneki” e du dati? Fa wi e handri te wi e ondrofeni den ogri disi?

¹⁶ A psalm skrifiman e go doro: „Na tapu a yongu lew èn na tapu a kobrasneki yu sa trapu; nanga yu futu yu sa trapu a yongu lew nanga neki-wiwiri nanga a bigi sneki kiri” (Psalm 91:13). Neleki fa wan yongu lew e dyompo kon langalanga na wan sma tapu, na so son wan fu den feanti fu wi e sori krinkrin taki den na gensman. Den e meki wet fu tapu a preikiwroko fu wi. Ma boiti taki sma e kon feti langalanga nanga wi, dan den e du dati tu na wan kibri fasi te wi no e fruwakti dati, neleki fa wan kobrasneki e dyompo komoto fu wan kibripresi kon na wan sma tapu. Son ten, kerki tiriman e pruberi na wan kibri fasi fu du wi ogri. Den e du dati nanga yepi fu sma di e meki wet, nanga yepi fu krutubakra, èn nanga yepi fu tra sma. Ma fu di Yehovah e horibaka gi wi, dan wi e tan suku yepi na fesi krutu, sondro fu meki trobi. Na so wan fasi wi e ’opo taki gi a bun nyunsu èn wi e poti en steifi akruderi a wet’.—Filipisma 1:7; Psalm 94:14, 20-22.

17. Fa wi e trapu a „yongu lew nanga neki-wiwiri” kiri?

¹⁷ A psalm skrifiman e taki fu a trapu di wi sa trapu „a yongu lew nanga neki-wiwiri èn a bigi sneki” kiri. Wan yongu lew nanga neki-wiwiri kan krasi srefisrefi, èn wan bigi sneki kan bigi srefisrefi (Yesaya 31:4). Ma awansi o krasi wan yongu lew nanga neki wiwiri de te a e dyompo go langalanga na wan sma tapu, toku wi kan trapu en kiri na wan agersifasi. Wi kan du dati fu di wi e gi yesi na Gado moro leki na libisma noso organisâsi di de leki wan lew (Tori fu den Apostel 5:29). Na so fasi na ogri-ati „lew” no e gi wi mankeri na yeye sei.

18. Fu suma „a bigi sneki” kande e memre wi, èn san wi musu du te a e pruberi fu du wi ogri?

¹⁸ A Griki Septuaginta e kari „a bigi sneki”, „wan draak”. Disi kan memre wi fu „a bigi draak . . . , a fosi sneki, a wan di den e kari Didibri  nanga Satan” (Openbaring 12:7-9; Genesis 3:15). A de leki wan takru sneki di man masi èn swari a sani di a kiri (Yeremia 51:34). Te Satan e pruberi fu tai wi hori nanga den trapu fu en, te a e pruberi fu masi wi nanga yepi fu den banawtu fu a grontapu disi, èn te a e pruberi fu swari wi, dan meki wi du muiti fu fri wisrefi fu en èn meki wi trapu a „bigi sneki” disi kiri (1 Petrus 5:8). A salfu fikapisi musu du disi efu den wani abi wan prati na a kontru fu Romesma 16:20.

Yehovah—A Sma Di E Kibri Wi

19. Fu san ede meki wi e go na Yehovah fu feni kibri?

¹⁹ A psalm skrifiman e taki fu tru anbegiman neleki na Gado srefi e taki: „Fu di a lobi mi, dati meki mi sa gi en frulusu so srefi. Mi sa kibri en fu di a kon sabi mi nen” (Psalm 91:14). Den wortu „mi sa kibri en” wani taki trutru, „mi sa poti en hei,” dati wani taki na wan presi pe nowan sma man doro en. Leki anbegiman fu Yehovah wi e go kibri na en, spesrutu fu di ’wi lobi en’ (Markus 12:29, 30; 1 Yohanes 4:19). Gado fu en sei, e ’frulusu wi’ fu wi feanti. Noiti den sa man pori wi. Na presi fu dati wi sa kisi frulusu fu di wi sabi a nen fu Gado èn wi e kari en nen na wan fasi di e sori taki wi abi bribi na ini En (Romesma 10:11-13). Wi abi a fasti bosroiti so srefi, fu ’waka na ini a nen fu Yehovah fu têgo’.—Mika 4:5; Yesaya 43:10-12.

