Wan Gronprakseri Di E Tyari Wini Kon gi Wi

Furu sma e si den wortu di skrifi na Mateus 7:12 leki wan gronprakseri fu Yesus, di de fu sori sma san na a yoisti fasi fu handri nanga trawan. Toku, Yesus ben taki: „San mi e leri, a no fu mi, ma na fu en di ben seni mi kon.”—Yohanes 7:16.

IYA, a Sma di ben sori Yesus den sani di a ben e leri sma, na a Mekiman, Yehovah Gado. A sani di sma kon sabi leki a gronprakseri di warti moro leki gowtu komoto fu Yehovah Gado tu.

Gado ben wani taki ala sma ben musu libi nanga makandra soleki fa den wani taki trawan musu libi nanga den. Gado de leki wan tumusi bun eksempre gi libisma, fu di a sori nanga a fasi fa a meki libisma taki a e broko en ede nanga den. Bijbel e fruteri wi taki: „Gado ben go moro fara fu meki libisma akruderi a prenki fu en, akruderi a prenki fu Gado a ben meki en; leki man èn leki uma a ben meki den” (Genesis 1:27). Disi wani taki dati na wan lobi-ati fasi, Gado gi sma pikinso fu den tumusi bun eigifasi fu en. Na so fasi libisma ben kan libi na ini vrede, koloku nanga wánfasi. A sani disi ben kan tan fu têgo. Te den ben o leri fu gebroiki a konsensi fu  den di den kisi fu Gado na wan yoisti fasi, dan dati ben o meki taki den ben o handri nanga trawan na a fasi fa densrefi wani taki trawan musu handri nanga den.

Moro Nanga Moro Sma E Prakseri Densrefi Nomo

San meki taki a libisma famiri di ben bigin so moi kon de so? Fu taki en leki fa a de, sma bigin kisi takru maniri. Den bigin prakseri densrefi nomo. Furu sma sabi a Bijbel tori di e fruteri san den fosi tu libisma ben du. Genesis kapitel 3 e taki fu a tori disi. Satan, wan gensman fu ala den regtfardiki markitiki fu Gado, ben gi Adam nanga Efa deki-ati fu poti a tiri fu Gado na wan sei èn fu bosroiti gi densrefi fa den libi ben musu waka. Fu di den ben e prakseri densrefi nomo, meki den du leti so. Fu di Adam nanga Efa ben opo densrefi teige Gado, dan dati meki den tyari takru bakapisi kon gi densrefi ma so srefi gi den bakapikin fu den di ben musu gebore ete. A tori dati e sori krin sortu rampu sa miti sma te den e poti a gronprakseri di skrifi na Mateus 7:12 na wan sei. Fu dati ede a de so taki, „nanga wán man, sondu ben kon na grontapu èn nanga sondu dede kon, èn na so dede panya go na ala libisma, fu di den alamala ben sondu”.—Romesma 5:12.

Ala di a heri libisma famiri drai baka gi a lobi-ati pasi fu Yehovah Gado, toku a no de so taki Yehovah drai baka gi den. Fu gi wan eksempre, Yehovah ben gi a nâsi Israèl a Wet fu en, so taki den ben kan kisi tiri fu dati. A Wet ben leri den fu handri nanga trawan soleki fa den ben wani taki trawan ben musu handri nanga den. A ben sori den so srefi fa den ben musu handri nanga srafu, nanga boi di ben de sondro papa, èn nanga weduwe. Moro fara, a Wet ben sori den fa den ben musu handri nanga wan sma di ben feti nanga wan trawan, nanga wan sma di ben tyari wan trawan gowe nanga tranga, èn nanga wan sma di ben furufuru. Tra wet ben leri den fu hori a tanpresi fu den krin, èn na so fasi den ben e leri fu broko den ede nanga a gosuntu fu trawan. Wet ben de tu di ben abi fu du nanga seks afersi. Yehovah ben taigi a pipel: „Yu musu lobi a sma na yu sei leki yusrefi”, èn na so fasi a ben sori den a moro prenspari boskopu fu a Wet fu en. Yesus ben gebroiki den srefi wortu disi bakaten (Lefitikus 19:18; Mateus 22:39, 40). A Wet ben sori den  Israèlsma tu fa den ben musu handri nanga den doroseisma di ben e tan na den mindri. A Wet ben komanderi: „Unu no musu kwinsi wan doroseisma fu di unsrefi sabi san a wani taki fu de wan doroseisma, bika unu ben de doroseisma na ini a kondre Egipti.” Fu taki en tra fasi, den Israèlsma ben musu sori switifasi na den sma di ben abi en moro takru leki den.—Exodus 23:9; Lefitikus 19:34; Deuteronomium 10:19.

