Yu E Memre Disi Ete?

Yu nyan bun fu den nyun Waktitoren di ben kon na doro? We, luku efu yu kan gi wan piki tapu den aksi di e kon now:

• San A Federale Hooggerechtshof (wan hei krutubangi) fu Doisrikondre ben du fu yepi Yehovah Kotoigi fu wini wan tumusi prenspari krutu afersi di abi fu du nanga kerki tori?

A krutubangi dati ben kenki wan bosroiti di wan tra krutubangi ben teki teige Yehovah Kotoigi èn a erken di a kondre musu erken den leki wan kerki organisâsi di e wroko gi a bun fu sma. A krutubosroiti disi ben de taki sma abi a fri fu anbegi na a fasi fa den wani èn taki fu dati ede wan sma ben sa kan ’hori ensrefi na den gronprakseri fu en bribi’ moro leki na a wet fu Lanti.—15/8, bladzijde 8.

• O langa Yob nyan pina?

A buku Yob no e taki dati a ben nyan pina furu yari langa. A kan taki a heri pisi ten di Yob nyan pina nanga a bakapisi fu dati, pasa na ini wan tu mun nomo, kande a no doro wán yari srefi.—15/8, bladzijde 31.

• Fu san ede wi kan de seiker taki Didibri a no wan kruktubribi nomo, ma taki a de wan trutru sma?

Yesus Krestes ben sabi taki Didibri ben de trutru. Yesus ben kisi tesi fu wan trutru sma. A no de so taki Yesus ben abi wan takru eigifasi na ini en di ben tesi en (Mateus 4:1-11; Yohanes 8:44; 14:30).—1/9, bladzijde 5, 6.

• Odo 10:15 e taki: „Den warti sani fu wan guduman na en tranga foto. A pori fu den pôtiwan na a pôtifasi fu den.” Fa wi du sabi taki disi na wan tru sani?

Gudu kan meki taki wi no abi fu broko wi ede nanga wan tu sani fu a libi, neleki fa wan tranga foto e gi den sma di e libi na ini en, pikinso seikerfasi. Na a tra sei, pôtifasi kan tyari pori kon te sani e pasa di wi no ben fruwakti.—15/9, bladzijde 24.

• Na sortu fasi sma ben bigin „kari a nen fu Yehovah” na ini a ten fu Enos? (Genesis 4:26)

Sma ben gebroiki a nen fu Gado sensi a bigin fu a historia fu a libisma famiri. Fu dati ede, a kari di sma ben kari a nen fu Yehovah na ini a ten fu Enos, no ben abi fu du nanga bribi na ini Yehovah. A kan taki na wan godelowsu fasi sma ben gebroiki Yehovah nen gi densrefi noso gi trawan, èn kande den ben e du neleki den ben e anbegi Gado nanga yepi fu den sma disi.—15/9, bladzijde 29.

• San a wortu „trangaleri” wani taki na ini Bijbel?

A wortu no wani taki dati na wan noso tra fasi sma e meshandri trawan, noso taki den e du tra sma ogri (Odo 4:13; 22:15). A Griki wortu gi „trangaleri” abi fu du nanga a gi di wan sma e gi rai, leri nanga piri-ai, èn son leisi a abi fu du tu nanga a strafu di wan sma e kisi na wan lobi-ati fasi fu di a e frudini dati. Wan prenspari fasi fa papa nanga mama kan waka baka na eksempre fu Yehovah, na te den e taki nanga den pikin fu den èn e gi den pikin so srefi na okasi fu taki (Hebrewsma 12:7-10).—1/10, bladzijde 8, 10.

• Fa tru Kresten na ini a ten disi e sori taki den wani taki Gado musu tiri grontapu?

Te Yehovah Kotoigi e taki fu Gado Kownukondre, dan den no e moksi densrefi nanga politiek noso den no e seti sani fu opo densrefi teige grontapu tirimakti. Srefi na ini kondre pe den tapu a wroko fu den, den Kotoigi no e opo densrefi teige tirimakti (Titus 3:1). Den e pruberi fu yepi sma na wan fasi di e tyari wini kon, na a srefi fasi leki fa Yesus nanga en fosi yarihondro disipel ben du dati. Den e leri sma fu libi akruderi den bun Bijbel leri, soleki eerlijkfasi, èn den markitiki fu tyari densrefi na wan krin fasi ini tori fu bun gwenti nanga gronprakseri. Den e leri sma so srefi fa fu abi bun gwenti na ini wroko afersi.—15/10, bladzijde 6.

• Na sortu fasi libiwatra e lon na tapu den Andesbergi?

Yehovah Kotoigi di de drape e du muiti fu tyari Bijbel waarheid gi den sma, srefi na ini den tu tongo di den e taki drape, Quechuatongo noso Aimaratongo. Den Kotoigi e go na den sma tu di e libi na tapu den tabiki di de na ini a Titikakameer. Den e go so srefi na den tabiki di e „drifi” leki wan pondo; tabiki di meki fu wan sortu ken di e gro na ini a Titikakameer.—15/10, bladzijde 8-10.

• San Gado gi wi fu tiri wi na ini a libi, di yu kan teki gersi nanga den computer di den opolani abi di e yepi sma fu sabi pe den musu frei te den de na loktu?

Gado gi wi wan konsensi fu sori wi fa wi musu tyari wisrefi na ini a libi, nanga den yoisti markitiki di e sori wi san bun èn san ogri. Disi na wan sani di wi e gebore nanga dati (Romesma 2:14, 15).—1/11, bladzijde 3, 4.

• San meki a dede fu Yesus abi so furu waarde?

Di a volmaakti man Adam ben sondu, dan a no lasi a libi di Gado ben gi en gi ensrefi wawan, ma so srefi gi den bakapikin fu en (Romesma 5:12). Yesus ben gi a volmaakti libi fu en leki wan srakti-ofrandi. Na so fasi a ben gi wan lusu-paiman san meki taki getrow sma kan kisi têgo libi.—15/11, bladzijde 5, 6.

• Suma ben de den Skitsma di Kolosesma 3:11 e taki fu den?

Den Skitsma ben de wan pipel di ben e froisi fu a wan tanpresi go na a trawan. Fu 700 te go miti 300 b.G.T. den ben de basi fu den opo presi na ini Europa nanga Asia. Den ben de bun asi-tyariman èn bun fetiman. Kande Kolosesma 3:11 no ben e sori go na wan spesrutu nâsi, ma na den moro ogri-ati pipel di no e libi akruderi wet nanga gronprakseri.—15/11, bladzijde 24, 25.

• Fu san ede wi musu hori wisrefi na a gronprakseri, libi nanga trawan soleki fa yu wani taki den musu libi nanga yu?

A Dyu bribi, a Buda bribi, a Griki filosofia nanga a bribi fu Confucius, den alamala e taki fu a gronprakseri disi. Ma san Yesus ben sori na ini a Bergitaki na taki wan sma musu du bun sani, èn dati abi krakti tapu a libi fu sma na ala sei, awansi den yongu noso owru (Mateus 7:12).—1/12, bladzijde 3.