„Suma den Sma E Taki Dati Mi De?”

KRESNETI ten doro baka. Sma na heri grontapu e memre a dei di wan spesrutu sma ben gebore. Suma ben de a sma dati? A ben de a Manpikin fu Gado noso wan fromsu Dyu di ben wani kenki a bribi fu en kondreman na ini a fosi yarihondro? A ben de wan man di ben feti gi den pôtiwan noso wan man di ben de so wan bigi kefar gi a Gran Kownukondre Rome, taki den kiri en? Noso a kan taki a ben de wan koniman di ben poti krakti tapu a sabi nanga a koni fu libisma? Now yu abi reide fu aksi yusrefi: ’Suma Yesus Krestes ben de trutru?’

Yesus srefi ben wani sabi san sma ben piki tapu na aksi dati. Wan leisi a ben aksi den disipel fu en: „Suma den sma e taki dati mi de?” (Markus 8:27) Fu san ede a ben aksi den dati? Furu sma no ben waka na en baka moro. Soleki fa a sori, dan trawan no ben man frustan fu san ede Yesus no ben wani tron kownu fu den èn den ben e mandi nanga en so srefi. Boiti dati, di den feanti fu Yesus ben tyalensi en, dan a no ben gebroiki wan marki di ben kon fu hemel fu sori den suma a ben de. So bun, san den apostel ben piki di Yesus aksi den suma den sma ben taki dati a ben de? Den taigi en san furu fu den sma ben denki: „Wan tu fu den e taki dati yu na Yohanes a Dopuman, trawan e taki yu na Elia, ma trawan de tu di e taki yu na Yeremia noso wan fu den profeiti” (Mateus 16:13, 14). Den no ben taki fu den takru sani di den sma na ini Palestina ben e taki fu Yesus na a ten dati. Den sma drape ben e taki dati Yesus ben e afrontu Gado, a ben de wan bedrigiman, wan falsi profeiti, srefi wan lawman.

 Sma Abi Furu Difrenti Denki fu Yesus

Efu Yesus ben o aksi sma na ini a ten disi a srefi aksi dati, dan kande a ben o poti na aksi na a fasi disi: „Suma den sabiman e taki dati mi de?” Kande sma ben o piki en na a srefi fasi disi baka: Den abi someni difrenti denki fu a tori disi. Soleki fa David Tracy fu na Universiteit fu Chicago ben taki, dan difrenti sma abi furu difrenti denki fu Yesus èn den e fuklari den sani di a ben taki èn ben du, na furu difrenti fasi. Na ini den wán hondro yari di pasa, sabiman du bun furu muiti fu kon sabi suma Yesus ben de trutru. Den ondrosuku a libimakandra nanga a kulturu di Yesus ben libi na ini, èn den studeri buku nanga tra sani di ben skrifi fu en. Leki bakapisi fu dati, sortu denki den abi fu Yesus?

Wan tu sabiman e tan nanga a denki taki a Yesus fu fositen ben de wan Dyu profeiti di ben e fruteri sma fu den lasti dei èn a ben e gi den deki-ati fu abi berow. Ma den no e kari en Manpikin fu Gado, Mesias, nanga Frulusuman. Furu fu den sabiman no e bribi taki Yesus e komoto fu hemel èn taki a kisi wan opobaka soleki fa Bijbel e taki dati. Trawan fu den ben e si Yesus nomo leki wan man di ben abi so furu krakti tapu sma nanga yepi fu en libi èn den leri fu en. Leki bakapisi fu dati, difrenti bribi opo kon èn te fu kaba ala den bribi disi tron Krestenhèit. Èn soleki fa a skrifi na ini a tijdschrift Theology Today, tra sma de tu di e si Yesus leki „wan man di noiti e si a bun sei fu sani, noso leki wan koniman di ben e go fu a wan presi na a trawan, noso leki wan gronman di ben e bribi na ini dangra tori. Den e si en so srefi leki wan man di ben tyari sma na ini a libimakandra kon na wan, noso leki wan puwema skrifiman di ben tyari ensrefi heri tra fasi leki fa sma ben gwenti èn di ben e krutu a libimakandra, noso leki wan man di ben sabi fa fu tyari ensrefi na ini den pôti bakabirti fu Palestina. Soleki fa sma e taki, dan a ben e gi ogri-ati sma deki-ati fu meki opruru, so taki lanti ben kan sroto den.”

Sma abi moro frekti idea fu Yesus. Rap poku, koni wroko di de fu si na ini foto, èn srefi dansi, e prenki Yesus leki wan blakaman. * Tra sma e taki dati, te yu e luku en bun, dan Yesus ben de wan umasma. Na ini a zomer fu 1993, sma di ben go na a Orange County Fair na ini California ben si wan stonpopki di nen „Christie”. A ben de wan umasma nanga sososkin di ben prenki „Krestes” na a kroisi. Pikinmoro na a srefi ten dati na ini New York sma ben kan si wan stonpopki di nen „Christa”. Dati ben de wan umasma di ben prenki „Yesus” di ben spikri na wan kroisi. Sma ben abi furu difrenti sani fu taki fu den tu stonpopki disi. Èn na a bigin fu 1999, sma di ben e bai sani na ini wenkri, ben kan si wan buku „di ben handri fu a lobi [di] a Boi Yesus nanga en dagu, Engel, abi gi makandra”. A buku e taki dati a matifasi fu den e „naki sma ati èn a e sori fa a boi nanga a dagu de klariklari fu dede gi makandra”.

A De Prenspari Trutru fu Sabi Suma Yesus Ben De?

Fu san ede a bun fu sabi suma Yesus ben de fosi èn suma a de now? Fu di, soleki fa Napoleon ben taki: „Yesus Krestes abi krakti tapu den bakaman fu en èn a komanderi den sondro taki ensrefi ben de drape.” Den krakti leri fu Yesus èn a fasi fa a ben e libi akruderi den leri disi, abi bigi krakti tapu a libi fu milyunmilyun sma pikinmoro tu dusun yari langa kaba. Wan skrifiman ben taki nanga leti: „Te yu e poti ala den legre kon na makandra di oiti opo go feti, nanga ala den fetisipi di oiti ben meki, nanga ala den edeman fu lanti di oiti ben sidon, nanga ala den kownu di oiti ben tiri, dan nowan fu den abi so wan bigi krakti tapu a libi fu sma na a grontapu disi.”

Boiti dati, yu musu sabi suma Yesus ben de fosi èn suma a de now, bika a sa abi krakti tapu a libi fu yu. Yu abi na okasi fu tron wan borgu fu wan tirimakti di seti na hemel, èn dati na a Kownukondre fu Gado na ondro a makti fu Yesus. Na ondro a tiri fu Yesus, grontapu fu wi di lai nanga problema sa seti kon bun baka. Leki bakapisi fu dati, sani sa waka bun nanga a grontapu srefi èn nanga ala libisani di de na en tapu. Bijbel profeititori e gi wi a dyaranti taki a Kownukondre fu Yesus sa gi nyanyan na den wan di e angri, a sa sorgu den pôtiwan, a sa dresi den sikiwan, èn a sa gi den dedewan wan opobaka.

A no de fu taki dati yu wani sabi suma na a sma di de tiriman fu a tirimakti disi di grontapu abi so tranga fanowdu. Na artikel di e kon now sa yepi yu fu kon sabi moro fini suma Yesus ben de trutru.

[Futuwortu]