So langa Israèl ben e hori ensrefi getrow na a Wet, dan Yehovah ben e blesi a nâsi disi. Na a ten di David nanga Salomo ben de kownu, sani ben e waka bun nanga a nâsi èn a pipel ben de koloku èn tevrede. Wan buku di e taki fu a pisi ten dati e skrifi: „Yuda nanga Israèl ben abi furu sma, so furu leki den ai-santi di de na sekanti, ala di den ben è nyan èn ben e dringi èn ben e meki prisiri. Èn Yuda nanga Israèl ben tan libi na ini seikerfasi, ibriwan fu den na ondro en eigi droifibon, èn na ondro en eigi figabon.”—1 Kownu 4:20, 25.

A sari fu taki dati a vrede nanga a seikerfasi di a nâsi ben abi, ben de fu wan syatu pisi ten nomo. Ala di den Israèlsma ben abi a Wet fu Gado, toku den no ben hori densrefi na en. A prakseri di den ben e prakseri densrefi nomo ben abi leki bakapisi taki den no ben e broko den ede moro nanga trawan. Fu a sani disi ede èn so srefi fu di den ben fadon komopo fu a bribi, meki sonwan fu den èn te fu kaba a nâsi ben kisi pina. Te fu kaba, na ini a yari 607 b.G.T., Yehovah meki den Babilonsma pori a kownukondre fu Yuda, a foto Yerusalem, èn srefi a kefalek moi tempel di ben de drape. Fu san ede Yehovah ben meki dati pasa? „’Fu di unu no ben gi yesi na mi wortu, luku mi sa teki ala den famiri fu a noordsei’ na so Yehovah taki,’ srefi Nebukadresar a kownu fu Babilon, mi futuboi èn mi sa tyari den kon teige a kondre disi èn teige den sma di e libi na ini en èn teige ala den nâsi disi di de na en lontu; èn mi sa meki den kisi pori èn mi sa meki den tron wan sani di e meki sma skreki èn leki wan fruwondru sani èn leki presi di pori te ten di no skotu’” (Yeremia 25:8, 9). Dati na trutru wan bigi paiman di den Israèlsma ben musu pai fu di den ben drai baka gi a tru anbegi fu Yehovah!

Wan Eksempre Di Wi Musu Waka na En Baka

Yesus Krestes na a tra sei, no ben e leri sma a gronprakseri na Mateus 7:12 wawan, ma a ben de a moro bun eksempre fu di a ben e libi akruderi a gronprakseri disi tu. A ben e broko en ede trutru nanga trawan (Mateus 9:36; 14:14; Lukas 5:12, 13). Wan leisi, krosibei fu a foto Nain, Yesus ben si wan weduwe di ben e waka makandra nanga trawan fu go beri en wan-enkri manpikin. A weduwe disi ben e sari trutru. A Bijbel tori e taki: „Èn di masra ben si en, a ben kisi sari-ati gi en” (Lukas 7:11-15). Soleki fa wan wortubuku fu na Owru nanga a Nyun Testamenti e sori, dan den wortu „kisi sari-ati gi” wani taki „firi dipi sari na ini yu ati”. Yesus ben firi a sari di a weduwe ben e firi, èn dati meki a trowstu en. Na uma ben prisiri trutru di Yesus gi a boi wan opobaka èn „gi en na en mama”!

Te fu kaba, akruderi a prakseri fu Gado, Yesus ben de klariklari fu pina èn a gi en libi leki wan lusu-paiman, so taki a libisma famiri ben kan kon fri fu a katibo fu sondu nanga dede. Disi ben de a moro bun eksempre di e sori fa fu libi akruderi a gronprakseri di warti moro leki gowtu.—Mateus 20:28; Yohanes 15:13; Hebrewsma 4:15.

