Aksi fu Leisiman
Aksi fu Leisiman
Wan Kresten wefi musu de getrow na Gado èn a musu saka ensrefi na ondro a tiri fu en masra. Fa a kan hori ensrefi na den tu sani disi te en masra no de na bribi èn e teki prati na kerki fesadei?
Fu man hori ensrefi na den tu sani disi, dan a Kresten uma sa musu sori koni. Ma a bun srefisrefi taki a e meki muiti fu hori ensrefi na den tu plekti disi. Na ini wan afersi di gersi a disi, Yesus ben taki: „Pai Caesar den sani baka di de fu Caesar, ma Gado den sani di de fu Gado” (Mateus 22:21). A tru taki a ben e taki fu den plekti di wi abi leki borgu fu wan kondre. Bakaten Kresten ben kisi a deki-ati srefi fu saka densrefi na ondro den tiriman (Romesma 13:1). Toku a rai fu Yesus bun fu di a e sori wan wefi san Gado e aksi fu en, ala di a wefi e waka baka a Bijbel rai fu saka ensrefi na ondro en masra, srefi efu a masra no de na bribi.
Iniwan sma di sabi sani fu Bijbel sa agri taki a e sori krinkrin taki a fosi plekti fu wan Kresten, na fu tan getrow na a Almakti Gado alaten (Tori fu den Apostel 5:29). Toku a de so taki furutron wan tru anbegiman kan fiti ensrefi na a winsi noso den fruwakti fu wan sma di no de na bribi, ma di abi wan frantwortu posisi. Èn a kan du dati sondro fu pasa den tumusi prenspari wet fu Gado.
Wi kan leri furu fu a bun eksempre fu den dri Hebrewman, di Danièl kapitel 3 e taki fu den. Nebukadnesar, di ben de a lanti edeman fu den man disi, ben komanderi taki, den, makandra nanga tra sma, ben musu go na a opo presi fu Dura. Den dri Hebrewman disi ben sabi taki den sma ben abi na prakseri fu go du falsi anbegi èn kande no ben wani go drape srefisrefi. Kande Danièl ben feni wan fasi fu no abi fu de drape, ma den dri man disi no ben man du dati. * So bun, den ben agri fu de drape, ma den no ben o teki prati na a fowtu sani dati, èn den no du dati tu.—Danièl 3:1-18.
Na so a kan de tu taki na a pisi ten di sma e
hori wan spesrutu fesa, dan wan masra di no de na bribi e aksi noso e taigi en Kresten wefi fu du wan sani di a wefi no wani du. Meki wi luku wan tu eksempre. A masra e taigi a sisa fu bori wan spesrutu nyanyan tapu wan dei di en nanga trawan o hori wan spesrutu fesa. Kande a wani nomonomo taki tapu a dei dati en heri osofamiri (na uma so srefi) musu go na den famiri fu en, fu go nyan noso fu go luku den nomo. A kan taki srefi fosi a fesadei doro, a e taigi en wefi taki te a wefi e go bai sani, dan a musu bai wan tu sani gi en tu. Kande a e aksi en fu bai sani di sma e nyan spesrutu na a fesadei dati, sani di a wani gi sma leki presenti, noso papira fu domru kado nanga karta fu gi sma.Agen a de so taki a Kresten wefi musu abi a fasti bosroiti fu no teki prati na falsi anbegi. Ma san a musu du te en masra e aksi en fu du den sortu sani disi? En masra de na edeman fu na osofamiri, èn a Wortu fu Gado e taki: „Un wefi, saka unsrefi na un masra ondro, soleki fa a fiti na Masra” (Kolosesma 3:18). San a wefi musu du na ini den situwâsi disi? A musu saka ensrefi na ondro en masra noso a musu saka ensrefi na ondro a tiri fu Gado? Ensrefi musu luku fa a o gi yesi na en masra ala di a e gi yesi na Yehovah na a fosi presi.
Tapu tra dei di no de wan fesadei, en masra kan aksi en fu bori wan spesrutu nyanyan; kande na fu di a lobi a nyanyan dati noso fu di a gwenti fu nyan dati na wan spesrutu ten fu a yari. A sisa sa wani fu sori taki a lobi en masra èn taki a e lespeki en leki edeman. A kan sori en masra a lespeki nanga a lobi dati srefi efu a masra e aksi en fu sreka nyanyan fu wan spesrutu fesadei ede? Son Kresten wefi kan du dati sondro fu kisi konsensi fonfon, fu di den e si a bori di den e bori a nyanyan dati leki wan pisi fu den aladei wroko. Srefi te en masra e si a nyanyan dati leki spesrutu sani gi a fesadei, toku no wan getrow Kresten uma sa si en na so wan fasi. Na so a kan de tu taki a e taigi en wefi taki a musu go nanga en te a e go fisiti den famiri fu en na difrenti momenti ibri mun noso ibri yari. A sisa kan go nanga en, srefi efu a dei dati na wan fesadei? Noso a de so taki a sisa abi a gwenti fu bai sani gi en masra efu a e aksi en fu du dati? A gwenti fu bai den sani sondro fu aksi en masra san a o du nanga den sani dati?
A no de fu taki dati wan Kresten wefi musu prakseri sortu krakti a sani di a o du sa abi tapu trawan (Filipisma 2:4). A no sa wani du sani di kan meki sma denki taki a e horibaka gi a fesadei, neleki fa den dri Hebrewman no ben wani kande taki sma si taki den ben e go na a opo presi fu Dura. So bun a kan pruberi fu taki-go-taki-kon nanga en masra nanga koni. Na so wan fasi den kan luku efu a masra kan du sani en wawan, te den abi fu du nanga spesrutu fesadei. Na a fasi dati a e hori den firi fu a sisa na prakseri, èn a e fiti ensrefi na en wefi di lobi en èn e lespeki en. Kande a sa frustan taki a de wan koni sani fu no poti densrefi na ini wan situwâsi pe den ala tu kan kisi syen te a sisa abi fu weigri fu teki prati na sani di abi fu du nanga falsi anbegi. Iya, a problema kan lusu sondro dyugudyugu, efu a tori disi taki na fesi na wan switi fasi.—Odo 22:3.
Te fu kaba, a getrow Kresten musu luku a situwâsi bun èn denki dipi fu dati, fosi a bosroiti san a sa du. A moro prenspari sani na fu gi yesi na Gado, neleki fa den dri Hebrewman ben du dati (1 Korentesma 10:31). Nanga den sani disi na prakseri ibri Kresten musu man bosroiti san a kan du sondro fu poti den wet fu Gado na wan sei. A bosroiti disi ensrefi kan teki, te wan edeman fu na osofamiri noso wan tiriman fu a libimakandra e aksi en fu du wan sani.
[Futuwortu]
^ paragraaf 5 Luku „Aksi fu Leisiman” na ini A Waktitoren fu 1 augustus 2001.