Sma Di Wani Kon na Gilead Musu De Klariklari fu Gi Densrefi

A WAKTITOREN BIJBELSKORO GILEAD de fu leri getrow mansma nanga umasma fa fu du zendelingwroko na tra kondre. Suma na den sma di e kisi a kari fu kon na Gilead? Den sma di de klariklari fu gi densrefi (Psalm 110:3). Sondro tweifri, dati ben de krin fu si tapu 8 september 2001, di a di fu 111 klas klari a skoro nanga bun bakapisi.

Wan tu studenti fu a klas ben gi densrefi kaba, fu di den ben gowe libi a famiri fu den, den mati fu den, èn so srefi a kondre pe den gebore fu dini na presi pe moro preikiman ben de fanowdu. Na so den ben man si efu den ben kan fiti densrefi na a libi na ini wan tra kondre. Fu gi wan eksempre, Richer nanga Nathalie ben seti sani fu froisi go na Bolifia, Todd nanga Michelle go tan na ini a Dominikan Republiek, èn David nanga Monique go tan na wan kondre na ini Asia fu preiki a bun nyunsu fu Gado en Kownukondre. Tra studenti ben dini kaba na ini Nikaragwa, Ekwador, nanga Albania.

Christy ben kisi deki-ati fu studeri Spanyoro di a ben de na middelbaar skoro, èn dati yepi en fu sreka ensrefi fu tan tu yari na ini Ekwador bifo a trow. Trawan ben tan na ini a kondre fu den, ma den go dini na ini gemeente pe sma e taki wan tra tongo. Wan tra tyalensi ben miti Saul nanga Priscilla. Bifo den kon na a skoro, den ben musu du furu muiti fu kon sabi Ingrisitongo moro bun, ma toku den ben de klariklari fu du dati.

Den 20 wiki di den ben kisi leri fu tron zendeling pasa heri esi. A dei di den ben o kisi diploma ben doro. Den studenti ben de makandra nanga mati nanga famiriman, ala di den ben e arki koni rai nanga tra wortu di ben gi den deki-ati bifo den ben gowe libi drape.

A fesiman fu a programma ben de Theodore Jaracz, wan brada di ben klari a di fu seibi klas fu a Gileadskoro nanga bun bakapisi. Now a e dini leki wan memre fu a Tiri Skin fu Yehovah Kotoigi. Den fosi sani di a taki ben sori dati na organisâsi fu wi noiti e frigiti fu san ede wi e gi studenti leri na a Gileadskoro. Den studenti disi e leri fa fu preiki a bun nyunsu fu a Kownukondre na heri grontapu (Markus 13:10). A Gileadskoro e sreka studenti di doro den markitiki, so taki den kan abi wan moro bigi prati na a preikiwroko leki fosi èn fu preiki na ini kontren na grontapu pe zendeling di kisi leri de tranga fanowdu. Brada Jaracz ben gi den studenti rai fu kisi wini fu a leri di den kisi na Gilead, now di den o wroko makandra nanga den zendeling di e dini kaba na ini den 19 kondre pe den studenti disi sa go.

Den Studenti Di Klari a Skoro Nanga Bun Bakapisi E Kisi Bun Rai

Difrenti lezing ben hori baka dati. William Van De Wall, wan memre fu a Bijkantoro Komte fu Amerkankondre, ben taki fu a thema „Tru Kresten Na Sma Di E Du Zendelingwroko Fayafaya”. A brada disi ben poti prakseri na a wroko di Kresten kisi fu „meki disipel” soleki fa a skrifi na Mateus 28:19, 20. So srefi a ben gi den studenti a rai fu „du leki Krestes, di ben du a zendelingwroko fu en fayafaya”. Fu man yepi den nyun zendeling fu tan du a zendelingwroko fayafaya, a gi den a deki-ati disi: „Tan du sani na wan fasi di sa tyari bun bakapisi kon; no lasi den bun gwenti di yu abi fu studeri, tan skinskin  nanga theokrasia afersi; èn ala ten tan hori na prakseri fu san ede yu e du zendelingwroko.

