Leri Yu Ati fu Frede Yehovah

„Efu den ben o leri na ati disi fu den nomo fu frede mi èn fu hori ala den komando fu mi ala ten.”—DEUTERONOMIUM 5:29.

1. Fa wi kan de seiker taki wan dei sa kon pe ala libisma sa libi sondro frede?

FREDE na wan sani di e trobi a libisma famiri someni yarihondro kaba. A frede fu de nanga angri, fu kon siki, fu miti nanga ogridu, noso fu orloku, e gi milyunmilyun sma broko-ede doronomo. Fu dati ede den bigin wortu fu a dokumenti di sma e kari a Fruklari fu den Reti fu Ala Libisma, e taki dati sma abi a winsi fu seti wan grontapu pe ala libisma sa libi sondro frede. * Koloku taki na Gado srefi e gi wi a dyaranti taki so wan grontapu sa kon, ala di a no libisma o tyari en. Yehovah e pramisi wi nanga yepi fu en profeiti Mika, taki na ini a nyun regtfardiki grontapu fu en, ’no wan sma sa de di sa meki a pipel fu en beifi’.—Mika 4:4.

2. (a) Na sortu fasi den Buku fu Bijbel e gi wi deki-ati fu frede Gado? (b) Sortu aksi kan opo kon te wi e prakseri a plekti di wi abi fu frede Gado?

² Na a tra sei, frede kan abi bun krakti na wi tapu. Ibri leisi baka, den Buku fu Bijbel e gi den futuboi fu Gado a deki-ati fu frede Yehovah. Moses ben taigi den Israèlsma: „Na Yehovah yu Gado yu musu frede, èn na en yu musu dini” (Deuteronomium 6:13). Furu yarihondro baka dati, Salomo ben skrifi: „Frede a tru Gado èn hori den komando fu en. Bika disi na a heri plekti fu libisma” (Preikiman 12:13). Na a srefi fasi, wi e gi ala sma deki-ati fu „frede Gado èn gi en glori”. Wi e du dati nanga yepi fu a preikiwroko di wi e du na ondro a tiri fu den engel (Openbaring 14:6, 7). Boiti taki Kresten musu frede Yehovah, dan den musu lobi en nanga den heri ati (Mateus 22:37, 38). Fa wi kan lobi Gado èn toku abi frede gi en? Fu san ede wi musu frede wan Gado fu lobi? Sortu winimarki wi sa kisi efu wi e kweki frede gi Gado? Fu man piki den aksi disi, wi musu frustan fosi san frede gi Gado wani taki èn fa a sortu frede disi de wan prenspari pisi fu a matifasi fu wi nanga Yehovah.

Bigi Lespeki, Nanga Frede

3. San frede gi Gado wani taki?

³ Kresten musu abi frede gi a Mekiman fu den. Wan fasi fu fruklari a sortu frede disi na taki a de „wan firi fu bigi lespeki gi a Mekiman èn a wani di wan sma no wani du wan sani di no e plisi en”. So bun, frede gi Gado abi krakti tapu tu prenspari afersi na ini wi libi. A abi krakti tapu a fasi fa wi e denki fu Gado èn tapu a fasi fa wi e tyari wisrefi na ini afersi di Gado no lobi kwetikweti. A no de fu taki dati ala den tu afersi disi na prenspari sani di wi musu luku finifini. Soleki fa a buku Expository Dictionary of New Testament Words fu Vine e sori, dan te Kresten abi a frede disi di e sori a bigi lespeki di den abi, dan dati na ’wan sani di e tiri den libi na ini yeye afersi èn na ini afersi fu bun gwenti nanga gronprakseri’.