20. San Yehovah e pramisi en getrow futuboi soleki fa a kaba fu Psalm 91 e taki?

²⁰ Na a kaba fu Psalm 91, Yehovah e taki fu en getrow futuboi: „A sa kari mi, èn mi sa piki en. Mi sa de nanga en te a de na ini banawtu. Mi sa frulusu en èn mi sa gi en glori. Mi sa gi en wan langa libi, èn mi sa meki a si a frulusu fu mi” (Psalm 91:15, 16). Te wi e kari Gado na ini begi akruderi a wani fu en, dan a e piki wi (1 Yohanes 5:13-15). Wi pasa furu banawtu kaba fu di Satan meki taki wi kisi gens na wan ogri-ati fasi. Ma den wortu „mi sa de nanga en te a de na ini banawtu” e sreka wi gi tesi di wi kan kisi na ini a ten di e kon èn den e gi wi a dyaranti taki Gado sa horibaka gi wi te a ogri sistema disi o kisi pori.

21. Na sortu fasi den salfuwan kisi glori kaba?

²¹ Ala di Satan e gens wi fayafaya, toku a heri grupu fu salfuwan di de na wi mindri sa kisi glori na ini hemel na a ten di Yehovah poti, dati wani taki baka wan „langa libi” na grontapu. Ma toku a fruwondru fasi fa Gado kibri sma, tyari glori na yeye fasi kaba gi den salfuwan. Den e si en leki wan grani trutru fu teki fesi leki Kotoigi fu Yehovah na grontapu na ini den lasti dei disi! (Yesaya 43:10-12) A moro bigi sani di Yehovah sa du fu frulusu a pipel fu en, sa de na a ten fu a bigi feti fu Armagedon. Na a ten dati a sa buweisi krinkrin taki na En abi a reti fu tiri èn a sa gi glori so srefi na en santa nen.—Psalm 83:18; Esekièl 38:23; Openbaring 16:14, 16.

22. Suma na den sma di ’sa si a frulusu fu Yehovah’?

²² Awansi wi na salfu Kresten noso den getrow kompe fu den di gi wisrefi abra na Gado, wi e suku kibri na En. Na a ten fu „a bigi èn frede dei fu Yehovah”, den sma di e horibaka gi Gado na wan getrow fasi, sa kisi frulusu (Yoèl 2:30-32). Sonwan fu wi sa de fu a „bigi ipi” fu sma di e tan na libi fu go na ini a nyun grontapu fu Gado. Te wi e tan getrow na a ten fu a lasti tesi, dan Gado sa ’satisferi wi fu di a sa gi wi wan langa libi’. Disi wani taki dati wi sa libi fu têgo. Gado sa wiki so srefi ipi-ipi sma na ini dede (Openbaring 7:9; 20:7-15). Iya, Yehovah sa prisiri srefisrefi fu ’meki wi si a frulusu’ di a sa gi wi nanga yepi fu en manpikin Yesus Krestes (Psalm 3:8). Nanga den tumusi moi fruwakti disi na wi fesi, meki wi tan suku yepi na Gado fu man teri den dei fu wi na wan fasi di sa gi en glori. Meki wi tan sori nanga yepi fu den sani di wi e taki èn den sani di wi e du, taki Yehovah na wi kibripresi.

[Futuwortu]

San Yu Ben Sa Piki?

• San na „a kibripresi fu a Moro Heiwan”?

• Fu san ede meki wi no e frede?

• Fa a de taki ’nowan rampu sa miti wi’?

• Fu san ede wi kan taki dati Yehovah na a sma di e gi wi frulusu?

[Aksi fu a tori disi]

[Prenki na tapu bladzijde 17]

Yu sabi fa a getrowfasi fu Yehovah na wan bigi skilt gi wi?

[Prenki na tapu bladzijde 18]

Yehovah e yepi den futuboi fu en fu du a diniwroko fu den, ala di sma e du ogri nanga den di den no ben fruwakti èn e gens den krinkrin

[Sma di abi a reti fu a prenki]

Kobra: A. N. Jagannatha Rao, Trustee, Madras Snake Park Trust