Baka dati Guy Pierce, wan memre fu a Tiri Skin, hori wan lezing. A taki fu a thema „Tan Du Muiti fu Meki a ’Krakti fu Un Denki’ Kon Moro Tranga” (Romesma 12:1). A gi den nyun zendeling bun rai, èn a gi den deki-ati fu gebroiki a koni di Gado gi den fu denki èn fu frustan sani. „Tan denki dipi fu den sani di Yehovah e taigi unu nanga yepi fu en Wortu. A sani disi sa kibri unu”, na so a brada disi ben taki (Odo 2:11). Brada Pierce gi a klas a rai so srefi fu no hori densrefi na den eigi denki nomo, bika dati no o yepi den fu meki ’a krakti fu den denki’ kon moro tranga. Sondro tweifri, den bun rai disi sa yepi den studenti bun te den sa dini leki zendeling.

Baka dati a fesiman kari Lawrence Bowen, wan fu den Gilead leriman, di taki fu a thema „Bosroiti fu No Sabi Noti”. A fruteri taki di na apostel Paulus ben musu du zendelingwroko na ini Korente, dan a ben „bosroiti fu no sabi noti . . . boiti Yesus Krestes wawan, a wan di ben spikri na wan postu” (1 Korentesma 2:2). Paulus ben sabi taki a moro bigi krakti na ini na universum, a santa yeye, e horibaka gi a boskopu di de fu feni na ini a heri Bijbel. A boskopu disi na: Yehovah sa buweisi nanga yepi fu a pramisi Siri taki a abi a reti fu tiri (Genesis 3:15). Den studenti  di ben klari a di fu 48 klas nanga bun bakapisi, ben kisi deki-ati fu de leki Paulus nanga Timoteus èn fu abi bun bakapisi leki zendeling, ala di den e tan hori densrefi na a „eksempre fu gosontu wortu”.—2 Timoteus 1:13.

A nen fu a lasti lezing di ben hori na a bigin fu a programma, ben de „Warderi a Grani Di Yu Abi, fu di A De wan Presenti fu Gado.” Wallace Liverance, a brada di abi a frantwortu fu na administrâsi fu Gileadskoro, yepi den nyun zendeling fu kon frustan taki den grani di den e kisi na ini a diniwroko fu den, na wan fasi fa Gado e sori bun-ati gi den, a no de wan sani di den kisi fu di den frudini dati. Brada Liverance gebroiki na eksempre fu na apostel Paulus èn a taki: „A no den wroko di Paulus ben du ben meki taki Yehovah teki en fu de en apostel gi den nâsi, bika na so fasi a ben o gersi leki Paulus ben abi a reti fu kisi a wroko dati noso taki a ben frudini fu kisi en. Den yari di Paulus ben de wan preikiman noso na ondrofeni di a ben abi, no ben abi noti fu du nanga a grani di a ben kisi fu tron wan apostel. Libisma kande ben denki taki Yehovah ben o teki Barnabas fu tron apostel. A no ben abi fu du nanga koni, bika soleki fa a sori, dan Apolos ben de wan moro bun takiman leki Paulus. Na fu di Gado ben sori Paulus bun-ati, meki a ben du dati” (Efeisesma 3:7, 8). Brada Liverance gi den nyun zendeling deki-ati fu gebroiki a presenti di den kisi. Dati wani taki dati den musu gebroiki a grani di den abi fu du diniwroko gi Yehovah, fu yepi trawan fu kisi wan matifasi nanga Gado so taki den kan tron sma di e kisi „a presenti di Gado e gi . . . , têgo libi nanga yepi fu Yesus Krestes, wi Masra”.—Romesma 6:23.