4. Fa wi kan leri fu kisi bigi lespeki gi wi Mekiman?

⁴ Fa wi kan leri fu kisi bigi lespeki gi wi Mekiman? Te wi e si wan tumusi moi kontren, wan bun bigi sula, noso den kefalek moi kloru na ini a loktu te son e dongo, dan dati e fruwondru wi srefisrefi. A firi disi e kon moro tranga te wi man gebroiki wi ai fu bribi, fu si taki na Gado meki den moi sani disi. Moro fara a de so taki neleki Kownu David, wi e kon frustan taki wi no prenspari srefisrefi te wi teki wisrefi gersi den fruwondru mekisani fu Yehovah. „Te mi e si yu hemel, den wroko fu yu finga, a mun nanga den stari di yu sreka, dan san na a libisma di man  dede, taki yu hori en na prakseri?” (Psalm 8:3, 4) A dipi firi disi fu fruwondru e meki wi kisi bigi lespeki, èn disi e pusu wi fu gi Yehovah tangi èn fu prèise en gi ala den sani di a e du gi wi. David ben skrifi so srefi: „Mi sa prèise yu fu di yu meki mi na wan tumusi fruwondru fasi di e gi lespeki frede. Den wroko fu yu na wondruwroko, dati mi sili sabi heri bun.”—Psalm 139:14.

5. Fu san ede wi musu frede Yehovah, èn sortu bun eksempre wi abi ini a tori disi?

⁵ Te wi abi bigi lespeki gi Gado, dan dati sa yepi wi fu abi a yoisti sortu frede gi a krakti di Gado abi leki Mekiman, èn gi a makti di a abi leki a Sma di abi a reti fu tiri ala sani. Na ini wan fisyun na apostel Yohanes ben si „den wan di e wini a werdri meti èn di e wini a popki fu en”. Den disi na den salfu bakaman fu Krestes na ini hemel. Den e meki bekènti: „Bigi èn tumusi moi den wroko fu yu de, Yehovah Gado, na Almaktiwan. Regtfardiki èn tru den pasi fu yu de, Kownu fu ten di no abi kaba. Suma no sa frede yu trutru, Yehovah, èn gi yu nen glori?” (Openbaring 15:2-4) Den wan di sa tiri makandra nanga Krestes na ini en hemel Kownukondre, abi frede gi Gado fu di den abi bigi lespeki gi a makti fu en. Disi e meki taki den e gi Gado grani leki a moro hei tirimakti di de. Te wi e prakseri ala den sani di Yehovah du èn a regtfardiki fasi fa a e tiri ala sani, dan wi abi nofo reide fu abi frede gi en, a no so?—Psalm 2:11; Yeremia 10:7.

6. Fu san ede wi musu abi a yoisti sortu frede fu no wani du wan sani di Yehovah no feni bun?

⁶ Ma boiti taki wi musu abi bigi lespeki gi Gado, dan a frede di wi musu abi gi en, wani taki dati wi no wani du sani di Gado no e feni bun noso wi no wani trangayesi en. Fu san ede? Bika ala di Yehovah ’no e kisi atibron esi-esi èn ala di a abi lobi bun-ati’, toku wi musu memre taki ’a no sa gi fri fu strafu kwetikweti’ (Exodus 34:6, 7). Ala di a abi furu lobi nanga sari-ati, toku Yehovah no e gi pasi meki onregtfardikifasi de èn a no e gi pasi meki sma du ogri fu espresi (Psalm 5:4, 5; Habakuk 1:13). Den sma di e du fu espresi san Yehovah no e feni bun, di e sori taki den no abi berow èn di e opo densrefi teige en, no sa man tan du dati sondro fu kisi strafu. Soleki fa na apostel Paulus ben taki, dan „a de wan kefalek takru sani fu fadon ini na anu fu a libi Gado”. Efu wi abi a yoisti  sortu frede fu no wani kon na ini so wan situwâsi, dan dati sa kibri wi te fu kaba.—Hebrewsma 10:31.

„Na En Yu Musu Tan Hori Steifi”

7. Fu san ede wi kan frutrow tapu a krakti di Yehovah abi fu kibri wi?

⁷ Te wan sma abi frede gi Gado fu di a abi bigi lespeki gi en èn te a sabi taki Gado abi furu makti, dan dati sa yepi en fu kisi frutrow tapu Yehovah. Neleki fa wan yongu pikin e firi taki noti no man pasa nanga en te en papa de krosibei fu en, na so wi e firi seikerfasi nanga frutrow te Yehovah e tiri wi. Luku fa den Israèlsma ben handri baka di Yehovah ben puru den na ini Egipti: „Israèl ben kisi na okasi tu fu si a tranga anu di Yehovah gebroiki teige den Egiptisma; èn a pipel ben bigin frede Yehovah èn den ben bigin poti bribi na ini Yehovah” (Exodus 14:31). San a profeiti Elisa ben ondrofeni, e sori krin tu taki „na engel fu Yehovah e seti ensrefi lontu den wan di e frede en, èn a e frulusu den” (Psalm 34:7; 2 Kownu 6:15-17). A disiten historia fu a pipel fu Yehovah èn kande den sani di wisrefi ondrofeni tu, e sori krin taki Gado e gebroiki a krakti fu en trutru fu yepi den wan di e dini en (2 Kroniki 16:9). Na a fasi disi wi e kon frustan taki ’na ini a frede gi Yehovah wan tranga frutrow de’.—Odo 14:26.