Sma Di E Libi Akruderi a Gronprakseri Di Warti Moro Leki Gowtu

Sma de na ini a ten fu wi di e libi trutru akruderi a warti gronprakseri disi? Iya, èn den no e du dati nomo te sani e go bun. Fu gi wan eksempre, na a ten fu a di fu Tu Grontapufeti na ini Nazi Doisrikondre, Yehovah Kotoigi ben tan hori a bribi di den abi na ini Gado. So srefi den tan sori taki den lobi trawan èn den weigri fu poti a warti gronprakseri na wan sei. Ala di lanti fu Doisrikondre ben gi sma deki-ati fu no lobi den Dyu kwetikweti èn fu desko den, toku den Kotoigi tan hori densrefi na a gronprakseri di skrifi na Mateus 7:12. Srefi na ini den strafuman kampu, den tan sorgu gi trawan, èn den tan prati a pikinso nyanyan fu den nanga Dyu èn nanga tra sma di ben abi bigi angri. Boiti dati, ala di lanti fu Doisrikondre ben komanderi den fu go feti na ini a legre fu kiri trawan, toku den no du dati, bika densrefi no ben wani fu trawan kiri den. Den no ben man kiri den sma di den ben musu lobi leki densrefi. Fu di den ben weigri fu kiri trawan, dan furu fu den ben musu go na strafuman kampu èn furu fu den kisi dedestrafu.—Mateus 5:43-48.

Te yu e leisi na artikel disi, dan yu e kisi wini fu wan tra eksempre di e sori fa sma e libi akruderi a gronprakseri disi di warti moro leki gowtu. Yehovah  Kotoigi sabi taki na ini a ten disi furu sma e pina sondro taki den abi wan howpu èn sondro taki den man yepi den srefi. Fu a sani disi ede, meki den Kotoigi de klariklari fu yepi trawan fu kon sabi a howpu nanga a bun rai di de fu feni na ini Bijbel. A sani disi abi fu du nanga wan leri wroko di den e du now na heri grontapu, wan sani di noiti ben pasa na fesi ete. San na a bakapisi fu di den e du a wroko disi? Soleki fa Yesaya 2:2-4 e taki na fesi, dan „furu pipel”, fu taki en leti, moro leki siksi milyun sma na heri grontapu, kisi ’leri fu den pasi fu Yehovah èn den e waka na tapu den pasi fu en’. Na wan agersifasi, den leri fu „naki den feti-owru fu den kon tron prugu èn den lansri fu den kon tron grasi-nefi”. Den feni vrede nanga seikerfasi na ini a muilek ten disi.

Fa A De Nanga Yu?

Teki wan momenti fu prakseri a banawtu nanga a pina di a libisma famiri ondrofeni fu di den poti a gronprakseri di skrifi na Mateus 7:12 na wan sei. Libisma ondrofeni den sani disi sensi a ten di Satan ben gi Adam nanga Efa deki-ati fu opo densrefi teige Gado na ini Eden. Yehovah abi a prakseri fu kenki a situwâsi disi heri esi. Fa a sa du dati? „Na fu a sani disi ede a Manpikin fu Gado ben tyari kon na krin, namku, fu broko den wroko fu Didibri” (1 Yohanes 3:8). A sani disi sa pasa na ondro a tiri fu Gado en Kownukondre. Yesus Krestes di ben leri trawan a gronprakseri di warti moro leki gowtu, èn di ben libi akruderi en so srefi, sa de tiriman fu a kownukondre dati. —Psalm 37:9-11; Danièl 2:44.

Kownu David fu owruten Israèl ben taki: „Wan ten ben de taki mi ben de wan yonkuman, mi kon owru tu, èn toku mi no si no wan regtfardikisma di ben libi na baka en wawan, noso den pikin fu en e suku brede. A heri dei langa a e du bun gi sma èn a e leni sma so srefi, èn na so fasi en bakapikin sa kisi wan blesi” (Psalm 37:25, 26). Yusrefi no feni taki furu sma na ini a ten disi e teki èn e grabu sani, na presi taki den e ’du bun gi sma èn e leni sma so srefi’? A krin fu si taki te wi e hori wisrefi na a warti gronprakseri di skrifi na Mateus 7:12, dan dati kan tyari trutru vrede nanga seikerfasi kon gi wi. Wi sa man kisi blesi now èn na ini a ten di e kon te a Kownukondre fu Gado e tiri grontapu. A Kownukondre fu Gado sa puru ala gridifasi nanga godelowsufasi na grontapu èn a sa poti wan seti fu Gado na presi fu a kruka seti fu libisma tiri di de now. Na a ten dati, ala sma sa prisiri fu di den e libi akruderi a gronprakseri di warti moro leki gowtu.—Psalm 29:11; 2 Petrus 3:13.

[Prenki na tapu bladzijde 4, 5]

Yesus no ben e leri sma a gronprakseri na Mateus 7:12 wawan, ma a ben de a moro bun eksempre fu di a ben e libi akruderi a gronprakseri disi tu

[Prenki na tapu bladzijde 7]

Te wi e libi akruderi a gronprakseri di warti moro leki gowtu, dan dati kan tyari trutru vrede nanga seikerfasi kon gi wi