Baka dati, Mark Noumair, wan tra Gilead leriman, hori wan switi takimakandra nanga wan tu studenti. A thema fu a takimakandra disi ben de „Te Wi E Sreka Wisrefi, dan Wi Sa Abi Bun Bakapisi” (Odo 21:5). Den ondrofenitori ben sori taki te wan preikiman e sreka ensrefi bun gi a preikiwroko, spesrutu te a e sreka en ati, dan a sa poti prakseri trutru na den sma di a e miti. Ala ten a o sabi san fu taki. A sa taki sani èn a sa du sani fu yepi sma na yeye fasi. „Na so fasi wawan wan zendeling sa abi bun bakapisi”, na so brada Noumair ben sori, ala di a ben taki fu en eigi ondrofeni leki wan zendeling na ini Afrika.

Zendelingwroko Na wan diniwroko di e gi prisiri

Ralph Walls nanga Charles Woody interview wan tu zendeling di abi ondrofeni èn di ben de drape tu na a Patterson Skoro Centrum pe brada fu Bijkantoro Komte e kisi leri tu. Den interview ben poti krakti na tapu taki a zendelingwroko e gi prisiri te wi lobi libisma. Den studenti makandra nanga den famiriman nanga mati fu den di ben de drape, kisi deki-ati di den arki fa den zendeling disi di abi ondrofeni, ben e fruteri fu san ede densrefi feni taki a zendelingwroko e gi prisiri.

John E.  Barr, di e dini leki wan memre fu a Tiri Skin, ben hori a moro prenspari lezing fu a dei, èn a lezing disi ben nen „Singi wan Nyun Singi gi Yehovah” (Yesaya 42:10). Brada Barr sori taki den wortu „wan nyun singi” de fu feni neigi tron na ini Bijbel. A poti na aksi disi: „San a nyun singi disi wani taki”? Ne a piki: „Den vers lontu a tekst e tyari kon na krin taki sma e singi wan nyun singi, bika nyun sani e pasa na ini a fasi fa Yehovah e tiri.” A ben gi den studenti deki-ati fu tan singi nanga makandra fu prèise a glori Kownukondre fu Gado na ini na anu fu a Mesias Kownu, Yesus Krestes. Brada Barr ben taki dati a leri di den studenti ben kisi na Gilead, ben yepi den fu frustan moro krin leki noiti bifo san a „nyun singi” disi wani taki trutru. „A skoro poti krakti na tapu dati a de fanowdu taki unu e ’singi’ fu prèise Yehovah makandra nanga den brada nanga sisa fu unu na iniwan presi pe unu e go. Un sorgu ala ten tu taki unu de na ini wánfasi nanga trawan te unu e du a zendelingwroko fu unu”.

Baka di den studenti ben kisi a diploma fu den, dan wan brada leisi wan brifi fu sori taki ala sma fu a klas ben de nanga tangi trutru fu a leri di den ben kisi na Gilead.

Yu kan du moro na ini a diniwroko gi Gado? Yu wani kisi moro winimarki na ini a diniwroko fu yu? Efu dati de so, dan gi yusrefi soleki fa den nyun zendeling disi du dati. Na disi yepi den fu tron zendeling. Te wan sma de klariklari fu gi ensrefi nanga en heri ati na ini a diniwroko fu Gado, dan a sma dati sa kisi bigi prisiri.—Yesaya 6:8.

[Faki na tapu bladzijde 25]

A STATISTIEK FU A KLAS

Nomru fu kondre pe den komoto: 10

Nomru fu kondre pe den kisi toewijzing fu go: 19

Nomru fu studenti: 48

Gemiddeld yari di den abi: 33,2

Gemiddeld yari di den de na ini waarheid: 16,8

Gemiddeld yari di den e du furuten diniwroko: 12,6

[Prenki na tapu bladzijde 26]

A di fu 111 Klas fu a Waktitoren Bijbelskoro Gilead Di Klari a Skoro Nanga Bun Bakapisi

Na tapu a lijst na ondrosei, den rei nomru fu fesisei go na bakasei èn den nen skrifi fu kruktu-anusei go na reti-anusei na ini ibri rei.

(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.