8. (a) Fu san ede frede gi Gado e meki wi wani waka den pasi fu en? (b) Fruklari fa wi musu „hori steifi” na Yehovah.

⁸ Te wi abi a yoisti sortu frede gi Gado, dan dati e meki taki wi sa frutrow na en tapu. Ma a e gi wi a krakti tu fu waka den pasi fu en. Di Salomo ben gi a tempel abra na Yehovah, dan a ben begi: ’Meki a de so taki [Israèl] kan abi frede gi yu fu di den sa waka den pasi fu yu ala den dei di den sa de na libi na tapu a gron di yu ben gi den fosi tata fu wi’ (2 Kroniki 6:31). Na fesi kaba, Moses ben gi den Israèlsma a deki-ati: „Na baka Yehovah yu Gado yu musu waka, èn na en yu musu frede, èn na en komando yu musu hori, èn na en sten yu musu arki, èn en yu musu dini, èn na en yu musu tan hori steifi” (Deuteronomium 13:4). Den vers disi e sori krinkrin taki wan sma sa kisi na angri fu waka den pasi fu Yehovah èn a sa wani „hori steifi” na en, te a abi frutrow na ini Gado. Iya, frede gi Gado e meki taki wi e gi yesi na Yehovah, wi e dini en, èn wi e hori steifi na en, neleki fa wan yongu pikin e tan hori steifi na en papa di a e frutrow, sondro fu tweifri wan momenti.—Psalm 63:8; Yesaya 41:13.

Te Wi Abi Lobi gi Gado, dan Wi Musu Abi Frede gi En Tu

9. San lobi gi Gado nanga frede gi Gado abi fu du nanga makandra?

⁹ Soleki fa Bijbel e sori, dan frede gi Gado no wani taki dati wan sma no man lobi en. Na presi fu dati a de so taki den Israèlsma ben kisi a rai fu ’frede Yehovah . . . so taki den ben kan waka ala den pasi fu en èn lobi en’ (Deuteronomium 10:12). So bun, frede gi Gado nanga lobi gi Gado abi furu fu du nanga makandra. Frede gi Gado e pusu wi fu waka den pasi fu en, èn dati e sori taki wi lobi en (1 Yohanes 5:3). Disi no tranga fu frustan, fu di te wi lobi wan sma, dan a fiti taki wi e frede fu du sani di kan hati en firi. Den Israèlsma ben hati den firi fu Yehovah, fu di den ben opo densrefi teige en di den ben de na ini a gran sabana. A no de fu taki dati wi no ben sa wani fu du nowan sani di kan meki wi hemel Tata firi sari (Psalm 78:40, 41). Na a tra sei a de so taki, fu di „Yehovah e prisiri nanga den wan di e frede en”, meki en ati e prisiri srefisrefi te wi e gi yesi na en èn te wi e tan getrow na en (Psalm 147:11; Odo 27:11). Lobi gi Gado e pusu wi fu du en wani, èn frede gi Gado e tapu wi fu du sani di kan hati den firi fu en. Den tu eigifasi disi no de kontrari makandra, ma ala tu de tranga fanowdu fu man du a wani fu Gado.

10. Fa Yesus sori taki a ben de wan prisiri sani gi en fu frede Yehovah?

¹⁰ A fasi fa Yesus Krestes ben e libi, e sori wi krin fa wi kan abi lobi gi Gado, ala di wi e frede en tu. A profeiti Yesaya ben skrifi fu Yesus: „A yeye fu Yehovah musu kon na en tapu, a yeye fu koni nanga frustan, a yeye fu rai nanga makti, a yeye fu sabi nanga a frede gi Yehovah; èn a frede gi Yehovah sa prisiri en” (Yesaya 11:2, 3). Soleki fa a profeititori disi e sori, dan a yeye fu Gado ben pusu Yesus fu abi frede gi en hemel  Tata. Moro fara wi e si taki a frede disi no ben de wan hebi, ma a ben de wan sani di e gi bigi prisiri. Yesus ben prisiri srefisrefi fu man du a wani fu Gado èn fu meki A firi prisiri, srefi te a ben miti nanga tumusi tranga ten. Di a ben de fu kisi dede strafu na wan pina udu, a ben taigi Yehovah: „No soleki fa mi wani, ma soleki fa yu wani” (Mateus 26:39). Fu di Yesus ben abi a sortu frede disi gi Gado, meki Yehovah ben arki a tranga begi fu en Manpikin nanga prisiri. A ben gi en deki-ati, èn a ben frulusu en fu dede.—Hebrewsma 5:7.

Leri fu Frede Yehovah

11, 12. (a) Fu san ede wi musu leri fu frede Gado? (b) Fa Yesus e leri wi fu frede Yehovah?

¹¹ Te wi e si o furu krakti den sani abi di Gado meki èn o moi den sani disi de, dan wi e fruwondru srefisrefi. Ma frede gi Gado no e kon fu ensrefi. Fu dati ede Yesus Krestes, a Moro Bigi David, e gi wi a kari disi fu di a ben taki na fesi: „Kon, un manpikin, arki mi; mi sa leri unu a frede gi Yehovah” (Psalm 34:11). Fa na eksempre fu Yesus kan leri wi fu frede Yehovah?

¹² Yesus e leri wi fu frede Yehovah fu di a e yepi wi fu frustan san na den tumusi moi eigifasi fu wi hemel Tata (Yohanes 1:18). Na eksempre fu Yesus srefi e sori wi fa Gado e denki èn fa a e handri nanga tra sma, bika Yesus e sori na wan volmaakti fasi taki a abi den srefi eigifasi leki di fu en Tata (Yohanes 14:9, 10). Boiti dati, nanga yepi fu na ofrandi fu Yesus, Yehovah e arki wi te wi e begi fu aksi en pardon fu wi sondu. A tumusi aparti fasi disi fa Gado sori sari-ati gi wi, na wan prenspari reide fu san ede wi musu abi frede gi en. A psalm skrifiman ben skrifi: „Bika yu e gi pardon trutru, so taki sma kan frede yu.”—Psalm 130:4.

13. San skrifi na ini a buku Odo, di kan yepi wi fu frede Yehovah?

¹³ A buku Odo e kari wan tu sani di wi kan du fu man kisi frede gi Gado. „Mi manpikin, efu yu e teki mi wortu èn e kibri den komando fu mi leki wan gudu na yu, fu yu poti prakseri nanga yu yesi na koni, so taki yu kan beni yu ati go na a koni fu man si sani krin; efu, boiti dati, yu e bari kari fu a frustan srefi èn e opo yu sten srefi fu kisi a koni fu si sani krin, . . . dan fosi yu sa frustan a frede gi Yehovah, èn yu sa feni a sabi fu Gado srefi” (Odo 2:1-5). Fu dati ede, efu wi wani abi frede gi Gado, dan wi musu studeri a Wortu fu en, wi musu du seryusu muiti fu frustan den sani di a e leri wi, èn baka dati wi musu handri soifri akruderi den sani di wi leri.

14. Fa wi kan waka baka a rai di den kownu fu Israèl ben kisi?

¹⁴ Ibri kownu fu na Israèl fu owruten ben kisi a komando fu meki wan kopi fu a Wet. ’A ben musu leisi na ini en ala den dei fu en libi, so taki a ben kan leri fu frede Yehovah en Gado, fu a ben kan hori ensrefi na ala den wortu fu a wet’ (Deuteronomium 17:18, 19). Na so a de nanga wi tu. Efu wi wani leri fa fu frede Yehovah, dan a de tumusi prenspari taki wi e leisi èn studeri Bijbel. Te wi e gebroiki den Bijbel gronprakseri na ini wi libi, dan safrisafri wi sa kisi koni nanga sabi di e komoto fu Gado. Wi e kon „frustan a frede gi Yehovah” fu di wi e si den bun bakapisi di wi abi na ini wi libi, èn wi e si a matifasi fu wi nanga Gado leki wan tumusi warti sani. Moro  fara, te wi e kon makandra doronomo nanga tra bribiman, dan yonguwan nanga owruwan kan arki den leri fu Gado. Den kan leri fa fu frede Gado, èn fa fu waka den pasi fu en.—Deuteronomium 31:12.

Ibri Sma Di E Frede Yehovah Sa De Koloku

15. San frede gi Gado abi fu du nanga na anbegi di wi e anbegi en?

¹⁵ Fu den sani di wi ben si kaba, wi kon frustan taki frede gi Gado na wan yoisti fasi fu denki di wi alamala musu kon kisi. Dati de so, fu di a de wan tumusi prenspari pisi fu na anbegi di wi e anbegi Yehovah. A e meki taki wi e frutrow na en tapu sondro fu tweifri. A e meki taki wi e handri akruderi en wani, èn taki wi e hori steifi na en. Neleki fa a ben de nanga Yesus Krestes, dan frede gi Gado kan meki tu taki, now èn fu têgo, wi sa handri akruderi a pramisi di wi meki di wi gi wisrefi abra na Gado.

16. Fu san ede Yehovah e gi wi a deki-ati fu abi frede gi en?

¹⁶ Te wan sma abi frede gi Gado, dan dati no wani taki dati a sma e beifi gi Gado. A no wani taki so srefi dati wan sma e si den wet fu Gado leki wan hebi. Bijbel e gi wi a dyaranti: „Koloku fu ibriwan sma di e frede Yehovah, di e waka den pasi fu en” (Psalm 128:1). Yehovah e gi wi a deki-ati fu abi frede gi en, fu di a sabi taki na eigifasi disi sa kibri wi. Wi kan si a broko-ede fu en na ini den wortu disi di a ben taigi Moses: „Efu den [den Israèlsma] ben o sreka na ati disi fu den nomo fu frede mi èn fu hori ala den komando fu mi ala ten, so taki a ben sa kan go bun nanga den èn nanga den manpikin fu den te ten di no skotu!”—Deuteronomium 5:29.

17. (a) Sortu winimarki a sa abi gi wi te wi e frede Gado? (b) Fu sortu sani di abi fu du nanga frede gi Gado wi sa taki na ini na artikel di e kon now?

¹⁷ Na so a sa de tu te wi e leri wi ati fu frede Gado; a sa go bun nanga wi. Na sortu fasi? Na a fosi presi, so wan eigifasi sa plisi Gado èn wi sa kisi wan bun matifasi nanga en. David srefi ben ondrofeni taki „a sa satisferi a lostu fu den wan di e frede en, a sa yere a babari di den e meki fu kisi yepi, èn a sa frulusu den” (Psalm 145:19). Na a di fu tu presi, frede gi Gado sa abi winimarki gi wi fu di a sa abi krakti tapu a fasi fa wi e denki fu san takru (Odo 3:7). Na artikel di e kon now sa taki finifini fu fasi fa a frede disi e kibri wi fu problema na yeye fasi, èn a sa taki fu wan tu Bijbel eksempre fu man di ben frede Gado èn di no ben e du san ogri.

[Futuwortu]

Yu Man Piki den Aksi Disi?

• San frede gi Gado wani taki, èn sortu krakti a kan abi na wi tapu?

• San a frede di wi e frede Gado èn a waka di wi e waka nanga Gado abi fu du nanga makandra?

• Fa na eksempre fu Yesus e sori taki frede gi Gado abi fu du nanga lobi gi Gado?

• San na difrenti fasi fa wi kan leri wi ati fu frede Yehovah?

[Aksi fu a tori disi]

[Prenki na tapu bladzijde 17]

Den kownu fu Israèl ben kisi a komando fu meki wan kopi fu a Wet gi densrefi, di den ben musu leisi ibri dei

[Prenki na tapu bladzijde 18]

Frede gi Yehovah o meki taki wi e frutrow na en tapu neleki fa wan boi e frutrow en papa

[Sma di abi a reti fu a prenki na tapu bladzijde 15]

Stari: Photo by Malin, © IAC/RGO 1991